Utshovঅধ্যায় 183
183.1
ভৃগুরুবাচ
সত্যং ব্রহ্ম তপঃ সত্যং সত্যং সৃজতি চ প্রজাঃ
সত্যেন ধার্যতে লোকঃ স্বর্গং সত্যেন গচ্ছতি
183.2
অনৃতং তমসো রূপং তমসা নীয়তে হ্যধঃ
তমোগ্রস্তা ন পশ্যন্তি প্রকাশং তমসাবৃতম্
183.3
স্বর্গঃ প্রকাশ ইত্যাহুর্নরকং তম এব চ
সত্যানৃতাত্তদুভয়ং প্রাপ্যতে জগতীচরৈঃ
183.4
তত্র ত্বেবংবিধা বৃত্তির্লোকে সত্যানৃতা ভবেৎ
ধর্মাধর্মৌ প্রকাশশ্চ তমো দুঃখং সুখং তথা
183.5
তত্র যত্সত্যং স ধর্মো যো ধর্মঃ স প্রকাশো যঃ প্রকাশস্তত্সুখমিতি
তত্র যদনৃতং সোঽধর্মো যোঽধর্মস্তত্তমো যত্তমস্তদ্দুঃখমিতি
183.6
অত্রোচ্যতে
শারীরৈর্মানসৈর্দুঃখৈঃ সুখৈশ্চাপ্যসুখোদয়ৈঃ
লোকসৃষ্টিং প্রপশ্যন্তো ন মুহ্যন্তি বিচক্ষণাঃ
183.7
তত্র দুঃখবিমোক্ষার্থং প্রয়তেত বিচক্ষণঃ
সুখং হ্যনিত্যং ভূতানামিহ লোকে পরত্র চ
183.8
রাহুগ্রস্তস্য সোমস্য যথা জ্যোত্স্না ন ভাসতে
তথা তমোভিভূতানাং ভূতানাং ভ্রশ্যতে সুখম্
183.9
তত্খলু দ্বিবিধং সুখমুচ্যতে শারীরং মানসং চ
ইহ খল্বমুষ্মিংশ্চ লোকে সর্বারম্ভপ্রবৃত্তয়ঃ সুখার্থা অভিধীয়ন্তে
ন হ্যতস্ত্রিবর্গফলং বিশিষ্টতরমস্তি
স এষ কাম্যো গুণবিশেষো ধর্মার্থয়োরারম্ভস্তদ্ধেতুরস্যোত্পত্তিঃ সুখপ্রয়োজনা
183.10
ভরদ্বাজ উবাচ
যদেতদ্ভবতাভিহিতং সুখানাং পরমাঃ স্ত্রিয় ইতি তন্ন গৃহ্ণীমঃ
ন হ্যেষামৃষীণাং মহতি স্থিতানামপ্রাপ্য এষ গুণবিশেষো ন চৈনমভিলষন্তি
শ্রূয়তে চ ভগবাংস্ত্রিলোককৃদ্ব্রহ্মা প্রভুরেকাকী তিষ্ঠতি
ব্রহ্মচারী ন কামসুখেষ্বাত্মানমবদধাতি
অপি চ ভগবান্বিশ্বেশ্বর উমাপতিঃ কামমভিবর্তমানমনঙ্গত্বেন শমমনয়ৎ
তস্মাদ্ব্রূমো ন মহাত্মভিরয়ং প্রতিগৃহীতো ন ত্বেষ তাবদ্বিশিষ্টো গুণ ইতি নৈতদ্ভগবতঃ প্রত্যেমি
ভগবতা তূক্তং সুখানাং পরমাঃ স্ত্রিয় ইতি
লোকপ্রবাদোঽপি চ ভবতি দ্বিবিধঃ ফলোদয়ঃ সুকৃতাত্সুখমবাপ্যতে দুষ্কৃতাদ্দুঃখমিতি
অত্রোচ্যতাম্
183.11
ভৃগুরুবাচ
অনৃতাত্খলু তমঃ প্রাদুর্ভূতং তমোগ্রস্তা অধর্মমেবানুবর্তন্তে ন ধর্মম্
ক্রোধলোভমোহমানানৃতাদিভিরবচ্ছন্না ন খল্বস্মিঁল্লোকে ন চামুত্র সুখমাপ্নুবন্তি
বিবিধব্যাধিগণোপতাপৈরবকীর্যন্তে
বধবন্ধরোগপরিক্লেশাদিভিশ্চ ক্ষুত্পিপাসাশ্রমকৃতৈরুপতাপৈরুপতপ্যন্তে
চণ্ডবাতাত্যুষ্ণাতিশীতকৃতৈশ্চ প্রতিভয়ৈঃ শারীরৈর্দুঃখৈরুপতপ্যন্তে
বন্ধুধনবিনাশবিপ্রয়োগকৃতৈশ্চ মানসৈঃ শোকৈরভিভূয়ন্তে জরামৃত্যুকৃতৈশ্চান্যৈরিতি
183.12
যস্ত্বেতৈঃ শারীরৈর্মানসৈর্দুঃখৈর্ন স্পৃশ্যতে স সুখং বেদ
ন চৈতে দোষাঃ স্বর্গে প্রাদুর্ভবন্তি
তত্র ভবতি খলু
183.13
সুসুখঃ পবনঃ স্বর্গে গন্ধশ্চ সুরভিস্তথা
ক্ষুত্পিপাসাশ্রমো নাস্তি ন জরা ন চ পাপকম্
183.14
নিত্যমেব সুখং স্বর্গে সুখং দুঃখমিহোভয়ম্
নরকে দুঃখমেবাহুঃ সমং তু পরমং পদম্
183.15
পৃথিবী সর্বভূতানাং জনিত্রী তদ্বিধাঃ স্ত্রিয়ঃ
পুমান্প্রজাপতিস্তত্র শুক্রং তেজোময়ং বিদুঃ
183.16
ইত্যেতল্লোকনির্মাণং ব্রহ্মণা বিহিতং পুরা
প্রজা বিপরিবর্তন্তে স্বৈঃ স্বৈঃ কর্মভিরাবৃতাঃ