অধ্যায় 182

182.1

ভরদ্বাজ উবাচ
ব্রাহ্মণঃ কেন ভবতি ক্ষত্রিয়ো বা দ্বিজোত্তম
বৈশ্যঃ শূদ্রশ্চ বিপ্রর্ষে তদ্ব্রূহি বদতাং বর

ভৃগুরুবাচ
জাতকর্মাদিভির্যস্তু সংস্কারৈঃ সংস্কৃতঃ শুচিঃ
বেদাধ্যয়নসংপন্নঃ ষট্সু কর্মস্ববস্থিতঃ

শৌচাচারস্থিতঃ সম্যগ্বিঘসাশী গুরুপ্রিয়ঃ
নিত্যব্রতী সত্যপরঃ স বৈ ব্রাহ্মণ উচ্যতে

সত্যং দানং দমোঽদ্রোহ আনৃশংস্যং ক্ষমা ঘৃণা
তপশ্চ দৃশ্যতে যত্র স ব্রাহ্মণ ইতি স্মৃতঃ

ক্ষত্রজং সেবতে কর্ম বেদাধ্যয়নসংমতঃ
দানাদানরতির্যশ্চ স বৈ ক্ষত্রিয় উচ্যতে

কৃষিগোরক্ষ্যবাণিজ্যং যো বিশত্যনিশং শুচিঃ
বেদাধ্যয়নসংপন্নঃ স বৈশ্য ইতি সংজ্ঞিতঃ

সর্বভক্ষরতির্নিত্যং সর্বকর্মকরোঽশুচিঃ
ত্যক্তবেদস্ত্বনাচারঃ স বৈ শূদ্র ইতি স্মৃতঃ

শূদ্রে চৈতদ্ভবেল্লক্ষ্যং দ্বিজে চৈতন্ন বিদ্যতে
ন বৈ শূদ্রো ভবেচ্ছূদ্রো ব্রাহ্মণো ন চ ব্রাহ্মণঃ

সর্বোপায়ৈস্তু লোভস্য ক্রোধস্য চ বিনিগ্রহঃ
এতত্পবিত্রং জ্ঞাতব্যং তথা চৈবাত্মসংয়মঃ

নিত্যং ক্রোধাত্তপো রক্ষেচ্ছ্রিয়ং রক্ষেত মত্সরাৎ
বিদ্যাং মানাবমানাভ্যামাত্মানং তু প্রমাদতঃ

যস্য সর্বে সমারম্ভা নিরাশীর্বন্ধনাস্ত্বিহ
ত্যাগে যস্য হুতং সর্বং স ত্যাগী স চ বুদ্ধিমান্

অহিংস্রঃ সর্বভূতানাং মৈত্রায়ণগতশ্চরেৎ
অবিস্রম্ভে ন গন্তব্যং বিস্রম্ভে ধারয়েন্মনঃ

পরিগ্রহান্পরিত্যজ্য ভবেদ্বুদ্ধ্যা জিতেন্দ্রিয়ঃ
অশোকং স্থানমাতিষ্ঠেদিহ চামুত্র চাভয়ম্

তপোনিত্যেন দান্তেন মুনিনা সংয়তাত্মনা
অজিতং জেতুকামেন ভাব্যং সঙ্গেষ্বসঙ্গিনা

ইন্দ্রিয়ৈর্গৃহ্যতে যদ্যত্তত্তদ্ব্যক্তমিতি স্থিতিঃ
অব্যক্তমিতি বিজ্ঞেয়ং লিঙ্গগ্রাহ্যমতীন্দ্রিয়ম্

মনঃ প্রাণে নিগৃহ্ণীয়াত্প্রাণং ব্রহ্মণি ধারয়েৎ
নির্বাণাদেব নির্বাণো ন চ কিংচিদ্বিচিন্তয়েৎ
সুখং বৈ ব্রাহ্মণো ব্রহ্ম স বৈ তেনাধিগচ্ছতি

শৌচেন সততং যুক্তস্তথাচারসমন্বিতঃ
সানুক্রোশশ্চ ভূতেষু তদ্দ্বিজাতিষু লক্ষণম্