অধ্যায় 181

181.1

ভৃগুরুবাচ
অসৃজদ্ব্রাহ্মণানেব পূর্বং ব্রহ্মা প্রজাপতিঃ
আত্মতেজোভিনির্বৃত্তান্ভাস্করাগ্নিসমপ্রভান্

ততঃ সত্যং চ ধর্মং চ তপো ব্রহ্ম চ শাশ্বতম্
আচারং চৈব শৌচং চ স্বর্গায় বিদধে প্রভুঃ

দেবদানবগন্ধর্বদৈত্যাসুরমহোরগাঃ
যক্ষরাক্ষসনাগাশ্চ পিশাচা মনুজাস্তথা

ব্রাহ্মণাঃ ক্ষত্রিয়া বৈশ্যাঃ শূদ্রাশ্চ দ্বিজসত্তম
যে চান্যে ভূতসংঘানাং সংঘাস্তাংশ্চাপি নির্মমে

ব্রাহ্মণানাং সিতো বর্ণঃ ক্ষত্রিয়াণাং তু লোহিতঃ
বৈশ্যানাং পীতকো বর্ণঃ শূদ্রাণামসিতস্তথা

ভরদ্বাজ উবাচ
চাতুর্বর্ণ্যস্য বর্ণেন যদি বর্ণো বিভজ্যতে
সর্বেষাং খলু বর্ণানাং দৃশ্যতে বর্ণসংকরঃ

কামঃ ক্রোধো ভয়ং লোভঃ শোকশ্চিন্তা ক্ষুধা শ্রমঃ
সর্বেষাং নঃ প্রভবতি কস্মাদ্বর্ণো বিভজ্যতে

স্বেদমূত্রপুরীষাণি শ্লেষ্মা পিত্তং সশোণিতম্
তনুঃ ক্ষরতি সর্বেষাং কস্মাদ্বর্ণো বিভজ্যতে

জঙ্গমানামসংখ্যেয়াঃ স্থাবরাণাং চ জাতয়ঃ
তেষাং বিবিধবর্ণানাং কুতো বর্ণবিনিশ্চয়ঃ

ভৃগুরুবাচ
ন বিশেষোঽস্তি বর্ণানাং সর্বং ব্রাহ্মমিদং জগৎ
ব্রহ্মণা পূর্বসৃষ্টং হি কর্মভির্বর্ণতাং গতম্

কামভোগপ্রিয়াস্তীক্ষ্ণাঃ ক্রোধনাঃ প্রিয়সাহসাঃ
ত্যক্তস্বধর্মা রক্তাঙ্গাস্তে দ্বিজাঃ ক্ষত্রতাং গতাঃ

গোষু বৃত্তিং সমাধায় পীতাঃ কৃষ্যুপজীবিনঃ
স্বধর্মং নানুতিষ্ঠন্তি তে দ্বিজা বৈশ্যতাং গতাঃ

হিংসানৃতপ্রিয়া লুব্ধাঃ সর্বকর্মোপজীবিনঃ
কৃষ্ণাঃ শৌচপরিভ্রষ্টাস্তে দ্বিজাঃ শূদ্রতাং গতাঃ

ইত্যেতৈঃ কর্মভির্ব্যস্তা দ্বিজা বর্ণান্তরং গতাঃ
ধর্মো যজ্ঞক্রিয়া চৈষাং নিত্যং ন প্রতিষিধ্যতে

বর্ণাশ্চত্বার এতে হি যেষাং ব্রাহ্মী সরস্বতী
বিহিতা ব্রহ্মণা পূর্বং লোভাত্ত্বজ্ঞানতাং গতাঃ

ব্রাহ্মণা ধর্মতন্ত্রস্থাস্তপস্তেষাং ন নশ্যতি
ব্রহ্ম ধারয়তাং নিত্যং ব্রতানি নিয়মাংস্তথা

ব্রহ্ম চৈতত্পুরা সৃষ্টং যে ন জানন্ত্যতদ্বিদঃ
তেষাং বহুবিধাস্ত্বন্যাস্তত্র তত্র হি জাতয়ঃ

পিশাচা রাক্ষসাঃ প্রেতা বহুধা ম্লেচ্ছজাতয়ঃ
প্রনষ্টজ্ঞানবিজ্ঞানাঃ স্বচ্ছন্দাচারচেষ্টিতাঃ

প্রজা ব্রাহ্মণসংস্কারাঃ স্বধর্মকৃতনিশ্চয়াঃ
ঋষিভিঃ স্বেন তপসা সৃজ্যন্তে চাপরে পরৈঃ

আদিদেবসমুদ্ভূতা ব্রহ্মমূলাক্ষয়াব্যয়া
সা সৃষ্টির্মানসী নাম ধর্মতন্ত্রপরায়ণা