Utshovঅধ্যায় 180
180.1
ভৃগুরুবাচ
ন প্রণাশোঽস্তি জীবানাং দত্তস্য চ কৃতস্য চ
যাতি দেহান্তরং প্রাণী শরীরং তু বিশীর্যতে
180.2
ন শরীরাশ্রিতো জীবস্তস্মিন্নষ্টে প্রণশ্যতি
যথা সমিত্সু দগ্ধাসু ন প্রণশ্যতি পাবকঃ
180.3
ভরদ্বাজ উবাচ
অগ্নের্যথা তথা তস্য যদি নাশো ন বিদ্যতে
ইন্ধনস্যোপয়োগান্তে স চাগ্নির্নোপলভ্যতে
180.4
নশ্যতীত্যেব জানামি শান্তমগ্নিমনিন্ধনম্
গতির্যস্য প্রমাণং বা সংস্থানং বা ন দৃশ্যতে
180.5
ভৃগুরুবাচ
সমিধামুপয়োগান্তে সন্নেবাগ্নির্ন দৃশ্যতে
আকাশানুগতত্বাদ্ধি দুর্গ্রহঃ স নিরাশ্রয়ঃ
180.6
তথা শরীরসংত্যাগে জীবো হ্যাকাশবত্স্থিতঃ
ন গৃহ্যতে সুসূক্ষ্মত্বাদ্যথা জ্যোতির্ন সংশয়ঃ
180.7
প্রাণান্ধারয়তে হ্যগ্নিঃ স জীব উপধার্যতাম্
বায়ুসংধারণো হ্যগ্নির্নশ্যত্যুচ্ছ্বাসনিগ্রহাৎ
180.8
তস্মিন্নষ্টে শরীরাগ্নৌ শরীরং তদচেতনম্
পতিতং যাতি ভূমিত্বময়নং তস্য হি ক্ষিতিঃ
180.9
জঙ্গমানাং হি সর্বেষাং স্থাবরাণাং তথৈব চ
আকাশং পবনোঽভ্যেতি জ্যোতিস্তমনুগচ্ছতি
তত্র ত্রয়াণামেকত্বং দ্বয়ং ভূমৌ প্রতিষ্ঠিতম্
180.10
যত্র খং তত্র পবনস্তত্রাগ্নির্যত্র মারুতঃ
অমূর্তয়স্তে বিজ্ঞেয়া আপো মূর্তাস্তথা ক্ষিতিঃ
180.11
ভরদ্বাজ উবাচ
যদ্যগ্নিমারুতৌ ভূমিঃ খমাপশ্চ শরীরিষু
জীবঃ কিংলক্ষণস্তত্রেত্যেতদাচক্ষ্ব মেঽনঘ
180.12
পঞ্চাত্মকে পঞ্চরতৌ পঞ্চবিজ্ঞানসংয়ুতে
শরীরে প্রাণিনাং জীবং জ্ঞাতুমিচ্ছামি যাদৃশম্
180.13
মাংসশোণিতসংঘাতে মেদঃস্নায্বস্থিসংচয়ে
ভিদ্যমানে শরীরে তু জীবো নৈবোপলভ্যতে
180.14
যদ্যজীবং শরীরং তু পঞ্চভূতসমন্বিতম্
শারীরে মানসে দুঃখে কস্তাং বেদয়তে রুজম্
180.15
শৃণোতি কথিতং জীবঃ কর্ণাভ্যাং ন শৃণোতি তৎ
মহর্ষে মনসি ব্যগ্রে তস্মাজ্জীবো নিরর্থকঃ
180.16
সর্বং পশ্যতি যদ্দৃশ্যং মনোয়ুক্তেন চক্ষুষা
মনসি ব্যাকুলে তদ্ধি পশ্যন্নপি ন পশ্যতি
180.17
ন পশ্যতি ন চ ব্রূতে ন শৃণোতি ন জিঘ্রতি
ন চ স্পর্শরসৌ বেত্তি নিদ্রাবশগতঃ পুনঃ
180.18
হৃষ্যতি ক্রুধ্যতি চ কঃ শোচত্যুদ্বিজতে চ কঃ
ইচ্ছতি ধ্যায়তি দ্বেষ্টি বাচমীরয়তে চ কঃ
180.19
ভৃগুরুবাচ
ন পঞ্চসাধারণমত্র কিংচি;চ্ছরীরমেকো বহতেঽন্তরাত্মা
স বেত্তি গন্ধাংশ্চ রসাঞ্শ্রুতিং চ; স্পর্শং চ রূপং চ গুণাশ্চ যেঽন্যে
180.20
পঞ্চাত্মকে পঞ্চগুণপ্রদর্শী; স সর্বগাত্রানুগতোঽন্তরাত্মা
স বেত্তি দুঃখানি সুখানি চাত্র; তদ্বিপ্রয়োগাত্তু ন বেত্তি দেহঃ
180.21
যদা ন রূপং ন স্পর্শো নোষ্মভাবশ্চ পাবকে
তদা শান্তে শরীরাগ্নৌ দেহং ত্যক্ত্বা স নশ্যতি
180.22
অম্ময়ং সর্বমেবেদমাপো মূর্তিঃ শরীরিণাম্
তত্রাত্মা মানসো ব্রহ্মা সর্বভূতেষু লোককৃৎ
180.23
আত্মানং তং বিজানীহি সর্বলোকহিতাত্মকম্
তস্মিন্যঃ সংশ্রিতো দেহে হ্যব্বিন্দুরিব পুষ্করে
180.24
ক্ষেত্রজ্ঞং তং বিজানীহি নিত্যং লোকহিতাত্মকম্
তমো রজশ্চ সত্ত্বং চ বিদ্ধি জীবগুণানিমান্
180.25
সচেতনং জীবগুণং বদন্তি; স চেষ্টতে চেষ্টয়তে চ সর্বম্
ততঃ পরং ক্ষেত্রবিদং বদন্তি; প্রাবর্তয়দ্যো ভুবনানি সপ্ত
180.26
ন জীবনাশোঽস্তি হি দেহভেদে; মিথ্যৈতদাহুর্মৃত ইত্যবুদ্ধাঃ
জীবস্তু দেহান্তরিতঃ প্রয়াতি; দশার্ধতৈবাস্য শরীরভেদঃ
180.27
এবং সর্বেষু ভূতেষু গূঢশ্চরতি সংবৃতঃ
দৃশ্যতে ত্বগ্র্যয়া বুদ্ধ্যা সূক্ষ্ময়া তত্ত্বদর্শিভিঃ
180.28
তং পূর্বাপররাত্রেষু যুঞ্জানঃ সততং বুধঃ
লঘ্বাহারো বিশুদ্ধাত্মা পশ্যত্যাত্মানমাত্মনি
180.29
চিত্তস্য হি প্রসাদেন হিত্বা কর্ম শুভাশুভম্
প্রসন্নাত্মাত্মনি স্থিত্বা সুখমক্ষয়মশ্নুতে
180.30
মানসোঽগ্নিঃ শরীরেষু জীব ইত্যভিধীয়তে
সৃষ্টিঃ প্রজাপতেরেষা ভূতাধ্যাত্মবিনিশ্চয়ে