অধ্যায় 179

179.1

ভরদ্বাজ উবাচ
যদি প্রাণায়তে বায়ুর্বায়ুরেব বিচেষ্টতে
শ্বসিত্যাভাষতে চৈব তস্মাজ্জীবো নিরর্থকঃ

যদ্যূষ্মভাব আগ্নেয়ো বহ্নিনা পচ্যতে যদি
অগ্নির্জরয়তে চৈব তস্মাজ্জীবো নিরর্থকঃ

জন্তোঃ প্রমীয়মাণস্য জীবো নৈবোপলভ্যতে
বায়ুরেব জহাত্যেনমূষ্মভাবশ্চ নশ্যতি

যদি বাতোপমো জীবঃ সংশ্লেষো যদি বায়ুনা
বায়ুমণ্ডলবদ্দৃশ্যো গচ্ছেত্সহ মরুদ্গণৈঃ

শ্লেষো যদি চ বাতেন যদি তস্মাত্প্রণশ্যতি
মহার্ণববিমুক্তত্বাদন্যত্সলিলভাজনম্

কূপে বা সলিলং দদ্যাত্প্রদীপং বা হুতাশনে
প্রক্ষিপ্তং নশ্যতি ক্ষিপ্রং যথা নশ্যত্যসৌ তথা

পঞ্চসাধারণে হ্যস্মিঞ্শরীরে জীবিতং কুতঃ
যেষামন্যতরত্যাগাচ্চতুর্ণাং নাস্তি সংগ্রহঃ

নশ্যন্ত্যাপো হ্যনাহারাদ্বায়ুরুচ্ছ্বাসনিগ্রহাৎ
নশ্যতে কোষ্ঠভেদাত্খমগ্নির্নশ্যত্যভোজনাৎ

ব্যাধিব্রণপরিক্লেশৈর্মেদিনী চৈব শীর্যতে
পীডিতেঽন্যতরে হ্যেষাং সংঘাতো যাতি পঞ্চধা

তস্মিন্পঞ্চত্বমাপন্নে জীবঃ কিমনুধাবতি
কিং বেদয়তি বা জীবঃ কিং শৃণোতি ব্রবীতি বা

এষা গৌঃ পরলোকস্থং তারয়িষ্যতি মামিতি
যো দত্ত্বা ম্রিয়তে জন্তুঃ সা গৌঃ কং তারয়িষ্যতি

গৌশ্চ প্রতিগ্রহীতা চ দাতা চৈব সমং যদা
ইহৈব বিলয়ং যান্তি কুতস্তেষাং সমাগমঃ

বিহগৈরুপয়ুক্তস্য শৈলাগ্রাত্পতিতস্য বা
অগ্নিনা চোপয়ুক্তস্য কুতঃ সংজীবনং পুনঃ

ছিন্নস্য যদি বৃক্ষস্য ন মূলং প্রতিরোহতি
বীজান্যস্য প্রবর্তন্তে মৃতঃ ক্ব পুনরেষ্যতি

বীজমাত্রং পুরা সৃষ্টং যদেতত্পরিবর্ততে
মৃতা মৃতাঃ প্রণশ্যন্তি বীজাদ্বীজং প্রবর্ততে