অধ্যায় 178

178.1

ভরদ্বাজ উবাচ
পার্থিবং ধাতুমাশ্রিত্য শারীরোঽগ্নিঃ কথং ভবেৎ
অবকাশবিশেষেণ কথং বর্তয়তেঽনিলঃ

ভৃগুরুবাচ
বায়োর্গতিমহং ব্রহ্মন্কীর্তয়িষ্যামি তেঽনঘ
প্রাণিনামনিলো দেহান্যথা চেষ্টয়তে বলী

শ্রিতো মূর্ধানমগ্নিস্তু শরীরং পরিপালয়ন্
প্রাণো মূর্ধনি চাগ্নৌ চ বর্তমানো বিচেষ্টতে

স জন্তুঃ সর্বভূতাত্মা পুরুষঃ স সনাতনঃ
মনো বুদ্ধিরহংকারো ভূতানি বিষয়াশ্চ সঃ

এবং ত্বিহ স সর্বত্র প্রাণেন পরিপাল্যতে
পৃষ্ঠতশ্চ সমানেন স্বাং স্বাং গতিমুপাশ্রিতঃ

বস্তিমূলং গুদং চৈব পাবকং চ সমাশ্রিতঃ
বহন্মূত্রং পুরীষং চাপ্যপানঃ পরিবর্ততে

প্রয়ত্নে কর্মণি বলে য একস্ত্রিষু বর্ততে
উদান ইতি তং প্রাহুরধ্যাত্মবিদুষো জনাঃ

সংধিষ্বপি চ সর্বেষু সংনিবিষ্টস্তথানিলঃ
শরীরেষু মনুষ্যাণাং ব্যান ইত্যুপদিশ্যতে

ধাতুষ্বগ্নিস্তু বিততঃ সমানেন সমীরিতঃ
রসান্ধাতূংশ্চ দোষাংশ্চ বর্তয়ন্নবতিষ্ঠতি

অপানপ্রাণয়োর্মধ্যে প্রাণাপানসমাহিতঃ
সমন্বিতঃ স্বধিষ্ঠানঃ সম্যক্পচতি পাবকঃ

আস্যং হি পায়ুসংয়ুক্তমন্তে স্যাদ্গুদসংজ্ঞিতম্
স্রোতস্তস্মাত্প্রজায়ন্তে সর্বস্রোতাংসি দেহিনাম্

প্রাণানাং সংনিপাতাচ্চ সংনিপাতঃ প্রজায়তে
ঊষ্মা চাগ্নিরিতি জ্ঞেয়ো যোঽন্নং পচতি দেহিনাম্

অগ্নিবেগবহঃ প্রাণো গুদান্তে প্রতিহন্যতে
স ঊর্ধ্বমাগম্য পুনঃ সমুত্ক্ষিপতি পাবকম্

পক্বাশয়স্ত্বধো নাভেরূর্ধ্বমামাশয়ঃ স্থিতঃ
নাভিমধ্যে শরীরস্য সর্বে প্রাণাঃ সমাহিতাঃ

প্রসৃতা হৃদয়াত্সর্বে তির্যগূর্ধ্বমধস্তথা
বহন্ত্যন্নরসান্নাড্যো দশ প্রাণপ্রচোদিতাঃ

এষ মার্গোঽথ যোগানাং যেন গচ্ছন্তি তত্পদম্
জিতক্লমাসনা ধীরা মূর্ধন্যাত্মানমাদধুঃ

এবং সর্বেষু বিহিতঃ প্রাণাপানেষু দেহিনাম্
তস্মিন্স্থিতো নিত্যমগ্নিঃ স্থাল্যামিব সমাহিতঃ