Utshovঅধ্যায় 177
177.1
ভরদ্বাজ উবাচ
এতে তে ধাতবঃ পঞ্চ ব্রহ্মা যানসৃজত্পুরা
আবৃতা যৈরিমে লোকা মহাভূতাভিসংজ্ঞিতৈঃ
177.2
যদাসৃজত্সহস্রাণি ভূতানাং স মহামতিঃ
পঞ্চানামেব ভূতত্বং কথং সমুপপদ্যতে
177.3
ভৃগুরুবাচ
অমিতানাং মহাশব্দো যান্তি ভূতানি সংভবম্
ততস্তেষাং মহাভূতশব্দোঽয়মুপপদ্যতে
177.4
চেষ্টা বায়ুঃ খমাকাশমূষ্মাগ্নিঃ সলিলং দ্রবঃ
পৃথিবী চাত্র সংঘাতঃ শরীরং পাঞ্চভৌতিকম্
177.5
ইত্যেতৈঃ পঞ্চভির্ভূতৈর্যুক্তং স্থাবরজঙ্গমম্
শ্রোত্রং ঘ্রাণং রসঃ স্পর্শো দৃষ্টিশ্চেন্দ্রিয়সংজ্ঞিতাঃ
177.6
ভরদ্বাজ উবাচ
পঞ্চভির্যদি ভূতৈস্তু যুক্তাঃ স্থাবরজঙ্গমাঃ
স্থাবরাণাং ন দৃশ্যন্তে শরীরে পঞ্চ ধাতবঃ
177.7
অনূষ্মণামচেষ্টানাং ঘনানাং চৈব তত্ত্বতঃ
বৃক্ষাণাং নোপলভ্যন্তে শরীরে পঞ্চ ধাতবঃ
177.8
ন শৃণ্বন্তি ন পশ্যন্তি ন গন্ধরসবেদিনঃ
ন চ স্পর্শং বিজানন্তি তে কথং পাঞ্চভৌতিকাঃ
177.9
অদ্রবত্বাদনগ্নিত্বাদভৌমত্বাদবায়ুতঃ
আকাশস্যাপ্রমেয়ত্বাদ্বৃক্ষাণাং নাস্তি ভৌতিকম্
177.10
ভৃগুরুবাচ
ঘনানামপি বৃক্ষাণামাকাশোঽস্তি ন সংশয়ঃ
তেষাং পুষ্পফলে ব্যক্তির্নিত্যং সমুপলভ্যতে
177.11
ঊষ্মতো গ্লানপর্ণানাং ত্বক্ফলং পুষ্পমেব চ
ম্লায়তে চৈব শীতে ন স্পর্শস্তেনাত্র বিদ্যতে
177.12
বায্বগ্ন্যশনিনিষ্পেষৈঃ ফলপুষ্পং বিশীর্যতে
শ্রোত্রেণ গৃহ্যতে শব্দস্তস্মাচ্ছৃণ্বন্তি পাদপাঃ
177.13
বল্লী বেষ্টয়তে বৃক্ষং সর্বতশ্চৈব গচ্ছতি
ন হ্যদৃষ্টেশ্চ মার্গোঽস্তি তস্মাত্পশ্যন্তি পাদপাঃ
177.14
পুণ্যাপুণ্যৈস্তথা গন্ধৈর্ধূপৈশ্চ বিবিধৈরপি
অরোগাঃ পুষ্পিতাঃ সন্তি তস্মাজ্জিঘ্রন্তি পাদপাঃ
177.15
পাদৈঃ সলিলপানং চ ব্যাধীনামপি দর্শনম্
ব্যাধিপ্রতিক্রিয়ত্বাচ্চ বিদ্যতে রসনং দ্রুমে
177.16
বক্ত্রেণোত্পলনালেন যথোর্ধ্বং জলমাদদেৎ
তথা পবনসংয়ুক্তঃ পাদৈঃ পিবতি পাদপঃ
177.17
গ্রহণাত্সুখদুঃখস্য ছিন্নস্য চ বিরোহণাৎ
জীবং পশ্যামি বৃক্ষাণামচৈতন্যং ন বিদ্যতে
177.18
তেন তজ্জলমাদত্তং জরয়ত্যগ্নিমারুতৌ
আহারপরিণামাচ্চ স্নেহো বৃদ্ধিশ্চ জায়তে
177.19
জঙ্গমানাং চ সর্বেষাং শরীরে পঞ্চ ধাতবঃ
প্রত্যেকশঃ প্রভিদ্যন্তে যৈঃ শরীরং বিচেষ্টতে
177.20
ত্বক্চ মাংসং তথাস্থীনি মজ্জা স্নায়ু চ পঞ্চমম্
ইত্যেতদিহ সংখ্যাতং শরীরে পৃথিবীময়ম্
177.21
তেজোঽগ্নিশ্চ তথা ক্রোধশ্চক্ষুরূষ্মা তথৈব চ
অগ্নির্জরয়তে চাপি পঞ্চাগ্নেয়াঃ শরীরিণঃ
177.22
শ্রোত্রং ঘ্রাণমথাস্যং চ হৃদয়ং কোষ্ঠমেব চ
আকাশাত্প্রাণিনামেতে শরীরে পঞ্চ ধাতবঃ
177.23
শ্লেষ্মা পিত্তমথ স্বেদো বসা শোণিতমেব চ
ইত্যাপঃ পঞ্চধা দেহে ভবন্তি প্রাণিনাং সদা
177.24
প্রাণাত্প্রণীয়তে প্রাণী ব্যানাদ্ব্যায়চ্ছতে তথা
গচ্ছত্যপানোঽবাক্চৈব সমানো হৃদ্যবস্থিতঃ
177.25
উদানাদুচ্ছ্বসিতি চ প্রতিভেদাচ্চ ভাষতে
ইত্যেতে বায়বঃ পঞ্চ চেষ্টয়ন্তীহ দেহিনম্
177.26
ভূমের্গন্ধগুণান্বেত্তি রসং চাদ্ভ্যঃ শরীরবান্
জ্যোতিঃ পশ্যতি চক্ষুর্ভ্যাং স্পর্শং বেত্তি চ বায়ুনা
177.27
তস্য গন্ধস্য বক্ষ্যামি বিস্তরাভিহিতান্গুণান্
ইষ্টশ্চানিষ্টগন্ধশ্চ মধুরঃ কটুরেব চ
177.28
নির্হারী সংহতঃ স্নিগ্ধো রূক্ষো বিশদ এব চ
এবং নববিধো জ্ঞেয়ঃ পার্থিবো গন্ধবিস্তরঃ
177.29
শব্দঃ স্পর্শশ্চ রূপং চ রসশ্চাপাং গুণাঃ স্মৃতাঃ
রসজ্ঞানং তু বক্ষ্যামি তন্মে নিগদতঃ শৃণু
177.30
রসো বহুবিধঃ প্রোক্তঃ সূরিভিঃ প্রথিতাত্মভিঃ
মধুরো লবণস্তিক্তঃ কষায়োঽম্লঃ কটুস্তথা
এষ ষড্বিধবিস্তারো রসো বারিময়ঃ স্মৃতঃ
177.31
শব্দঃ স্পর্শশ্চ রূপং চ ত্রিগুণং জ্যোতিরুচ্যতে
জ্যোতিঃ পশ্যতি রূপাণি রূপং চ বহুধা স্মৃতম্
177.32
হ্রস্বো দীর্ঘস্তথা স্থূলশ্চতুরস্রোঽণু বৃত্তবান্
শুক্লঃ কৃষ্ণস্তথা রক্তো নীলঃ পীতোঽরুণস্তথা
এবং দ্বাদশবিস্তারো জ্যোতীরূপগুণঃ স্মৃতঃ
177.33
শব্দস্পর্শৌ তু বিজ্ঞেয়ৌ দ্বিগুণো বায়ুরুচ্যতে
বায়ব্যস্তু গুণঃ স্পর্শঃ স্পর্শশ্চ বহুধা স্মৃতঃ
177.34
কঠিনশ্চিক্কণঃ শ্লক্ষ্ণঃ পিচ্ছলো মৃদুদারুণঃ
উষ্ণঃ শীতঃ সুখো দুঃখঃ স্নিগ্ধো বিশদ এব চ
এবং দ্বাদশবিস্তারো বায়ব্যো গুণ উচ্যতে
177.35
তত্রৈকগুণমাকাশং শব্দ ইত্যেব তত্স্মৃতম্
তস্য শব্দস্য বক্ষ্যামি বিস্তরং বিবিধাত্মকম্
177.36
ষড্জ ঋষভগান্ধারৌ মধ্যমঃ পঞ্চমস্তথা
ধৈবতশ্চাপি বিজ্ঞেয়স্তথা চাপি নিষাদকঃ
177.37
এষ সপ্তবিধঃ প্রোক্তো গুণ আকাশলক্ষণঃ
ত্রৈস্বর্যেণ তু সর্বত্র স্থিতোঽপি পটহাদিষু
177.38
আকাশজং শব্দমাহুরেভির্বায়ুগুণৈঃ সহ
অব্যাহতৈশ্চেতয়তে ন বেত্তি বিষমাগতৈঃ
177.39
আপ্যায়ন্তে চ তে নিত্যং ধাতবস্তৈস্তু ধাতুভিঃ
আপোঽগ্নির্মারুতশ্চৈব নিত্যং জাগ্রতি দেহিষু