অধ্যায় 176

176.1

ভরদ্বাজ উবাচ
প্রজাবিসর্গং বিবিধং কথং স সৃজতে প্রভুঃ
মেরুমধ্যে স্থিতো ব্রহ্মা তদ্ব্রূহি দ্বিজসত্তম

ভৃগুরুবাচ
প্রজাবিসর্গং বিবিধং মানসো মনসাসৃজৎ
সংধুক্ষণার্থং ভূতানাং সৃষ্টং প্রথমতো জলম্

যত্প্রাণাঃ সর্বভূতানাং বর্ধন্তে যেন চ প্রজাঃ
পরিত্যক্তাশ্চ নশ্যন্তি তেনেদং সর্বমাবৃতম্

পৃথিবী পর্বতা মেঘা মূর্তিমন্তশ্চ যে পরে
সর্বং তদ্বারুণং জ্ঞেয়মাপস্তস্তম্ভিরে পুনঃ

ভরদ্বাজ উবাচ
কথং সলিলমুত্পন্নং কথং চৈবাগ্নিমারুতৌ
কথং চ মেদিনী সৃষ্টেত্যত্র মে সংশয়ো মহান্

ভৃগুরুবাচ
ব্রহ্মকল্পে পুরা ব্রহ্মন্ব্রহ্মর্ষীণাং সমাগমে
লোকসংভবসংদেহঃ সমুত্পন্নো মহাত্মনাম্

তেঽতিষ্ঠন্ধ্যানমালম্ব্য মৌনমাস্থায় নিশ্চলাঃ
ত্যক্তাহারাঃ পবনপা দিব্যং বর্ষশতং দ্বিজাঃ

তেষাং ধর্মময়ী বাণী সর্বেষাং শ্রোত্রমাগমৎ
দিব্যা সরস্বতী তত্র সংবভূব নভস্তলাৎ

পুরা স্তিমিতনিঃশব্দমাকাশমচলোপমম্
নষ্টচন্দ্রার্কপবনং প্রসুপ্তমিব সংবভৌ

ততঃ সলিলমুত্পন্নং তমসীবাপরং তমঃ
তস্মাচ্চ সলিলোত্পীডাদুদতিষ্ঠত মারুতঃ

যথা ভাজনমচ্ছিদ্রং নিঃশব্দমিব লক্ষ্যতে
তচ্চাম্ভসা পূর্যমাণং সশব্দং কুরুতেঽনিলঃ

তথা সলিলসংরুদ্ধে নভসোঽন্তে নিরন্তরে
ভিত্ত্বার্ণবতলং বায়ুঃ সমুত্পততি ঘোষবান্

স এষ চরতে বায়ুরর্ণবোত্পীডসংভবঃ
আকাশস্থানমাসাদ্য প্রশান্তিং নাধিগচ্ছতি

তস্মিন্বায্বম্বুসংঘর্ষে দীপ্ততেজা মহাবলঃ
প্রাদুর্ভবত্যূর্ধ্বশিখঃ কৃত্বা বিতিমিরং নভঃ

অগ্নিঃ পবনসংয়ুক্তঃ খাত্সমুত্পততে জলম্
সোঽগ্নির্মারুতসংয়োগাদ্ঘনত্বমুপপদ্যতে

তস্যাকাশে নিপতিতঃ স্নেহস্তিষ্ঠতি যোঽপরঃ
স সংঘাতত্বমাপন্নো ভূমিত্বমুপগচ্ছতি

রসানাং সর্বগন্ধানাং স্নেহানাং প্রাণিনাং তথা
ভূমির্যোনিরিহ জ্ঞেয়া যস্যাং সর্বং প্রসূয়তে