Utshovঅধ্যায় 175
175.1
যুধিষ্ঠির উবাচ
কুতঃ সৃষ্টমিদং বিশ্বং জগত্স্থাবরজঙ্গমম্
প্রলয়ে চ কমভ্যেতি তন্মে ব্রূহি পিতামহ
175.2
সসাগরঃ সগগনঃ সশৈলঃ সবলাহকঃ
সভূমিঃ সাগ্নিপবনো লোকোঽয়ং কেন নির্মিতঃ
175.3
কথং সৃষ্টানি ভূতানি কথং বর্ণবিভক্তয়ঃ
শৌচাশৌচং কথং তেষাং ধর্মাধর্মাবথো কথম্
175.4
কীদৃশো জীবতাং জীবঃ ক্ব বা গচ্ছন্তি যে মৃতাঃ
অস্মাল্লোকাদমুং লোকং সর্বং শংসতু নো ভবান্
175.5
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
ভৃগুণাভিহিতং শ্রেষ্ঠং ভরদ্বাজায় পৃচ্ছতে
175.6
কৈলাসশিখরে দৃষ্ট্বা দীপ্যমানমিবৌজসা
ভৃগুং মহর্ষিমাসীনং ভরদ্বাজোঽন্বপৃচ্ছত
175.7
সসাগরঃ সগগনঃ সশৈলঃ সবলাহকঃ
সভূমিঃ সাগ্নিপবনো লোকোঽয়ং কেন নির্মিতঃ
175.8
কথং সৃষ্টানি ভূতানি কথং বর্ণবিভক্তয়ঃ
শৌচাশৌচং কথং তেষাং ধর্মাধর্মাবথো কথম্
175.9
কীদৃশো জীবতাং জীবঃ ক্ব বা গচ্ছন্তি যে মৃতাঃ
পরলোকমিমং চাপি সর্বং শংসতু নো ভবান্
175.10
এবং স ভগবান্পৃষ্টো ভরদ্বাজেন সংশয়ম্
মহর্ষির্ব্রহ্মসংকাশঃ সর্বং তস্মৈ ততোঽব্রবীৎ
175.11
মানসো নাম বিখ্যাতঃ শ্রুতপূর্বো মহর্ষিভিঃ
অনাদিনিধনো দেবস্তথাভেদ্যোঽজরামরঃ
175.12
অব্যক্ত ইতি বিখ্যাতঃ শাশ্বতোঽথাক্ষরোঽব্যয়ঃ
যতঃ সৃষ্টানি ভূতানি জায়ন্তে চ ম্রিয়ন্তি চ
175.13
সোঽসৃজত্প্রথমং দেবো মহান্তং নাম নামতঃ
আকাশমিতি বিখ্যাতং সর্বভূতধরঃ প্রভুঃ
175.14
আকাশাদভবদ্বারি সলিলাদগ্নিমারুতৌ
অগ্নিমারুতসংয়োগাত্ততঃ সমভবন্মহী
175.15
ততস্তেজোময়ং দিব্যং পদ্মং সৃষ্টং স্বয়ংভুবা
তস্মাত্পদ্মাত্সমভবদ্ব্রহ্মা বেদময়ো নিধিঃ
175.16
অহংকার ইতি খ্যাতঃ সর্বভূতাত্মভূতকৃৎ
ব্রহ্মা বৈ সুমহাতেজা য এতে পঞ্চ ধাতবঃ
175.17
শৈলাস্তস্যাস্থিসংজ্ঞাস্তু মেদো মাংসং চ মেদিনী
সমুদ্রাস্তস্য রুধিরমাকাশমুদরং তথা
175.18
পবনশ্চৈব নিঃশ্বাসস্তেজোঽগ্নির্নিম্নগাঃ সিরাঃ
অগ্নীষোমৌ তু চন্দ্রার্কৌ নয়নে তস্য বিশ্রুতে
175.19
নভশ্চোর্ধ্বং শিরস্তস্য ক্ষিতিঃ পাদৌ দিশো ভুজৌ
দুর্বিজ্ঞেয়ো হ্যনন্তত্বাত্সিদ্ধৈরপি ন সংশয়ঃ
175.20
স এব ভগবান্বিষ্ণুরনন্ত ইতি বিশ্রুতঃ
সর্বভূতাত্মভূতস্থো দুর্বিজ্ঞেয়োঽকৃতাত্মভিঃ
175.21
অহংকারস্য যঃ স্রষ্টা সর্বভূতভবায় বৈ
যতঃ সমভবদ্বিশ্বং পৃষ্টোঽহং যদিহ ত্বয়া
175.22
ভরদ্বাজ উবাচ
গগনস্য দিশাং চৈব ভূতলস্যানিলস্য চ
কান্যত্র পরিমাণানি সংশয়ং ছিন্ধি মেঽর্থতঃ
175.23
ভৃগুরুবাচ
অনন্তমেতদাকাশং সিদ্ধচারণসেবিতম্
রম্যং নানাশ্রয়াকীর্ণং যস্যান্তো নাধিগম্যতে
175.24
ঊর্ধ্বং গতেরধস্তাত্তু চন্দ্রাদিত্যৌ ন দৃশ্যতঃ
তত্র দেবাঃ স্বয়ং দীপ্তা ভাস্বরাশ্চাগ্নিবর্চসঃ
175.25
তে চাপ্যন্তং ন পশ্যন্তি নভসঃ প্রথিতৌজসঃ
দুর্গমত্বাদনন্তত্বাদিতি মে বিদ্ধি মানদ
175.26
উপরিষ্টোপরিষ্টাত্তু প্রজ্বলদ্ভিঃ স্বয়ংপ্রভৈঃ
নিরুদ্ধমেতদাকাশমপ্রমেয়ং সুরৈরপি
175.27
পৃথিব্যন্তে সমুদ্রাস্তু সমুদ্রান্তে তমঃ স্মৃতম্
তমসোঽন্তে জলং প্রাহুর্জলস্যান্তেঽগ্নিরেব চ
175.28
রসাতলান্তে সলিলং জলান্তে পন্নগাধিপঃ
তদন্তে পুনরাকাশমাকাশান্তে পুনর্জলম্
175.29
এবমন্তং ভগবতঃ প্রমাণং সলিলস্য চ
অগ্নিমারুততোয়েভ্যো দুর্জ্ঞেয়ং দৈবতৈরপি
175.30
অগ্নিমারুততোয়ানাং বর্ণাঃ ক্ষিতিতলস্য চ
আকাশসদৃশা হ্যেতে ভিদ্যন্তে তত্ত্বদর্শনাৎ
175.31
পঠন্তি চৈব মুনয়ঃ শাস্ত্রেষু বিবিধেষু চ
ত্রৈলোক্যে সাগরে চৈব প্রমাণং বিহিতং যথা
অদৃশ্যায় ত্বগম্যায় কঃ প্রমাণমুদাহরেৎ
175.32
সিদ্ধানাং দেবতানাং চ যদা পরিমিতা গতিঃ
তদা গৌণমনন্তস্য নামানন্তেতি বিশ্রুতম্
নামধেয়ানুরূপস্য মানসস্য মহাত্মনঃ
175.33
যদা তু দিব্যং তদ্রূপং হ্রসতে বর্ধতে পুনঃ
কোঽন্যস্তদ্বেদিতুং শক্তো যোঽপি স্যাত্তদ্বিধোঽপরঃ
175.34
ততঃ পুষ্করতঃ সৃষ্টঃ সর্বজ্ঞো মূর্তিমান্প্রভুঃ
ব্রহ্মা ধর্মময়ঃ পূর্বঃ প্রজাপতিরনুত্তমঃ
175.35
ভরদ্বাজ উবাচ
পুষ্করাদ্যদি সংভূতো জ্যেষ্ঠং ভবতি পুষ্করম্
ব্রহ্মাণং পূর্বজং চাহ ভবান্সংদেহ এব মে
175.36
ভৃগুরুবাচ
মানসস্যেহ যা মূর্তির্ব্রহ্মত্বং সমুপাগতা
তস্যাসনবিধানার্থং পৃথিবী পদ্মমুচ্যতে
175.37
কর্ণিকা তস্য পদ্মস্য মেরুর্গগনমুচ্ছ্রিতঃ
তস্য মধ্যে স্থিতো লোকান্সৃজতে জগতঃ প্রভুঃ