অধ্যায় 174

174.1

যুধিষ্ঠির উবাচ
যদ্যস্তি দত্তমিষ্টং বা তপস্তপ্তং তথৈব চ
গুরূণাং চাপি শুশ্রূষা তন্মে ব্রূহি পিতামহ

ভীষ্ম উবাচ
আত্মনানর্থয়ুক্তেন পাপে নিবিশতে মনঃ
স কর্ম কলুষং কৃত্বা ক্লেশে মহতি ধীয়তে

দুর্ভিক্ষাদেব দুর্ভিক্ষং ক্লেশাত্ক্লেশং ভয়াদ্ভয়ম্
মৃতেভ্যঃ প্রমৃতং যান্তি দরিদ্রাঃ পাপকারিণঃ

উত্সবাদুত্সবং যান্তি স্বর্গাত্স্বর্গং সুখাত্সুখম্
শ্রদ্দধানাশ্চ দান্তাশ্চ ধনাঢ্যাঃ শুভকারিণঃ

ব্যালকুঞ্জরদুর্গেষু সর্পচোরভয়েষু চ
হস্তাবাপেন গচ্ছন্তি নাস্তিকাঃ কিমতঃ পরম্

প্রিয়দেবাতিথেয়াশ্চ বদান্যাঃ প্রিয়সাধবঃ
ক্ষেম্যমাত্মবতাং মার্গমাস্থিতা হস্তদক্ষিণম্

পুলাকা ইব ধান্যেষু পুত্তিকা ইব পক্ষিষু
তদ্বিধাস্তে মনুষ্যেষু যেষাং ধর্মো ন কারণম্

সুশীঘ্রমপি ধাবন্তং বিধানমনুধাবতি
শেতে সহ শয়ানেন যেন যেন যথা কৃতম্

উপতিষ্ঠতি তিষ্ঠন্তং গচ্ছন্তমনুগচ্ছতি
করোতি কুর্বতঃ কর্ম ছায়েবানুবিধীয়তে

যেন যেন যথা যদ্যত্পুরা কর্ম সমাচিতম্
তত্তদেব নরো ভুঙ্ক্তে নিত্যং বিহিতমাত্মনা

স্বকর্মফলবিক্ষিপ্তং বিধানপরিরক্ষিতম্
ভূতগ্রামমিমং কালঃ সমন্তাত্পরিকর্ষতি

অচোদ্যমানানি যথা পুষ্পাণি চ ফলানি চ
স্বকালং নাতিবর্তন্তে তথা কর্ম পুরাকৃতম্

সংমানশ্চাবমানশ্চ লাভালাভৌ ক্ষয়োদয়ৌ
প্রবৃত্তা বিনিবর্তন্তে বিধানান্তে পুনঃ পুনঃ

আত্মনা বিহিতং দুঃখমাত্মনা বিহিতং সুখম্
গর্ভশয্যামুপাদায় ভুজ্যতে পৌর্বদেহিকম্

বালো যুবা চ বৃদ্ধশ্চ যত্করোতি শুভাশুভম্
তস্যাং তস্যামবস্থায়াং ভুঙ্ক্তে জন্মনি জন্মনি

যথা ধেনুসহস্রেষু বত্সো বিন্দতি মাতরম্
তথা পূর্বকৃতং কর্ম কর্তারমনুগচ্ছতি

সমুন্নমগ্রতো বস্ত্রং পশ্চাচ্ছুধ্যতি কর্মণা
উপবাসৈঃ প্রতপ্তানাং দীর্ঘং সুখমনন্তকম্

দীর্ঘকালেন তপসা সেবিতেন তপোবনে
ধর্মনির্ধূতপাপানাং সংসিধ্যন্তে মনোরথাঃ

শকুনীনামিবাকাশে মত্স্যানামিব চোদকে
পদং যথা ন দৃশ্যেত তথা জ্ঞানবিদাং গতিঃ

অলমন্যৈরুপালম্ভৈঃ কীর্তিতৈশ্চ ব্যতিক্রমৈঃ
পেশলং চানুরূপং চ কর্তব্যং হিতমাত্মনঃ