Utshovঅধ্যায় 173
173.1
যুধিষ্ঠির উবাচ
বান্ধবাঃ কর্ম বিত্তং বা প্রজ্ঞা বেহ পিতামহ
নরস্য কা প্রতিষ্ঠা স্যাদেতত্পৃষ্টো বদস্ব মে
173.2
ভীষ্ম উবাচ
প্রজ্ঞা প্রতিষ্ঠা ভূতানাং প্রজ্ঞা লাভঃ পরো মতঃ
প্রজ্ঞা নৈঃশ্রেয়সী লোকে প্রজ্ঞা স্বর্গো মতঃ সতাম্
173.3
প্রজ্ঞয়া প্রাপিতার্থো হি বলিরৈশ্বর্যসংক্ষয়ে
প্রহ্রাদো নমুচির্মঙ্কিস্তস্যাঃ কিং বিদ্যতে পরম্
173.4
অত্রাপ্যুদাহরন্তীমমিতিহাসং পুরাতনম্
ইন্দ্রকাশ্যপসংবাদং তন্নিবোধ যুধিষ্ঠির
173.5
বৈশ্যঃ কশ্চিদৃষিং তাত কাশ্যপং সংশিতব্রতম্
রথেন পাতয়ামাস শ্রীমান্দৃপ্তস্তপস্বিনম্
173.6
আর্তঃ স পতিতঃ ক্রুদ্ধস্ত্যক্ত্বাত্মানমথাব্রবীৎ
মরিষ্যাম্যধনস্যেহ জীবিতার্থো ন বিদ্যতে
173.7
তথা মুমূর্ষুমাসীনমকূজন্তমচেতসম্
ইন্দ্রঃ সৃগালরূপেণ বভাষে ক্রুদ্ধমানসম্
173.8
মনুষ্যয়োনিমিচ্ছন্তি সর্বভূতানি সর্বশঃ
মনুষ্যত্বে চ বিপ্রত্বং সর্ব এবাভিনন্দতি
173.9
মনুষ্যো ব্রাহ্মণশ্চাসি শ্রোত্রিয়শ্চাসি কাশ্যপ
সুদুর্লভমবাপ্যৈতদদোষান্মর্তুমিচ্ছসি
173.10
সর্বে লাভাঃ সাভিমানা ইতি সত্যা বত শ্রুতিঃ
সংতোষণীয়রূপোঽসি লোভাদ্যদভিমন্যসে
173.11
অহো সিদ্ধার্থতা তেষাং যেষাং সন্তীহ পাণয়ঃ
পাণিমদ্ভ্যঃ স্পৃহাস্মাকং যথা তব ধনস্য বৈ
173.12
ন পাণিলাভাদধিকো লাভঃ কশ্চন বিদ্যতে
অপাণিত্বাদ্বয়ং ব্রহ্মন্কণ্টকান্নোদ্ধরামহে
173.13
অথ যেষাং পুনঃ পাণী দেবদত্তৌ দশাঙ্গুলী
উদ্ধরন্তি কৃমীনঙ্গাদ্দশমানান্কষন্তি চ
173.14
হিমবর্ষাতপানাং চ পরিত্রাণানি কুর্বতে
চেলমন্নং সুখং শয্যাং নিবাতং চোপভুঞ্জতে
173.15
অধিষ্ঠায় চ গাং লোকে ভুঞ্জতে বাহয়ন্তি চ
উপায়ৈর্বহুভিশ্চৈব বশ্যানাত্মনি কুর্বতে
173.16
যে খল্বজিহ্বাঃ কৃপণা অল্পপ্রাণা অপাণয়ঃ
সহন্তে তানি দুঃখানি দিষ্ট্যা ত্বং ন তথা মুনে
173.17
দিষ্ট্যা ত্বং ন সৃগালো বৈ ন কৃমির্ন চ মূষকঃ
ন সর্পো ন চ মণ্ডূকো ন চান্যঃ পাপয়োনিজঃ
173.18
এতাবতাপি লাভেন তোষ্টুমর্হসি কাশ্যপ
কিং পুনর্যোঽসি সত্ত্বানাং সর্বেষাং ব্রাহ্মণোত্তমঃ
173.19
ইমে মাং কৃময়োঽদন্তি তেষামুদ্ধরণায় মে
নাস্তি শক্তিরপাণিত্বাত্পশ্যাবস্থামিমাং মম
173.20
অকার্যমিতি চৈবেমং নাত্মানং সংত্যজাম্যহম্
নেতঃ পাপীয়সীং যোনিং পতেয়মপরামিতি
173.21
মধ্যে বৈ পাপয়োনীনাং সার্গালী যামহং গতঃ
পাপীয়স্যো বহুতরা ইতোঽন্যাঃ পাপয়োনয়ঃ
173.22
জাত্যৈবৈকে সুখতরাঃ সন্ত্যন্যে ভৃশদুঃখিতাঃ
নৈকান্তসুখমেবেহ ক্বচিত্পশ্যামি কস্যচিৎ
173.23
মনুষ্যা হ্যাঢ্যতাং প্রাপ্য রাজ্যমিচ্ছন্ত্যনন্তরম্
রাজ্যাদ্দেবত্বমিচ্ছন্তি দেবত্বাদিন্দ্রতামপি
173.24
ভবেস্ত্বং যদ্যপি ত্বাঢ্যো ন রাজা ন চ দৈবতম্
দেবত্বং প্রাপ্য চেন্দ্রত্বং নৈব তুষ্যেস্তথা সতি
173.25
ন তৃপ্তিঃ প্রিয়লাভেঽস্তি তৃষ্ণা নাদ্ভিঃ প্রশাম্যতি
সংপ্রজ্বলতি সা ভূয়ঃ সমিদ্ভিরিব পাবকঃ
173.26
অস্ত্যেব ত্বয়ি শোকো বৈ হর্ষশ্চাস্তি তথা ত্বয়ি
সুখদুঃখে তথা চোভে তত্র কা পরিদেবনা
173.27
পরিচ্ছিদ্যৈব কামানাং সর্বেষাং চৈব কর্মণাম্
মূলং রুন্ধীন্দ্রিয়গ্রামং শকুন্তানিব পঞ্জরে
173.28
ন খল্বপ্যরসজ্ঞস্য কামঃ ক্বচন জায়তে
সংস্পর্শাদ্দর্শনাদ্বাপি শ্রবণাদ্বাপি জায়তে
173.29
ন ত্বং স্মরসি বারুণ্যা লট্বাকানাং চ পক্ষিণাম্
তাভ্যাং চাভ্যধিকো ভক্ষ্যো ন কশ্চিদ্বিদ্যতে ক্বচিৎ
173.30
যানি চান্যানি দূরেষু ভক্ষ্যভোজ্যানি কাশ্যপ
যেষামভুক্তপূর্বং তে তেষামস্মৃতিরেব চ
173.31
অপ্রাশনমসংস্পর্শমসংদর্শনমেব চ
পুরুষস্যৈষ নিয়মো মন্যে শ্রেয়ো ন সংশয়ঃ
173.32
পাণিমন্তো ধনৈর্যুক্তা বলবন্তো ন সংশয়ঃ
মনুষ্যা মানুষৈরেব দাসত্বমুপপাদিতাঃ
173.33
বধবন্ধপরিক্লেশৈঃ ক্লিশ্যন্তে চ পুনঃ পুনঃ
তে খল্বপি রমন্তে চ মোদন্তে চ হসন্তি চ
173.34
অপরে বাহুবলিনঃ কৃতবিদ্যা মনস্বিনঃ
জুগুপ্সিতাং সুকৃপণাং পাপাং বৃত্তিমুপাসতে
173.35
উত্সহন্তে চ তে বৃত্তিমন্যামপ্যুপসেবিতুম্
স্বকর্মণা তু নিয়তং ভবিতব্যং তু তত্তথা
173.36
ন পুল্কসো ন চণ্ডাল আত্মানং ত্যক্তুমিচ্ছতি
অসংতুষ্টঃ স্বয়া যোন্যা মায়াং পশ্যস্ব যাদৃশীম্
173.37
দৃষ্ট্বা কুণীন্পক্ষহতান্মনুষ্যানাময়াবিনঃ
সুসংপূর্ণঃ স্বয়া যোন্যা লব্ধলাভোঽসি কাশ্যপ
173.38
যদি ব্রাহ্মণ দেহস্তে নিরাতঙ্কো নিরাময়ঃ
অঙ্গানি চ সমগ্রাণি ন চ লোকেষু ধিক্কৃতঃ
173.39
ন কেনচিত্প্রবাদেন সত্যেনৈবাপহারিণা
ধর্মায়োত্তিষ্ঠ বিপ্রর্ষে নাত্মানং ত্যক্তুমর্হসি
173.40
যদি ব্রহ্মঞ্শৃণোষ্যেতচ্ছ্রদ্দধাসি চ মে বচঃ
বেদোক্তস্য চ ধর্মস্য ফলং মুখ্যমবাপ্স্যসি
173.41
স্বাধ্যায়মগ্নিসংস্কারমপ্রমত্তোঽনুপালয়
সত্যং দমং চ দানং চ স্পর্ধিষ্ঠা মা চ কেনচিৎ
173.42
যে কেচন স্বধ্যয়নাঃ প্রাপ্তা যজনয়াজনম্
কথং তে জাতু শোচেয়ুর্ধ্যায়েয়ুর্বাপ্যশোভনম্
173.43
ইচ্ছন্তস্তে বিহারায় সুখং মহদবাপ্নুয়ুঃ
উত জাতাঃ সুনক্ষত্রে সুতীর্থাঃ সুমুহূর্তজাঃ
173.44
নক্ষত্রেষ্বাসুরেষ্বন্যে দুস্তীর্থা দুর্মুহূর্তজাঃ
সংপতন্ত্যাসুরীং যোনিং যজ্ঞপ্রসববর্জিতাম্
173.45
অহমাসং পণ্ডিতকো হৈতুকো বেদনিন্দকঃ
আন্বীক্ষিকীং তর্কবিদ্যামনুরক্তো নিরর্থিকাম্
173.46
হেতুবাদান্প্রবদিতা বক্তা সংসত্সু হেতুমৎ
আক্রোষ্টা চাভিবক্তা চ ব্রহ্ময়জ্ঞেষু বৈ দ্বিজান্
173.47
নাস্তিকঃ সর্বশঙ্কী চ মূর্খঃ পণ্ডিতমানিকঃ
তস্যেয়ং ফলনির্বৃত্তিঃ সৃগালত্বং মম দ্বিজ
173.48
অপি জাতু তথা তত্স্যাদহোরাত্রশতৈরপি
যদহং মানুষীং যোনিং সৃগালঃ প্রাপ্নুয়াং পুনঃ
173.49
সংতুষ্টশ্চাপ্রমত্তশ্চ যজ্ঞদানতপোরতিঃ
জ্ঞেয়জ্ঞাতা ভবেয়ং বৈ বর্জ্যবর্জয়িতা তথা
173.50
ততঃ স মুনিরুত্থায় কাশ্যপস্তমুবাচ হ
অহো বতাসি কুশলো বুদ্ধিমানিতি বিস্মিতঃ
173.51
সমবৈক্ষত তং বিপ্রো জ্ঞানদীর্ঘেণ চক্ষুষা
দদর্শ চৈনং দেবানামিন্দ্রং দেবং শচীপতিম্
173.52
ততঃ সংপূজয়ামাস কাশ্যপো হরিবাহনম্
অনুজ্ঞাতশ্চ তেনাথ প্রবিবেশ স্বমাশ্রমম্