Utshovঅধ্যায় 172
172.1
যুধিষ্ঠির উবাচ
কেন বৃত্তেন বৃত্তজ্ঞ বীতশোকশ্চরেন্মহীম্
কিং চ কুর্বন্নরো লোকে প্রাপ্নোতি পরমাং গতিম্
172.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
প্রহ্রাদস্য চ সংবাদং মুনেরাজগরস্য চ
172.3
চরন্তং ব্রাহ্মণং কংচিত্কল্যচিত্তমনাময়ম্
পপ্রচ্ছ রাজন্প্রহ্রাদো বুদ্ধিমান্প্রাজ্ঞসংমতঃ
172.4
স্বস্থঃ শক্তো মৃদুর্দান্তো নির্বিবিত্সোঽনসূয়কঃ
সুবাগ্বহুমতো লোকে প্রাজ্ঞশ্চরসি বালবৎ
172.5
নৈব প্রার্থয়সে লাভং নালাভেষ্বনুশোচসি
নিত্যতৃপ্ত ইব ব্রহ্মন্ন কিংচিদবমন্যসে
172.6
স্রোতসা হ্রিয়মাণাসু প্রজাস্ববিমনা ইব
ধর্মকামার্থকার্যেষু কূটস্থ ইব লক্ষ্যসে
172.7
নানুতিষ্ঠসি ধর্মার্থৌ ন কামে চাপি বর্তসে
ইন্দ্রিয়ার্থাননাদৃত্য মুক্তশ্চরসি সাক্ষিবৎ
172.8
কা নু প্রজ্ঞা শ্রুতং বা কিং বৃত্তির্বা কা নু তে মুনে
ক্ষিপ্রমাচক্ষ্ব মে ব্রহ্মঞ্শ্রেয়ো যদিহ মন্যসে
172.9
অনুয়ুক্তঃ স মেধাবী লোকধর্মবিধানবিৎ
উবাচ শ্লক্ষ্ণয়া বাচা প্রহ্রাদমনপার্থয়া
172.10
পশ্যন্প্রহ্রাদ ভূতানামুত্পত্তিমনিমিত্ততঃ
হ্রাসং বৃদ্ধিং বিনাশং চ ন প্রহৃষ্যে ন চ ব্যথে
172.11
স্বভাবাদেব সংদৃশ্য বর্তমানাঃ প্রবৃত্তয়ঃ
স্বভাবনিরতাঃ সর্বাঃ পরিতপ্যে ন কেনচিৎ
172.12
পশ্যন্প্রহ্রাদ সংয়োগান্বিপ্রয়োগপরায়ণান্
সংচয়াংশ্চ বিনাশান্তান্ন ক্বচিদ্বিদধে মনঃ
172.13
অন্তবন্তি চ ভূতানি গুণয়ুক্তানি পশ্যতঃ
উত্পত্তিনিধনজ্ঞস্য কিং কার্যমবশিষ্যতে
172.14
জলজানামপি হ্যন্তং পর্যায়েণোপলক্ষয়ে
মহতামপি কায়ানাং সূক্ষ্মাণাং চ মহোদধৌ
172.15
জঙ্গমস্থাবরাণাং চ ভূতানামসুরাধিপ
পার্থিবানামপি ব্যক্তং মৃত্যুং পশ্যামি সর্বশঃ
172.16
অন্তরিক্ষচরাণাং চ দানবোত্তম পক্ষিণাম্
উত্তিষ্ঠতি যথাকালং মৃত্যুর্বলবতামপি
172.17
দিবি সংচরমাণানি হ্রস্বানি চ মহান্তি চ
জ্যোতীংষি চ যথাকালং পতমানানি লক্ষয়ে
172.18
ইতি ভূতানি সংপশ্যন্ননুষক্তানি মৃত্যুনা
সর্বসামান্যতো বিদ্বান্কৃতকৃত্যঃ সুখং স্বপে
172.19
সুমহান্তমপি গ্রাসং গ্রসে লব্ধং যদৃচ্ছয়া
শয়ে পুনরভুঞ্জানো দিবসানি বহূন্যপি
172.20
আস্রবত্যপি মামন্নং পুনর্বহুগুণং বহু
পুনরল্পগুণং স্তোকং পুনর্নৈবোপপদ্যতে
172.21
কণান্কদাচিত্খাদামি পিণ্যাকমপি চ গ্রসে
ভক্ষয়ে শালিমাংসানি ভক্ষাংশ্চোচ্চাবচান্পুনঃ
172.22
শয়ে কদাচিত্পর্যঙ্কে ভূমাবপি পুনঃ শয়ে
প্রাসাদেঽপি চ মে শয্যা কদাচিদুপপদ্যতে
172.23
ধারয়ামি চ চীরাণি শাণীং ক্ষৌমাজিনানি চ
মহার্হাণি চ বাসাংসি ধারয়াম্যহমেকদা
172.24
ন সংনিপতিতং ধর্ম্যমুপভোগং যদৃচ্ছয়া
প্রত্যাচক্ষে ন চাপ্যেনমনুরুধ্যে সুদুর্লভম্
172.25
অচলমনিধনং শিবং বিশোকং; শুচিমতুলং বিদুষাং মতে নিবিষ্টম্
অনভিমতমসেবিতং চ মূঢৈ;র্ব্রতমিদমাজগরং শুচিশ্চরামি
172.26
অচলিতমতিরচ্যুতঃ স্বধর্মা;ত্পরিমিতসংসরণঃ পরাবরজ্ঞঃ
বিগতভয়কষায়লোভমোহো; ব্রতমিদমাজগরং শুচিশ্চরামি
172.27
অনিয়তফলভক্ষ্যভোজ্যপেয়ং; বিধিপরিণামবিভক্তদেশকালম্
হৃদয়সুখমসেবিতং কদর্যৈ;র্ব্রতমিদমাজগরং শুচিশ্চরামি
172.28
ইদমিদমিতি তৃষ্ণয়াভিভূতং; জনমনবাপ্তধনং বিষীদমানম্
নিপুণমনুনিশাম্য তত্ত্ববুদ্ধ্যা; ব্রতমিদমাজগরং শুচিশ্চরামি
172.29
বহুবিধমনুদৃশ্য চার্থহেতোঃ; কৃপণমিহার্যমনার্যমাশ্রয়ন্তম্
উপশমরুচিরাত্মবান্প্রশান্তো; ব্রতমিদমাজগরং শুচিশ্চরামি
172.30
সুখমসুখমনর্থমর্থলাভং; রতিমরতিং মরণং চ জীবিতং চ
বিধিনিয়তমবেক্ষ্য তত্ত্বতোঽহং; ব্রতমিদমাজগরং শুচিশ্চরামি
172.31
অপগতভয়রাগমোহদর্পো; ধৃতিমতিবুদ্ধিসমন্বিতঃ প্রশান্তঃ
উপগতফলভোগিনো নিশাম্য; ব্রতমিদমাজগরং শুচিশ্চরামি
172.32
অনিয়তশয়নাসনঃ প্রকৃত্যা; দমনিয়মব্রতসত্যশৌচয়ুক্তঃ
অপগতফলসংচয়ঃ প্রহৃষ্টো; ব্রতমিদমাজগরং শুচিশ্চরামি
172.33
অভিগতমসুখার্থমীহনার্থৈ;রুপগতবুদ্ধিরবেক্ষ্য চাত্মসংস্থঃ
তৃষিতমনিয়তং মনো নিয়ন্তুং; ব্রতমিদমাজগরং শুচিশ্চরামি
172.34
ন হৃদয়মনুরুধ্যতে মনো বা; প্রিয়সুখদুর্লভতামনিত্যতাং চ
তদুভয়মুপলক্ষয়ন্নিবাহং; ব্রতমিদমাজগরং শুচিশ্চরামি
172.35
বহু কথিতমিদং হি বুদ্ধিমদ্ভিঃ; কবিভিরভিপ্রথয়দ্ভিরাত্মকীর্তিম্
ইদমিদমিতি তত্র তত্র তত্ত;ত্স্বপরমতৈর্গহনং প্রতর্কয়দ্ভিঃ
172.36
তদহমনুনিশাম্য বিপ্রয়াতং; পৃথগভিপন্নমিহাবুধৈর্মনুষ্যৈঃ
অনবসিতমনন্তদোষপারং; নৃষু বিহরামি বিনীতরোষতৃষ্ণঃ
172.37
ভীষ্ম উবাচ
অজগরচরিতং ব্রতং মহাত্মা; য ইহ নরোঽনুচরেদ্বিনীতরাগঃ
অপগতভয়মন্যুলোভমোহঃ; স খলু সুখী বিহরেদিমং বিহারম্