Utshovঅধ্যায় 171
171.1
যুধিষ্ঠির উবাচ
ঈহমানঃ সমারম্ভান্যদি নাসাদয়েদ্ধনম্
ধনতৃষ্ণাভিভূতশ্চ কিং কুর্বন্সুখমাপ্নুয়াৎ
171.2
ভীষ্ম উবাচ
সর্বসাম্যমনায়াসঃ সত্যবাক্যং চ ভারত
নির্বেদশ্চাবিবিত্সা চ যস্য স্যাত্স সুখী নরঃ
171.3
এতান্যেব পদান্যাহুঃ পঞ্চ বৃদ্ধাঃ প্রশান্তয়ে
এষ স্বর্গশ্চ ধর্মশ্চ সুখং চানুত্তমং সতাম্
171.4
অত্রাপ্যুদাহরন্তীমমিতিহাসং পুরাতনম্
নির্বেদান্মঙ্কিনা গীতং তন্নিবোধ যুধিষ্ঠির
171.5
ঈহমানো ধনং মঙ্কির্ভগ্নেহশ্চ পুনঃ পুনঃ
কেনচিদ্ধনশেষেণ ক্রীতবান্দম্যগোয়ুগম্
171.6
সুসংবদ্ধৌ তু তৌ দম্যৌ দমনায়াভিনিঃসৃতৌ
আসীনমুষ্ট্রং মধ্যেন সহসৈবাভ্যধাবতাম্
171.7
তয়োঃ সংপ্রাপ্তয়োরুষ্ট্রঃ স্কন্ধদেশমমর্ষণঃ
উত্থায়োত্ক্ষিপ্য তৌ দম্যৌ প্রসসার মহাজবঃ
171.8
হ্রিয়মাণৌ তু তৌ দম্যৌ তেনোষ্ট্রেণ প্রমাথিনা
ম্রিয়মাণৌ চ সংপ্রেক্ষ্য মঙ্কিস্তত্রাব্রবীদিদম্
171.9
ন চৈবাবিহিতং শক্যং দক্ষেণাপীহিতুং ধনম্
যুক্তেন শ্রদ্ধয়া সম্যগীহাং সমনুতিষ্ঠতা
171.10
কৃতস্য পূর্বং চানর্থৈর্যুক্তস্যাপ্যনুতিষ্ঠতঃ
ইমং পশ্যত সংগত্যা মম দৈবমুপপ্লবম্
171.11
উদ্যম্যোদ্যম্য মে দম্যৌ বিষমেণেব গচ্ছতি
উত্ক্ষিপ্য কাকতালীয়মুন্মাথেনেব জম্বুকঃ
171.12
মণী বোষ্ট্রস্য লম্বেতে প্রিয়ৌ বত্সতরৌ মম
শুদ্ধং হি দৈবমেবেদমতো নৈবাস্তি পৌরুষম্
171.13
যদি বাপ্যুপপদ্যেত পৌরুষং নাম কর্হিচিৎ
অন্বিষ্যমাণং তদপি দৈবমেবাবতিষ্ঠতে
171.14
তস্মান্নির্বেদ এবেহ গন্তব্যঃ সুখমীপ্সতা
সুখং স্বপিতি নির্বিণ্ণো নিরাশশ্চার্থসাধনে
171.15
অহো সম্যক্শুকেনোক্তং সর্বতঃ পরিমুচ্যতা
প্রতিষ্ঠতা মহারণ্যং জনকস্য নিবেশনাৎ
171.16
যঃ কামান্প্রাপ্নুয়াত্সর্বান্যশ্চৈনান্কেবলাংস্ত্যজেৎ
প্রাপণাত্সর্বকামানাং পরিত্যাগো বিশিষ্যতে
171.17
নান্তং সর্ববিবিত্সানাং গতপূর্বোঽস্তি কশ্চন
শরীরে জীবিতে চৈব তৃষ্ণা মন্দস্য বর্ধতে
171.18
নিবর্তস্ব বিবিত্সাভ্যঃ শাম্য নির্বিদ্য মামক
অসকৃচ্চাসি নিকৃতো ন চ নির্বিদ্যসে তনো
171.19
যদি নাহং বিনাশ্যস্তে যদ্যেবং রমসে ময়া
মা মাং যোজয় লোভেন বৃথা ত্বং বিত্তকামুক
171.20
সংচিতং সংচিতং দ্রব্যং নষ্টং তব পুনঃ পুনঃ
কদা বিমোক্ষ্যসে মূঢ ধনেহাং ধনকামুক
171.21
অহো নু মম বালিশ্যং যোঽহং ক্রীডনকস্তব
কিং নৈব জাতু পুরুষঃ পরেষাং প্রেষ্যতামিয়াৎ
171.22
ন পূর্বে নাপরে জাতু কামানামন্তমাপ্নুবন্
ত্যক্ত্বা সর্বসমারম্ভান্প্রতিবুদ্ধোঽস্মি জাগৃমি
171.23
নূনং তে হৃদয়ং কাম বজ্রসারময়ং দৃধম্
যদনর্থশতাবিষ্টং শতধা ন বিদীর্যতে
171.24
ত্যজামি কাম ত্বাং চৈব যচ্চ কিংচিত্প্রিয়ং তব
তবাহং সুখমন্বিচ্ছন্নাত্মন্যুপলভে সুখম্
171.25
কাম জানামি তে মূলং সংকল্পাত্কিল জায়সে
ন ত্বাং সংকল্পয়িষ্যামি সমূলো ন ভবিষ্যসি
171.26
ঈহা ধনস্য ন সুখা লব্ধ্বা চিন্তা চ ভূয়সী
লব্ধনাশো যথা মৃত্যুর্লব্ধং ভবতি বা ন বা
171.27
পরেত্য যো ন লভতে ততো দুঃখতরং নু কিম্
ন চ তুষ্যতি লব্ধেন ভূয় এব চ মার্গতি
171.28
অনুতর্ষুল এবার্থঃ স্বাদু গাঙ্গমিবোদকম্
মদ্বিলাপনমেতত্তু প্রতিবুদ্ধোঽস্মি সংত্যজ
171.29
য ইমং মামকং দেহং ভূতগ্রামঃ সমাশ্রিতঃ
স যাত্বিতো যথাকামং বসতাং বা যথাসুখম্
171.30
ন যুষ্মাস্বিহ মে প্রীতিঃ কামলোভানুসারিষু
তস্মাদুত্সৃজ্য সর্বান্বঃ সত্যমেবাশ্রয়াম্যহম্
171.31
সর্বভূতান্যহং দেহে পশ্যন্মনসি চাত্মনঃ
যোগে বুদ্ধিং শ্রুতে সত্ত্বং মনো ব্রহ্মণি ধারয়ন্
171.32
বিহরিষ্যাম্যনাসক্তঃ সুখী লোকান্নিরাময়ঃ
যথা মা ত্বং পুনর্নৈবং দুঃখেষু প্রণিধাস্যসি
171.33
ত্বয়া হি মে প্রণুন্নস্য গতিরন্যা ন বিদ্যতে
তৃষ্ণাশোকশ্রমাণাং হি ত্বং কাম প্রভবঃ সদা
171.34
ধননাশোঽধিকং দুঃখং মন্যে সর্বমহত্তরম্
জ্ঞাতয়ো হ্যবমন্যন্তে মিত্রাণি চ ধনচ্যুতম্
171.35
অবজ্ঞানসহস্রৈস্তু দোষাঃ কষ্টতরাধনে
ধনে সুখকলা যা চ সাপি দুঃখৈর্বিধীয়তে
171.36
ধনমস্যেতি পুরুষং পুরা নিঘ্নন্তি দস্যবঃ
ক্লিশ্যন্তি বিবিধৈর্দণ্ডৈর্নিত্যমুদ্বেজয়ন্তি চ
171.37
মন্দলোলুপতা দুঃখমিতি বুদ্ধং চিরান্ময়া
যদ্যদালম্বসে কাম তত্তদেবানুরুধ্যসে
171.38
অতত্ত্বজ্ঞোঽসি বালশ্চ দুস্তোষোঽপূরণোঽনলঃ
নৈব ত্বং বেত্থ সুলভং নৈব ত্বং বেত্থ দুর্লভম্
171.39
পাতালমিব দুষ্পূরো মাং দুঃখৈর্যোক্তুমিচ্ছসি
নাহমদ্য সমাবেষ্টুং শক্যঃ কাম পুনস্ত্বয়া
171.40
নির্বেদমহমাসাদ্য দ্রব্যনাশাদ্যদৃচ্ছয়া
নির্বৃতিং পরমাং প্রাপ্য নাদ্য কামান্বিচিন্তয়ে
171.41
অতিক্লেশান্সহামীহ নাহং বুধ্যাম্যবুদ্ধিমান্
নিকৃতো ধননাশেন শয়ে সর্বাঙ্গবিজ্বরঃ
171.42
পরিত্যজামি কাম ত্বাং হিত্বা সর্বমনোগতীঃ
ন ত্বং ময়া পুনঃ কাম নস্যোতেনেব রংস্যসে
171.43
ক্ষমিষ্যেঽক্ষমমাণানাং ন হিংসিষ্যে চ হিংসিতঃ
দ্বেষ্যমুক্তঃ প্রিয়ং বক্ষ্যাম্যনাদৃত্য তদপ্রিয়ম্
171.44
তৃপ্তঃ স্বস্থেন্দ্রিয়ো নিত্যং যথালব্ধেন বর্তয়ন্
ন সকামং করিষ্যামি ত্বামহং শত্রুমাত্মনঃ
171.45
নির্বেদং নির্বৃতিং তৃপ্তিং শান্তিং সত্যং দমং ক্ষমাম্
সর্বভূতদয়াং চৈব বিদ্ধি মাং শরণাগতম্
171.46
তস্মাত্কামশ্চ লোভশ্চ তৃষ্ণা কার্পণ্যমেব চ
ত্যজন্তু মাং প্রতিষ্ঠন্তং সত্ত্বস্থো হ্যস্মি সাংপ্রতম্
171.47
প্রহায় কামং লোভং চ ক্রোধং পারুষ্যমেব চ
নাদ্য লোভবশং প্রাপ্তো দুঃখং প্রাপ্স্যাম্যনাত্মবান্
171.48
যদ্যত্ত্যজতি কামানাং তত্সুখস্যাভিপূর্যতে
কামস্য বশগো নিত্যং দুঃখমেব প্রপদ্যতে
171.49
কামান্ব্যুদস্য ধুনুতে যত্কিংচিত্পুরুষো রজঃ
কামক্রোধোদ্ভবং দুঃখমহ্রীররতিরেব চ
171.50
এষ ব্রহ্মপ্রবিষ্টোঽহং গ্রীষ্মে শীতমিব হ্রদম্
শাম্যামি পরিনির্বামি সুখমাসে চ কেবলম্
171.51
যচ্চ কামসুখং লোকে যচ্চ দিব্যং মহত্সুখম্
তৃষ্ণাক্ষয়সুখস্যৈতে নার্হতঃ ষোডশীং কলাম্
171.52
আত্মনা সপ্তমং কামং হত্বা শত্রুমিবোত্তমম্
প্রাপ্যাবধ্যং ব্রহ্মপুরং রাজেব স্যামহং সুখী
171.53
এতাং বুদ্ধিং সমাস্থায় মঙ্কির্নির্বেদমাগতঃ
সর্বান্কামান্পরিত্যজ্য প্রাপ্য ব্রহ্ম মহত্সুখম্
171.54
দম্যনাশকৃতে মঙ্কিরমরত্বং কিলাগমৎ
অচ্ছিনত্কামমূলং স তেন প্রাপ মহত্সুখম্
171.55
অত্রাপ্যুদাহরন্তীমমিতিহাসং পুরাতনম্
গীতং বিদেহরাজেন জনকেন প্রশাম্যতা
171.56
অনন্তং বত মে বিত্তং যস্য মে নাস্তি কিংচন
মিথিলায়াং প্রদীপ্তায়াং ন মে দহ্যতি কিংচন
171.57
অত্রৈবোদাহরন্তীমং বোধ্যস্য পদসংচয়ম্
নির্বেদং প্রতি বিন্যস্তং প্রতিবোধ যুধিষ্ঠির
171.58
বোধ্যং দান্তমৃষিং রাজা নহুষঃ পর্যপৃচ্ছত
নির্বেদাচ্ছান্তিমাপন্নং শান্তং প্রজ্ঞানতর্পিতম্
171.59
উপদেশং মহাপ্রাজ্ঞ শমস্যোপদিশস্ব মে
কাং বুদ্ধিং সমনুধ্যায় শান্তশ্চরসি নির্বৃতঃ
171.60
বোধ্য উবাচ
উপদেশেন বর্তামি নানুশাস্মীহ কংচন
লক্ষণং তস্য বক্ষ্যেঽহং তত্স্বয়ং প্রবিমৃশ্যতাম্
171.61
পিঙ্গলা কুররঃ সর্পঃ সারঙ্গান্বেষণং বনে
ইষুকারঃ কুমারী চ ষডেতে গুরবো মম