অধ্যায় 170

170.1

যুধিষ্ঠির উবাচ
ধনিনো বাধনা যে চ বর্তয়ন্তি স্বতন্ত্রিণঃ
সুখদুঃখাগমস্তেষাং কঃ কথং বা পিতামহ

ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
শম্যাকেন বিমুক্তেন গীতং শান্তিগতেন হ

অব্রবীন্মাং পুরা কশ্চিদ্ব্রাহ্মণস্ত্যাগমাস্থিতঃ
ক্লিশ্যমানঃ কুদারেণ কুচৈলেন বুভুক্ষয়া

উত্পন্নমিহ লোকে বৈ জন্মপ্রভৃতি মানবম্
বিবিধান্যুপবর্তন্তে দুঃখানি চ সুখানি চ

তয়োরেকতরে মার্গে যদ্যেনমভিসংনয়েৎ
ন সুখং প্রাপ্য সংহৃষ্যেন্ন দুঃখং প্রাপ্য সংজ্বরেৎ

ন বৈ চরসি যচ্ছ্রেয় আত্মনো বা যদীহসে
অকামাত্মাপি হি সদা ধুরমুদ্যম্য চৈব হি

অকিংচনঃ পরিপতন্সুখমাস্বাদয়িষ্যসি
অকিংচনঃ সুখং শেতে সমুত্তিষ্ঠতি চৈব হি

আকিংচন্যং সুখং লোকে পথ্যং শিবমনাময়ম্
অনমিত্রমথো হ্যেতদ্দুর্লভং সুলভং সতাম্

অকিংচনস্য শুদ্ধস্য উপপন্নস্য সর্বশঃ
অবেক্ষমাণস্ত্রীঁল্লোকান্ন তুল্যমুপলক্ষয়ে

আকিংচন্যং চ রাজ্যং চ তুলয়া সমতোলয়ম্
অত্যরিচ্যত দারিদ্র্যং রাজ্যাদপি গুণাধিকম্

আকিংচন্যে চ রাজ্যে চ বিশেষঃ সুমহানয়ম্
নিত্যোদ্বিগ্নো হি ধনবান্মৃত্যোরাস্যগতো যথা

নৈবাস্যাগ্নির্ন চাদিত্যো ন মৃত্যুর্ন চ দস্যবঃ
প্রভবন্তি ধনজ্যানিনির্মুক্তস্য নিরাশিষঃ

তং বৈ সদা কামচরমনুপস্তীর্ণশায়িনম্
বাহূপধানং শাম্যন্তং প্রশংসন্তি দিবৌকসঃ

ধনবান্ক্রোধলোভাভ্যামাবিষ্টো নষ্টচেতনঃ
তির্যগীক্ষঃ শুষ্কমুখঃ পাপকো ভ্রুকুটীমুখঃ

নির্দশংশ্চাধরোষ্ঠং চ ক্রুদ্ধো দারুণভাষিতা
কস্তমিচ্ছেত্পরিদ্রষ্টুং দাতুমিচ্ছতি চেন্মহীম্

শ্রিয়া হ্যভীক্ষ্ণং সংবাসো মোহয়ত্যবিচক্ষণম্
সা তস্য চিত্তং হরতি শারদাভ্রমিবানিলঃ

অথৈনং রূপমানশ্চ ধনমানশ্চ বিন্দতি
অভিজাতোঽস্মি সিদ্ধোঽস্মি নাস্মি কেবলমানুষঃ
ইত্যেভিঃ কারণৈস্তস্য ত্রিভিশ্চিত্তং প্রসিচ্যতে

স প্রসিক্তমনা ভোগান্বিসৃজ্য পিতৃসংচিতান্
পরিক্ষীণঃ পরস্বানামাদানং সাধু মন্যতে

তমতিক্রান্তমর্যাদমাদদানং ততস্ততঃ
প্রতিষেধন্তি রাজানো লুব্ধা মৃগমিবেষুভিঃ

এবমেতানি দুঃখানি তানি তানীহ মানবম্
বিবিধান্যুপবর্তন্তে গাত্রসংস্পর্শজানি চ

তেষাং পরমদুঃখানাং বুদ্ধ্যা ভৈষজ্যমাচরেৎ
লোকধর্মং সমাজ্ঞায় ধ্রুবাণামধ্রুবৈঃ সহ

নাত্যক্ত্বা সুখমাপ্নোতি নাত্যক্ত্বা বিন্দতে পরম্
নাত্যক্ত্বা চাভয়ঃ শেতে ত্যক্ত্বা সর্বং সুখী ভব

ইত্যেতদ্ধাস্তিনপুরে ব্রাহ্মণেনোপবর্ণিতম্
শম্যাকেন পুরা মহ্যং তস্মাত্ত্যাগঃ পরো মতঃ