Utshovঅধ্যায় 169
169.1
যুধিষ্ঠির উবাচ
অতিক্রামতি কালেঽস্মিন্সর্বভূতক্ষয়াবহে
কিং শ্রেয়ঃ প্রতিপদ্যেত তন্মে ব্রূহি পিতামহ
169.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
পিতুঃ পুত্রেণ সংবাদং তন্নিবোধ যুধিষ্ঠির
169.3
দ্বিজাতেঃ কস্যচিত্পার্থ স্বাধ্যায়নিরতস্য বৈ
বভূব পুত্রো মেধাবী মেধাবী নাম নামতঃ
169.4
সোঽব্রবীত্পিতরং পুত্রঃ স্বাধ্যায়করণে রতম্
মোক্ষধর্মার্থকুশলো লোকতত্ত্ববিচক্ষণঃ
169.5
ধীরঃ কিং স্বিত্তাত কুর্যাত্প্রজান;ন্ক্ষিপ্রং হ্যায়ুর্ভ্রশ্যতে মানবানাম্
পিতস্তদাচক্ষ্ব যথার্থয়োগং; মমানুপূর্ব্যা যেন ধর্মং চরেয়ম্
169.6
পিতোবাচ
বেদানধীত্য ব্রহ্মচর্যেণ পুত্র; পুত্রানিচ্ছেত্পাবনার্থং পিতৄণাম্
অগ্নীনাধায় বিধিবচ্চেষ্টয়জ্ঞো; বনং প্রবিশ্যাথ মুনির্বুভূষেৎ
169.7
পুত্র উবাচ
এবমভ্যাহতে লোকে সমন্তাত্পরিবারিতে
অমোঘাসু পতন্তীষু কিং ধীর ইব ভাষসে
169.8
পিতোবাচ
কথমভ্যাহতো লোকঃ কেন বা পরিবারিতঃ
অমোঘাঃ কাঃ পতন্তীহ কিং নু ভীষয়সীব মাম্
169.9
পুত্র উবাচ
মৃত্যুনাভ্যাহতো লোকো জরয়া পরিবারিতঃ
অহোরাত্রাঃ পতন্ত্যেতে ননু কস্মান্ন বুধ্যসে
169.10
যদাহমেতজ্জানামি ন মৃত্যুস্তিষ্ঠতীতি হ
সোঽহং কথং প্রতীক্ষিষ্যে জালেনাপিহিতশ্চরন্
169.11
রাত্র্যাং রাত্র্যাং ব্যতীতায়ামায়ুরল্পতরং যদা
গাধোদকে মত্স্য ইব সুখং বিন্দেত কস্তদা
তদেব বন্ধ্যং দিবসমিতি বিদ্যাদ্বিচক্ষণঃ
169.12
অনবাপ্তেষু কামেষু মৃত্যুরভ্যেতি মানবম্
শষ্পাণীব বিচিন্বন্তমন্যত্রগতমানসম্
বৃকীবোরণমাসাদ্য মৃত্যুরাদায় গচ্ছতি
169.13
অদ্যৈব কুরু যচ্ছ্রেয়ো মা ত্বা কালোঽত্যগাদয়ম্
অকৃতেষ্বেব কার্যেষু মৃত্যুর্বৈ সংপ্রকর্ষতি
169.14
শ্বঃকার্যমদ্য কুর্বীত পূর্বাহ্ণে চাপরাহ্ণিকম্
ন হি প্রতীক্ষতে মৃত্যুঃ কৃতং বাস্য ন বা কৃতম্
কো হি জানাতি কস্যাদ্য মৃত্যুসেনা নিবেক্ষ্যতে
169.15
যুবৈব ধর্মশীলঃ স্যাদনিমিত্তং হি জীবিতম্
কৃতে ধর্মে ভবেত্কীর্তিরিহ প্রেত্য চ বৈ সুখম্
169.16
মোহেন হি সমাবিষ্টঃ পুত্রদারার্থমুদ্যতঃ
কৃত্বা কার্যমকার্যং বা পুষ্টিমেষাং প্রয়চ্ছতি
169.17
তং পুত্রপশুসংমত্তং ব্যাসক্তমনসং নরম্
সুপ্তং ব্যাঘ্রং মহৌঘো বা মৃত্যুরাদায় গচ্ছতি
169.18
সংচিন্বানকমেবৈকং কামানামবিতৃপ্তকম্
ব্যাঘ্রঃ পশুমিবাদায় মৃত্যুরাদায় গচ্ছতি
169.19
ইদং কৃতমিদং কার্যমিদমন্যত্কৃতাকৃতম্
এবমীহাসুখাসক্তং কৃতান্তঃ কুরুতে বশে
169.20
কৃতানাং ফলমপ্রাপ্তং কর্মণাং ফলসঙ্গিনম্
ক্ষেত্রাপণগৃহাসক্তং মৃত্যুরাদায় গচ্ছতি
169.21
মৃত্যুর্জরা চ ব্যাধিশ্চ দুঃখং চানেককারণম্
অনুষক্তং যদা দেহে কিং স্বস্থ ইব তিষ্ঠসি
169.22
জাতমেবান্তকোঽন্তায় জরা চান্বেতি দেহিনম্
অনুষক্তা দ্বয়েনৈতে ভাবাঃ স্থাবরজঙ্গমাঃ
169.23
মৃত্যোর্বা গৃহমেবৈতদ্যা গ্রামে বসতো রতিঃ
দেবানামেষ বৈ গোষ্ঠো যদরণ্যমিতি শ্রুতিঃ
169.24
নিবন্ধনী রজ্জুরেষা যা গ্রামে বসতো রতিঃ
ছিত্ত্বৈনাং সুকৃতো যান্তি নৈনাং ছিন্দন্তি দুষ্কৃতঃ
169.25
ন হিংসয়তি যঃ প্রাণান্মনোবাক্কায়হেতুভিঃ
জীবিতার্থাপনয়নৈঃ কর্মভির্ন স বধ্যতে
169.26
ন মৃত্যুসেনামায়ান্তীং জাতু কশ্চিত্প্রবাধতে
ঋতে সত্যমসংত্যাজ্যং সত্যে হ্যমৃতমাশ্রিতম্
169.27
তস্মাত্সত্যব্রতাচারঃ সত্যয়োগপরায়ণঃ
সত্যারামঃ সমো দান্তঃ সত্যেনৈবান্তকং জয়েৎ
169.28
অমৃতং চৈব মৃত্যুশ্চ দ্বয়ং দেহে প্রতিষ্ঠিতম্
মৃত্যুমাপদ্যতে মোহাত্সত্যেনাপদ্যতেঽমৃতম্
169.29
সোঽহং হ্যহিংস্রঃ সত্যার্থী কামক্রোধবহিষ্কৃতঃ
সমদুঃখসুখঃ ক্ষেমী মৃত্যুং হাস্যাম্যমর্ত্যবৎ
169.30
শান্তিয়জ্ঞরতো দান্তো ব্রহ্ময়জ্ঞে স্থিতো মুনিঃ
বাঙ্মনঃকর্ময়জ্ঞশ্চ ভবিষ্যাম্যুদগায়নে
169.31
পশুয়জ্ঞৈঃ কথং হিংস্রৈর্মাদৃশো যষ্টুমর্হতি
অন্তবদ্ভিরুত প্রাজ্ঞঃ ক্ষত্রয়জ্ঞৈঃ পিশাচবৎ
169.32
যস্য বাঙ্মনসী স্যাতাং সম্যক্প্রণিহিতে সদা
তপস্ত্যাগশ্চ যোগশ্চ স বৈ সর্বমবাপ্নুয়াৎ
169.33
নাস্তি বিদ্যাসমং চক্ষুর্নাস্তি বিদ্যাসমং বলম্
নাস্তি রাগসমং দুঃখং নাস্তি ত্যাগসমং সুখম্
169.34
আত্মন্যেবাত্মনা জাত আত্মনিষ্ঠোঽপ্রজোঽপি বা
আত্মন্যেব ভবিষ্যামি ন মাং তারয়তি প্রজা
169.35
নৈতাদৃশং ব্রাহ্মণস্যাস্তি বিত্তং; যথৈকতা সমতা সত্যতা চ
শীলে স্থিতির্দণ্ডনিধানমার্জবং; ততস্ততশ্চোপরমঃ ক্রিয়াভ্যঃ
169.36
কিং তে ধনৈর্বান্ধবৈর্বাপি কিং তে; কিং তে দারৈর্ব্রাহ্মণ যো মরিষ্যসি
আত্মানমন্বিচ্ছ গুহাং প্রবিষ্টং; পিতামহস্তে ক্ব গতঃ পিতা চ
169.37
ভীষ্ম উবাচ
পুত্রস্যৈতদ্বচঃ শ্রুত্বা তথাকার্ষীত্পিতা নৃপ
তথা ত্বমপি বর্তস্ব সত্যধর্মপরায়ণঃ