Utshovঅধ্যায় 168
168.1
যুধিষ্ঠির উবাচ
ধর্মাঃ পিতামহেনোক্তা রাজধর্মাশ্রিতাঃ শুভাঃ
ধর্মমাশ্রমিণাং শ্রেষ্ঠং বক্তুমর্হসি পার্থিব
168.2
ভীষ্ম উবাচ
সর্বত্র বিহিতো ধর্মঃ স্বর্গ্যঃ সত্যফলং তপঃ
বহুদ্বারস্য ধর্মস্য নেহাস্তি বিফলা ক্রিয়া
168.3
যস্মিন্যস্মিংস্তু বিনয়ে যো যো যাতি বিনিশ্চয়ম্
স তমেবাভিজানাতি নান্যং ভরতসত্তম
168.4
যথা যথা চ পর্যেতি লোকতন্ত্রমসারবৎ
তথা তথা বিরাগোঽত্র জায়তে নাত্র সংশয়ঃ
168.5
এবং ব্যবসিতে লোকে বহুদোষে যুধিষ্ঠির
আত্মমোক্ষনিমিত্তং বৈ যতেত মতিমান্নরঃ
168.6
যুধিষ্ঠির উবাচ
নষ্টে ধনে বা দারে বা পুত্রে পিতরি বা মৃতে
যয়া বুদ্ধ্যা নুদেচ্ছোকং তন্মে ব্রূহি পিতামহ
168.7
ভীষ্ম উবাচ
নষ্টে ধনে বা দারে বা পুত্রে পিতরি বা মৃতে
অহো দুঃখমিতি ধ্যায়ঞ্শোকস্যাপচিতিং চরেৎ
168.8
অত্রাপ্যুদাহরন্তীমমিতিহাসং পুরাতনম্
যথা সেনজিতং বিপ্রঃ কশ্চিদিত্যব্রবীদ্বচঃ
168.9
পুত্রশোকাভিসংতপ্তং রাজানং শোকবিহ্বলম্
বিষণ্ণবদনং দৃষ্ট্বা বিপ্রো বচনমব্রবীৎ
168.10
কিং নু খল্বসি মূঢস্ত্বং শোচ্যঃ কিমনুশোচসি
যদা ত্বামপি শোচন্তঃ শোচ্যা যাস্যন্তি তাং গতিম্
168.11
ত্বং চৈবাহং চ যে চান্যে ত্বাং রাজন্পর্যুপাসতে
সর্বে তত্র গমিষ্যামো যত এবাগতা বয়ম্
168.12
সেনজিদুবাচ
কা বুদ্ধিঃ কিং তপো বিপ্র কঃ সমাধিস্তপোধন
কিং জ্ঞানং কিং শ্রুতং বা তে যত্প্রাপ্য ন বিষীদসি
168.13
ব্রাহ্মণ উবাচ
পশ্য ভূতানি দুঃখেন ব্যতিষক্তানি সর্বশঃ
আত্মাপি চায়ং ন মম সর্বা বা পৃথিবী মম
168.14
যথা মম তথান্যেষামিতি বুদ্ধ্যা ন মে ব্যথা
এতাং বুদ্ধিমহং প্রাপ্য ন প্রহৃষ্যে ন চ ব্যথে
168.15
যথা কাষ্ঠং চ কাষ্ঠং চ সমেয়াতাং মহোদধৌ
সমেত্য চ ব্যপেয়াতাং তদ্বদ্ভূতসমাগমঃ
168.16
এবং পুত্রাশ্চ পৌত্রাশ্চ জ্ঞাতয়ো বান্ধবাস্তথা
তেষু স্নেহো ন কর্তব্যো বিপ্রয়োগো হি তৈর্ধ্রুবম্
168.17
অদর্শনাদাপতিতঃ পুনশ্চাদর্শনং গতঃ
ন ত্বাসৌ বেদ ন ত্বং তং কঃ সন্কমনুশোচসি
168.18
তৃষ্ণার্তিপ্রভবং দুঃখং দুঃখার্তিপ্রভবং সুখম্
সুখাত্সংজায়তে দুঃখমেবমেতত্পুনঃ পুনঃ
সুখস্যানন্তরং দুঃখং দুঃখস্যানন্তরং সুখম্
168.19
সুখাত্ত্বং দুঃখমাপন্নঃ পুনরাপত্স্যসে সুখম্
ন নিত্যং লভতে দুঃখং ন নিত্যং লভতে সুখম্
168.20
নালং সুখায় সুহৃদো নালং দুঃখায় শত্রবঃ
ন চ প্রজ্ঞালমর্থানাং ন সুখানামলং ধনম্
168.21
ন বুদ্ধির্ধনলাভায় ন জাড্যমসমৃদ্ধয়ে
লোকপর্যায়বৃত্তান্তং প্রাজ্ঞো জানাতি নেতরঃ
168.22
বুদ্ধিমন্তং চ মূঢং চ শূরং ভীরুং জডং কবিম্
দুর্বলং বলবন্তং চ ভাগিনং ভজতে সুখম্
168.23
ধেনুর্বত্সস্য গোপস্য স্বামিনস্তস্করস্য চ
পয়ঃ পিবতি যস্তস্যা ধেনুস্তস্যেতি নিশ্চয়ঃ
168.24
যে চ মূঢতমা লোকে যে চ বুদ্ধেঃ পরং গতাঃ
তে নরাঃ সুখমেধন্তে ক্লিশ্যত্যন্তরিতো জনঃ
168.25
অন্ত্যেষু রেমিরে ধীরা ন তে মধ্যেষু রেমিরে
অন্ত্যপ্রাপ্তিং সুখামাহুর্দুঃখমন্তরমন্তয়োঃ
168.26
যে তু বুদ্ধিসুখং প্রাপ্তা দ্বংদ্বাতীতা বিমত্সরাঃ
তান্নৈবার্থা ন চানর্থা ব্যথয়ন্তি কদাচন
168.27
অথ যে বুদ্ধিমপ্রাপ্তা ব্যতিক্রান্তাশ্চ মূঢতাম্
তেঽতিবেলং প্রহৃষ্যন্তি সংতাপমুপয়ান্তি চ
168.28
নিত্যপ্রমুদিতা মূঢা দিবি দেবগণা ইব
অবলেপেন মহতা পরিদৃব্ধা বিচেতসঃ
168.29
সুখং দুঃখান্তমালস্যং দুঃখং দাক্ষ্যং সুখোদয়ম্
ভূতিশ্চৈব শ্রিয়া সার্ধং দক্ষে বসতি নালসে
168.30
সুখং বা যদি বা দুঃখং দ্বেষ্যং বা যদি বা প্রিয়ম্
প্রাপ্তং প্রাপ্তমুপাসীত হৃদয়েনাপরাজিতঃ
168.31
শোকস্থানসহস্রাণি হর্ষস্থানশতানি চ
দিবসে দিবসে মূঢমাবিশন্তি ন পণ্ডিতম্
168.32
বুদ্ধিমন্তং কৃতপ্রজ্ঞং শুশ্রূষুমনসূয়কম্
দান্তং জিতেন্দ্রিয়ং চাপি শোকো ন স্পৃশতে নরম্
168.33
এতাং বুদ্ধিং সমাস্থায় গুপ্তচিত্তশ্চরেদ্বুধঃ
উদয়াস্তময়জ্ঞং হি ন শোকঃ স্প্রষ্টুমর্হতি
168.34
যন্নিমিত্তং ভবেচ্ছোকস্ত্রাসো বা দুঃখমেব বা
আয়াসো বা যতোমূলস্তদেকাঙ্গমপি ত্যজেৎ
168.35
যদ্যত্ত্যজতি কামানাং তত্সুখস্যাভিপূর্যতে
কামানুসারী পুরুষঃ কামাননু বিনশ্যতি
168.36
যচ্চ কামসুখং লোকে যচ্চ দিব্যং মহত্সুখম্
তৃষ্ণাক্ষয়সুখস্যৈতে নার্হতঃ ষোডশীং কলাম্
168.37
পূর্বদেহকৃতং কর্ম শুভং বা যদি বাশুভম্
প্রাজ্ঞং মূঢং তথা শূরং ভজতে যাদৃশং কৃতম্
168.38
এবমেব কিলৈতানি প্রিয়াণ্যেবাপ্রিয়াণি চ
জীবেষু পরিবর্তন্তে দুঃখানি চ সুখানি চ
168.39
তদেবং বুদ্ধিমাস্থায় সুখং জীবেদ্গুণান্বিতঃ
সর্বান্কামাঞ্জুগুপ্সেত সঙ্গান্কুর্বীত পৃষ্ঠতঃ
বৃত্ত এষ হৃদি প্রৌঢো মৃত্যুরেষ মনোময়ঃ
168.40
যদা সংহরতে কামান্কূর্মোঽঙ্গানীব সর্বশঃ
তদাত্মজ্যোতিরাত্মা চ আত্মন্যেব প্রসীদতি
168.41
কিংচিদেব মমত্বেন যদা ভবতি কল্পিতম্
তদেব পরিতাপার্থং সর্বং সংপদ্যতে তদা
168.42
ন বিভেতি যদা চায়ং যদা চাস্মান্ন বিভ্যতি
যদা নেচ্ছতি ন দ্বেষ্টি ব্রহ্ম সংপদ্যতে তদা
168.43
উভে সত্যানৃতে ত্যক্ত্বা শোকানন্দৌ ভয়াভয়ে
প্রিয়াপ্রিয়ে পরিত্যজ্য প্রশান্তাত্মা ভবিষ্যসি
168.44
যদা ন কুরুতে ধীরঃ সর্বভূতেষু পাপকম্
কর্মণা মনসা বাচা ব্রহ্ম সংপদ্যতে তদা
168.45
যা দুস্ত্যজা দুর্মতিভির্যা ন জীর্যতি জীর্যতঃ
যোঽসৌ প্রাণান্তিকো রোগস্তাং তৃষ্ণাং ত্যজতঃ সুখম্
168.46
অত্র পিঙ্গলয়া গীতা গাথাঃ শ্রূয়ন্তি পার্থিব
যথা সা কৃচ্ছ্রকালেঽপি লেভে ধর্মং সনাতনম্
168.47
সংকেতে পিঙ্গলা বেশ্যা কান্তেনাসীদ্বিনাকৃতা
অথ কৃচ্ছ্রগতা শান্তাং বুদ্ধিমাস্থাপয়ত্তদা
168.48
পিঙ্গলোবাচ
উন্মত্তাহমনুন্মত্তং কান্তমন্ববসং চিরম্
অন্তিকে রমণং সন্তং নৈনমধ্যগমং পুরা
168.49
একস্থূণং নবদ্বারমপিধাস্যাম্যগারকম্
কা হি কান্তমিহায়ান্তময়ং কান্তেতি মংস্যতে
168.50
অকামাঃ কামরূপেণ ধূর্তা নরকরূপিণঃ
ন পুনর্বঞ্চয়িষ্যন্তি প্রতিবুদ্ধাস্মি জাগৃমি
168.51
অনর্থোঽপি ভবত্যর্থো দৈবাত্পূর্বকৃতেন বা
সংবুদ্ধাহং নিরাকারা নাহমদ্যাজিতেন্দ্রিয়া
168.52
সুখং নিরাশঃ স্বপিতি নৈরাশ্যং পরমং সুখম্
আশামনাশাং কৃত্বা হি সুখং স্বপিতি পিঙ্গলা
168.53
ভীষ্ম উবাচ
এতৈশ্চান্যৈশ্চ বিপ্রস্য হেতুমদ্ভিঃ প্রভাষিতৈঃ
পর্যবস্থাপিতো রাজা সেনজিন্মুমুদে সুখম্