Utshovঅধ্যায় 167
167.1
ভীষ্ম উবাচ
ততশ্চিতাং বকপতেঃ কারয়ামাস রাক্ষসঃ
রত্নৈর্গন্ধৈশ্চ বহুভির্বস্ত্রৈশ্চ সমলংকৃতাম্
167.2
তত্র প্রজ্বাল্য নৃপতে বকরাজং প্রতাপবান্
প্রেতকার্যাণি বিধিবদ্রাক্ষসেন্দ্রশ্চকার হ
167.3
তস্মিন্কালেঽথ সুরভির্দেবী দাক্ষায়ণী শুভা
উপরিষ্টাত্ততস্তস্য সা বভূব পয়স্বিনী
167.4
তস্যা বক্ত্রাচ্চ্যুতঃ ফেনঃ ক্ষীরমিশ্রস্তদানঘ
সোঽপতদ্বৈ ততস্তস্যাং চিতায়াং রাজধর্মণঃ
167.5
ততঃ সংজীবিতস্তেন বকরাজস্তদানঘ
উত্পত্য চ সমেয়ায় বিরূপাক্ষং বকাধিপঃ
167.6
ততোঽভ্যয়াদ্দেবরাজো বিরূপাক্ষপুরং তদা
প্রাহ চেদং বিরূপাক্ষং দিষ্ট্যায়ং জীবতীত্যুত
167.7
শ্রাবয়ামাস চেন্দ্রস্তং বিরূপাক্ষং পুরাতনম্
যথা শাপঃ পুরা দত্তো ব্রহ্মণা রাজধর্মণঃ
167.8
যদা বকপতী রাজন্ব্রহ্মাণং নোপসর্পতি
ততো রোষাদিদং প্রাহ বকেন্দ্রায় পিতামহঃ
167.9
যস্মান্মূঢো মম সদো নাগতোঽসৌ বকাধমঃ
তস্মাদ্বধং স দুষ্টাত্মা নচিরাত্সমবাপ্স্যতি
167.10
তদায়ং তস্য বচনান্নিহতো গৌতমেন বৈ
তেনৈবামৃতসিক্তশ্চ পুনঃ সংজীবিতো বকঃ
167.11
রাজধর্মা ততঃ প্রাহ প্রণিপত্য পুরংদরম্
যদি তেঽনুগ্রহকৃতা ময়ি বুদ্ধিঃ পুরংদর
সখায়ং মে সুদয়িতং গৌতমং জীবয়েত্যুত
167.12
তস্য বাক্যং সমাজ্ঞায় বাসবঃ পুরুষর্ষভ
সংজীবয়িত্বা সখ্যে বৈ প্রাদাত্তং গৌতমং তদা
167.13
সভাণ্ডোপস্করং রাজংস্তমাসাদ্য বকাধিপঃ
সংপরিষ্বজ্য সুহৃদং প্রীত্যা পরময়া যুতঃ
167.14
অথ তং পাপকর্মাণং রাজধর্মা বকাধিপঃ
বিসর্জয়িত্বা সধনং প্রবিবেশ স্বমালয়ম্
167.15
যথোচিতং চ স বকো যয়ৌ ব্রহ্মসদস্তদা
ব্রহ্মা চ তং মহাত্মানমাতিথ্যেনাভ্যপূজয়ৎ
167.16
গৌতমশ্চাপি সংপ্রাপ্য পুনস্তং শবরালয়ম্
শূদ্রায়াং জনয়ামাস পুত্রান্দুষ্কৃতকারিণঃ
167.17
শাপশ্চ সুমহাংস্তস্য দত্তঃ সুরগণৈস্তদা
কুক্ষৌ পুনর্ভ্বাং ভার্যায়াং জনয়িত্বা চিরাত্সুতান্
নিরয়ং প্রাপ্স্যতি মহত্কৃতঘ্নোঽয়মিতি প্রভো
167.18
এতত্প্রাহ পুরা সর্বং নারদো মম ভারত
সংস্মৃত্য চাপি সুমহদাখ্যানং পুরুষর্ষভ
ময়াপি ভবতে সর্বং যথাবদুপবর্ণিতম্
167.19
কুতঃ কৃতঘ্নস্য যশঃ কুতঃ স্থানং কুতঃ সুখম্
অশ্রদ্ধেয়ঃ কৃতঘ্নো হি কৃতঘ্নে নাস্তি নিষ্কৃতিঃ
167.20
মিত্রদ্রোহো ন কর্তব্যঃ পুরুষেণ বিশেষতঃ
মিত্রধ্রুঙ্নিরয়ং ঘোরমনন্তং প্রতিপদ্যতে
167.21
কৃতজ্ঞেন সদা ভাব্যং মিত্রকামেন চানঘ
মিত্রাত্প্রভবতে সত্যং মিত্রাত্প্রভবতে বলম্
সত্কারৈরুত্তমৈর্মিত্রং পূজয়েত বিচক্ষণঃ
167.22
পরিত্যাজ্যো বুধৈঃ পাপঃ কৃতঘ্নো নিরপত্রপঃ
মিত্রদ্রোহী কুলাঙ্গারঃ পাপকর্মা নরাধমঃ
167.23
এষ ধর্মভৃতাং শ্রেষ্ঠ প্রোক্তঃ পাপো ময়া তব
মিত্রদ্রোহী কৃতঘ্নো বৈ কিং ভূয়ঃ শ্রোতুমিচ্ছসি
167.24
বৈশংপায়ন উবাচ
এতচ্ছ্রুত্বা তদা বাক্যং ভীষ্মেণোক্তং মহাত্মনা
যুধিষ্ঠিরঃ প্রীতমনা বভূব জনমেজয়