অধ্যায় 166

166.1

ভীষ্ম উবাচ
অথ তত্র মহার্চিষ্মাননলো বাতসারথিঃ
তস্যাবিদূরে রক্ষার্থং খগেন্দ্রেণ কৃতোঽভবৎ

166.2

স চাপি পার্শ্বে সুষ্বাপ বিশ্বস্তো বকরাট্তদা
কৃতঘ্নস্তু স দুষ্টাত্মা তং জিঘাংসুরজাগরৎ

166.3

ততোঽলাতেন দীপ্তেন বিশ্বস্তং নিজঘান তম্
নিহত্য চ মুদা যুক্তঃ সোঽনুবন্ধং ন দৃষ্টবান্

166.4

স তং বিপক্ষরোমাণং কৃত্বাগ্নাবপচত্তদা
তং গৃহীত্বা সুবর্ণং চ যয়ৌ দ্রুততরং দ্বিজঃ

166.5

ততোঽন্যস্মিন্গতে চাহ্নি বিরূপাক্ষোঽব্রবীত্সুতম্
ন প্রেক্ষে রাজধর্মাণমদ্য পুত্র খগোত্তমম্

166.6

স পূর্বসংধ্যাং ব্রহ্মাণং বন্দিতুং যাতি সর্বদা
মাং চাদৃষ্ট্বা কদাচিত্স ন গচ্ছতি গৃহান্খগঃ

166.7

উভে দ্বিরাত্রং সংধ্যে বৈ নাভ্যগাত্স মমালয়ম্
তস্মান্ন শুধ্যতে ভাবো মম স জ্ঞায়তাং সুহৃৎ

166.8

স্বাধ্যায়েন বিয়ুক্তো হি ব্রহ্মবর্চসবর্জিতঃ
তং গতস্তত্র মে শঙ্কা হন্যাত্তং স দ্বিজাধমঃ

166.9

দুরাচারস্তু দুর্বুদ্ধিরিঙ্গিতৈর্লক্ষিতো ময়া
নিষ্ক্রিয়ো দারুণাকারঃ কৃষ্ণো দস্যুরিবাধমঃ

166.10

গৌতমঃ স গতস্তত্র তেনোদ্বিগ্নং মনো মম
পুত্র শীঘ্রমিতো গত্বা রাজধর্মনিবেশনম্
জ্ঞায়তাং স বিশুদ্ধাত্মা যদি জীবতি মাচিরম্

166.11

স এবমুক্তস্ত্বরিতো রক্ষোভিঃ সহিতো যয়ৌ
ন্যগ্রোধং তত্র চাপশ্যত্কঙ্কালং রাজধর্মণঃ

166.12

স রুদন্নগমত্পুত্রো রাক্ষসেন্দ্রস্য ধীমতঃ
ত্বরমাণঃ পরং শক্ত্যা গৌতমগ্রহণায় বৈ

166.13

ততোঽবিদূরে জগৃহুর্গৌতমং রাক্ষসাস্তদা
রাজধর্মশরীরং চ পক্ষাস্থিচরণোজ্ঝিতম্

166.14

তমাদায়াথ রক্ষাংসি দ্রুতং মেরুব্রজং যয়ুঃ
রাজ্ঞশ্চ দর্শয়ামাসুঃ শরীরং রাজধর্মণঃ
কৃতঘ্নং পুরুষং তং চ গৌতমং পাপচেতসম্

166.15

রুরোদ রাজা তং দৃষ্ট্বা সামাত্যঃ সপুরোহিতঃ
আর্তনাদশ্চ সুমহানভূত্তস্য নিবেশনে

166.16

সস্ত্রীকুমারং চ পুরং বভূবাস্বস্থমানসম্
অথাব্রবীন্নৃপঃ পুত্রং পাপোঽয়ং বধ্যতামিতি

166.17

অস্য মাংসৈরিমে সর্বে বিহরন্তু যথেষ্টতঃ
পাপাচারঃ পাপকর্মা পাপাত্মা পাপনিশ্চয়ঃ
হন্তব্যোঽয়ং মম মতির্ভবদ্ভিরিতি রাক্ষসাঃ

166.18

ইত্যুক্তা রাক্ষসেন্দ্রেণ রাক্ষসা ঘোরবিক্রমাঃ
নৈচ্ছন্ত তং ভক্ষয়িতুং পাপকর্মায়মিত্যুত

166.19

দস্যূনাং দীয়তামেষ সাধ্বদ্য পুরুষাধমঃ
ইত্যূচুস্তং মহারাজ রাক্ষসেন্দ্রং নিশাচরাঃ

166.20

শিরোভিশ্চ গতা ভূমিমূচূ রক্ষোগণাধিপম্
ন দাতুমর্হসি ত্বং নো ভক্ষণায়াস্য কিল্বিষম্

166.21

এবমস্ত্বিতি তানাহ রাক্ষসেন্দ্রো নিশাচরান্
দস্যূনাং দীয়তামেষ কৃতঘ্নোঽদ্যৈব রাক্ষসাঃ

166.22

ইত্যুক্তে তস্য তে দাসাঃ শূলমুদ্গরপাণয়ঃ
ছিত্ত্বা তং খণ্ডশঃ পাপং দস্যুভ্যঃ প্রদদুস্তদা

166.23

দস্যবশ্চাপি নৈচ্ছন্ত তমত্তুং পাপকারিণম্
ক্রব্যাদা অপি রাজেন্দ্র কৃতঘ্নং নোপভুঞ্জতে

166.24

ব্রহ্মঘ্নে চ সুরাপে চ চোরে ভগ্নব্রতে তথা
নিষ্কৃতির্বিহিতা রাজন্কৃতঘ্নে নাস্তি নিষ্কৃতিঃ

166.25

মিত্রদ্রোহী নৃশংসশ্চ কৃতঘ্নশ্চ নরাধমঃ
ক্রব্যাদৈঃ কৃমিভিশ্চান্যৈর্ন ভুজ্যন্তে হি তাদৃশাঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.