Utshovঅধ্যায় 165
165.1
ভীষ্ম উবাচ
ততঃ স বিদিতো রাজ্ঞঃ প্রবিশ্য গৃহমুত্তমম্
পূজিতো রাক্ষসেন্দ্রেণ নিষসাদাসনোত্তমে
165.2
পৃষ্টশ্চ গোত্রচরণং স্বাধ্যায়ং ব্রহ্মচারিকম্
ন তত্র ব্যাজহারান্যদ্গোত্রমাত্রাদৃতে দ্বিজঃ
165.3
ব্রহ্মবর্চসহীনস্য স্বাধ্যায়বিরতস্য চ
গোত্রমাত্রবিদো রাজা নিবাসং সমপৃচ্ছত
165.4
ক্ব তে নিবাসঃ কল্যাণ কিংগোত্রা ব্রাহ্মণী চ তে
তত্ত্বং ব্রূহি ন ভীঃ কার্যা বিশ্রমস্ব যথাসুখম্
165.5
গৌতম উবাচ
মধ্যদেশপ্রসূতোঽহং বাসো মে শবরালয়ে
শূদ্রা পুনর্ভূর্ভার্যা মে সত্যমেতদ্ব্রবীমি তে
165.6
ভীষ্ম উবাচ
ততো রাজা বিমমৃশে কথং কার্যমিদং ভবেৎ
কথং বা সুকৃতং মে স্যাদিতি বুদ্ধ্যান্বচিন্তয়ৎ
165.7
অয়ং বৈ জননাদ্বিপ্রঃ সুহৃত্তস্য মহাত্মনঃ
সংপ্রেষিতশ্চ তেনায়ং কাশ্যপেন মমান্তিকম্
165.8
তস্য প্রিয়ং করিষ্যামি স হি মামাশ্রিতঃ সদা
ভ্রাতা মে বান্ধবশ্চাসৌ সখা চ হৃদয়ংগমঃ
165.9
কার্ত্তিক্যামদ্য ভোক্তারঃ সহস্রং মে দ্বিজোত্তমাঃ
তত্রায়মপি ভোক্তা বৈ দেয়মস্মৈ চ মে ধনম্
165.10
ততঃ সহস্রং বিপ্রাণাং বিদুষাং সমলংকৃতম্
স্নাতানামনুসংপ্রাপ্তমহতক্ষৌমবাসসাম্
165.11
তানাগতান্দ্বিজশ্রেষ্ঠান্বিরূপাক্ষো বিশাং পতে
যথার্হং প্রতিজগ্রাহ বিধিদৃষ্টেন কর্মণা
165.12
বৃস্যস্তেষাং তু সংন্যস্তা রাক্ষসেন্দ্রস্য শাসনাৎ
ভূমৌ বরকুথাস্তীর্ণাঃ প্রেষ্যৈর্ভরতসত্তম
165.13
তাসু তে পূজিতা রাজ্ঞা নিষণ্ণা দ্বিজসত্তমাঃ
ব্যরাজন্ত মহারাজ নক্ষত্রপতয়ো যথা
165.14
ততো জাম্বূনদাঃ পাত্রীর্বজ্রাঙ্কা বিমলাঃ শুভাঃ
বরান্নপূর্ণা বিপ্রেভ্যঃ প্রাদান্মধুঘৃতাপ্লুতাঃ
165.15
তস্য নিত্যং তথাষাঢ্যাং মাঘ্যাং চ বহবো দ্বিজাঃ
ঈপ্সিতং ভোজনবরং লভন্তে সত্কৃতং সদা
165.16
বিশেষতস্তু কার্ত্তিক্যাং দ্বিজেভ্যঃ সংপ্রয়চ্ছতি
শরদ্ব্যপায়ে রত্নানি পৌর্ণমাস্যামিতি শ্রুতিঃ
165.17
সুবর্ণং রজতং চৈব মণীনথ চ মৌক্তিকম্
বজ্রান্মহাধনাংশ্চৈব বৈডূর্যাজিনরাঙ্কবান্
165.18
রত্নরাশীন্বিনিক্ষিপ্য দক্ষিণার্থে স ভারত
ততঃ প্রাহ দ্বিজশ্রেষ্ঠান্বিরূপাক্ষো মহায়শাঃ
165.19
গৃহ্ণীত রত্নান্যেতানি যথোত্সাহং যথেষ্টতঃ
যেষু যেষু চ ভাণ্ডেষু ভুক্তং বো দ্বিজসত্তমাঃ
তান্যেবাদায় গচ্ছধ্বং স্ববেশ্মানীতি ভারত
165.20
ইত্যুক্তবচনে তস্মিন্রাক্ষসেন্দ্রে মহাত্মনি
যথেষ্টং তানি রত্নানি জগৃহুর্ব্রাহ্মণর্ষভাঃ
165.21
ততো মহার্হৈস্তে সর্বে রত্নৈরভ্যর্চিতাঃ শুভৈঃ
ব্রাহ্মণা মৃষ্টবসনাঃ সুপ্রীতাঃ স্ম তদাভবন্
165.22
ততস্তান্রাক্ষসেন্দ্রশ্চ দ্বিজানাহ পুনর্বচঃ
নানাদিগাগতান্রাজন্রাক্ষসান্প্রতিষিধ্য বৈ
165.23
অধ্যৈকদিবসং বিপ্রা ন বোঽস্তীহ ভয়ং ক্বচিৎ
রাক্ষসেভ্যঃ প্রমোদধ্বমিষ্টতো যাত মাচিরম্
165.24
ততঃ প্রদুদ্রুবুঃ সর্বে বিপ্রসংঘাঃ সমন্ততঃ
গৌতমোঽপি সুবর্ণস্য ভারমাদায় সত্বরঃ
165.25
কৃচ্ছ্রাত্সমুদ্বহন্বীর ন্যগ্রোধং সমুপাগমৎ
ন্যষীদচ্চ পরিশ্রান্তঃ ক্লান্তশ্চ ক্ষুধিতশ্চ হ
165.26
ততস্তমভ্যগাদ্রাজন্রাজধর্মা খগোত্তমঃ
স্বাগতেনাভ্যনন্দচ্চ গৌতমং মিত্রবত্সলঃ
165.27
তস্য পক্ষাগ্রবিক্ষেপৈঃ ক্লমং ব্যপনয়ত্খগঃ
পূজাং চাপ্যকরোদ্ধীমান্ভোজনং চাপ্যকল্পয়ৎ
165.28
স ভুক্তবান্সুবিশ্রান্তো গৌতমোঽচিন্তয়ত্তদা
হাটকস্যাভিরূপস্য ভারোঽয়ং সুমহান্ময়া
গৃহীতো লোভমোহাদ্বৈ দূরং চ গমনং মম
165.29
ন চাস্তি পথি ভোক্তব্যং প্রাণসংধারণং মম
কিং কৃত্বা ধারয়েয়ং বৈ প্রাণানিত্যভ্যচিন্তয়ৎ
165.30
ততঃ স পথি ভোক্তব্যং প্রেক্ষমাণো ন কিংচন
কৃতঘ্নঃ পুরুষব্যাঘ্র মনসেদমচিন্তয়ৎ
165.31
অয়ং বকপতিঃ পার্শ্বে মাংসরাশিঃ স্থিতো মম
ইমং হত্বা গৃহীত্বা চ যাস্যেঽহং সমভিদ্রুতম্