Utshovঅধ্যায় 164
164.1
ভীষ্ম উবাচ
গিরং তাং মধুরাং শ্রুত্বা গৌতমো বিস্মিতস্তদা
কৌতূহলান্বিতো রাজন্রাজধর্মাণমৈক্ষত
164.2
রাজধর্মোবাচ
ভোঃ কশ্যপস্য পুত্রোঽহং মাতা দাক্ষায়ণী চ মে
অতিথিস্ত্বং গুণোপেতঃ স্বাগতং তে দ্বিজর্ষভ
164.3
ভীষ্ম উবাচ
তস্মৈ দত্ত্বা স সত্কারং বিধিদৃষ্টেন কর্মণা
শালপুষ্পময়ীং দিব্যাং বৃসীং সমুপকল্পয়ৎ
164.4
ভগীরথরথাক্রান্তান্দেশান্গঙ্গানিষেবিতান্
যে চরন্তি মহামীনাস্তাংশ্চ তস্যান্বকল্পয়ৎ
164.5
বহ্নিং চাপি সুসংদীপ্তং মীনাংশ্চৈব সুপীবরান্
স গৌতমায়াতিথয়ে ন্যবেদয়ত কাশ্যপঃ
164.6
ভুক্তবন্তং চ তং বিপ্রং প্রীতাত্মানং মহামনাঃ
ক্লমাপনয়নার্থং স পক্ষাভ্যামভ্যবীজয়ৎ
164.7
ততো বিশ্রান্তমাসীনং গোত্রপ্রশ্নমপৃচ্ছত
সোঽব্রবীদ্গৌতমোঽস্মীতি ব্রাহ্ম নান্যদুদাহরৎ
164.8
তস্মৈ পর্ণময়ং দিব্যং দিব্যপুষ্পাধিবাসিতম্
গন্ধাঢ্যং শয়নং প্রাদাত্স শিশ্যে তত্র বৈ সুখম্
164.9
অথোপবিষ্টং শয়নে গৌতমং বকরাট্তদা
পপ্রচ্ছ কাশ্যপো বাগ্মী কিমাগমনকারণম্
164.10
ততোঽব্রবীদ্গৌতমস্তং দরিদ্রোঽহং মহামতে
সমুদ্রগমনাকাঙ্ক্ষী দ্রব্যার্থমিতি ভারত
164.11
তং কাশ্যপোঽব্রবীত্প্রীতো নোত্কণ্ঠাং কর্তুমর্হসি
কৃতকার্যো দ্বিজশ্রেষ্ঠ সদ্রব্যো যাস্যসে গৃহান্
164.12
চতুর্বিধা হ্যর্থগতির্বৃহস্পতিমতং যথা
পারংপর্যং তথা দৈবং কর্ম মিত্রমিতি প্রভো
164.13
প্রাদুর্ভূতোঽস্মি তে মিত্রং সুহৃত্ত্বং চ মম ত্বয়ি
সোঽহং তথা যতিষ্যামি ভবিষ্যসি যথার্থবান্
164.14
ততঃ প্রভাতসময়ে সুখং পৃষ্ট্বাব্রবীদিদম্
গচ্ছ সৌম্য পথানেন কৃতকৃত্যো ভবিষ্যসি
164.15
ইতস্ত্রিয়োজনং গত্বা রাক্ষসাধিপতির্মহান্
বিরূপাক্ষ ইতি খ্যাতঃ সখা মম মহাবলঃ
164.16
তং গচ্ছ দ্বিজমুখ্য ত্বং মম বাক্যপ্রচোদিতঃ
কামানভীপ্সিতাংস্তুভ্যং দাতা নাস্ত্যত্র সংশয়ঃ
164.17
ইত্যুক্তঃ প্রয়য়ৌ রাজন্গৌতমো বিগতক্লমঃ
ফলান্যমৃতকল্পানি ভক্ষয়ন্স্ম যথেষ্টতঃ
164.18
চন্দনাগুরুমুখ্যানি ত্বক্পত্রাণাং বনানি চ
তস্মিন্পথি মহারাজ সেবমানো দ্রুতং যয়ৌ
164.19
ততো মেরুব্রজং নাম নগরং শৈলতোরণম্
শৈলপ্রাকারবপ্রং চ শৈলয়ন্ত্রার্গলং তথা
164.20
বিদিতশ্চাভবত্তস্য রাক্ষসেন্দ্রস্য ধীমতঃ
প্রহিতঃ সুহৃদা রাজন্প্রীয়তা বৈ প্রিয়াতিথিঃ
164.21
ততঃ স রাক্ষসেন্দ্রঃ স্বান্প্রেষ্যানাহ যুধিষ্ঠির
গৌতমো নগরদ্বারাচ্ছীঘ্রমানীয়তামিতি
164.22
ততঃ পুরবরাত্তস্মাত্পুরুষাঃ শ্বেতবেষ্টনাঃ
গৌতমেত্যভিভাষন্তঃ পুরদ্বারমুপাগমন্
164.23
তে তমূচুর্মহারাজ প্রেষ্যা রক্ষঃপতের্দ্বিজম্
ত্বরস্ব তূর্ণমাগচ্ছ রাজা ত্বাং দ্রষ্টুমিচ্ছতি
164.24
রাক্ষসাধিপতির্বীরো বিরূপাক্ষ ইতি শ্রুতঃ
স ত্বাং ত্বরতি বৈ দ্রষ্টুং তত্ক্ষিপ্রং সংবিধীয়তাম্
164.25
ততঃ স প্রাদ্রবদ্বিপ্রো বিস্ময়াদ্বিগতক্লমঃ
গৌতমো নগরর্দ্ধিং তাং পশ্যন্পরমবিস্মিতঃ
164.26
তৈরেব সহিতো রাজ্ঞো বেশ্ম তূর্ণমুপাদ্রবৎ
দর্শনং রাক্ষসেন্দ্রস্য কাঙ্ক্ষমাণো দ্বিজস্তদা