অধ্যায় 163

163.1

ভীষ্ম উবাচ
তস্যাং নিশায়াং ব্যুষ্টায়াং গতে তস্মিন্দ্বিজোত্তমে
নিষ্ক্রম্য গৌতমোঽগচ্ছত্সমুদ্রং প্রতি ভারত

সামুদ্রকান্স বণিজস্ততোঽপশ্যত্স্থিতান্পথি
স তেন সার্থেন সহ প্রয়য়ৌ সাগরং প্রতি

স তু সার্থো মহারাজ কস্মিংশ্চিদ্গিরিগহ্বরে
মত্তেন দ্বিরদেনাথ নিহতঃ প্রায়শোঽভবৎ

স কথংচিত্ততস্তস্মাত্সার্থান্মুক্তো দ্বিজস্তদা
কাংদিগ্ভূতো জীবিতার্থী প্রদুদ্রাবোত্তরাং দিশম্

স সর্বতঃ পরিভ্রষ্টঃ সার্থাদ্দেশাত্তথার্থতঃ
একাকী ব্যদ্রবত্তত্র বনে কিংপুরুষো যথা

স পন্থানমথাসাদ্য সমুদ্রাভিসরং তদা
আসসাদ বনং রম্যং মহত্পুষ্পিতপাদপম্

সর্বর্তুকৈরাম্রবনৈঃ পুষ্পিতৈরুপশোভিতম্
নন্দনোদ্দেশসদৃশং যক্ষকিংনরসেবিতম্

শালতালধবাশ্বত্থত্বচাগুরুবনৈস্তথা
চন্দনস্য চ মুখ্যস্য পাদপৈরুপশোভিতম্
গিরিপ্রস্থেষু রম্যেষু শুভেষু সুসুগন্ধিষু

সমন্ততো দ্বিজশ্রেষ্ঠা বল্গু কূজন্তি তত্র বৈ
মনুষ্যবদনাস্ত্বন্যে ভারুণ্ডা ইতি বিশ্রুতাঃ
ভূলিঙ্গশকুনাশ্চান্যে সমুদ্রং সর্বতোঽভবন্

স তান্যতিমনোজ্ঞানি বিহংগাভিরুতানি বৈ
শৃণ্বন্সুরমণীয়ানি বিপ্রোঽগচ্ছত গৌতমঃ

ততোঽপশ্যত্সুরম্যে স সুবর্ণসিকতাচিতে
দেশভাগে সমে চিত্রে স্বর্গোদ্দেশসমপ্রভে

শ্রিয়া জুষ্টং মহাবৃক্ষং ন্যগ্রোধং পরিমণ্ডলম্
শাখাভিরনুরূপাভির্ভূষিতং ছত্রসংনিভম্

তস্য মূলং সুসংসিক্তং বরচন্দনবারিণা
দিব্যপুষ্পান্বিতং শ্রীমত্পিতামহসদোপমম্

তং দৃষ্ট্বা গৌতমঃ প্রীতো মুনিকান্তমনুত্তমম্
মেধ্যং সুরগৃহপ্রখ্যং পুষ্পিতৈঃ পাদপৈর্বৃতম্
তমাগম্য মুদা যুক্তস্তস্যাধস্তাদুপাবিশৎ

তত্রাসীনস্য কৌরব্য গৌতমস্য সুখঃ শিবঃ
পুষ্পাণি সমুপস্পৃশ্য প্রববাবনিলঃ শুচিঃ
হ্লাদয়ন্সর্বগাত্রাণি গৌতমস্য তদা নৃপ

স তু বিপ্রঃ পরিশ্রান্তঃ স্পৃষ্টঃ পুণ্যেন বায়ুনা
সুখমাসাদ্য সুষ্বাপ ভাস্করশ্চাস্তমভ্যগাৎ

ততোঽস্তং ভাস্করে যাতে সংধ্যাকাল উপস্থিতে
আজগাম স্বভবনং ব্রহ্মলোকাত্খগোত্তমঃ

নাডীজঙ্ঘ ইতি খ্যাতো দয়িতো ব্রহ্মণঃ সখা
বকরাজো মহাপ্রাজ্ঞঃ কশ্যপস্যাত্মসংভবঃ

রাজধর্মেতি বিখ্যাতো বভূবাপ্রতিমো ভুবি
দেবকন্যাসুতঃ শ্রীমান্বিদ্বান্দেবপতিপ্রভঃ

মৃষ্টহাটকসংছন্নো ভূষণৈরর্কসংনিভৈঃ
ভূষিতঃ সর্বগাত্রেষু দেবগর্ভঃ শ্রিয়া জ্বলন্

তমাগতং দ্বিজং দৃষ্ট্বা বিস্মিতো গৌতমোঽভবৎ
ক্ষুত্পিপাসাপরীতাত্মা হিংসার্থী চাপ্যবৈক্ষত

রাজধর্মোবাচ
স্বাগতং ভবতে বিপ্র দিষ্ট্যা প্রাপ্তোঽসি মে গৃহম্
অস্তং চ সবিতা যাতঃ সংধ্যেয়ং সমুপস্থিতা

মম ত্বং নিলয়ং প্রাপ্তঃ প্রিয়াতিথিরনিন্দিতঃ
পূজিতো যাস্যসি প্রাতর্বিধিদৃষ্টেন কর্মণা