Utshovঅধ্যায় 162
162.1
যুধিষ্ঠির উবাচ
পিতামহ মহাপ্রাজ্ঞ কুরূণাং কীর্তিবর্ধন
প্রশ্নং কংচিত্প্রবক্ষ্যামি তন্মে ব্যাখ্যাতুমর্হসি
162.2
কীদৃশা মানবাঃ সৌম্যাঃ কৈঃ প্রীতিঃ পরমা ভবেৎ
আয়ত্যাং চ তদাত্বে চ কে ক্ষমাস্তান্বদস্ব মে
162.3
ন হি তত্র ধনং স্ফীতং ন চ সংবন্ধিবান্ধবাঃ
তিষ্ঠন্তি যত্র সুহৃদস্তিষ্ঠন্তীতি মতির্মম
162.4
দুর্লভো হি সুহৃচ্ছ্রোতা দুর্লভশ্চ হিতঃ সুহৃৎ
এতদ্ধর্মভৃতাং শ্রেষ্ঠ সর্বং ব্যাখ্যাতুমর্হসি
162.5
ভীষ্ম উবাচ
সংধেয়ান্পুরুষান্রাজন্নসংধেয়াংশ্চ তত্ত্বতঃ
বদতো মে নিবোধ ত্বং নিখিলেন যুধিষ্ঠির
162.6
লুব্ধঃ ক্রূরস্ত্যক্তধর্মা নিকৃতঃ শঠ এব চ
ক্ষুদ্রঃ পাপসমাচারঃ সর্বশঙ্কী তথালসঃ
162.7
দীর্ঘসূত্রোঽনৃজুঃ কষ্টো গুরুদারপ্রধর্ষকঃ
ব্যসনে যঃ পরিত্যাগী দুরাত্মা নিরপত্রপঃ
162.8
সর্বতঃ পাপদর্শী চ নাস্তিকো বেদনিন্দকঃ
সংপ্রকীর্ণেন্দ্রিয়ো লোকে যঃ কামনিরতশ্চরেৎ
162.9
অসত্যো লোকবিদ্বিষ্টঃ সময়ে চানবস্থিতঃ
পিশুনোঽথাকৃতপ্রজ্ঞো মত্সরী পাপনিশ্চয়ঃ
162.10
দুঃশীলোঽথাকৃতাত্মা চ নৃশংসঃ কিতবস্তথা
মিত্রৈরর্থকৃতী নিত্যমিচ্ছত্যর্থপরশ্চ যঃ
162.11
বহতশ্চ যথাশক্তি যো ন তুষ্যতি মন্দধীঃ
অমিত্রমিব যো ভুঙ্ক্তে সদা মিত্রং নরর্ষভ
162.12
অস্থানক্রোধনো যশ্চ অকস্মাচ্চ বিরজ্যতে
সুহৃদশ্চৈব কল্যাণানাশু ত্যজতি কিল্বিষী
162.13
অল্পেঽপ্যপকৃতে মূঢস্তথাজ্ঞানাত্কৃতেঽপি চ
কার্যোপসেবী মিত্রেষু মিত্রদ্বেষী নরাধিপ
162.14
শত্রুর্মিত্রমুখো যশ্চ জিহ্মপ্রেক্ষী বিলোভনঃ
ন রজ্যতি চ কল্যাণে যস্ত্যজেত্তাদৃশং নরম্
162.15
পানপো দ্বেষণঃ ক্রূরো নির্ঘৃণঃ পরুষস্তথা
পরোপতাপী মিত্রধ্রুক্তথা প্রাণিবধে রতঃ
162.16
কৃতঘ্নশ্চাধমো লোকে ন সংধেয়ঃ কথংচন
ছিদ্রান্বেষী ন সংধেয়ঃ সংধেয়ানপি মে শৃণু
162.17
কুলীনা বাক্যসংপন্না জ্ঞানবিজ্ঞানকোবিদাঃ
মিত্রজ্ঞাশ্চ কৃতজ্ঞাশ্চ সর্বজ্ঞাঃ শোকবর্জিতাঃ
162.18
মাধুর্যগুণসংপন্নাঃ সত্যসংধা জিতেন্দ্রিয়াঃ
ব্যায়ামশীলাঃ সততং ভৃতপুত্রাঃ কুলোদ্গতাঃ
162.19
রূপবন্তো গুণোপেতাস্তথালুব্ধা জিতশ্রমাঃ
দোষৈর্বিয়ুক্তাঃ প্রথিতৈস্তে গ্রাহ্যাঃ পার্থিবেন হ
162.20
যথাশক্তিসমাচারাঃ সন্তস্তুষ্যন্তি হি প্রভো
নাস্থানে ক্রোধবন্তশ্চ ন চাকস্মাদ্বিরাগিণঃ
162.21
বিরক্তাশ্চ ন রুষ্যন্তি মনসাপ্যর্থকোবিদাঃ
আত্মানং পীডয়িত্বাপি সুহৃত্কার্যপরায়ণাঃ
ন বিরজ্যন্তি মিত্রেভ্যো বাসো রক্তমিবাবিকম্
162.22
দোষাংশ্চ লোভমোহাদীনর্থেষু যুবতিষ্বথ
ন দর্শয়ন্তি সুহৃদাং বিশ্বস্তা বন্ধুবত্সলাঃ
162.23
লোষ্টকাঞ্চনতুল্যার্থাঃ সুহৃত্স্বশঠবুদ্ধয়ঃ
যে চরন্ত্যনভীমানা নিসৃষ্টার্থবিভূষণাঃ
সংগৃহ্ণন্তঃ পরিজনং স্বাম্যর্থপরমাঃ সদা
162.24
ঈদৃশৈঃ পুরুষশ্রেষ্ঠৈঃ সংধিং যঃ কুরুতে নৃপঃ
তস্য বিস্তীর্যতে রাষ্ট্রং জ্যোত্স্না গ্রহপতেরিব
162.25
শাস্ত্রনিত্যা জিতক্রোধা বলবন্তো রণপ্রিয়াঃ
ক্ষান্তাঃ শীলগুণোপেতাঃ সংধেয়াঃ পুরুষোত্তমাঃ
162.26
যে চ দোষসমায়ুক্তা নরাঃ প্রোক্তা ময়ানঘ
তেষামপ্যধমো রাজন্কৃতঘ্নো মিত্রঘাতকঃ
ত্যক্তব্যঃ স দুরাচারঃ সর্বেষামিতি নিশ্চয়ঃ
162.27
যুধিষ্ঠির উবাচ
বিস্তরেণার্থসংবন্ধং শ্রোতুমিচ্ছামি পার্থিব
মিত্রদ্রোহী কৃতঘ্নশ্চ যঃ প্রোক্তস্তং চ মে বদ
162.28
ভীষ্ম উবাচ
হন্ত তে বর্তয়িষ্যেঽহমিতিহাসং পুরাতনম্
উদীচ্যাং দিশি যদ্বৃত্তং ম্লেচ্ছেষু মনুজাধিপ
162.29
ব্রাহ্মণো মধ্যদেশীয়ঃ কৃষ্ণাঙ্গো ব্রহ্মবর্জিতঃ
গ্রামং প্রেক্ষ্য জনাকীর্ণং প্রাবিশদ্ভৈক্ষকাঙ্ক্ষয়া
162.30
তত্র দস্যুর্ধনয়ুতঃ সর্ববর্ণবিশেষবিৎ
ব্রহ্মণ্যঃ সত্যসংধশ্চ দানে চ নিরতোঽভবৎ
162.31
তস্য ক্ষয়মুপাগম্য ততো ভিক্ষাময়াচত
প্রতিশ্রয়ং চ বাসার্থং ভিক্ষাং চৈবাথ বার্ষিকীম্
162.32
প্রাদাত্তস্মৈ স বিপ্রায় বস্ত্রং চ সদৃশং নবম্
নারীং চাপি বয়োপেতাং ভর্ত্রা বিরহিতাং তদা
162.33
এতত্সংপ্রাপ্য হৃষ্টাত্মা দস্যোঃ সর্বং দ্বিজস্তদা
তস্মিন্গৃহবরে রাজংস্তয়া রেমে স গৌতমঃ
162.34
কুটুম্বার্থেষু দস্যোঃ স সাহায্যং চাপ্যথাকরোৎ
তত্রাবসত্সোঽথ বর্ষাঃ সমৃদ্ধে শবরালয়ে
বাণবেধ্যে পরং যত্নমকরোচ্চৈব গৌতমঃ
162.35
বক্রাঙ্গাংস্তু স নিত্যং বৈ সর্বতো বাণগোচরে
জঘান গৌতমো রাজন্যথা দস্যুগণস্তথা
162.36
হিংসাপরো ঘৃণাহীনঃ সদা প্রাণিবধে রতঃ
গৌতমঃ সংনিকর্ষেণ দস্যুভিঃ সমতামিয়াৎ
162.37
তথা তু বসতস্তস্য দস্যুগ্রামে সুখং তদা
অগচ্ছন্বহবো মাসা নিঘ্নতঃ পক্ষিণো বহূন্
162.38
ততঃ কদাচিদপরো দ্বিজস্তং দেশমাগমৎ
জটী চীরাজিনধরঃ স্বাধ্যায়পরমঃ শুচিঃ
162.39
বিনীতো নিয়তাহারো ব্রহ্মণ্যো বেদপারগঃ
সব্রহ্মচারী তদ্দেশ্যঃ সখা তস্যৈব সুপ্রিয়ম্
তং দস্যুগ্রামমগমদ্যত্রাসৌ গৌতমোঽভবৎ
162.40
স তু বিপ্রগৃহান্বেষী শূদ্রান্নপরিবর্জকঃ
গ্রামে দস্যুজনাকীর্ণে ব্যচরত্সর্বতোদিশম্
162.41
ততঃ স গৌতমগৃহং প্রবিবেশ দ্বিজোত্তমঃ
গৌতমশ্চাপি সংপ্রাপ্তস্তাবন্যোন্যেন সংগতৌ
162.42
বক্রাঙ্গভারহস্তং তং ধনুষ্পাণিং কৃতাগসম্
রুধিরেণাবসিক্তাঙ্গং গৃহদ্বারমুপাগতম্
162.43
তং দৃষ্ট্বা পুরুষাদাভমপধ্বস্তং ক্ষয়াগতম্
অভিজ্ঞায় দ্বিজো ব্রীডামগমদ্বাক্যমাহ চ
162.44
কিমিদং কুরুষে মৌঢ্যাদ্বিপ্রস্ত্বং হি কুলোদ্গতঃ
মধ্যদেশপরিজ্ঞাতো দস্যুভাবং গতঃ কথম্
162.45
পূর্বান্স্মর দ্বিজাগ্র্যাংস্তান্প্রখ্যাতান্বেদপারগান্
যেষাং বংশেঽভিজাতস্ত্বমীদৃশঃ কুলপাংসনঃ
162.46
অববুধ্যাত্মনাত্মানং সত্যং শীলং শ্রুতং দমম্
অনুক্রোশং চ সংস্মৃত্য ত্যজ বাসমিমং দ্বিজ
162.47
এবমুক্তঃ স সুহৃদা তদা তেন হিতৈষিণা
প্রত্যুবাচ ততো রাজন্বিনিশ্চিত্য তদার্তবৎ
162.48
অধনোঽস্মি দ্বিজশ্রেষ্ঠ ন চ বেদবিদপ্যহম্
বৃত্ত্যর্থমিহ সংপ্রাপ্তং বিদ্ধি মাং দ্বিজসত্তম
162.49
ত্বদ্দর্শনাত্তু বিপ্রর্ষে কৃতার্থং বেদ্ম্যহং দ্বিজ
আত্মানং সহ যাস্যাবঃ শ্বো বসাদ্যেহ শর্বরীম্