Utshovঅধ্যায় 161
161.1
বৈশংপায়ন উবাচ
ইত্যুক্তবতি ভীষ্মে তু তূষ্ণীংভূতে যুধিষ্ঠিরঃ
পপ্রচ্ছাবসরং গত্বা ভ্রাতৄন্বিদুরপঞ্চমান্
161.2
ধর্মে চার্থে চ কামে চ লোকবৃত্তিঃ সমাহিতা
তেষাং গরীয়ান্কতমো মধ্যমঃ কো লঘুশ্চ কঃ
161.3
কস্মিংশ্চাত্মা নিয়ন্তব্যস্ত্রিবর্গবিজয়ায় বৈ
সংতুষ্টা নৈষ্ঠিকং বাক্যং যথাবদ্বক্তুমর্হথ
161.4
ততোঽর্থগতিতত্ত্বজ্ঞঃ প্রথমং প্রতিভানবান্
জগাদ বিদুরো বাক্যং ধর্মশাস্ত্রমনুস্মরন্
161.5
বাহুশ্রুত্যং তপস্ত্যাগঃ শ্রদ্ধা যজ্ঞক্রিয়া ক্ষমা
ভাবশুদ্ধির্দয়া সত্যং সংয়মশ্চাত্মসংপদঃ
161.6
এতদেবাভিপদ্যস্ব মা তে ভূচ্চলিতং মনঃ
এতন্মূলৌ হি ধর্মার্থাবেতদেকপদং হিতম্
161.7
ধর্মেণৈবর্ষয়স্তীর্ণা ধর্মে লোকাঃ প্রতিষ্ঠিতাঃ
ধর্মেণ দেবা দিবিগা ধর্মে চার্থঃ সমাহিতঃ
161.8
ধর্মো রাজন্গুণশ্রেষ্ঠো মধ্যমো হ্যর্থ উচ্যতে
কামো যবীয়ানিতি চ প্রবদন্তি মনীষিণঃ
তস্মাদ্ধর্মপ্রধানেন ভবিতব্যং যতাত্মনা
161.9
সমাপ্তবচনে তস্মিন্নর্থশাস্ত্রবিশারদঃ
পার্থো বাক্যার্থতত্ত্বজ্ঞো জগৌ বাক্যমতন্দ্রিতঃ
161.10
কর্মভূমিরিয়ং রাজন্নিহ বার্ত্তা প্রশস্যতে
কৃষিবাণিজ্যগোরক্ষ্যং শিল্পানি বিবিধানি চ
161.11
অর্থ ইত্যেব সর্বেষাং কর্মণামব্যতিক্রমঃ
ন ঋতেঽর্থেন বর্তেতে ধর্মকামাবিতি শ্রুতিঃ
161.12
বিজয়ী হ্যর্থবান্ধর্মমারাধয়িতুমুত্তমম্
কামং চ চরিতুং শক্তো দুষ্প্রাপমকৃতাত্মভিঃ
161.13
অর্থস্যাবয়বাবেতৌ ধর্মকামাবিতি শ্রুতিঃ
অর্থসিদ্ধ্যা হি নির্বৃত্তাবুভাবেতৌ ভবিষ্যতঃ
161.14
উদ্ভূতার্থং হি পুরুষং বিশিষ্টতরয়োনয়ঃ
ব্রহ্মাণমিব ভূতানি সততং পর্যুপাসতে
161.15
জটাজিনধরা দান্তাঃ পঙ্কদিগ্ধা জিতেন্দ্রিয়াঃ
মুণ্ডা নিস্তন্তবশ্চাপি বসন্ত্যর্থার্থিনঃ পৃথক্
161.16
কাষায়বসনাশ্চান্যে শ্মশ্রুলা হ্রীসুসংবৃতাঃ
বিদ্বাংসশ্চৈব শান্তাশ্চ মুক্তাঃ সর্বপরিগ্রহৈঃ
161.17
অর্থার্থিনঃ সন্তি কেচিদপরে স্বর্গকাঙ্ক্ষিণঃ
কুলপ্রত্যাগমাশ্চৈকে স্বং স্বং মার্গমনুষ্ঠিতাঃ
161.18
আস্তিকা নাস্তিকাশ্চৈব নিয়তাঃ সংয়মে পরে
অপ্রজ্ঞানং তমোভূতং প্রজ্ঞানং তু প্রকাশতা
161.19
ভৃত্যান্ভোগৈর্দ্বিষো দণ্ডৈর্যো যোজয়তি সোঽর্থবান্
এতন্মতিমতাং শ্রেষ্ঠ মতং মম যথাতথম্
অনয়োস্তু নিবোধ ত্বং বচনং বাক্যকণ্ঠয়োঃ
161.20
ততো ধর্মার্থকুশলৌ মাদ্রীপুত্রাবনন্তরম্
নকুলঃ সহদেবশ্চ বাক্যং জগদতুঃ পরম্
161.21
আসীনশ্চ শয়ানশ্চ বিচরন্নপি চ স্থিতঃ
অর্থয়োগং দৃঢং কুর্যাদ্যোগৈরুচ্চাবচৈরপি
161.22
অস্মিংস্তু বৈ সুসংবৃত্তে দুর্লভে পরমপ্রিয়ে
ইহ কামানবাপ্নোতি প্রত্যক্ষং নাত্র সংশয়ঃ
161.23
যোঽর্থো ধর্মেণ সংয়ুক্তো ধর্মো যশ্চার্থসংয়ুতঃ
মধ্বিবামৃতসংয়ুক্তং তস্মাদেতৌ মতাবিহ
161.24
অনর্থস্য ন কামোঽস্তি তথার্থোঽধর্মিণঃ কুতঃ
তস্মাদুদ্বিজতে লোকো ধর্মার্থাদ্যো বহিষ্কৃতঃ
161.25
তস্মাদ্ধর্মপ্রধানেন সাধ্যোঽর্থঃ সংয়তাত্মনা
বিশ্বস্তেষু চ ভূতেষু কল্পতে সর্ব এব হি
161.26
ধর্মং সমাচরেত্পূর্বং তথার্থং ধর্মসংয়ুতম্
ততঃ কামং চরেত্পশ্চাত্সিদ্ধার্থস্য হি তত্ফলম্
161.27
বিরেমতুস্তু তদ্বাক্যমুক্ত্বা তাবশ্বিনোঃ সুতৌ
ভীমসেনস্তদা বাক্যমিদং বক্তুং প্রচক্রমে
161.28
নাকামঃ কাময়ত্যর্থং নাকামো ধর্মমিচ্ছতি
নাকামঃ কাময়ানোঽস্তি তস্মাত্কামো বিশিষ্যতে
161.29
কামেন যুক্তা ঋষয়স্তপস্যেব সমাহিতাঃ
পলাশফলমূলাশা বায়ুভক্ষাঃ সুসংয়তাঃ
161.30
বেদোপবাদেষ্বপরে যুক্তাঃ স্বাধ্যায়পারগাঃ
শ্রাদ্ধয়জ্ঞক্রিয়ায়াং চ তথা দানপ্রতিগ্রহে
161.31
বণিজঃ কর্ষকা গোপাঃ কারবঃ শিল্পিনস্তথা
দৈবকর্মকৃতশ্চৈব যুক্তাঃ কামেন কর্মসু
161.32
সমুদ্রং চাবিশন্ত্যন্যে নরাঃ কামেন সংয়ুতাঃ
কামো হি বিবিধাকারঃ সর্বং কামেন সংততম্
161.33
নাস্তি নাসীন্নাভবিষ্যদ্ভূতং কামাত্মকাত্পরম্
এতত্সারং মহারাজ ধর্মার্থাবত্র সংশ্রিতৌ
161.34
নবনীতং যথা দধ্নস্তথা কামোঽর্থধর্মতঃ
শ্রেয়স্তৈলং চ পিণ্যাকাদ্ঘৃতং শ্রেয় উদশ্বিতঃ
161.35
শ্রেয়ঃ পুষ্পফলং কাষ্ঠাত্কামো ধর্মার্থয়োর্বরঃ
পুষ্পতো মধ্বিব রসঃ কামাত্সংজায়তে সুখম্
161.36
সুচারুবেষাভিরলংকৃতাভি;র্মদোত্কটাভিঃ প্রিয়বাদিনীভিঃ
রমস্ব যোষাভিরুপেত্য কামং; কামো হি রাজংস্তরসাভিপাতী
161.37
বুদ্ধির্মমৈষা পরিষত্স্থিতস্য; মা ভূদ্বিচারস্তব ধর্মপুত্র
স্যাত্সংহিতং সদ্ভিরফল্গুসারং; সমেত্য বাক্যং পরমানৃশংস্যম্
161.38
ধর্মার্থকামাঃ সমমেব সেব্যা; যস্ত্বেকসেবী স নরো জঘন্যঃ
দ্বয়োস্তু দক্ষং প্রবদন্তি মধ্যং; স উত্তমো যো নিরতস্ত্রিবর্গে
161.39
প্রাজ্ঞঃ সুহৃচ্চন্দনসারলিপ্তো; বিচিত্রমাল্যাভরণৈরুপেতঃ
ততো বচঃ সংগ্রহবিগ্রহেণ; প্রোক্ত্বা যবীয়ান্বিররাম ভীমঃ
161.40
ততো মুহূর্তাদথ ধর্মরাজো; বাক্যানি তেষামনুচিন্ত্য সম্যক্
উবাচ বাচাবিতথং স্ময়ন্বৈ; বহুশ্রুতো ধর্মভৃতাং বরিষ্ঠঃ
161.41
নিঃসংশয়ং নিশ্চিতধর্মশাস্ত্রাঃ; সর্বে ভবন্তো বিদিতপ্রমাণাঃ
বিজ্ঞাতুকামস্য মমেহ বাক্য;মুক্তং যদ্বৈ নৈষ্ঠিকং তচ্ছ্রুতং মে
ইহ ত্ববশ্যং গদতো মমাপি; বাক্যং নিবোধধ্বমনন্যভাবাঃ
161.42
যো বৈ ন পাপে নিরতো ন পুণ্যে; নার্থে ন ধর্মে মনুজো ন কামে
বিমুক্তদোষঃ সমলোষ্টকাঞ্চনঃ; স মুচ্যতে দুঃখসুখার্থসিদ্ধেঃ
161.43
ভূতানি জাতীমরণান্বিতানি; জরাবিকারৈশ্চ সমন্বিতানি
ভূয়শ্চ তৈস্তৈঃ প্রতিবোধিতানি; মোক্ষং প্রশংসন্তি ন তং চ বিদ্মঃ
161.44
স্নেহে নবদ্ধস্য ন সন্তি তানী;ত্যেবং স্বয়ংভূর্ভগবানুবাচ
বুধাশ্চ নির্বাণপরা বদন্তি; তস্মান্ন কুর্যাত্প্রিয়মপ্রিয়ং চ
161.45
এতত্প্রধানং ন তু কামকারো; যথা নিয়ুক্তোঽস্মি তথা চরামি
ভূতানি সর্বাণি বিধির্নিয়ুঙ্ক্তে; বিধির্বলীয়ানিতি বিত্ত সর্বে
161.46
ন কর্মণাপ্নোত্যনবাপ্যমর্থং; যদ্ভাবি সর্বং ভবতীতি বিত্ত
ত্রিবর্গহীনোঽপি হি বিন্দতেঽর্থং; তস্মাদিদং লোকহিতায় গুহ্যম্
161.47
ততস্তদগ্র্যং বচনং মনোনুগং; সমস্তমাজ্ঞায় ততোঽতিহেতুমৎ
তদা প্রণেদুশ্চ জহর্ষিরে চ তে; কুরুপ্রবীরায় চ চক্রুরঞ্জলীন্
161.48
সুচারুবর্ণাক্ষরশব্দভূষিতাং; মনোনুগাং নির্ধুতবাক্যকণ্টকাম্
নিশম্য তাং পার্থিব পার্থভাষিতাং; গিরং নরেন্দ্রাঃ প্রশশংসুরেব তে
পুনশ্চ পপ্রচ্ছ সরিদ্বরাসুতং; ততঃ পরং ধর্মমহীনসত্ত্বঃ