Utshovঅধ্যায় 160
160.1
বৈশংপায়ন উবাচ
কথান্তরমথাসাদ্য খড্গয়ুদ্ধবিশারদঃ
নকুলঃ শরতল্পস্থমিদমাহ পিতামহম্
160.2
ধনুঃ প্রহরণং শ্রেষ্ঠমিতি বাদঃ পিতামহ
মতস্তু মম ধর্মজ্ঞ খড্গ এব সুসংশিতঃ
160.3
বিশীর্ণে কার্মুকে রাজন্প্রক্ষীণেষু চ বাজিষু
খড্গেন শক্যতে যুদ্ধে সাধ্বাত্মা পরিরক্ষিতুম্
160.4
শরাসনধরাংশ্চৈব গদাশক্তিধরাংস্তথা
একঃ খড্গধরো বীরঃ সমর্থঃ প্রতিবাধিতুম্
160.5
অত্র মে সংশয়শ্চৈব কৌতূহলমতীব চ
কিং স্বিত্প্রহরণং শ্রেষ্ঠং সর্বয়ুদ্ধেষু পার্থিব
160.6
কথং চোত্পাদিতঃ খড্গঃ কস্যার্থায় চ কেন বা
পূর্বাচার্যং চ খড্গস্য প্রব্রূহি প্রপিতামহ
160.7
তস্য তদ্বচনং শ্রুত্বা মাদ্রীপুত্রস্য ধীমতঃ
সর্বকৌশলসংয়ুক্তং সূক্ষ্মচিত্রার্থবচ্ছুভম্
160.8
ততস্তস্যোত্তরং বাক্যং স্বরবর্ণোপপাদিতম্
শিক্ষান্যায়োপসংপন্নং দ্রোণশিষ্যায় পৃচ্ছতে
160.9
উবাচ সর্বধর্মজ্ঞো ধনুর্বেদস্য পারগঃ
শরতল্পগতো ভীষ্মো নকুলায় মহাত্মনে
160.10
তত্ত্বং শৃণুষ্ব মাদ্রেয় যদেতত্পরিপৃচ্ছসি
প্রবোধিতোঽস্মি ভবতা ধাতুমানিব পর্বতঃ
160.11
সলিলৈকার্ণবং তাত পুরা সর্বমভূদিদম্
নিষ্প্রকম্পমনাকাশমনির্দেশ্যমহীতলম্
160.12
তমঃসংবৃতমস্পর্শমতিগম্ভীরদর্শনম্
নিঃশব্দং চাপ্রমেয়ং চ তত্র জজ্ঞে পিতামহঃ
160.13
সোঽসৃজদ্বায়ুমগ্নিং চ ভাস্করং চাপি বীর্যবান্
আকাশমসৃজচ্চোর্ধ্বমধো ভূমিং চ নৈরৃতিম্
160.14
নভঃ সচন্দ্রতারং চ নক্ষত্রাণি গ্রহাংস্তথা
সংবত্সরানহোরাত্রানৃতূনথ লবান্ক্ষণান্
160.15
ততঃ শরীরং লোকস্থং স্থাপয়িত্বা পিতামহঃ
জনয়ামাস ভগবান্পুত্রানুত্তমতেজসঃ
160.16
মরীচিমৃষিমত্রিং চ পুলস্ত্যং পুলহং ক্রতুম্
বসিষ্ঠাঙ্গিরসৌ চোভৌ রুদ্রং চ প্রভুমীশ্বরম্
160.17
প্রাচেতসস্তথা দক্ষঃ কন্যাঃ ষষ্টিমজীজনৎ
তা বৈ ব্রহ্মর্ষয়ঃ সর্বাঃ প্রজার্থং প্রতিপেদিরে
160.18
তাভ্যো বিশ্বানি ভূতানি দেবাঃ পিতৃগণাস্তথা
গন্ধর্বাপ্সরসশ্চৈব রক্ষাংসি বিবিধানি চ
160.19
পতত্রিমৃগমীনাশ্চ প্লবংগাশ্চ মহোরগাঃ
নানাকৃতিবলাশ্চান্যে জলক্ষিতিবিচারিণঃ
160.20
ঔদ্ভিদাঃ স্বেদজাশ্চৈব অণ্ডজাশ্চ জরায়ুজাঃ
জজ্ঞে তাত তথা সর্বং জগত্স্থাবরজঙ্গমম্
160.21
ভূতসর্গমিমং কৃত্বা সর্বলোকপিতামহঃ
শাশ্বতং বেদপঠিতং ধর্মং চ যুয়ুজে পুনঃ
160.22
তস্মিন্ধর্মে স্থিতা দেবাঃ সহাচার্যপুরোহিতাঃ
আদিত্যা বসবো রুদ্রাঃ সসাধ্যা মরুদশ্বিনঃ
160.23
ভৃগ্বত্র্যঙ্গিরসঃ সিদ্ধাঃ কাশ্যপশ্চ তপোধনঃ
বসিষ্ঠগৌতমাগস্ত্যাস্তথা নারদপর্বতৌ
160.24
ঋষয়ো বালখিল্যাশ্চ প্রভাসাঃ সিকতাস্তথা
ঘৃতাচাঃ সোমবায়ব্যা বৈখানসমরীচিপাঃ
160.25
অকৃষ্টাশ্চৈব হংসাশ্চ ঋষয়োঽথাগ্নিয়োনিজাঃ
বানপ্রস্থাঃ পৃশ্নয়শ্চ স্থিতা ব্রহ্মানুশাসনে
160.26
দানবেন্দ্রাস্ত্বতিক্রম্য তত্পিতামহশাসনম্
ধর্মস্যাপচয়ং চক্রুঃ ক্রোধলোভসমন্বিতাঃ
160.27
হিরণ্যকশিপুশ্চৈব হিরণ্যাক্ষো বিরোচনঃ
শম্বরো বিপ্রচিত্তিশ্চ প্রহ্রাদো নমুচির্বলিঃ
160.28
এতে চান্যে চ বহবঃ সগণা দৈত্যদানবাঃ
ধর্মসেতুমতিক্রম্য রেমিরেঽধর্মনিশ্চয়াঃ
160.29
সর্বে স্ম তুল্যজাতীয়া যথা দেবাস্তথা বয়ম্
ইত্যেবং হেতুমাস্থায় স্পর্ধমানাঃ সুরর্ষিভিঃ
160.30
ন প্রিয়ং নাপ্যনুক্রোশং চক্রুর্ভূতেষু ভারত
ত্রীনুপায়ানতিক্রম্য দণ্ডেন রুরুধুঃ প্রজাঃ
ন জগ্মুঃ সংবিদং তৈশ্চ দর্পাদসুরসত্তমাঃ
160.31
অথ বৈ ভগবান্ব্রহ্মা ব্রহ্মর্ষিভিরুপস্থিতঃ
তদা হিমবতঃ পৃষ্ঠে সুরম্যে পদ্মতারকে
160.32
শতয়োজনবিস্তারে মণিমুক্তাচয়াচিতে
তস্মিন্গিরিবরে পুত্র পুষ্পিতদ্রুমকাননে
তস্থৌ স বিবুধশ্রেষ্ঠো ব্রহ্মা লোকার্থসিদ্ধয়ে
160.33
ততো বর্ষসহস্রান্তে বিতানমকরোত্প্রভুঃ
বিধিনা কল্পদৃষ্টেন যথোক্তেনোপপাদিতম্
160.34
ঋষিভির্যজ্ঞপটুভির্যথাবত্কর্মকর্তৃভিঃ
মরুদ্ভিঃ পরিসংস্তীর্ণং দীপ্যমানৈশ্চ পাবকৈঃ
160.35
কাঞ্চনৈর্যজ্ঞভাণ্ডৈশ্চ ভ্রাজিষ্ণুভিরলংকৃতম্
বৃতং দেবগণৈশ্চৈব প্রবভৌ যজ্ঞমণ্ডলম্
160.36
তথা ব্রহ্মর্ষিভিশ্চৈব সদস্যৈরুপশোভিতম্
তত্র ঘোরতমং বৃত্তমৃষীণাং মে পরিশ্রুতম্
160.37
চন্দ্রমা বিমলং ব্যোম যথাভ্যুদিততারকম্
বিদার্যাগ্নিং তথা ভূতমুত্থিতং শ্রূয়তে ততঃ
160.38
নীলোত্পলসবর্ণাভং তীক্ষ্ণদংষ্ট্রং কৃশোদরম্
প্রাংশু দুর্দর্শনং চৈবাপ্যতিতেজস্তথৈব চ
160.39
তস্মিন্নুত্পতমানে চ প্রচচাল বসুংধরা
তত্রোর্মিকলিলাবর্তশ্চুক্ষুভে চ মহার্ণবঃ
160.40
পেতুরুল্কা মহোত্পাতাঃ শাখাশ্চ মুমুচুর্দ্রুমাঃ
অপ্রসন্না দিশঃ সর্বাঃ পবনশ্চাশিবো ববৌ
মুহুর্মুহুশ্চ ভূতানি প্রাব্যথন্ত ভয়াত্তথা
160.41
ততঃ সুতুমুলং দৃষ্ট্বা তদদ্ভুতমুপস্থিতম্
মহর্ষিসুরগন্ধর্বানুবাচেদং পিতামহঃ
160.42
ময়ৈতচ্চিন্তিতং ভূতমসির্নামৈষ বীর্যবান্
রক্ষণার্থায় লোকস্য বধায় চ সুরদ্বিষাম্
160.43
ততস্তদ্রূপমুত্সৃজ্য বভৌ নিস্ত্রিংশ এব সঃ
বিমলস্তীক্ষ্ণধারশ্চ কালান্তক ইবোদ্যতঃ
160.44
ততস্তং শিতিকণ্ঠায় রুদ্রায়র্ষভকেতবে
ব্রহ্মা দদাবসিং দীপ্তমধর্মপ্রতিবারণম্
160.45
ততঃ স ভগবান্রুদ্রো ব্রহ্মর্ষিগণসংস্তুতঃ
প্রগৃহ্যাসিমমেয়াত্মা রূপমন্যচ্চকার হ
160.46
চতুর্বাহুঃ স্পৃশন্মূর্ধ্না ভূস্থিতোঽপি নভস্তলম্
ঊর্ধ্বদৃষ্টির্মহালিঙ্গো মুখাজ্জ্বালাঃ সমুত্সৃজন্
বিকুর্বন্বহুধা বর্ণান্নীলপাণ্ডুরলোহিতান্
160.47
বিভ্রত্কৃষ্ণাজিনং বাসো হেমপ্রবরতারকম্
নেত্রং চৈকং ললাটেন ভাস্করপ্রতিমং মহৎ
শুশুভাতে চ বিমলে দ্বে নেত্রে কৃষ্ণপিঙ্গলে
160.48
ততো দেবো মহাদেবঃ শূলপাণির্ভগাক্ষিহা
সংপ্রগৃহ্য তু নিস্ত্রিংশং কালার্কানলসংনিভম্
160.49
ত্রিকূটং চর্ম চোদ্যম্য সবিদ্যুতমিবাম্বুদম্
চচার বিবিধান্মার্গান্মহাবলপরাক্রমঃ
বিধুন্বন্নসিমাকাশে দানবান্তচিকীর্ষয়া
160.50
তস্য নাদং বিনদতো মহাহাসং চ মুঞ্চতঃ
বভৌ প্রতিভয়ং রূপং তদা রুদ্রস্য ভারত
160.51
তদ্রূপধারিণং রুদ্রং রৌদ্রকর্ম চিকীর্ষবঃ
নিশম্য দানবাঃ সর্বে হৃষ্টাঃ সমভিদুদ্রুবুঃ
160.52
অশ্মভিশ্চাপ্যবর্ষন্ত প্রদীপ্তৈশ্চ তথোল্মুকৈঃ
ঘোরৈঃ প্রহরণৈশ্চান্যৈঃ শিতধারৈরয়োমুখৈঃ
160.53
ততস্তদ্দানবানীকং সংপ্রণেতারমচ্যুতম্
রুদ্রখড্গবলোদ্ধূতং প্রচচাল মুমোহ চ
160.54
চিত্রং শীঘ্রতরত্বাচ্চ চরন্তমসিধারিণম্
তমেকমসুরাঃ সর্বে সহস্রমিতি মেনিরে
160.55
ছিন্দন্ভিন্দন্রুজন্কৃন্তন্দারয়ন্প্রমথন্নপি
অচরদ্দৈত্যসংঘেষু রুদ্রোঽগ্নিরিব কক্ষগঃ
160.56
অসিবেগপ্ররুগ্ণাস্তে ছিন্নবাহূরুবক্ষসঃ
সংপ্রকৃত্তোত্তমাঙ্গাশ্চ পেতুরুর্ব্যাং মহাসুরাঃ
160.57
অপরে দানবা ভগ্না রুদ্রঘাতাবপীডিতাঃ
অন্যোন্যমভিনর্দন্তো দিশঃ সংপ্রতিপেদিরে
160.58
ভূমিং কেচিত্প্রবিবিশুঃ পর্বতানপরে তথা
অপরে জগ্মুরাকাশমপরেঽম্ভঃ সমাবিশন্
160.59
তস্মিন্মহতি সংবৃত্তে সমরে ভৃশদারুণে
বভৌ ভূমিঃ প্রতিভয়া তদা রুধিরকর্দমা
160.60
দানবানাং শরীরৈশ্চ মহদ্ভিঃ শোণিতোক্ষিতৈঃ
সমাকীর্ণা মহাবাহো শৈলৈরিব সকিংশুকৈঃ
160.61
রুধিরেণ পরিক্লিন্না প্রবভৌ বসুধা তদা
রক্তার্দ্রবসনা শ্যামা নারীব মদবিহ্বলা
160.62
স রুদ্রো দানবান্হত্বা কৃত্বা ধর্মোত্তরং জগৎ
রৌদ্রং রূপং বিহায়াশু চক্রে রূপং শিবং শিবঃ
160.63
ততো মহর্ষয়ঃ সর্বে সর্বে দেবগণাস্তথা
জয়েনাদ্ভুতকল্পেন দেবদেবমথার্চয়ন্
160.64
ততঃ স ভগবান্রুদ্রো দানবক্ষতজোক্ষিতম্
অসিং ধর্মস্য গোপ্তারং দদৌ সত্কৃত্য বিষ্ণবে
160.65
বিষ্ণুর্মরীচয়ে প্রাদান্মরীচির্ভগবাংশ্চ তম্
মহর্ষিভ্যো দদৌ খড্গমৃষয়ো বাসবায় তু
160.66
মহেন্দ্রো লোকপালেভ্যো লোকপালাস্তু পুত্রক
মনবে সূর্যপুত্রায় দদুঃ খড্গং সুবিস্তরম্
160.67
ঊচুশ্চৈনং তথৈবাদ্যং মানুষাণাং ত্বমীশ্বরঃ
অসিনা ধর্মগর্ভেণ পালয়স্ব প্রজা ইতি
160.68
ধর্মসেতুমতিক্রান্তাঃ সূক্ষ্মস্থূলার্থকারণাৎ
বিভজ্য দণ্ডং রক্ষ্যাঃ স্যুর্ধর্মতো ন যদৃচ্ছয়া
160.69
দুর্বাচা নিগ্রহো দণ্ডো হিরণ্যবহুলস্তথা
ব্যঙ্গনং চ শরীরস্য বধো বানল্পকারণাৎ
160.70
অসেরেতানি রূপাণি দুর্বাচাদীনি নির্দিশেৎ
অসেরেব প্রমাণানি পরিমাণব্যতিক্রমাৎ
160.71
অধিসৃজ্যাথ পুত্রং স্বং প্রজানামধিপং ততঃ
মনুঃ প্রজানাং রক্ষার্থং ক্ষুপায় প্রদদাবসিম্
160.72
ক্ষুপাজ্জগ্রাহ চেক্ষ্বাকুরিক্ষ্বাকোশ্চ পুরূরবাঃ
আয়ুশ্চ তস্মাল্লেভে তং নহুষশ্চ ততো ভুবি
160.73
যয়াতির্নহুষাচ্চাপি পূরুস্তস্মাচ্চ লব্ধবান্
আমূর্তরয়সস্তস্মাত্ততো ভূমিশয়ো নৃপঃ
160.74
ভরতশ্চাপি দৌঃষন্তির্লেভে ভূমিশয়াদসিম্
তস্মাচ্চ লেভে ধর্মজ্ঞো রাজন্নৈডবিডস্তথা
160.75
ততশ্চৈডবিডাল্লেভে ধুন্ধুমারো জনেশ্বরঃ
ধুন্ধুমারাচ্চ কাম্বোজো মুচুকুন্দস্ততোঽলভৎ
160.76
মুচুকুন্দান্মরুত্তশ্চ মরুত্তাদপি রৈবতঃ
রৈবতাদ্যুবনাশ্বশ্চ যুবনাশ্বাত্ততো রঘুঃ
160.77
ইক্ষ্বাকুবংশজস্তস্মাদ্ধরিণাশ্বঃ প্রতাপবান্
হরিণাশ্বাদসিং লেভে শুনকঃ শুনকাদপি
160.78
উশীনরো বৈ ধর্মাত্মা তস্মাদ্ভোজাঃ সয়াদবাঃ
যদুভ্যশ্চ শিবির্লেভে শিবেশ্চাপি প্রতর্দনঃ
160.79
প্রতর্দনাদষ্টকশ্চ রুশদশ্বোঽষ্টকাদপি
রুশদশ্বাদ্ভরদ্বাজো দ্রোণস্তস্মাত্কৃপস্ততঃ
ততস্ত্বং ভ্রাতৃভিঃ সার্ধং পরমাসিমবাপ্তবান্
160.80
কৃত্তিকাশ্চাস্য নক্ষত্রমসেরগ্নিশ্চ দৈবতম্
রোহিণ্যো গোত্রমস্যাথ রুদ্রশ্চ গুরুরুত্তমঃ
160.81
অসেরষ্টৌ চ নামানি রহস্যানি নিবোধ মে
পাণ্ডবেয় সদা যানি কীর্তয়ঁল্লভতে জয়ম্
160.82
অসির্বিশসনঃ খড্গস্তীক্ষ্ণবর্ত্মা দুরাসদঃ
শ্রীগর্ভো বিজয়শ্চৈব ধর্মপালস্তথৈব চ
160.83
অগ্র্যঃ প্রহরণানাং চ খড্গো মাদ্রবতীসুত
মহেশ্বরপ্রণীতশ্চ পুরাণে নিশ্চয়ং গতঃ
160.84
পৃথুস্তূত্পাদয়ামাস ধনুরাদ্যমরিংদম
তেনেয়ং পৃথিবী পূর্বং বৈন্যেন পরিরক্ষিতা
160.85
তদেতদার্ষং মাদ্রেয় প্রমাণং কর্তুমর্হসি
অসেশ্চ পূজা কর্তব্যা সদা যুদ্ধবিশারদৈঃ
160.86
ইত্যেষ প্রথমঃ কল্পো ব্যাখ্যাতস্তে সুবিস্তরঃ
অসেরুত্পত্তিসংসর্গো যথাবদ্ভরতর্ষভ
160.87
সর্বথৈতদিহ শ্রুত্বা খড্গসাধনমুত্তমম্
লভতে পুরুষঃ কীর্তিং প্রেত্য চানন্ত্যমশ্নুতে