Utshovঅধ্যায় 159
159.1
ভীষ্ম উবাচ
কৃতার্থো যক্ষ্যমাণশ্চ সর্ববেদান্তগশ্চ যঃ
আচার্যপিতৃভার্যার্থং স্বাধ্যায়ার্থমথাপি বা
159.2
এতে বৈ সাধবো দৃষ্টা ব্রাহ্মণা ধর্মভিক্ষবঃ
অস্বেভ্যো দেয়মেতেভ্যো দানং বিদ্যাবিশেষতঃ
159.3
অন্যত্র দক্ষিণা যা তু দেয়া ভরতসত্তম
অন্যেভ্যো হি বহির্বেদ্যাং নাকৃতান্নং বিধীয়তে
159.4
সর্বরত্নানি রাজা চ যথার্হং প্রতিপাদয়েৎ
ব্রাহ্মণাশ্চৈব যজ্ঞাশ্চ সহান্নাঃ সহদক্ষিণাঃ
159.5
যস্য ত্রৈবার্ষিকং ভক্তং পর্যাপ্তং ভৃত্যবৃত্তয়ে
অধিকং বাপি বিদ্যেত স সোমং পাতুমর্হতি
159.6
যজ্ঞশ্চেত্প্রতিবিদ্ধঃ স্যাদঙ্গেনৈকেন যজ্বনঃ
ব্রাহ্মণস্য বিশেষেণ ধার্মিকে সতি রাজনি
159.7
যো বৈশ্যঃ স্যাদ্বহুপশুর্হীনক্রতুরসোমপঃ
কুটুম্বাত্তস্য তদ্দ্রব্যং যজ্ঞার্থং পার্থিবো হরেৎ
159.8
আহরেদ্বেশ্মতঃ কিংচিত্কামং শূদ্রস্য দ্রব্যতঃ
ন হি বেশ্মনি শূদ্রস্য কশ্চিদস্তি পরিগ্রহঃ
159.9
যোঽনাহিতাগ্নিঃ শতগুরয়জ্বা চ সহস্রগুঃ
তয়োরপি কুটুম্বাভ্যামাহরেদবিচারয়ন্
159.10
অদাতৃভ্যো হরেন্নিত্যং ব্যাখ্যাপ্য নৃপতিঃ প্রভো
তথা হ্যাচরতো ধর্মো নৃপতেঃ স্যাদথাখিলঃ
159.11
তথৈব সপ্তমে ভক্তে ভক্তানি ষডনশ্নতা
অশ্বস্তনবিধানেন হর্তব্যং হীনকর্মণঃ
খলাত্ক্ষেত্রাত্তথাগারাদ্যতো বাপ্যুপপদ্যতে
159.12
আখ্যাতব্যং নৃপস্যৈতত্পৃচ্ছতোঽপৃচ্ছতোঽপি বা
ন তস্মৈ ধারয়েদ্দণ্ডং রাজা ধর্মেণ ধর্মবিৎ
159.13
ক্ষত্রিয়স্য হি বালিশ্যাদ্ব্রাহ্মণঃ ক্লিশ্যতে ক্ষুধা
শ্রুতশীলে সমাজ্ঞায় বৃত্তিমস্য প্রকল্পয়েৎ
অথৈনং পরিরক্ষেত পিতা পুত্রমিবৌরসম্
159.14
ইষ্টিং বৈশ্বানরীং নিত্যং নির্বপেদব্দপর্যয়ে
অবিকল্পঃ পুরাধর্মো ধর্মবাদৈস্তু কেবলম্
159.15
বিশ্বৈস্তু দেবৈঃ সাধ্যৈশ্চ ব্রাহ্মণৈশ্চ মহর্ষিভিঃ
আপত্সু মরণাদ্ভীতৈর্লিঙ্গপ্রতিনিধিঃ কৃতঃ
159.16
প্রভুঃ প্রথমকল্পস্য যোঽনুকল্পেন বর্ততে
ন সাংপরায়িকং তস্য দুর্মতের্বিদ্যতে ফলম্
159.17
ন ব্রাহ্মণান্বেদয়েত কশ্চিদ্রাজনি মানবঃ
অবীর্যো বেদনাদ্বিদ্যাত্সুবীর্যো বীর্যবত্তরম্
159.18
তস্মাদ্রাজ্ঞা সদা তেজো দুঃসহং ব্রহ্মবাদিনাম্
মন্তা শাস্তা বিধাতা চ ব্রাহ্মণো দেব উচ্যতে
তস্মিন্নাকুশলং ব্রূয়ান্ন শুক্তামীরয়েদ্গিরম্
159.19
ক্ষত্রিয়ো বাহুবীর্যেণ তরত্যাপদমাত্মনঃ
ধনেন বৈশ্যঃ শূদ্রশ্চ মন্ত্রৈর্হোমৈশ্চ বৈ দ্বিজঃ
159.20
ন বৈ কন্যা ন যুবতির্নামন্ত্রো ন চ বালিশঃ
পরিবেষ্টাগ্নিহোত্রস্য ভবেন্নাসংস্কৃতস্তথা
নরকে নিপতন্ত্যেতে জুহ্বানাঃ স চ যস্য তৎ
159.21
প্রাজাপত্যমদত্ত্বাশ্বমগ্ন্যাধেয়স্য দক্ষিণাম্
অনাহিতাগ্নিরিতি স প্রোচ্যতে ধর্মদর্শিভিঃ
159.22
পুণ্যান্যন্যানি কুর্বীত শ্রদ্দধানো জিতেন্দ্রিয়ঃ
অনাপ্তদক্ষিণৈর্যজ্ঞৈর্ন যজেত কথংচন
159.23
প্রজাঃ পশূংশ্চ স্বর্গং চ হন্তি যজ্ঞো হ্যদক্ষিণঃ
ইন্দ্রিয়াণি যশঃ কীর্তিমায়ুশ্চাস্যোপকৃন্ততি
159.24
উদক্যা হ্যাসতে যে চ যে চ কেচিদনগ্নয়ঃ
কুলং চাশ্রোত্রিয়ং যেষাং সর্বে তে শূদ্রধর্মিণঃ
159.25
উদপানোদকে গ্রামে ব্রাহ্মণো বৃষলীপতিঃ
উষিত্বা দ্বাদশ সমাঃ শূদ্রকর্মেহ গচ্ছতি
159.26
অনার্যাং শয়নে বিভ্রদুজ্ঝন্বিভ্রচ্চ যো দ্বিজাম্
অব্রাহ্মণো মন্যমানস্তৃণেষ্বাসীত পৃষ্ঠতঃ
তথা স শুধ্যতে রাজঞ্শৃণু চাত্র বচো মম
159.27
যদেকরাত্রেণ করোতি পাপং; কৃষ্ণং বর্ণং ব্রাহ্মণঃ সেবমানঃ
স্থানাসনাভ্যাং বিচরন্ব্রতী সং;স্ত্রিভির্বর্ষৈঃ শময়েদাত্মপাপম্
159.28
ন নর্ময়ুক্তং বচনং হিনস্তি; ন স্ত্রীষু রাজন্ন বিবাহকালে
ন গুর্বর্থে নাত্মনো জীবিতার্থে; পঞ্চানৃতান্যাহুরপাতকানি
159.29
শ্রদ্দধানঃ শুভাং বিদ্যাং হীনাদপি সমাচরেৎ
সুবর্ণমপি চামেধ্যাদাদদীতেতি ধারণা
159.30
স্ত্রীরত্নং দুষ্কুলাচ্চাপি বিষাদপ্যমৃতং পিবেৎ
অদুষ্টা হি স্ত্রিয়ো রত্নমাপ ইত্যেব ধর্মতঃ
159.31
গোব্রাহ্মণহিতার্থং চ বর্ণানাং সংকরেষু চ
গৃহ্ণীয়াত্তু ধনুর্বৈশ্যঃ পরিত্রাণায় চাত্মনঃ
159.32
সুরাপানং ব্রহ্মহত্যা গুরুতল্পমথাপি বা
অনির্দেশ্যানি মন্যন্তে প্রাণান্তানীতি ধারণা
159.33
সুবর্ণহরণং স্তৈন্যং বিপ্রাসঙ্গশ্চ পাতকম্
বিহরন্মদ্যপানং চাপ্যগম্যাগমনং তথা
159.34
পতিতৈঃ সংপ্রয়োগাচ্চ ব্রাহ্মণৈর্যোনিতস্তথা
অচিরেণ মহারাজ তাদৃশো বৈ ভবত্যুত
159.35
সংবত্সরেণ পততি পতিতেন সহাচরন্
যাজনাধ্যাপনাদ্যৌনান্ন তু যানাসনাশনাৎ
159.36
এতানি চ ততোঽন্যানি নির্দেশ্যানীতি ধারণা
নির্দেশ্যকেন বিধিনা কালেনাব্যসনী ভবেৎ
159.37
অন্নং তির্যঙ্ন হোতব্যং প্রেতকর্মণ্যপাতিতে
ত্রিষু ত্বেতেষু পূর্বেষু ন কুর্বীত বিচারণাম্
159.38
অমাত্যান্বা গুরূন্বাপি জহ্যাদ্ধর্মেণ ধার্মিকঃ
প্রায়শ্চিত্তমকুর্বাণৈর্নৈতৈরর্হতি সংবিদম্
159.39
অধর্মকারী ধর্মেণ তপসা হন্তি কিল্বিষম্
ব্রুবন্স্তেন ইতি স্তেনং তাবত্প্রাপ্নোতি কিল্বিষম্
অস্তেনং স্তেন ইত্যুক্ত্বা দ্বিগুণং পাপমাপ্নুয়াৎ
159.40
ত্রিভাগং ব্রহ্মহত্যায়াঃ কন্যা প্রাপ্নোতি দুষ্যতী
যস্তু দূষয়িতা তস্যাঃ শেষং প্রাপ্নোতি কিল্বিষম্
159.41
ব্রাহ্মণায়াবগূর্যেহ স্পৃষ্ট্বা গুরুতরং ভবেৎ
বর্ষাণাং হি শতং পাপঃ প্রতিষ্ঠাং নাধিগচ্ছতি
159.42
সহস্রং ত্বেব বর্ষাণাং নিপাত্য নরকে বসেৎ
তস্মান্নৈবাবগূর্যাদ্ধি নৈব জাতু নিপাতয়েৎ
159.43
শোণিতং যাবতঃ পাংসূন্সংগৃহ্ণীয়াদ্দ্বিজক্ষতাৎ
তাবতীঃ স সমা রাজন্নরকে পরিবর্ততে
159.44
ভ্রূণহাহবমধ্যে তু শুধ্যতে শস্ত্রপাতিতঃ
আত্মানং জুহুয়াদ্বহ্নৌ সমিদ্ধে তেন শুধ্যতি
159.45
সুরাপো বারুণীমুষ্ণাং পীত্বা পাপাদ্বিমুচ্যতে
তয়া স কায়ে নির্দগ্ধে মৃত্যুনা প্রেত্য শুধ্যতি
লোকাংশ্চ লভতে বিপ্রো নান্যথা লভতে হি সঃ
159.46
গুরুতল্পমধিষ্ঠায় দুরাত্মা পাপচেতনঃ
সূর্মীং জ্বলন্তীমাশ্লিষ্য মৃত্যুনা স বিশুধ্যতি
159.47
অথ বা শিশ্নবৃষণাবাদায়াঞ্জলিনা স্বয়ম্
নৈরৃতীং দিশমাস্থায় নিপতেত্স ত্বজিহ্মগঃ
159.48
ব্রাহ্মণার্থেঽপি বা প্রাণান্সংত্যজেত্তেন শুধ্যতি
অশ্বমেধেন বাপীষ্ট্বা গোমেধেনাপি বা পুনঃ
অগ্নিষ্টোমেন বা সম্যগিহ প্রেত্য চ পূয়তে
159.49
তথৈব দ্বাদশ সমাঃ কপালী ব্রহ্মহা ভবেৎ
ব্রহ্মচারী চরেদ্ভৈক্ষং স্বকর্মোদাহরন্মুনিঃ
159.50
এবং বা তপসা যুক্তো ব্রহ্মহা সবনী ভবেৎ
এবং বা গর্ভমজ্ঞাতা চাত্রেয়ীং যোঽভিগচ্ছতি
দ্বিগুণা ব্রহ্মহত্যা বৈ আত্রেয়ীব্যসনে ভবেৎ
159.51
সুরাপো নিয়তাহারো ব্রহ্মচারী ক্ষমাচরঃ
ঊর্ধ্বং ত্রিভ্যোঽথ বর্ষেভ্যো যজেতাগ্নিষ্টুতা পরম্
ঋষভৈকসহস্রং গা দত্ত্বা শুভমবাপ্নুয়াৎ
159.52
বৈশ্যং হত্বা তু বর্ষে দ্বে ঋষভৈকশতাশ্চ গাঃ
শূদ্রং হত্বাব্দমেবৈকমৃষভৈকাদশাশ্চ গাঃ
159.53
শ্ববর্বরখরান্হত্বা শৌদ্রমেব ব্রতং চরেৎ
মার্জারচাষমণ্ডূকান্কাকং ভাসং চ মূষকম্
159.54
উক্তঃ পশুসমো ধর্মো রাজন্প্রাণিনিপাতনাৎ
প্রায়শ্চিত্তান্যথান্যানি প্রবক্ষ্যাম্যনুপূর্বশঃ
159.55
তল্পে চান্যস্য চৌর্যে চ পৃথক্সংবত্সরং চরেৎ
ত্রীণি শ্রোত্রিয়ভার্যায়াং পরদারে তু দ্বে স্মৃতে
159.56
কালে চতুর্থে ভুঞ্জানো ব্রহ্মচারী ব্রতী ভবেৎ
স্থানাসনাভ্যাং বিহরেত্ত্রিরহ্নোঽভ্যুদিতাদপঃ
এবমেব নিরাচান্তো যশ্চাগ্নীনপবিধ্যতি
159.57
ত্যজত্যকারণে যশ্চ পিতরং মাতরং তথা
পতিতঃ স্যাত্স কৌরব্য তথা ধর্মেষু নিশ্চয়ঃ
159.58
গ্রাসাচ্ছাদনমত্যর্থং দদ্যাদিতি নিদর্শনম্
ভার্যায়াং ব্যভিচারিণ্যাং নিরুদ্ধায়াং বিশেষতঃ
যত্পুংসাং পরদারেষু তচ্চৈনাং চারয়েদ্ব্রতম্
159.59
শ্রেয়াংসং শয়নে হিত্বা যা পাপীয়াংসমৃচ্ছতি
শ্বভিস্তাং খাদয়েদ্রাজা সংস্থানে বহুসংবৃতে
159.60
পুমাংসং বন্ধয়েত্প্রাজ্ঞঃ শয়নে তপ্ত আয়সে
অপ্যাদধীত দারূণি তত্র দহ্যেত পাপকৃৎ
159.61
এষ দণ্ডো মহারাজ স্ত্রীণাং ভর্তৃব্যতিক্রমে
সংবত্সরাভিশস্তস্য দুষ্টস্য দ্বিগুণো ভবেৎ
159.62
দ্বে তস্য ত্রীণি বর্ষাণি চত্বারি সহসেবিনঃ
কুচরঃ পঞ্চ বর্ষাণি চরেদ্ভৈক্ষং মুনিব্রতঃ
159.63
পরিবিত্তিঃ পরিবেত্তা যয়া চ পরিবিদ্যতে
পাণিগ্রাহশ্চ ধর্মেণ সর্বে তে পতিতাঃ স্মৃতাঃ
159.64
চরেয়ুঃ সর্ব এবৈতে বীরহা যদ্ব্রতং চরেৎ
চান্দ্রায়ণং চরেন্মাসং কৃচ্ছ্রং বা পাপশুদ্ধয়ে
159.65
পরিবেত্তা প্রয়চ্ছেত পরিবিত্তায় তাং স্নুষাম্
জ্যেষ্ঠেন ত্বভ্যনুজ্ঞাতো যবীয়ান্প্রত্যনন্তরম্
এনসো মোক্ষমাপ্নোতি সা চ তৌ চৈব ধর্মতঃ
159.66
অমানুষীষু গোবর্জমনাবৃষ্টির্ন দুষ্যতি
অধিষ্ঠাতারমত্তারং পশূনাং পুরুষং বিদুঃ
159.67
পরিধায়োর্ধ্ববালং তু পাত্রমাদায় মৃন্ময়ম্
চরেত্সপ্ত গৃহান্ভৈক্ষং স্বকর্ম পরিকীর্তয়ন্
159.68
তত্রৈব লব্ধভোজী স্যাদ্দ্বাদশাহাত্স শুধ্যতি
চরেত্সংবত্সরং চাপি তদ্ব্রতং যন্নিরাকৃতি
159.69
ভবেত্তু মানুষেষ্বেবং প্রায়শ্চিত্তমনুত্তমম্
দানং বাদানসক্তেষু সর্বমেব প্রকল্পয়েৎ
অনাস্তিকেষু গোমাত্রং প্রাণমেকং প্রচক্ষতে
159.70
শ্ববরাহমনুষ্যাণাং কুক্কুটস্য খরস্য চ
মাংসং মূত্রপুরীষং চ প্রাশ্য সংস্কারমর্হতি
159.71
ব্রাহ্মণস্য সুরাপস্য গন্ধমাঘ্রায় সোমপঃ
অপস্ত্র্যহং পিবেদুষ্ণাস্ত্র্যহমুষ্ণং পয়ঃ পিবেৎ
ত্র্যহমুষ্ণং ঘৃতং পীত্বা বায়ুভক্ষো ভবেত্ত্র্যহম্
159.72
এবমেতত্সমুদ্দিষ্টং প্রায়শ্চিত্তং সনাতনম্
ব্রাহ্মণস্য বিশেষেণ তত্ত্বজ্ঞানেন জায়তে