অধ্যায় 158

158.1

যুধিষ্ঠির উবাচ
আনৃশংস্যং বিজানামি দর্শনেন সতাং সদা
নৃশংসান্ন বিজানামি তেষাং কর্ম চ ভারত

কণ্টকান্কূপমগ্নিং চ বর্জয়ন্তি যথা নরাঃ
তথা নৃশংসকর্মাণং বর্জয়ন্তি নরা নরম্

নৃশংসো হ্যধমো নিত্যং প্রেত্য চেহ চ ভারত
তস্মাদ্ব্রবীহি কৌরব্য তস্য ধর্মবিনিশ্চয়ম্

ভীষ্ম উবাচ
স্পৃহাস্যান্তর্হিতা চৈব বিদিতার্থা চ কর্মণা
আক্রোষ্টা ক্রুশ্যতে চৈব বন্ধিতা বধ্যতে চ যঃ

দত্তানুকীর্তির্বিষমঃ ক্ষুদ্রো নৈকৃতিকঃ শঠঃ
অসংভোগী চ মানী চ তথা সঙ্গী বিকত্থনঃ

সর্বাতিশঙ্কী পরুষো বালিশঃ কৃপণস্তথা
বর্গপ্রশংসী সততমাশ্রমদ্বেষসংকরী

হিংসাবিহারী সততমবিশেষগুণাগুণঃ
বহ্বলীকো মনস্বী চ লুব্ধোঽত্যর্থং নৃশংসকৃৎ

ধর্মশীলং গুণোপেতং পাপ ইত্যবগচ্ছতি
আত্মশীলানুমানেন ন বিশ্বসিতি কস্যচিৎ

পরেষাং যত্র দোষঃ স্যাত্তদ্গুহ্যং সংপ্রকাশয়েৎ
সমানেষ্বেব দোষেষু বৃত্ত্যর্থমুপঘাতয়েৎ

তথোপকারিণং চৈব মন্যতে বঞ্চিতং পরম্
দত্ত্বাপি চ ধনং কালে সংতপত্যুপকারিণে

ভক্ষ্যং ভোজ্যমথো লেহ্যং যচ্চান্যত্সাধু ভোজনম্
প্রেক্ষমাণেষু যোঽশ্নীয়ান্নৃশংস ইতি তং বিদুঃ

ব্রাহ্মণেভ্যঃ প্রদায়াগ্রং যঃ সুহৃদ্ভিঃ সহাশ্নুতে
স প্রেত্য লভতে স্বর্গমিহ চানন্ত্যমশ্নুতে

এষ তে ভরতশ্রেষ্ঠ নৃশংসঃ পরিকীর্তিতঃ
সদা বিবর্জনীয়ো বৈ পুরুষেণ বুভূষতা