অধ্যায় 157

157.1

যুধিষ্ঠির উবাচ
যতঃ প্রভবতি ক্রোধঃ কামশ্চ ভরতর্ষভ
শোকমোহৌ বিবিত্সা চ পরাসুত্বং তথা মদঃ

লোভো মাত্সর্যমীর্ষ্যা চ কুত্সাসূয়া কৃপা তথা
এতত্সর্বং মহাপ্রাজ্ঞ যাথাতথ্যেন মে বদ

ভীষ্ম উবাচ
ত্রয়োদশৈতেঽতিবলাঃ শত্রবঃ প্রাণিনাং স্মৃতাঃ
উপাসতে মহারাজ সমস্তাঃ পুরুষানিহ

এতে প্রমত্তং পুরুষমপ্রমত্তা নুদন্তি হি
বৃকা ইব বিলুম্পন্তি দৃষ্ট্বৈব পুরুষেতরান্

এভ্যঃ প্রবর্ততে দুঃখমেভ্যঃ পাপং প্রবর্ততে
ইতি মর্ত্যো বিজানীয়াত্সততং ভরতর্ষভ

এতেষামুদয়ং স্থানং ক্ষয়ং চ পুরুষোত্তম
হন্ত তে বর্তয়িষ্যামি তন্মে নিগদতঃ শৃণু

লোভাত্ক্রোধঃ প্রভবতি পরদোষৈরুদীর্যতে
ক্ষময়া তিষ্ঠতে রাজঞ্শ্রীমাংশ্চ বিনিবর্ততে

সংকল্পাজ্জায়তে কামঃ সেব্যমানো বিবর্ধতে
অবদ্যদর্শনাদ্ব্যেতি তত্ত্বজ্ঞানাচ্চ ধীমতাম্

বিরুদ্ধানি হি শাস্ত্রাণি পশ্যন্তীহাল্পবুদ্ধয়ঃ
বিবিত্সা জায়তে তত্র তত্ত্বজ্ঞানান্নিবর্ততে

প্রীতেঃ শোকঃ প্রভবতি বিয়োগাত্তস্য দেহিনঃ
যদা নিরর্থকং বেত্তি তদা সদ্যঃ প্রণশ্যতি

পরাসুতা ক্রোধলোভাদভ্যাসাচ্চ প্রবর্ততে
দয়য়া সর্বভূতানাং নির্বেদাত্সা নিবর্ততে

সত্ত্বত্যাগাত্তু মাত্সর্যমহিতানি চ সেবতে
এতত্তু ক্ষীয়তে তাত সাধূনামুপসেবনাৎ

কুলাজ্জ্ঞানাত্তথৈশ্বর্যান্মদো ভবতি দেহিনাম্
এভিরেব তু বিজ্ঞাতৈর্মদঃ সদ্যঃ প্রণশ্যতি

ঈর্ষ্যা কামাত্প্রভবতি সংঘর্ষাচ্চৈব ভারত
ইতরেষাং তু মর্ত্যানাং প্রজ্ঞয়া সা প্রণশ্যতি

বিভ্রমাল্লোকবাহ্যানাং দ্বেষ্যৈর্বাক্যৈরসংগতৈঃ
কুত্সা সংজায়তে রাজন্নুপেক্ষাভিঃ প্রশাম্যতি

প্রতিকর্তুমশক্যায় বলস্থায়াপকারিণে
অসূয়া জায়তে তীব্রা কারুণ্যাদ্বিনিবর্ততে

কৃপণান্সততং দৃষ্ট্বা ততঃ সংজায়তে কৃপা
ধর্মনিষ্ঠাং যদা বেত্তি তদা শাম্যতি সা কৃপা

এতান্যেব জিতান্যাহুঃ প্রশমাচ্চ ত্রয়োদশ
এতে হি ধার্তরাষ্ট্রাণাং সর্বে দোষাস্ত্রয়োদশ
ত্বয়া সর্বাত্মনা নিত্যং বিজিতা জেষ্যসে চ তান্