Utshovঅধ্যায় 156
156.1
যুধিষ্ঠির উবাচ
সত্যং ধর্মে প্রশংসন্তি বিপ্রর্ষিপিতৃদেবতাঃ
সত্যমিচ্ছাম্যহং শ্রোতুং তন্মে ব্রূহি পিতামহ
156.2
সত্যং কিংলক্ষণং রাজন্কথং বা তদবাপ্যতে
সত্যং প্রাপ্য ভবেত্কিং চ কথং চৈব তদুচ্যতে
156.3
ভীষ্ম উবাচ
চাতুর্বর্ণ্যস্য ধর্মাণাং সংকরো ন প্রশস্যতে
অবিকারিতমং সত্যং সর্ববর্ণেষু ভারত
156.4
সত্যং সত্সু সদা ধর্মঃ সত্যং ধর্মঃ সনাতনঃ
সত্যমেব নমস্যেত সত্যং হি পরমা গতিঃ
156.5
সত্যং ধর্মস্তপো যোগঃ সত্যং ব্রহ্ম সনাতনম্
সত্যং যজ্ঞঃ পরঃ প্রোক্তঃ সত্যে সর্বং প্রতিষ্ঠিতম্
156.6
আচারানিহ সত্যস্য যথাবদনুপূর্বশঃ
লক্ষণং চ প্রবক্ষ্যামি সত্যস্যেহ যথাক্রমম্
156.7
প্রাপ্যতে হি যথা সত্যং তচ্চ শ্রোতুং ত্বমর্হসি
সত্যং ত্রয়োদশবিধং সর্বলোকেষু ভারত
156.8
সত্যং চ সমতা চৈব দমশ্চৈব ন সংশয়ঃ
অমাত্সর্যং ক্ষমা চৈব হ্রীস্তিতিক্ষানসূয়তা
156.9
ত্যাগো ধ্যানমথার্যত্বং ধৃতিশ্চ সততং স্থিরা
অহিংসা চৈব রাজেন্দ্র সত্যাকারাস্ত্রয়োদশ
156.10
সত্যং নামাব্যয়ং নিত্যমবিকারি তথৈব চ
সর্বধর্মাবিরুদ্ধং চ যোগেনৈতদবাপ্যতে
156.11
আত্মনীষ্টে তথানিষ্টে রিপৌ চ সমতা তথা
ইচ্ছাদ্বেষক্ষয়ং প্রাপ্য কামক্রোধক্ষয়ং তথা
156.12
দমো নান্যস্পৃহা নিত্যং ধৈর্যং গাম্ভীর্যমেব চ
অভয়ং ক্রোধশমনং জ্ঞানেনৈতদবাপ্যতে
156.13
অমাত্সর্যং বুধাঃ প্রাহুর্দানং ধর্মে চ সংয়মম্
অবস্থিতেন নিত্যং চ সত্যেনামত্সরী ভবেৎ
156.14
অক্ষমায়াঃ ক্ষমায়াশ্চ প্রিয়াণীহাপ্রিয়াণি চ
ক্ষমতে সর্বতঃ সাধুঃ সাধ্বাপ্নোতি চ সত্যবান্
156.15
কল্যাণং কুরুতে গাঢং হ্রীমান্ন শ্লাঘতে ক্বচিৎ
প্রশান্তবাঙ্মনা নিত্যং হ্রীস্তু ধর্মাদবাপ্যতে
156.16
ধর্মার্থহেতোঃ ক্ষমতে তিতিক্ষা ক্ষান্তিরুচ্যতে
লোকসংগ্রহণার্থং তু সা তু ধৈর্যেণ লভ্যতে
156.17
ত্যাগঃ স্নেহস্য যস্ত্যাগো বিষয়াণাং তথৈব চ
রাগদ্বেষপ্রহীণস্য ত্যাগো ভবতি নান্যথা
156.18
আর্যতা নাম ভূতানাং যঃ করোতি প্রয়ত্নতঃ
শুভং কর্ম নিরাকারো বীতরাগত্বমেব চ
156.19
ধৃতির্নাম সুখে দুঃখে যথা নাপ্নোতি বিক্রিয়াম্
তাং ভজেত সদা প্রাজ্ঞো য ইচ্ছেদ্ভূতিমাত্মনঃ
156.20
সর্বথা ক্ষমিণা ভাব্যং তথা সত্যপরেণ চ
বীতহর্ষভয়ক্রোধো ধৃতিমাপ্নোতি পণ্ডিতঃ
156.21
অদ্রোহঃ সর্বভূতেষু কর্মণা মনসা গিরা
অনুগ্রহশ্চ দানং চ সতাং ধর্মঃ সনাতনঃ
156.22
এতে ত্রয়োদশাকারাঃ পৃথক্সত্যৈকলক্ষণাঃ
ভজন্তে সত্যমেবেহ বৃংহয়ন্তি চ ভারত
156.23
নান্তঃ শক্যো গুণানাং হি বক্তুং সত্যস্য ভারত
অতঃ সত্যং প্রশংসন্তি বিপ্রাঃ সপিতৃদেবতাঃ
156.24
নাস্তি সত্যাত্পরো ধর্মো নানৃতাত্পাতকং পরম্
স্থিতির্হি সত্যং ধর্মস্য তস্মাত্সত্যং ন লোপয়েৎ
156.25
উপৈতি সত্যাদ্দানং হি তথা যজ্ঞাঃ সদক্ষিণাঃ
ব্রতাগ্নিহোত্রং বেদাশ্চ যে চান্যে ধর্মনিশ্চয়াঃ
156.26
অশ্বমেধসহস্রং চ সত্যং চ তুলয়া ধৃতম্
অশ্বমেধসহস্রাদ্ধি সত্যমেবাতিরিচ্যতে