অধ্যায় 155

155.1

ভীষ্ম উবাচ
সর্বমেতত্তপোমূলং কবয়ঃ পরিচক্ষতে
ন হ্যতপ্ততপা মূঢঃ ক্রিয়াফলমবাপ্যতে

প্রজাপতিরিদং সর্বং তপসৈবাসৃজত্প্রভুঃ
তথৈব বেদানৃষয়স্তপসা প্রতিপেদিরে

তপসো হ্যানুপূর্ব্যেণ ফলমূলানিলাশনাঃ
ত্রীঁল্লোকাংস্তপসা সিদ্ধাঃ পশ্যন্তি সুসমাহিতাঃ

ঔষধান্যগদাদীনি তিস্রো বিদ্যাশ্চ সংস্কৃতাঃ
তপসৈব হি সিধ্যন্তি তপোমূলং হি সাধনম্

যদ্দুরাপং দুরাম্নায়ং দুরাধর্ষং দুরুত্সহম্
সর্বং তত্তপসা শক্যং তপো হি দুরতিক্রমম্

সুরাপোঽসংমতাদায়ী ভ্রূণহা গুরুতল্পগঃ
তপসৈব সুতপ্তেন নরঃ পাপাদ্বিমুচ্যতে

তপসো বহুরূপস্য তৈস্তৈর্দ্বারৈঃ প্রবর্ততঃ
নিবৃত্ত্যা বর্তমানস্য তপো নানশনাত্পরম্

অহিংসা সত্যবচনং দানমিন্দ্রিয়নিগ্রহঃ
এতেভ্যো হি মহারাজ তপো নানশনাত্পরম্

ন দুষ্করতরং দানান্নাতিমাতরমাশ্রমঃ
ত্রৈবিদ্যেভ্যঃ পরং নাস্তি সংন্যাসঃ পরমং তপঃ

ইন্দ্রিয়াণীহ রক্ষন্তি ধনধান্যাভিগুপ্তয়ে
তস্মাদর্থে চ ধর্মে চ তপো নানশনাত্পরম্

ঋষয়ঃ পিতরো দেবা মনুষ্যা মৃগসত্তমাঃ
যানি চান্যানি ভূতানি স্থাবরাণি চরাণি চ

তপঃপরায়ণাঃ সর্বে সিধ্যন্তি তপসা চ তে
ইত্যেবং তপসা দেবা মহত্ত্বং চাপ্যবাপ্নুবন্

ইমানীষ্টবিভাগানি ফলানি তপসা সদা
তপসা শক্যতে প্রাপ্তুং দেবত্বমপি নিশ্চয়াৎ