Utshovঅধ্যায় 154
154.1
যুধিষ্ঠির উবাচ
স্বাধ্যায়কৃতয়ত্নস্য ব্রাহ্মণস্য পিতামহ
ধর্মকামস্য ধর্মাত্মন্কিং নু শ্রেয় ইহোচ্যতে
154.2
বহুধাদর্শনে লোকে শ্রেয়ো যদিহ মন্যসে
অস্মিঁল্লোকে পরে চৈব তন্মে ব্রূহি পিতামহ
154.3
মহানয়ং ধর্মপথো বহুশাখশ্চ ভারত
কিং স্বিদেবেহ ধর্মাণামনুষ্ঠেয়তমং মতম্
154.4
ধর্মস্য মহতো রাজন্বহুশাখস্য তত্ত্বতঃ
যন্মূলং পরমং তাত তত্সর্বং ব্রূহ্যতন্দ্রিতঃ
154.5
ভীষ্ম উবাচ
হন্ত তে কথয়িষ্যামি যেন শ্রেয়ঃ প্রপত্স্যসে
পীত্বামৃতমিব প্রাজ্ঞো জ্ঞানতৃপ্তো ভবিষ্যসি
154.6
ধর্মস্য বিধয়ো নৈকে তে তে প্রোক্তা মহর্ষিভিঃ
স্বং স্বং বিজ্ঞানমাশ্রিত্য দমস্তেষাং পরায়ণম্
154.7
দমং নিঃশ্রেয়সং প্রাহুর্বৃদ্ধা নিশ্চয়দর্শিনঃ
ব্রাহ্মণস্য বিশেষেণ দমো ধর্মঃ সনাতনঃ
154.8
নাদান্তস্য ক্রিয়াসিদ্ধির্যথাবদুপলভ্যতে
দমো দানং তথা যজ্ঞানধীতং চাতিবর্ততে
154.9
দমস্তেজো বর্ধয়তি পবিত্রং চ দমঃ পরম্
বিপাপ্মা তেজসা যুক্তঃ পুরুষো বিন্দতে মহৎ
154.10
দমেন সদৃশং ধর্মং নান্যং লোকেষু শুশ্রুম
দমো হি পরমো লোকে প্রশস্তঃ সর্বধর্মিণাম্
154.11
প্রেত্য চাপি মনুষ্যেন্দ্র পরমং বিন্দতে সুখম্
দমেন হি সমায়ুক্তো মহান্তং ধর্মমশ্নুতে
154.12
সুখং দান্তঃ প্রস্বপিতি সুখং চ প্রতিবুধ্যতে
সুখং পর্যেতি লোকাংশ্চ মনশ্চাস্য প্রসীদতি
154.13
অদান্তঃ পুরুষঃ ক্লেশমভীক্ষ্ণং প্রতিপদ্যতে
অনর্থাংশ্চ বহূনন্যান্প্রসৃজত্যাত্মদোষজান্
154.14
আশ্রমেষু চতুর্ষ্বাহুর্দমমেবোত্তমং ব্রতম্
তস্য লিঙ্গানি বক্ষ্যামি যেষাং সমুদয়ো দমঃ
154.15
ক্ষমা ধৃতিরহিংসা চ সমতা সত্যমার্জবম্
ইন্দ্রিয়াবজয়ো দাক্ষ্যং মার্দবং হ্রীরচাপলম্
154.16
অকার্পণ্যমসংরম্ভঃ সংতোষঃ প্রিয়বাদিতা
অবিবিত্সানসূয়া চাপ্যেষাং সমুদয়ো দমঃ
154.17
গুরুপূজা চ কৌরব্য দয়া ভূতেষ্বপৈশুনম্
জনবাদোঽমৃষাবাদঃ স্তুতিনিন্দাবিবর্জনম্
154.18
কামঃ ক্রোধশ্চ লোভশ্চ দর্পঃ স্তম্ভো বিকত্থনম্
মোহ ঈর্ষ্যাবমানশ্চেত্যেতদ্দান্তো ন সেবতে
154.19
অনিন্দিতো হ্যকামাত্মাথাল্পেচ্ছোঽথানসূয়কঃ
সমুদ্রকল্পঃ স নরো ন কদাচন পূর্যতে
154.20
অহং ত্বয়ি মম ত্বং চ ময়ি তে তেষু চাপ্যহম্
পূর্বসংবন্ধিসংয়োগান্নৈতদ্দান্তো নিষেবতে
154.21
সর্বা গ্রাম্যাস্তথারণ্যা যাশ্চ লোকে প্রবৃত্তয়ঃ
নিন্দাং চৈব প্রশংসাং চ যো নাশ্রয়তি মুচ্যতে
154.22
মৈত্রোঽথ শীলসংপন্নঃ সুসহায়পরশ্চ যঃ
মুক্তশ্চ বিবিধৈঃ সঙ্গৈস্তস্য প্রেত্য মহত্ফলম্
154.23
সুবৃত্তঃ শীলসংপন্নঃ প্রসন্নাত্মাত্মবিদ্বুধঃ
প্রাপ্যেহ লোকে সত্কারং সুগতিং প্রতিপদ্যতে
154.24
কর্ম যচ্ছুভমেবেহ সদ্ভিরাচরিতং চ যৎ
তদেব জ্ঞানয়ুক্তস্য মুনের্ধর্মো ন হীয়তে
154.25
নিষ্ক্রম্য বনমাস্থায় জ্ঞানয়ুক্তো জিতেন্দ্রিয়ঃ
কালাকাঙ্ক্ষী চরন্নেবং ব্রহ্মভূয়ায় কল্পতে
154.26
অভয়ং যস্য ভূতেভ্যো ভূতানামভয়ং যতঃ
তস্য দেহাদ্বিমুক্তস্য ভয়ং নাস্তি কুতশ্চন
154.27
অবাচিনোতি কর্মাণি ন চ সংপ্রচিনোতি হ
সমঃ সর্বেষু ভূতেষু মৈত্রায়ণগতিশ্চরেৎ
154.28
শকুনীনামিবাকাশে জলে বারিচরস্য বা
যথা গতির্ন দৃশ্যেত তথা তস্য ন সংশয়ঃ
154.29
গৃহানুত্সৃজ্য যো রাজন্মোক্ষমেবাভিপদ্যতে
লোকাস্তেজোময়াস্তস্য কল্পন্তে শাশ্বতীঃ সমাঃ
154.30
সংন্যস্য সর্বকর্মাণি সংন্যস্য বিধিবত্তপঃ
সংন্যস্য বিবিধা বিদ্যাঃ সর্বং সংন্যস্য চৈব হ
154.31
কামেষু চাপ্যনাবৃত্তঃ প্রসন্নাত্মাত্মবিচ্ছুচিঃ
প্রাপ্যেহ লোকে সত্কারং স্বর্গং সমভিপদ্যতে
154.32
যচ্চ পৈতামহং স্থানং ব্রহ্মরাশিসমুদ্ভবম্
গুহায়াং পিহিতং নিত্যং তদ্দমেনাভিপদ্যতে
154.33
জ্ঞানারামস্য বুদ্ধস্য সর্বভূতাবিরোধিনঃ
নাবৃত্তিভয়মস্তীহ পরলোকে ভয়ং কুতঃ
154.34
এক এব দমে দোষো দ্বিতীয়ো নোপপদ্যতে
যদেনং ক্ষময়া যুক্তমশক্তং মন্যতে জনঃ
154.35
এতস্য তু মহাপ্রাজ্ঞ দোষস্য সুমহান্গুণঃ
ক্ষমায়াং বিপুলা লোকাঃ সুলভা হি সহিষ্ণুনা
154.36
দান্তস্য কিমরণ্যেন তথাদান্তস্য ভারত
যত্রৈব হি বসেদ্দান্তস্তদরণ্যং স আশ্রমঃ
154.37
বৈশংপায়ন উবাচ
এতদ্ভীষ্মস্য বচনং শ্রুত্বা রাজা যুধিষ্ঠিরঃ
অমৃতেনেব সংতৃপ্তঃ প্রহৃষ্টঃ সমপদ্যত
154.38
পুনশ্চ পরিপপ্রচ্ছ ভীষ্মং ধর্মভৃতাং বরম্
তপঃ প্রতি স চোবাচ তস্মৈ সর্বং কুরূদ্বহ