অধ্যায় 153

153.1

যুধিষ্ঠির উবাচ
অনর্থানামধিষ্ঠানমুক্তো লোভঃ পিতামহ
অজ্ঞানমপি বৈ তাত শ্রোতুমিচ্ছামি তত্ত্বতঃ

ভীষ্ম উবাচ
করোতি পাপং যোঽজ্ঞানান্নাত্মনো বেত্তি চ ক্ষমম্
প্রদ্বেষ্টি সাধুবৃত্তাংশ্চ স লোকস্যৈতি বাচ্যতাম্

অজ্ঞানান্নিরয়ং যাতি তথাজ্ঞানেন দুর্গতিম্
অজ্ঞানাত্ক্লেশমাপ্নোতি তথাপত্সু নিমজ্জতি

যুধিষ্ঠির উবাচ
অজ্ঞানস্য প্রবৃত্তিং চ স্থানং বৃদ্ধিং ক্ষয়োদয়ৌ
মূলং যোগং গতিং কালং কারণং হেতুমেব চ

শ্রোতুমিচ্ছামি তত্ত্বেন যথাবদিহ পার্থিব
অজ্ঞানপ্রভবং হীদং যদ্দুঃখমুপলভ্যতে

ভীষ্ম উবাচ
রাগো দ্বেষস্তথা মোহো হর্ষঃ শোকোঽভিমানিতা
কামঃ ক্রোধশ্চ দর্পশ্চ তন্দ্রীরালস্যমেব চ

ইচ্ছা দ্বেষস্তথা তাপঃ পরবৃদ্ধ্যুপতাপিতা
অজ্ঞানমেতন্নির্দিষ্টং পাপানাং চৈব যাঃ ক্রিয়াঃ

এতয়া যা প্রবৃত্তিশ্চ বৃদ্ধ্যাদীন্যাংশ্চ পৃচ্ছসি
বিস্তরেণ মহাবাহো শৃণু তচ্চ বিশাং পতে

উভাবেতৌ সমফলৌ সমদোষৌ চ ভারত
অজ্ঞানং চাতিলোভশ্চাপ্যেকং জানীহি পার্থিব

লোভপ্রভবমজ্ঞানং বৃদ্ধং ভূয়ঃ প্রবর্ধতে
স্থানে স্থানং ক্ষয়ে ক্ষৈণ্যমুপৈতি বিবিধাং গতিম্

মূলং লোভস্য মহতঃ কালাত্মগতিরেব চ
ছিন্নেঽচ্ছিন্নে তথা লোভে কারণং কাল এব হি

তস্যাজ্ঞানাত্তু লোভো হি লোভাদজ্ঞানমেব চ
সর্বে দোষাস্তথা লোভাত্তস্মাল্লোভং বিবর্জয়েৎ

জনকো যুবনাশ্বশ্চ বৃষাদর্ভিঃ প্রসেনজিৎ
লোভক্ষয়াদ্দিবং প্রাপ্তাস্তথৈবান্যে জনাধিপাঃ

প্রত্যক্ষং তু কুরুশ্রেষ্ঠ ত্যজ লোভমিহাত্মনা
ত্যক্ত্বা লোভং সুখং লোকে প্রেত্য চানুচরিষ্যসি