Utshovঅধ্যায় 152
152.1
যুধিষ্ঠির উবাচ
পাপস্য যদধিষ্ঠানং যতঃ পাপং প্রবর্ততে
এতদিচ্ছাম্যহং জ্ঞাতুং তত্ত্বেন ভরতর্ষভ
152.2
ভীষ্ম উবাচ
পাপস্য যদধিষ্ঠানং তচ্ছৃণুষ্ব নরাধিপ
একো লোভো মহাগ্রাহো লোভাত্পাপং প্রবর্ততে
152.3
অতঃ পাপমধর্মশ্চ তথা দুঃখমনুত্তমম্
নিকৃত্যা মূলমেতদ্ধি যেন পাপকৃতো জনাঃ
152.4
লোভাত্ক্রোধঃ প্রভবতি লোভাত্কামঃ প্রবর্ততে
লোভান্মোহশ্চ মায়া চ মানস্তম্ভঃ পরাসুতা
152.5
অক্ষমা হ্রীপরিত্যাগঃ শ্রীনাশো ধর্মসংক্ষয়ঃ
অভিধ্যাপ্রজ্ঞতা চৈব সর্বং লোভাত্প্রবর্ততে
152.6
অন্যায়শ্চাবিতর্কশ্চ বিকর্মসু চ যাঃ ক্রিয়াঃ
কূটবিদ্যাদয়শ্চৈব রূপৈশ্বর্যমদস্তথা
152.7
সর্বভূতেষ্ববিশ্বাসঃ সর্বভূতেষ্বনার্জবম্
সর্বভূতেষ্বভিদ্রোহঃ সর্বভূতেষ্বয়ুক্ততা
হরণং পরবিত্তানাং পরদারাভিমর্শনম্
152.8
বাগ্বেগো মানসো বেগো নিন্দাবেগস্তথৈব চ
উপস্থোদরয়োর্বেগো মৃত্যুবেগশ্চ দারুণঃ
152.9
ঈর্ষ্যাবেগশ্চ বলবান্মিথ্যাবেগশ্চ দুস্ত্যজঃ
রসবেগশ্চ দুর্বারঃ শ্রোত্রবেগশ্চ দুঃসহঃ
152.10
কুত্সা বিকত্থা মাত্সর্যং পাপং দুষ্করকারিতা
সাহসানাং চ সর্বেষামকার্যাণাং ক্রিয়াস্তথা
152.11
জাতৌ বাল্যেঽথ কৌমারে যৌবনে চাপি মানবঃ
ন সংত্যজত্যাত্মকর্ম যন্ন জীর্যতি জীর্যতঃ
152.12
যো ন পূরয়িতুং শক্যো লোভঃ প্রাপ্ত্যা কুরূদ্বহ
নিত্যং গম্ভীরতোয়াভিরাপগাভিরিবোদধিঃ
ন প্রহৃষ্যতি লাভৈর্যো যশ্চ কামৈর্ন তৃপ্যতি
152.13
যো ন দেবৈর্ন গন্ধর্বৈর্নাসুরৈর্ন মহোরগৈঃ
জ্ঞায়তে নৃপ তত্ত্বেন সর্বৈর্ভূতগণৈস্তথা
স লোভঃ সহ মোহেন বিজেতব্যো জিতাত্মনা
152.14
দম্ভো দ্রোহশ্চ নিন্দা চ পৈশুন্যং মত্সরস্তথা
ভবন্ত্যেতানি কৌরব্য লুব্ধানামকৃতাত্মনাম্
152.15
সুমহান্ত্যপি শাস্ত্রাণি ধারয়ন্তি বহুশ্রুতাঃ
ছেত্তারঃ সংশয়ানাং চ ক্লিশ্যন্তীহাল্পবুদ্ধয়ঃ
152.16
দ্বেষক্রোধপ্রসক্তাশ্চ শিষ্টাচারবহিষ্কৃতাঃ
অন্তঃক্ষুরা বাঙ্মধুরাঃ কূপাশ্ছন্নাস্তৃণৈরিব
ধর্মবৈতংসিকাঃ ক্ষুদ্রা মুষ্ণন্তি ধ্বজিনো জগৎ
152.17
কুর্বতে চ বহূন্মার্গাংস্তাংস্তান্হেতুবলাশ্রিতাঃ
সর্বং মার্গং বিলুম্পন্তি লোভাজ্ঞানেষু নিষ্ঠিতাঃ
152.18
ধর্মস্যাহ্রিয়মাণস্য লোভগ্রস্তৈর্দুরাত্মভিঃ
যা যা বিক্রিয়তে সংস্থা ততঃ সাভিপ্রপদ্যতে
152.19
দর্পঃ ক্রোধো মদঃ স্বপ্নো হর্ষঃ শোকোঽতিমানিতা
তত এব হি কৌরব্য দৃশ্যন্তে লুব্ধবুদ্ধিষু
এতানশিষ্টান্বুধ্যস্ব নিত্যং লোভসমন্বিতান্
152.20
শিষ্টাংস্তু পরিপৃচ্ছেথা যান্বক্ষ্যামি শুচিব্রতান্
যেষু বৃত্তিভয়ং নাস্তি পরলোকভয়ং ন চ
152.21
নামিষেষু প্রসঙ্গোঽস্তি ন প্রিয়েষ্বপ্রিয়েষু চ
শিষ্টাচারঃ প্রিয়ো যেষু দমো যেষু প্রতিষ্ঠিতঃ
152.22
সুখং দুঃখং পরং যেষাং সত্যং যেষাং পরায়ণম্
দাতারো ন গৃহীতারো দয়াবন্তস্তথৈব চ
152.23
পিতৃদেবাতিথেয়াশ্চ নিত্যোদ্যুক্তাস্তথৈব চ
সর্বোপকারিণো ধীরাঃ সর্বধর্মানুপালকাঃ
152.24
সর্বভূতহিতাশ্চৈব সর্বদেয়াশ্চ ভারত
ন তে চালয়িতুং শক্যা ধর্মব্যাপারপারগাঃ
152.25
ন তেষাং ভিদ্যতে বৃত্তং যত্পুরা সাধুভিঃ কৃতম্
ন ত্রাসিনো ন চপলা ন রৌদ্রাঃ সত্পথে স্থিতাঃ
152.26
তে সেব্যাঃ সাধুভির্নিত্যং যেষ্বহিংসা প্রতিষ্ঠিতা
কামক্রোধব্যপেতা যে নির্মমা নিরহংকৃতাঃ
সুব্রতাঃ স্থিরমর্যাদাস্তানুপাস্স্ব চ পৃচ্ছ চ
152.27
ন গবার্থং যশোর্থং বা ধর্মস্তেষাং যুধিষ্ঠির
অবশ্যকার্য ইত্যেব শরীরস্য ক্রিয়াস্তথা
152.28
ন ভয়ং ক্রোধচাপল্যং ন শোকস্তেষু বিদ্যতে
ন ধর্মধ্বজিনশ্চৈব ন গুহ্যং কিংচিদাস্থিতাঃ
152.29
যেষ্বলোভস্তথামোহো যে চ সত্যার্জবে রতাঃ
তেষু কৌন্তেয় রজ্যেথা যেষ্বতন্দ্রীকৃতং মনঃ
152.30
যে ন হৃষ্যন্তি লাভেষু নালাভেষু ব্যথন্তি চ
নির্মমা নিরহংকারাঃ সত্ত্বস্থাঃ সমদর্শিনঃ
152.31
লাভালাভৌ সুখদুঃখে চ তাত; প্রিয়াপ্রিয়ে মরণং জীবিতং চ
সমানি যেষাং স্থিরবিক্রমাণাং; বুদ্ধাত্মনাং সত্ত্বমবস্থিতানাম্
152.32
সুখপ্রিয়ৈস্তান্সুমহাপ্রতাপা;ন্যত্তোঽপ্রমত্তশ্চ সমর্থয়েথাঃ
দৈবাত্সর্বে গুণবন্তো ভবন্তি; শুভাশুভা বাক্প্রলাপা যথৈব