Utshovঅধ্যায় 151
151.1
ভীষ্ম উবাচ
এবমুক্ত্বা তু রাজেন্দ্র শল্মলিং ব্রহ্মবিত্তমঃ
নারদঃ পবনে সর্বং শল্মলের্বাক্যমব্রবীৎ
151.2
হিমবত্পৃষ্ঠজঃ কশ্চিচ্ছল্মলিঃ পরিবারবান্
বৃহন্মূলো বৃহচ্ছাখঃ স ত্বাং বায়োঽবমন্যতে
151.3
বহূন্যাক্ষেপয়ুক্তানি ত্বামাহ বচনানি সঃ
ন যুক্তানি ময়া বায়ো তানি বক্তুং ত্বয়ি প্রভো
151.4
জানামি ত্বামহং বায়ো সর্বপ্রাণভৃতাং বরম্
বরিষ্ঠং চ গরিষ্ঠং চ ক্রোধে বৈবস্বতং যথা
151.5
এবং তু বচনং শ্রুত্বা নারদস্য সমীরণঃ
শল্মলিং তমুপাগম্য ক্রুদ্ধো বচনমব্রবীৎ
151.6
শল্মলে নারদে যত্তত্ত্বয়োক্তং মদ্বিগর্হণম্
অহং বায়ুঃ প্রভাবং তে দর্শয়াম্যাত্মনো বলম্
151.7
নাহং ত্বা নাভিজানামি বিদিতশ্চাসি মে দ্রুম
পিতামহঃ প্রজাসর্গে ত্বয়ি বিশ্রান্তবান্প্রভুঃ
151.8
তস্য বিশ্রমণাদেব প্রসাদো যঃ কৃতস্তব
রক্ষ্যসে তেন দুর্বুদ্ধে নাত্মবীর্যাদ্দ্রুমাধম
151.9
যন্মা ত্বমবজানীষে যথান্যং প্রাকৃতং তথা
দর্শয়াম্যেষ আত্মানং যথা মামবভোত্স্যসে
151.10
এবমুক্তস্ততঃ প্রাহ শল্মলিঃ প্রহসন্নিব
পবন ত্বং বনে ক্রুদ্ধো দর্শয়াত্মানমাত্মনা
151.11
ময়ি বৈ ত্যজ্যতাং ক্রোধঃ কিং মে ক্রুদ্ধঃ করিষ্যসি
ন তে বিভেমি পবন যদ্যপি ত্বং স্বয়ংপ্রভুঃ
151.12
ইত্যেবমুক্তঃ পবনঃ শ্ব ইত্যেবাব্রবীদ্বচঃ
দর্শয়িষ্যামি তে তেজস্ততো রাত্রিরুপাগমৎ
151.13
অথ নিশ্চিত্য মনসা শল্মলির্বাতকারিতম্
পশ্যমানস্তদাত্মানমসমং মাতরিশ্বনঃ
151.14
নারদে যন্ময়া প্রোক্তং পবনং প্রতি তন্মৃষা
অসমর্থো হ্যহং বায়োর্বলেন বলবান্হি সঃ
151.15
মারুতো বলবান্নিত্যং যথৈনং নারদোঽব্রবীৎ
অহং হি দুর্বলোঽন্যেভ্যো বৃক্ষেভ্যো নাত্র সংশয়ঃ
151.16
কিং তু বুদ্ধ্যা সমো নাস্তি মম কশ্চিদ্বনস্পতিঃ
তদহং বুদ্ধিমাস্থায় ভয়ং মোক্ষ্যে সমীরণাৎ
151.17
যদি তাং বুদ্ধিমাস্থায় চরেয়ুঃ পর্ণিনো বনে
অরিষ্টাঃ স্যুঃ সদা ক্রুদ্ধাত্পবনান্নাত্র সংশয়ঃ
151.18
তেঽত্র বালা ন জানন্তি যথা নৈনান্সমীরণঃ
সমীরয়েত সংক্রুদ্ধো যথা জানাম্যহং তথা
151.19
ততো নিশ্চিত্য মনসা শল্মলিঃ ক্ষুভিতস্তদা
শাখাঃ স্কন্ধান্প্রশাখাশ্চ স্বয়মেব ব্যশাতয়ৎ
151.20
স পরিত্যজ্য শাখাশ্চ পত্রাণি কুসুমানি চ
প্রভাতে বায়ুমায়ান্তং প্রত্যৈক্ষত বনস্পতিঃ
151.21
ততঃ ক্রুদ্ধঃ শ্বসন্বায়ুঃ পাতয়ন্বৈ মহাদ্রুমান্
আজগামাথ তং দেশং স্থিতো যত্র স শল্মলিঃ
151.22
তং হীনপর্ণং পতিতাগ্রশাখং; বিশীর্ণপুষ্পং প্রসমীক্ষ্য বায়ুঃ
উবাচ বাক্যং স্ময়মান এনং; মুদা যুতং শল্মলিং রুগ্ণশাখম্
151.23
অহমপ্যেবমেব ত্বাং কুর্বাণঃ শল্মলে রুষা
আত্মনা যত্কৃতং কৃত্স্নং শাখানামপকর্ষণম্
151.24
হীনপুষ্পাগ্রশাখস্ত্বং শীর্ণাঙ্কুরপলাশবান্
আত্মদুর্মন্ত্রিতেনেহ মদ্বীর্যবশগোঽভবঃ
151.25
এতচ্ছ্রুত্বা বচো বায়োঃ শল্মলির্ব্রীডিতস্তদা
অতপ্যত বচঃ স্মৃত্বা নারদো যত্তদাব্রবীৎ
151.26
এবং যো রাজশার্দূল দুর্বলঃ সন্বলীয়সা
বৈরমাসজ্জতে বালস্তপ্যতে শল্মলির্যথা
151.27
তস্মাদ্বৈরং ন কুর্বীত দুর্বলো বলবত্তরৈঃ
শোচেদ্ধি বৈরং কুর্বাণো যথা বৈ শল্মলিস্তথা
151.28
ন হি বৈরং মহাত্মানো বিবৃণ্বন্ত্যপকারিষু
শনৈঃ শনৈর্মহারাজ দর্শয়ন্তি স্ম তে বলম্
151.29
বৈরং ন কুর্বীত নরো দুর্বুদ্ধির্বুদ্ধিজীবিনা
বুদ্ধির্বুদ্ধিমতো যাতি তূলেষ্বিব হুতাশনঃ
151.30
ন হি বুদ্ধ্যা সমং কিংচিদ্বিদ্যতে পুরুষে নৃপ
তথা বলেন রাজেন্দ্র ন সমোঽস্তীতি চিন্তয়েৎ
151.31
তস্মাত্ক্ষমেত বালায় জডায় বধিরায় চ
বলাধিকায় রাজেন্দ্র তদ্দৃষ্টং ত্বয়ি শত্রুহন্
151.32
অক্ষৌহিণ্যো দশৈকা চ সপ্ত চৈব মহাদ্যুতে
বলেন ন সমা রাজন্নর্জুনস্য মহাত্মনঃ
151.33
হতাস্তাশ্চৈব ভগ্নাশ্চ পাণ্ডবেন যশস্বিনা
চরতা বলমাস্থায় পাকশাসনিনা মৃধে
151.34
উক্তাস্তে রাজধর্মাশ্চ আপদ্ধর্মাশ্চ ভারত
বিস্তরেণ মহারাজ কিং ভূয়ঃ প্রব্রবীমি তে