Utshovঅধ্যায় 150
150.1
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
সংবাদং ভরতশ্রেষ্ঠ শল্মলেঃ পবনস্য চ
150.2
হিমবন্তং সমাসাদ্য মহানাসীদ্বনস্পতিঃ
বর্ষপূগাভিসংবৃদ্ধঃ শাখাস্কন্ধপলাশবান্
150.3
তত্র স্ম মত্তা মাতঙ্গা ধর্মার্তাঃ শ্রমকর্শিতাঃ
বিশ্রমন্তি মহাবাহো তথান্যা মৃগজাতয়ঃ
150.4
নল্বমাত্রপরীণাহো ঘনচ্ছায়ো বনস্পতিঃ
শুকশারিকসংঘুষ্টঃ ফলবান্পুষ্পবানপি
150.5
সার্থিকা বণিজশ্চাপি তাপসাশ্চ বনৌকসঃ
বসন্তি বাসান্মার্গস্থাঃ সুরম্যে তরুসত্তমে
150.6
তস্যা তা বিপুলাঃ শাখা দৃষ্ট্বা স্কন্ধাংশ্চ সর্বতঃ
অভিগম্যাব্রবীদেনং নারদো ভরতর্ষভ
150.7
অহো নু রমণীয়স্ত্বমহো চাসি মনোরমঃ
প্রীয়ামহে ত্বয়া নিত্যং তরুপ্রবর শল্মলে
150.8
সদৈব শকুনাস্তাত মৃগাশ্চাধস্তথা গজাঃ
বসন্তি তব সংহৃষ্টা মনোহরতরাস্তথা
150.9
তব শাখা মহাশাখ স্কন্ধং চ বিপুলং তথা
ন বৈ প্রভগ্নান্পশ্যামি মারুতেন কথংচন
150.10
কিং নু তে মারুতস্তাত প্রীতিমানথ বা সুহৃৎ
ত্বাং রক্ষতি সদা যেন বনেঽস্মিন্পবনো ধ্রুবম্
150.11
বিবান্হি পবনঃ স্থানাদ্বৃক্ষানুচ্চাবচানপি
পর্বতানাং চ শিখরাণ্যাচালয়তি বেগবান্
150.12
শোষয়ত্যেব পাতালং বিবান্গন্ধবহঃ শুচিঃ
হ্রদাংশ্চ সরিতশ্চৈব সাগরাংশ্চ তথৈব হ
150.13
ত্বাং সংরক্ষেত পবনঃ সখিত্বেন ন সংশয়ঃ
তস্মাদ্বহলশাখোঽসি পর্ণবান্পুষ্পবানপি
150.14
ইদং চ রমণীয়ং তে প্রতিভাতি বনস্পতে
যদিমে বিহগাস্তাত রমন্তে মুদিতাস্ত্বয়ি
150.15
এষাং পৃথক্সমস্তানাং শ্রূয়তে মধুরঃ স্বরঃ
পুষ্পসংমোদনে কালে বাশতাং সুমনোহরম্
150.16
তথেমে মুদিতা নাগাঃ স্বয়ূথকুলশোভিনঃ
ঘর্মার্তাস্ত্বাং সমাসাদ্য সুখং বিন্দন্তি শল্মলে
150.17
তথৈব মৃগজাতীভিরন্যাভিরুপশোভসে
তথা সার্থাধিবাসৈশ্চ শোভসে মেরুবদ্দ্রুম
150.18
ব্রাহ্মণৈশ্চ তপঃসিদ্ধৈস্তাপসৈঃ শ্রমণৈরপি
ত্রিবিষ্টপসমং মন্যে তবায়তনমেব হ
150.19
বন্ধুত্বাদথ বা সখ্যাচ্ছল্মলে নাত্র সংশয়ঃ
পালয়ত্যেব সততং ভীমঃ সর্বত্রগোঽনিলঃ
150.20
ন্যগ্ভাবং পরমং বায়োঃ শল্মলে ত্বমুপাগতঃ
তবাহমস্মীতি সদা যেন রক্ষতি মারুতঃ
150.21
ন তং পশ্যাম্যহং বৃক্ষং পর্বতং বাপি তং দৃঢম্
যো ন বায়ুবলাদ্ভগ্নঃ পৃথিব্যামিতি মে মতিঃ
150.22
ত্বং পুনঃ কারণৈর্নূনং শল্মলে রক্ষ্যসে সদা
বায়ুনা সপরীবারস্তেন তিষ্ঠস্যসংশয়ম্
150.23
শল্মলিরুবাচ
ন মে বায়ুঃ সখা ব্রহ্মন্ন বন্ধুর্ন চ মে সুহৃৎ
পরমেষ্ঠী তথা নৈব যেন রক্ষতি মানিলঃ
150.24
মম তেজোবলং বায়োর্ভীমমপি হি নারদ
কলামষ্টাদশীং প্রাণৈর্ন মে প্রাপ্নোতি মারুতঃ
150.25
আগচ্ছন্পরমো বায়ুর্ময়া বিষ্টম্ভিতো বলাৎ
রুজন্দ্রুমান্পর্বতাংশ্চ যচ্চান্যদপি কিংচন
150.26
স ময়া বহুশো ভগ্নঃ প্রভঞ্জন্বৈ প্রভঞ্জনঃ
তস্মান্ন বিভ্যে দেবর্ষে ক্রুদ্ধাদপি সমীরণাৎ
150.27
নারদ উবাচ
শল্মলে বিপরীতং তে দর্শনং নাত্র সংশয়ঃ
ন হি বায়োর্বলেনাস্তি ভূতং তুল্যবলং ক্বচিৎ
150.28
ইন্দ্রো যমো বৈশ্রবণো বরুণশ্চ জলেশ্বরঃ
ন তেঽপি তুল্যা মরুতঃ কিং পুনস্ত্বং বনস্পতে
150.29
যদ্ধি কিংচিদিহ প্রাণি শল্মলে চেষ্টতে ভুবি
সর্বত্র ভগবান্বায়ুশ্চেষ্টাপ্রাণকরঃ প্রভুঃ
150.30
এষ চেষ্টয়তে সম্যক্প্রাণিনঃ সম্যগায়তঃ
অসম্যগায়তো ভূয়শ্চেষ্টতে বিকৃতো নৃষু
150.31
স ত্বমেবংবিধং বায়ুং সর্বসত্ত্বভৃতাং বরম্
ন পূজয়সি পূজ্যং তং কিমন্যদ্বুদ্ধিলাঘবাৎ
150.32
অসারশ্চাসি দুর্বুদ্ধে কেবলং বহু ভাষসে
ক্রোধাদিভিরবচ্ছন্নো মিথ্যা বদসি শল্মলে
150.33
মম রোষঃ সমুত্পন্নস্ত্বয্যেবং সংপ্রভাষতি
ব্রবীম্যেষ স্বয়ং বায়োস্তব দুর্ভাষিতং বহু
150.34
চন্দনৈঃ স্পন্দনৈঃ শালৈঃ সরলৈর্দেবদারুভিঃ
বেতসৈর্বন্ধনৈশ্চাপি যে চান্যে বলবত্তরাঃ
150.35
তৈশ্চাপি নৈবং দুর্বুদ্ধে ক্ষিপ্তো বায়ুঃ কৃতাত্মভিঃ
তে হি জানন্তি বায়োশ্চ বলমাত্মন এব চ
150.36
তস্মাত্তে বৈ নমস্যন্তি শ্বসনং দ্রুমসত্তমাঃ
ত্বং তু মোহান্ন জানীষে বায়োর্বলমনন্তকম্