Utshovঅধ্যায় 149
149.1
ভীষ্ম উবাচ
শৃণু পার্থ যথাবৃত্তমিতিহাসং পুরাতনম্
গৃধ্রজম্বুকসংবাদং যো বৃত্তো বৈদিশে পুরা
149.2
দুঃখিতাঃ কেচিদাদায় বালমপ্রাপ্তয়ৌবনম্
কুলসর্বস্বভূতং বৈ রুদন্তঃ শোকবিহ্বলাঃ
149.3
বালং মৃতং গৃহীত্বাথ শ্মশানাভিমুখাঃ স্থিতাঃ
অঙ্কেনাঙ্কং চ সংক্রম্য রুরুদুর্ভূতলে তদা
149.4
তেষাং রুদিতশব্দেন গৃধ্রোঽভ্যেত্য বচোঽব্রবীৎ
একাত্মকমিমং লোকে ত্যক্ত্বা গচ্ছত মাচিরম্
149.5
ইহ পুংসাং সহস্রাণি স্ত্রীসহস্রাণি চৈব হি
সমানীতানি কালেন কিং তে বৈ জাত্ববান্ধবাঃ
149.6
সংপশ্যত জগত্সর্বং সুখদুঃখৈরধিষ্ঠিতম্
সংয়োগো বিপ্রয়োগশ্চ পর্যায়েণোপলভ্যতে
149.7
গৃহীত্বা যে চ গচ্ছন্তি যেঽনুয়ান্তি চ তান্মৃতান্
তেঽপ্যায়ুষঃ প্রমাণেন স্বেন গচ্ছন্তি জন্তবঃ
149.8
অলং স্থিত্বা শ্মশানেঽস্মিন্গৃধ্রগোমায়ুসংকুলে
কঙ্কালবহুলে ঘোরে সর্বপ্রাণিভয়ংকরে
149.9
ন পুনর্জীবিতঃ কশ্চিত্কালধর্মমুপাগতঃ
প্রিয়ো বা যদি বা দ্বেষ্যঃ প্রাণিনাং গতিরীদৃশী
149.10
সর্বেণ খলু মর্তব্যং মর্ত্যলোকে প্রসূয়তা
কৃতান্তবিহিতে মার্গে কো মৃতং জীবয়িষ্যতি
149.11
কর্মান্তবিহিতে লোকে চাস্তং গচ্ছতি ভাস্করে
গম্যতাং স্বমধিষ্ঠানং সুতস্নেহং বিসৃজ্য বৈ
149.12
ততো গৃধ্রবচঃ শ্রুত্বা বিক্রোশন্তস্তদা নৃপ
বান্ধবাস্তেঽভ্যগচ্ছন্ত পুত্রমুত্সৃজ্য ভূতলে
149.13
বিনিশ্চিত্যাথ চ ততঃ সংত্যজন্তঃ স্বমাত্মজম্
নিরাশা জীবিতে তস্য মার্গমারুহ্য ধিষ্ঠিতাঃ
149.14
ধ্বাঙ্ক্ষাভ্রসমবর্ণস্তু বিলান্নিঃসৃত্য জম্বুকঃ
গচ্ছমানান্স্ম তানাহ নির্ঘৃণাঃ খলু মানবাঃ
149.15
আদিত্যোঽয়ং স্থিতো মূঢাঃ স্নেহং কুরুত মা ভয়ম্
বহুরূপো মুহূর্তশ্চ জীবেতাপি কদাচন
149.16
যূয়ং ভূমৌ বিনিক্ষিপ্য পুত্রস্নেহবিনাকৃতাঃ
শ্মশানে পুত্রমুত্সৃজ্য কস্মাদ্গচ্ছথ নির্ঘৃণাঃ
149.17
ন বোঽস্ত্যস্মিন্সুতে স্নেহো বালে মধুরভাষিণি
যস্য ভাষিতমাত্রেণ প্রসাদমুপগচ্ছথ
149.18
ন পশ্যথ সুতস্নেহং যাদৃশঃ পশুপক্ষিণাম্
ন যেষাং ধারয়িত্বা তান্কশ্চিদস্তি ফলাগমঃ
149.19
চতুষ্পাত্পক্ষিকীটানাং প্রাণিনাং স্নেহসঙ্গিনাম্
পরলোকগতিস্থানাং মুনিয়জ্ঞক্রিয়া ইব
149.20
তেষাং পুত্রাভিরামাণামিহ লোকে পরত্র চ
ন গুণো দৃশ্যতে কশ্চিত্প্রজাঃ সংধারয়ন্তি চ
149.21
অপশ্যতাং প্রিয়ান্পুত্রান্নৈষাং শোকোঽনুতিষ্ঠতি
ন চ পুষ্ণন্তি সংবৃদ্ধাস্তে মাতাপিতরৌ ক্বচিৎ
149.22
মানুষাণাং কুতঃ স্নেহো যেষাং শোকো ভবিষ্যতি
ইমং কুলকরং পুত্রং কথং ত্যক্ত্বা গমিষ্যথ
149.23
চিরং মুঞ্চত বাষ্পং চ চিরং স্নেহেন পশ্যত
এবংবিধানি হীষ্টানি দুস্ত্যজানি বিশেষতঃ
149.24
ক্ষীণস্যাথাভিয়ুক্তস্য শ্মশানাভিমুখস্য চ
বান্ধবা যত্র তিষ্ঠন্তি তত্রান্যো নাবতিষ্ঠতে
149.25
সর্বস্য দয়িতাঃ প্রাণাঃ সর্বঃ স্নেহং চ বিন্দতি
তির্যগ্যোনিষ্বপি সতাং স্নেহং পশ্যত যাদৃশম্
149.26
ত্যক্ত্বা কথং গচ্ছেথেমং পদ্মলোলায়তাক্ষকম্
যথা নবোদ্বাহকৃতং স্নানমাল্যবিভূষিতম্
149.27
ভীষ্ম উবাচ
জম্বুকস্য বচঃ শ্রুত্বা কৃপণং পরিদেবতঃ
ন্যবর্তন্ত তদা সর্বে শবার্থং তে স্ম মানুষাঃ
149.28
গৃধ্র উবাচ
অহো ধিক্সুনৃশংসেন জম্বুকেনাল্পমেধসা
ক্ষুদ্রেণোক্তা হীনসত্ত্বা মানুষাঃ কিং নিবর্তথ
149.29
পঞ্চভূতপরিত্যক্তং শূন্যং কাষ্ঠত্বমাগতম্
কস্মাচ্ছোচথ নিশ্চেষ্টমাত্মানং কিং ন শোচথ
149.30
তপঃ কুরুত বৈ তীব্রং মুচ্যধ্বং যেন কিল্বিষাৎ
তপসা লভ্যতে সর্বং বিলাপঃ কিং করিষ্যতি
149.31
অনিষ্টানি চ ভাগ্যানি জানীত সহ মূর্তিভিঃ
যেন গচ্ছতি লোকোঽয়ং দত্ত্বা শোকমনন্তকম্
149.32
ধনং গাশ্চ সুবর্ণং চ মণিরত্নমথাপি চ
অপত্যং চ তপোমূলং তপোয়োগাচ্চ লভ্যতে
149.33
যথাকৃতা চ ভূতেষু প্রাপ্যতে সুখদুঃখতা
গৃহীত্বা জায়তে জন্তুর্দুঃখানি চ সুখানি চ
149.34
ন কর্মণা পিতুঃ পুত্রঃ পিতা বা পুত্রকর্মণা
মার্গেণান্যেন গচ্ছন্তি ত্যক্ত্বা সুকৃতদুষ্কৃতে
149.35
ধর্মং চরত যত্নেন তথাধর্মান্নিবর্তত
বর্তধ্বং চ যথাকালং দৈবতেষু দ্বিজেষু চ
149.36
শোকং ত্যজত দৈন্যং চ সুতস্নেহান্নিবর্তত
ত্যজ্যতাময়মাকাশে ততঃ শীঘ্রং নিবর্তত
149.37
যত্করোতি শুভং কর্ম তথাধর্মং সুদারুণম্
তত্কর্তৈব সমশ্নাতি বান্ধবানাং কিমত্র হি
149.38
ইহ ত্যক্ত্বা ন তিষ্ঠন্তি বান্ধবা বান্ধবং প্রিয়ম্
স্নেহমুত্সৃজ্য গচ্ছন্তি বাষ্পপূর্ণাবিলেক্ষণাঃ
149.39
প্রাজ্ঞো বা যদি বা মূর্খঃ সধনো নির্ধনোঽপি বা
সর্বঃ কালবশং যাতি শুভাশুভসমন্বিতঃ
149.40
কিং করিষ্যথ শোচিত্বা মৃতং কিমনুশোচথ
সর্বস্য হি প্রভুঃ কালো ধর্মতঃ সমদর্শনঃ
149.41
যৌবনস্থাংশ্চ বালাংশ্চ বৃদ্ধান্গর্ভগতানপি
সর্বানাবিশতে মৃত্যুরেবংভূতমিদং জগৎ
149.42
জম্বুক উবাচ
অহো মন্দীকৃতঃ স্নেহো গৃধ্রেণেহাল্পমেধসা
পুত্রস্নেহাভিভূতানাং যুষ্মাকং শোচতাং ভৃশম্
149.43
সমৈঃ সম্যক্প্রয়ুক্তৈশ্চ বচনৈঃ প্রশ্রয়োত্তরৈঃ
যদ্গচ্ছথ জলস্থায়ং স্নেহমুত্সৃজ্য দুস্ত্যজম্
149.44
অহো পুত্রবিয়োগেন মৃতশূন্যোপসেবনাৎ
ক্রোশতাং বৈ ভৃশং দুঃখং বিবত্সানাং গবামিব
149.45
অদ্য শোকং বিজানামি মানুষাণাং মহীতলে
স্নেহং হি করুণং দৃষ্ট্বা মমাপ্যশ্রূণ্যথাগমন্
149.46
যত্নো হি সততং কার্যঃ কৃতো দৈবেন সিধ্যতি
দৈবং পুরুষকারশ্চ কৃতান্তেনোপপদ্যতে
149.47
অনির্বেদঃ সদা কার্যো নির্বেদাদ্ধি কুতঃ সুখম্
প্রয়ত্নাত্প্রাপ্যতে হ্যর্থঃ কস্মাদ্গচ্ছথ নির্দয়াঃ
149.48
আত্মমাংসোপবৃত্তং চ শরীরার্ধময়ীং তনুম্
পিতৄণাং বংশকর্তারং বনে ত্যক্ত্বা ক্ব যাস্যথ
149.49
অথ বাস্তং গতে সূর্যে সংধ্যাকাল উপস্থিতে
ততো নেষ্যথ বা পুত্রমিহস্থা বা ভবিষ্যথ
149.50
গৃধ্র উবাচ
অদ্য বর্ষসহস্রং মে সাগ্রং জাতস্য মানুষাঃ
ন চ পশ্যামি জীবন্তং মৃতং স্ত্রীপুংনপুংসকম্
149.51
মৃতা গর্ভেষু জায়ন্তে ম্রিয়ন্তে জাতমাত্রকাঃ
বিক্রমন্তো ম্রিয়ন্তে চ যৌবনস্থাস্তথাপরে
149.52
অনিত্যানীহ ভাগ্যানি চতুষ্পাত্পক্ষিণামপি
জঙ্গমাজঙ্গমানাং চাপ্যায়ুরগ্রেঽবতিষ্ঠতে
149.53
ইষ্টদারবিয়ুক্তাশ্চ পুত্রশোকান্বিতাস্তথা
দহ্যমানাঃ স্ম শোকেন গৃহং গচ্ছন্তি নিত্যদা
149.54
অনিষ্টানাং সহস্রাণি তথেষ্টানাং শতানি চ
উত্সৃজ্যেহ প্রয়াতা বৈ বান্ধবা ভৃশদুঃখিতাঃ
149.55
ত্যজ্যতামেষ নিস্তেজাঃ শূন্যঃ কাষ্ঠত্বমাগতঃ
অন্যদেহবিষক্তো হি শাবং কাষ্ঠমুপাসতে
149.56
ভ্রান্তজীবস্য বৈ বাষ্পং কস্মাদ্ধিত্বা ন গচ্ছথ
নিরর্থকো হ্যয়ং স্নেহো নিরর্থশ্চ পরিগ্রহঃ
149.57
ন চক্ষুর্ভ্যাং ন কর্ণাভ্যাং সংশৃণোতি সমীক্ষতে
তস্মাদেনং সমুত্সৃজ্য স্বগৃহান্গচ্ছতাশু বৈ
149.58
মোক্ষধর্মাশ্রিতৈর্বাক্যৈর্হেতুমদ্ভিরনিষ্ঠুরৈঃ
ময়োক্তা গচ্ছত ক্ষিপ্রং স্বং স্বমেব নিবেশনম্
149.59
প্রজ্ঞাবিজ্ঞানয়ুক্তেন বুদ্ধিসংজ্ঞাপ্রদায়িনা
বচনং শ্রাবিতা রূক্ষং মানুষাঃ সংনিবর্তত
149.60
জম্বুক উবাচ
ইমং কনকবর্ণাভং ভূষণৈঃ সমলংকৃতম্
গৃধ্রবাক্যাত্কথং পুত্রং ত্যজধ্বং পিতৃপিণ্ডদম্
149.61
ন স্নেহস্য বিরোধোঽস্তি বিলাপরুদিতস্য বৈ
মৃতস্যাস্য পরিত্যাগাত্তাপো বৈ ভবিতা ধ্রুবম্
149.62
শ্রূয়তে শম্বুকে শূদ্রে হতে ব্রাহ্মণদারকঃ
জীবিতো ধর্মমাসাদ্য রামাত্সত্যপরাক্রমাৎ
149.63
তথা শ্বেতস্য রাজর্ষের্বালো দিষ্টান্তমাগতঃ
শ্বোঽভূতে ধর্মনিত্যেন মৃতঃ সংজীবিতঃ পুনঃ
149.64
তথা কশ্চিদ্ভবেত্সিদ্ধো মুনির্বা দেবতাপি বা
কৃপণানামনুক্রোশং কুর্যাদ্বো রুদতামিহ
149.65
ভীষ্ম উবাচ
ইত্যুক্তাঃ সংন্যবর্তন্ত শোকার্তাঃ পুত্রবত্সলাঃ
অঙ্কে শিরঃ সমাধায় রুরুদুর্বহুবিস্তরম্
149.66
গৃধ্র উবাচ
অশ্রুপাতপরিক্লিন্নঃ পাণিস্পর্শনপীডিতঃ
ধর্মরাজপ্রয়োগাচ্চ দীর্ঘাং নিদ্রাং প্রবেশিতঃ
149.67
তপসাপি হি সংয়ুক্তো ন কালে নোপহন্যতে
সর্বস্নেহাবসানং তদিদং তত্প্রেতপত্তনম্
149.68
বালবৃদ্ধসহস্রাণি সদা সংত্যজ্য বান্ধবাঃ
দিনানি চৈব রাত্রীশ্চ দুঃখং তিষ্ঠন্তি ভূতলে
149.69
অলং নির্বন্ধমাগম্য শোকস্য পরিবারণম্
অপ্রত্যয়ং কুতো হ্যস্য পুনরদ্যেহ জীবিতম্
149.70
নৈষ জম্বুকবাক্যেন পুনঃ প্রাপ্স্যতি জীবিতম্
মৃতস্যোত্সৃষ্টদেহস্য পুনর্দেহো ন বিদ্যতে
149.71
ন বৈ মূর্তিপ্রদানেন ন জম্বুকশতৈরপি
শক্যো জীবয়িতুং হ্যেষ বালো বর্ষশতৈরপি
149.72
অপি রুদ্রঃ কুমারো বা ব্রহ্মা বা বিষ্ণুরেব বা
বরমস্মৈ প্রয়চ্ছেয়ুস্ততো জীবেদয়ং শিশুঃ
149.73
ন চ বাষ্পবিমোক্ষেণ ন চাশ্বাসকৃতেন বৈ
ন দীর্ঘরুদিতেনেহ পুনর্জীবো ভবিষ্যতি
149.74
অহং চ ক্রোষ্টুকশ্চৈব যূয়ং চৈবাস্য বান্ধবাঃ
ধর্মাধর্মৌ গৃহীত্বেহ সর্বে বর্তামহেঽধ্বনি
149.75
অপ্রিয়ং পরুষং চাপি পরদ্রোহং পরস্ত্রিয়ম্
অধর্মমনৃতং চৈব দূরাত্প্রাজ্ঞো নিবর্তয়েৎ
149.76
সত্যং ধর্মং শুভং ন্যায্যং প্রাণিনাং মহতীং দয়াম্
অজিহ্মত্বমশাঠ্যং চ যত্নতঃ পরিমার্গত
149.77
মাতরং পিতরং চৈব বান্ধবান্সুহৃদস্তথা
জীবতো যে ন পশ্যন্তি তেষাং ধর্মবিপর্যয়ঃ
149.78
যো ন পশ্যতি চক্ষুর্ভ্যাং নেঙ্গতে চ কথংচন
তস্য নিষ্ঠাবসানান্তে রুদন্তঃ কিং করিষ্যথ
149.79
ভীষ্ম উবাচ
ইত্যুক্তাস্তং সুতং ত্যক্ত্বা ভূমৌ শোকপরিপ্লুতাঃ
দহ্যমানাঃ সুতস্নেহাত্প্রয়য়ুর্বান্ধবা গৃহান্
149.80
জম্বুক উবাচ
দারুণো মর্ত্যলোকোঽয়ং সর্বপ্রাণিবিনাশনঃ
ইষ্টবন্ধুবিয়োগশ্চ তথৈবাল্পং চ জীবিতম্
149.81
বহ্বলীকমসত্যং চ প্রতিবাদাপ্রিয়ংবদম্
ইমং প্রেক্ষ্য পুনর্ভাবং দুঃখশোকাভিবর্ধনম্
149.82
ন মে মানুষলোকোঽয়ং মুহূর্তমপি রোচতে
অহো ধিগ্গৃধ্রবাক্যেন সংনিবর্তথ মানুষাঃ
149.83
প্রদীপ্তাঃ পুত্রশোকেন যথৈবাবুদ্ধয়স্তথা
কথং গচ্ছথ সস্নেহাঃ সুতস্নেহং বিসৃজ্য চ
শ্রুত্বা গৃধ্রস্য বচনং পাপস্যেহাকৃতাত্মনঃ
149.84
সুখস্যানন্তরং দুঃখং দুঃখস্যানন্তরং সুখম্
সুখদুঃখান্বিতে লোকে নেহাস্ত্যেকমনন্তকম্
149.85
ইমং ক্ষিতিতলে ন্যস্য বালং রূপসমন্বিতম্
কুলশোকাকরং মূঢাঃ পুত্রং ত্যক্ত্বা ক্ব যাস্যথ
149.86
রূপয়ৌবনসংপন্নং দ্যোতমানমিব শ্রিয়া
জীবন্তমেনং পশ্যামি মনসা নাত্র সংশয়ঃ
149.87
বিনাশশ্চাপ্যনর্হোঽস্য সুখং প্রাপ্স্যথ মানুষাঃ
পুত্রশোকাগ্নিদগ্ধানাং মৃতমপ্যদ্য বঃ ক্ষমম্
149.88
দুঃখসংভাবনাং কৃত্বা ধারয়িত্বা স্বয়ং সুখম্
ত্যক্ত্বা গমিষ্যথ ক্বাদ্য সমুত্সৃজ্যাল্পবুদ্ধিবৎ
149.89
ভীষ্ম উবাচ
তথা ধর্মবিরোধেন প্রিয়মিথ্যাভিধ্যায়িনা
শ্মশানবাসিনা নিত্যং রাত্রিং মৃগয়তা তদা
149.90
ততো মধ্যস্থতাং নীতা বচনৈরমৃতোপমৈঃ
জম্বুকেন স্বকার্যার্থং বান্ধবাস্তস্য ধিষ্ঠিতাঃ
149.91
গৃধ্র উবাচ
অয়ং প্রেতসমাকীর্ণো যক্ষরাক্ষসসেবিতঃ
দারুণঃ কাননোদ্দেশঃ কৌশিকৈরভিনাদিতঃ
149.92
ভীমঃ সুঘোরশ্চ তথা নীলমেঘসমপ্রভঃ
অস্মিঞ্শবং পরিত্যজ্য প্রেতকার্যাণ্যুপাসত
149.93
ভানুর্যাবন্ন যাত্যস্তং যাবচ্চ বিমলা দিশঃ
তাবদেনং পরিত্যজ্য প্রেতকার্যাণ্যুপাসত
149.94
নদন্তি পরুষং শ্যেনাঃ শিবাঃ ক্রোশন্তি দারুণাঃ
মৃগেন্দ্রাঃ প্রতিনন্দন্তি রবিরস্তং চ গচ্ছতি
149.95
চিতাধূমেন নীলেন সংরজ্যন্তে চ পাদপাঃ
শ্মশানে চ নিরাহারাঃ প্রতিনন্দন্তি দেহিনঃ
149.96
সর্বে বিক্রান্তবীর্যাশ্চ অস্মিন্দেশে সুদারুণাঃ
যুষ্মান্প্রধর্ষয়িষ্যন্তি বিকৃতা মাংসভোজনাঃ
149.97
দূরাচ্চায়ং বনোদ্দেশো ভয়মত্র ভবিষ্যতি
ত্যজ্যতাং কাষ্ঠভূতোঽয়ং মৃষ্যতাং জাম্বুকং বচঃ
149.98
যদি জম্বুকবাক্যানি নিষ্ফলান্যনৃতানি চ
শ্রোষ্যথ ভ্রষ্টবিজ্ঞানাস্ততঃ সর্বে বিনঙ্ক্ষ্যথ
149.99
জম্বুক উবাচ
স্থীয়তাং নেহ ভেতব্যং যাবত্তপতি ভাস্করঃ
তাবদস্মিন্সুতস্নেহাদনির্বেদেন বর্তত
149.100
স্বৈরং রুদত বিস্রব্ধাঃ স্বৈরং স্নেহেন পশ্যত
স্থীয়তাং যাবদাদিত্যঃ কিং বঃ ক্রব্যাদভাষিতৈঃ
149.101
যদি গৃধ্রস্য বাক্যানি তীব্রাণি রভসানি চ
গৃহ্ণীত মোহিতাত্মানঃ সুতো বো ন ভবিষ্যতি
149.102
ভীষ্ম উবাচ
গৃধ্রোঽনস্তমিতে ত্বাহ গতেঽস্তমিতি জম্বুকঃ
মৃতস্য তং পরিজনমূচতুস্তৌ ক্ষুধান্বিতৌ
149.103
স্বকার্যদক্ষিণৌ রাজন্গৃধ্রো জম্বুক এব চ
ক্ষুত্পিপাসাপরিশ্রান্তৌ শাস্ত্রমালম্ব্য জল্পতঃ
149.104
তয়োর্বিজ্ঞানবিদুষোর্দ্বয়োর্জম্বুকপত্রিণোঃ
বাক্যৈরমৃতকল্পৈর্হি প্রাতিষ্ঠন্ত ব্রজন্তি চ
149.105
শোকদৈন্যসমাবিষ্টা রুদন্তস্তস্থিরে তদা
স্বকার্যকুশলাভ্যাং তে সংভ্রাম্যন্তে হ নৈপুণাৎ
149.106
তথা তয়োর্বিবদতোর্বিজ্ঞানবিদুষোর্দ্বয়োঃ
বান্ধবানাং স্থিতানাং চ উপাতিষ্ঠত শংকরঃ
149.107
ততস্তানাহ মনুজান্বরদোঽস্মীতি শূলভৃৎ
তে প্রত্যূচুরিদং বাক্যং দুঃখিতাঃ প্রণতাঃ স্থিতাঃ
149.108
একপুত্রবিহীনানাং সর্বেষাং জীবিতার্থিনাম্
পুত্রস্য নো জীবদানাজ্জীবিতং দাতুমর্হসি
149.109
এবমুক্তঃ স ভগবান্বারিপূর্ণেন পাণিনা
জীবং তস্মৈ কুমারায় প্রাদাদ্বর্ষশতায় বৈ
149.110
তথা গোমায়ুগৃধ্রাভ্যামদদত্ক্ষুদ্বিনাশনম্
বরং পিনাকী ভগবান্সর্বভূতহিতে রতঃ
149.111
ততঃ প্রণম্য তং দেবং শ্রেয়োহর্ষসমন্বিতাঃ
কৃতকৃত্যাঃ সুখং হৃষ্টাঃ প্রাতিষ্ঠন্ত তদা বিভো
149.112
অনির্বেদেন দীর্ঘেণ নিশ্চয়েন ধ্রুবেণ চ
দেবদেবপ্রসাদাচ্চ ক্ষিপ্রং ফলমবাপ্যতে
149.113
পশ্য দেবস্য সংয়োগং বান্ধবানাং চ নিশ্চয়ম্
কৃপণানাং হি রুদতাং কৃতমশ্রুপ্রমার্জনম্
149.114
পশ্য চাল্পেন কালেন নিশ্চয়ান্বেষণেন চ
প্রসাদং শংকরাত্প্রাপ্য দুঃখিতাঃ সুখমাপ্নুবন্
149.115
তে বিস্মিতাঃ প্রহৃষ্টাশ্চ পুত্রসংজীবনাত্পুনঃ
বভূবুর্ভরতশ্রেষ্ঠ প্রসাদাচ্ছংকরস্য বৈ
149.116
ততস্তে ত্বরিতা রাজঞ্শ্রুত্বা শোকমঘোদ্ভবম্
বিবিশুঃ পুত্রমাদায় নগরং হৃষ্টমানসাঃ
এষা বুদ্ধিঃ সমস্তানাং চাতুর্বর্ণ্যে নিদর্শিতা
149.117
ধর্মার্থমোক্ষসংয়ুক্তমিতিহাসমিমং শুভম্
শ্রুত্বা মনুষ্যঃ সততমিহ প্রেত্য চ মোদতে