Utshovঅধ্যায় 148
148.1
শৌনক উবাচ
তস্মাত্তেঽহং প্রবক্ষ্যামি ধর্মমাবৃত্তচেতসে
শ্রীমান্মহাবলস্তুষ্টো যস্ত্বং ধর্মমবেক্ষসে
পুরস্তাদ্দারুণো ভূত্বা সুচিত্রতরমেব তৎ
148.2
অনুগৃহ্ণন্তি ভূতানি স্বেন বৃত্তেন পার্থিব
কৃত্স্নে নূনং সদসতী ইতি লোকো ব্যবস্যতি
যত্র ত্বং তাদৃশো ভূত্বা ধর্মমদ্যানুপশ্যসি
148.3
হিত্বা সুরুচিরং ভক্ষ্যং ভোগাংশ্চ তপ আস্থিতঃ
ইত্যেতদপি ভূতানামদ্ভুতং জনমেজয়
148.4
যো দুর্বলো ভবেদ্দাতা কৃপণো বা তপোধনঃ
অনাশ্চর্যং তদিত্যাহুর্নাতিদূরে হি বর্ততে
148.5
এতদেব হি কার্পণ্যং সমগ্রমসমীক্ষিতম্
তস্মাত্সমীক্ষয়ৈব স্যাদ্ভবেত্তস্মিংস্ততো গুণঃ
148.6
যজ্ঞো দানং দয়া বেদাঃ সত্যং চ পৃথিবীপতে
পঞ্চৈতানি পবিত্রাণি ষষ্ঠং সুচরিতং তপঃ
148.7
তদেব রাজ্ঞাং পরমং পবিত্রং জনমেজয়
তেন সম্যগ্গৃহীতেন শ্রেয়াংসং ধর্মমাপ্স্যসি
148.8
পুণ্যদেশাভিগমনং পবিত্রং পরমং স্মৃতম্
অপি হ্যুদাহরন্তীমা গাথা গীতা যয়াতিনা
148.9
যো মর্ত্যঃ প্রতিপদ্যেত আয়ুর্জীবেত বা পুনঃ
যজ্ঞমেকান্ততঃ কৃত্বা তত্সংন্যস্য তপশ্চরেৎ
148.10
পুণ্যমাহুঃ কুরুক্ষেত্রং সরস্বত্যাং পৃথূদকম্
যত্রাবগাহ্য পীত্বা বা নৈবং শ্বোমরণং তপেৎ
148.11
মহাসরঃ পুষ্করাণি প্রভাসোত্তরমানসে
কালোদং ত্বেব গন্তাসি লব্ধায়ুর্জীবিতে পুনঃ
148.12
সরস্বতীদৃষদ্বত্যৌ সেবমানোঽনুসংচরেঃ
স্বাধ্যায়শীলঃ স্থানেষু সর্বেষু সমুপস্পৃশেঃ
148.13
ত্যাগধর্মং পবিত্রাণাং সংন্যাসং পরমব্রবীৎ
অত্রাপ্যুদাহরন্তীমা গাথাঃ সত্যবতা কৃতাঃ
148.14
যথা কুমারঃ সত্যো বৈ ন পুণ্যো ন চ পাপকৃৎ
ন হ্যস্তি সর্বভূতেষু দুঃখমস্মিন্কুতঃ সুখম্
148.15
এবং প্রকৃতিভূতানাং সর্বসংসর্গয়ায়িনাম্
ত্যজতাং জীবিতং প্রায়ো বিবৃতে পুণ্যপাতকে
148.16
যত্ত্বেব রাজ্ঞো জ্যায়ো বৈ কার্যাণাং তদ্বদামি তে
বলেন সংবিভাগৈশ্চ জয় স্বর্গং পুনীষ্ব চ
148.17
যস্যৈবং বলমোজশ্চ স ধর্মস্য প্রভুর্নরঃ
ব্রাহ্মণানাং সুখার্থং ত্বং পর্যেহি পৃথিবীমিমাম্
148.18
যথৈবৈনান্পুরাক্ষৈপ্সীস্তথৈবৈনান্প্রসাদয়
অপি ধিক্ক্রিয়মাণোঽপি ত্যজ্যমানোঽপ্যনেকধা
148.19
আত্মনো দর্শনং বিদ্বন্নাহন্তাস্মীতি মা ক্রুধঃ
ঘটমানঃ স্বকার্যেষু কুরু নৈঃশ্রেয়সং পরম্
148.20
হিমাগ্নিঘোরসদৃশো রাজা ভবতি কশ্চন
লাঙ্গলাশনিকল্পো বা ভবত্যন্যঃ পরংতপ
148.21
ন নিঃশেষেণ মন্তব্যমচিকিত্স্যেন বা পুনঃ
ন জাতু নাহমস্মীতি প্রসক্তব্যমসাধুষু
148.22
বিকর্মণা তপ্যমানঃ পাদাত্পাপস্য মুচ্যতে
নৈতত্কার্যং পুনরিতি দ্বিতীয়াত্পরিমুচ্যতে
চরিষ্যে ধর্মমেবেতি তৃতীয়াত্পরিমুচ্যতে
148.23
কল্যাণমনুমন্তব্যং পুরুষেণ বুভূষতা
যে সুগন্ধীনি সেবন্তে তথাগন্ধা ভবন্তি তে
যে দুর্গন্ধীনি সেবন্তে তথাগন্ধা ভবন্তি তে
148.24
তপশ্চর্যাপরঃ সদ্যঃ পাপাদ্ধি পরিমুচ্যতে
সংবত্সরমুপাস্যাগ্নিমভিশস্তঃ প্রমুচ্যতে
ত্রীণি বর্ষাণ্যুপাস্যাগ্নিং ভ্রূণহা বিপ্রমুচ্যতে
148.25
যাবতঃ প্রাণিনো হন্যাত্তজ্জাতীয়ান্স্বভাবতঃ
প্রমীয়মাণানুন্মোচ্য ভ্রূণহা বিপ্রমুচ্যতে
148.26
অপি বাপ্সু নিমজ্জেত ত্রির্জপন্নঘমর্ষণম্
যথাশ্বমেধাবভৃথস্তথা তন্মনুরব্রবীৎ
148.27
ক্ষিপ্রং প্রণুদতে পাপং সত্কারং লভতে তথা
অপি চৈনং প্রসীদন্তি ভূতানি জডমূকবৎ
148.28
বৃহস্পতিং দেবগুরুং সুরাসুরাঃ; সমেত্য সর্বে নৃপতেঽন্বয়ুঞ্জন্
ধর্মে ফলং বেত্থ কৃতে মহর্ষে; তথেতরস্মিন্নরকে পাপলোকে
148.29
উভে তু যস্য সুকৃতে ভবেতাং; কিং স্বিত্তয়োস্তত্র জয়োত্তরং স্যাৎ
আচক্ষ্ব নঃ কর্মফলং মহর্ষে; কথং পাপং নুদতে পুণ্যশীলঃ
148.30
বৃহস্পতিরুবাচ
কৃত্বা পাপং পূর্বমবুদ্ধিপূর্বং; পুণ্যানি যঃ কুরুতে বুদ্ধিপূর্বম্
স তত্পাপং নুদতে পুণ্যশীলো; বাসো যথা মলিনং ক্ষারয়ুক্ত্যা
148.31
পাপং কৃত্বা ন মন্যেত নাহমস্মীতি পূরুষঃ
চিকীর্ষেদেব কল্যাণং শ্রদ্দধানোঽনসূয়কঃ
148.32
ছিদ্রাণি বসনস্যেব সাধুনা বিবৃণোতি যঃ
যঃ পাপং পুরুষঃ কৃত্বা কল্যাণমভিপদ্যতে
148.33
যথাদিত্যঃ পুনরুদ্যংস্তমঃ সর্বং ব্যপোহতি
কল্যাণমাচরন্নেবং সর্বং পাপং ব্যপোহতি
148.34
ভীষ্ম উবাচ
এবমুক্ত্বা স রাজানমিন্দ্রোতো জনমেজয়ম্
যাজয়ামাস বিধিবদ্বাজিমেধেন শৌনকঃ
148.35
ততঃ স রাজা ব্যপনীতকল্মষঃ; শ্রিয়া যুতঃ প্রজ্বলিতাগ্নিরূপয়া
বিবেশ রাজ্যং স্বমমিত্রকর্শনো; দিবং যথা পূর্ণবপুর্নিশাকরঃ