অধ্যায় 147

147.1

ভীষ্ম উবাচ
এবমুক্তঃ প্রত্যুবাচ তং মুনিং জনমেজয়ঃ
গর্হ্যং ভবান্গর্হয়তি নিন্দ্যং নিন্দতি মা ভবান্

ধিক্কার্যং মা ধিক্কুরুতে তস্মাত্ত্বাহং প্রসাদয়ে
সর্বং হীদং স্বকৃতং মে জ্বলাম্যগ্নাবিবাহিতঃ

স্বকর্মাণ্যভিসংধায় নাভিনন্দতি মে মনঃ
প্রাপ্তং নূনং ময়া ঘোরং ভয়ং বৈবস্বতাদপি

তত্তু শল্যমনির্হৃত্য কথং শক্ষ্যামি জীবিতুম্
সর্বমন্যূন্বিনীয় ত্বমভি মা বদ শৌনক

মহানসং ব্রাহ্মণানাং ভবিষ্যাম্যর্থবান্পুনঃ
অস্তু শেষং কুলস্যাস্য মা পরাভূদিদং কুলম্

ন হি নো ব্রহ্মশপ্তানাং শেষো ভবিতুমর্হতি
শ্রুতীরলভমানানাং সংবিদং বেদনিশ্চয়াৎ

নির্বিদ্যমানঃ সুভৃশং ভূয়ো বক্ষ্যামি সাংপ্রতম্
ভূয়শ্চৈবাভিনঙ্ক্ষন্তি নির্ধর্মা নির্জপা ইব

অর্বাক্চ প্রতিতিষ্ঠন্তি পুলিন্দশবরা ইব
ন হ্যয়জ্ঞা অমুং লোকং প্রাপ্নুবন্তি কথংচন

অবিজ্ঞায়ৈব মে প্রজ্ঞাং বালস্যেব সুপণ্ডিতঃ
ব্রহ্মন্পিতেব পুত্রেভ্যঃ প্রতি মাং বাঞ্ছ শৌনক

শৌনক উবাচ
কিমাশ্চর্যং যতঃ প্রাজ্ঞো বহু কুর্যাদ্ধি সাংপ্রতম্
ইতি বৈ পণ্ডিতো ভূত্বা ভূতানাং নোপতপ্যতি

প্রজ্ঞাপ্রাসাদমারুহ্য অশোচ্যঃ শোচতে জনান্
জগতীস্থানিবাদ্রিস্থঃ প্রজ্ঞয়া প্রতিপশ্যতি

ন চোপলভতে তত্র ন চ কার্যাণি পশ্যতি
নির্বিণ্ণাত্মা পরোক্ষো বা ধিক্কৃতঃ সর্বসাধুষু

বিদিত্বোভয়তো বীর্যং মাহাত্ম্যং বেদ আগমে
কুরুষ্বেহ মহাশান্তিং ব্রহ্মা শরণমস্তু তে

তদ্বৈ পারত্রিকং চারু ব্রাহ্মণানামকুপ্যতাম্
অথ চেত্তপ্যসে পাপৈর্ধর্মং চেদনুপশ্যসি

জনমেজয় উবাচ
অনুতপ্যে চ পাপেন ন চাধর্মং চরাম্যহম্
বুভূষুং ভজমানং চ প্রতিবাঞ্ছামি শৌনক

শৌনক উবাচ
ছিত্ত্বা স্তম্ভং চ মানং চ প্রীতিমিচ্ছামি তে নৃপ
সর্বভূতহিতে তিষ্ঠ ধর্মং চৈব প্রতিস্মর

ন ভয়ান্ন চ কার্পণ্যান্ন লোভাত্ত্বামুপাহ্বয়ে
তাং মে দেবা গিরং সত্যাং শৃণ্বন্তু ব্রাহ্মণৈঃ সহ

সোঽহং ন কেনচিচ্চার্থী ত্বাং চ ধর্মমুপাহ্বয়ে
ক্রোশতাং সর্বভূতানামহো ধিগিতি কুর্বতাম্

বক্ষ্যন্তি মামধর্মজ্ঞা বক্ষ্যন্ত্যসুহৃদো জনাঃ
বাচস্তাঃ সুহৃদঃ শ্রুত্বা সংজ্বরিষ্যন্তি মে ভৃশম্

কেচিদেব মহাপ্রাজ্ঞাঃ পরিজ্ঞাস্যন্তি কার্যতাম্
জানীহি মে কৃতং তাত ব্রাহ্মণান্প্রতি ভারত

যথা তে মত্কৃতে ক্ষেমং লভেরংস্তত্তথা কুরু
প্রতিজানীহি চাদ্রোহং ব্রাহ্মণানাং নরাধিপ

জনমেজয় উবাচ
নৈব বাচা ন মনসা ন পুনর্জাতু কর্মণা
দ্রোগ্ধাস্মি ব্রাহ্মণান্বিপ্র চরণাবেব তে স্পৃশে