অধ্যায় 146

146.1

যুধিষ্ঠির উবাচ
অবুদ্ধিপূর্বং যঃ পাপং কুর্যাদ্ভরতসত্তম
মুচ্যতে স কথং তস্মাদেনসস্তদ্বদস্ব মে

ভীষ্ম উবাচ
অত্র তে বর্ণয়িষ্যেঽহমিতিহাসং পুরাতনম্
ইন্দ্রোতঃ শৌনকো বিপ্রো যদাহ জনমেজয়ম্

আসীদ্রাজা মহাবীর্যঃ পারিক্ষিজ্জনমেজয়ঃ
অবুদ্ধিপূর্বং ব্রহ্মহত্যা তমাগচ্ছন্মহীপতিম্

তং ব্রাহ্মণাঃ সর্ব এব তত্যজুঃ সপুরোহিতাঃ
জগাম স বনং রাজা দহ্যমানো দিবানিশম্

স প্রজাভিঃ পরিত্যক্তশ্চকার কুশলং মহৎ
অতিবেলং তপস্তেপে দহ্যমানঃ স মন্যুনা

তত্রেতিহাসং বক্ষ্যামি ধর্মস্যাস্যোপবৃংহণম্
দহ্যমানঃ পাপকৃত্যা জগাম জনমেজয়ঃ

বরিষ্যমাণ ইন্দ্রোতং শৌনকং সংশিতব্রতম্
সমাসাদ্যোপজগ্রাহ পাদয়োঃ পরিপীডয়ন্

ততো ভীতো মহাপ্রাজ্ঞো জগর্হে সুভৃশং তদা
কর্তা পাপস্য মহতো ভ্রূণহা কিমিহাগতঃ

কিং তবাস্মাসু কর্তব্যং মা মা স্প্রাক্ষীঃ কথংচন
গচ্ছ গচ্ছ ন তে স্থানং প্রীণাত্যস্মানিহ ধ্রুবম্

রুধিরস্যেব তে গন্ধঃ শবস্যেব চ দর্শনম্
অশিবঃ শিবসংকাশো মৃতো জীবন্নিবাটসি

অন্তর্মৃত্যুরশুদ্ধাত্মা পাপমেবানুচিন্তয়ন্
প্রবুধ্যসে প্রস্বপিষি বর্তসে চরসে সুখী

মোঘং তে জীবিতং রাজন্পরিক্লিষ্টং চ জীবসি
পাপায়েব চ সৃষ্টোঽসি কর্মণে হ যবীয়সে

বহু কল্যাণমিচ্ছন্ত ঈহন্তে পিতরঃ সুতান্
তপসা দেবতেজ্যাভির্বন্দনেন তিতিক্ষয়া

পিতৃবংশমিমং পশ্য ত্বত্কৃতে নরকং গতম্
নিরর্থাঃ সর্ব এবৈষামাশাবন্ধাস্ত্বদাশ্রয়াঃ

যান্পূজয়ন্তো বিন্দন্তি স্বর্গমায়ুর্যশঃ সুখম্
তেষু তে সততং দ্বেষো ব্রাহ্মণেষু নিরর্থকঃ

ইমং লোকং বিমুচ্য ত্বমবাঙ্মূর্ধা পতিষ্যসি
অশাশ্বতীঃ শাশ্বতীশ্চ সমাঃ পাপেন কর্মণা

অদ্যমানো জন্তুগৃধ্রৈঃ শিতিকণ্ঠৈরয়োমুখৈঃ
ততোঽপি পুনরাবৃত্তঃ পাপয়োনিং গমিষ্যসি

যদিদং মন্যসে রাজন্নায়মস্তি পরঃ কুতঃ
প্রতিস্মারয়িতারস্ত্বাং যমদূতা যমক্ষয়ে