অধ্যায় 145

145.1

ভীষ্ম উবাচ
বিমানস্থৌ তু তৌ রাজঁল্লুব্ধকো বৈ দদর্শ হ
দৃষ্ট্বা তৌ দংপতী দুঃখাদচিন্তয়ত সদ্গতিম্

কীদৃশেনেহ তপসা গচ্ছেয়ং পরমাং গতিম্
ইতি বুদ্ধ্যা বিনিশ্চিত্য গমনায়োপচক্রমে

মহাপ্রস্থানমাশ্রিত্য লুব্ধকঃ পক্ষিজীবনঃ
নিশ্চেষ্টো মারুতাহারো নির্মমঃ স্বর্গকাঙ্ক্ষয়া

ততোঽপশ্যত্সুবিস্তীর্ণং হৃদ্যং পদ্মবিভূষিতম্
নানাদ্বিজগণাকীর্ণং সরঃ শীতজলং শুভম্
পিপাসার্তোঽপি তদ্দৃষ্ট্বা তৃপ্তঃ স্যান্নাত্র সংশয়ঃ

উপবাসকৃশোঽত্যর্থং স তু পার্থিব লুব্ধকঃ
উপসর্পত সংহৃষ্টঃ শ্বাপদাধ্যুষিতং বনম্

মহান্তং নিশ্চয়ং কৃত্বা লুব্ধকঃ প্রবিবেশ হ
প্রবিশন্নেব চ বনং নিগৃহীতঃ স কণ্টকৈঃ

স কণ্টকবিভুগ্নাঙ্গো লোহিতার্দ্রীকৃতচ্ছবিঃ
বভ্রাম তস্মিন্বিজনে নানামৃগসমাকুলে

ততো দ্রুমাণাং মহতাং পবনেন বনে তদা
উদতিষ্ঠত সংঘর্ষাত্সুমহান্হব্যবাহনঃ

তদ্বনং বৃক্ষসংকীর্ণং লতাবিটপসংকুলম্
দদাহ পাবকঃ ক্রুদ্ধো যুগান্তাগ্নিসমপ্রভঃ

সজ্বালৈঃ পবনোদ্ধূতৈর্বিস্ফুলিঙ্গৈঃ সমন্বিতঃ
দদাহ তদ্বনং ঘোরং মৃগপক্ষিসমাকুলম্

ততঃ স দেহমোক্ষার্থং সংপ্রহৃষ্টেন চেতসা
অভ্যধাবত সংবৃদ্ধং পাবকং লুব্ধকস্তদা

ততস্তেনাগ্নিনা দগ্ধো লুব্ধকো নষ্টকিল্বিষঃ
জগাম পরমাং সিদ্ধিং তদা ভরতসত্তম

ততঃ স্বর্গস্থমাত্মানং সোঽপশ্যদ্বিগতজ্বরঃ
যক্ষগন্ধর্বসিদ্ধানাং মধ্যে ভ্রাজন্তমিন্দ্রবৎ

এবং খলু কপোতশ্চ কপোতী চ পতিব্রতা
লুব্ধকেন সহ স্বর্গং গতাঃ পুণ্যেন কর্মণা

যাপি চৈবংবিধা নারী ভর্তারমনুবর্ততে
বিরাজতে হি সা ক্ষিপ্রং কপোতীব দিবি স্থিতা

এবমেতত্পুরা বৃত্তং লুব্ধকস্য মহাত্মনঃ
কপোতস্য চ ধর্মিষ্ঠা গতিঃ পুণ্যেন কর্মণা

যশ্চেদং শৃণুয়ান্নিত্যং যশ্চেদং পরিকীর্তয়েৎ
নাশুভং বিদ্যতে তস্য মনসাপি প্রমাদ্যতঃ

যুধিষ্ঠির মহানেষ ধর্মো ধর্মভৃতাং বর
গোঘ্নেষ্বপি ভবেদস্মিন্নিষ্কৃতিঃ পাপকর্মণঃ
নিষ্কৃতির্ন ভবেত্তস্মিন্যো হন্যাচ্ছরণাগতম্