অধ্যায় 144

144.1

ভীষ্ম উবাচ
ততো গতে শাকুনিকে কপোতী প্রাহ দুঃখিতা
সংস্মৃত্য ভর্তারমথো রুদতী শোকমূর্ছিতা

নাহং তে বিপ্রিয়ং কান্ত কদাচিদপি সংস্মরে
সর্বা বৈ বিধবা নারী বহুপুত্রাপি খেচর
শোচ্যা ভবতি বন্ধূনাং পতিহীনা মনস্বিনী

লালিতাহং ত্বয়া নিত্যং বহুমানাচ্চ সান্ত্বিতা
বচনৈর্মধুরৈঃ স্নিগ্ধৈরসকৃত্সুমনোহরৈঃ

কন্দরেষু চ শৈলানাং নদীনাং নির্ঝরেষু চ
দ্রুমাগ্রেষু চ রম্যেষু রমিতাহং ত্বয়া প্রিয়

আকাশগমনে চৈব সুখিতাহং ত্বয়া সুখম্
বিহৃতাস্মি ত্বয়া কান্ত তন্মে নাদ্যাস্তি কিংচন

মিতং দদাতি হি পিতা মিতং মাতা মিতং সুতঃ
অমিতস্য তু দাতারং ভর্তারং কা ন পূজয়েৎ

নাস্তি ভর্তৃসমো নাথো ন চ ভর্তৃসমং সুখম্
বিসৃজ্য ধনসর্বস্বং ভর্তা বৈ শরণং স্ত্রিয়াঃ

ন কার্যমিহ মে নাথ জীবিতেন ত্বয়া বিনা
পতিহীনাপি কা নারী সতী জীবিতুমুত্সহেৎ

এবং বিলপ্য বহুধা করুণং সা সুদুঃখিতা
পতিব্রতা সংপ্রদীপ্তং প্রবিবেশ হুতাশনম্

ততশ্চিত্রাম্বরধরং ভর্তারং সান্বপশ্যত
বিমানস্থং সুকৃতিভিঃ পূজ্যমানং মহাত্মভিঃ

চিত্রমাল্যাম্বরধরং সর্বাভরণভূষিতম্
বিমানশতকোটীভিরাবৃতং পুণ্যকীর্তিভিঃ

ততঃ স্বর্গগতঃ পক্ষী ভার্যয়া সহ সংগতঃ
কর্মণা পূজিতস্তেন রেমে তত্র স ভার্যয়া