অধ্যায় 143

143.1

ভীষ্ম উবাচ
ততস্তং লুব্ধকঃ পশ্যন্কৃপয়াভিপরিপ্লুতঃ
কপোতমগ্নৌ পতিতং বাক্যং পুনরুবাচ হ

কিমীদৃশং নৃশংসেন ময়া কৃতমবুদ্ধিনা
ভবিষ্যতি হি মে নিত্যং পাতকং হৃদি জীবতঃ

স বিনিন্দন্নথাত্মানং পুনঃ পুনরুবাচ হ
ধিঙ্মামস্তু সুদুর্বুদ্ধিং সদা নিকৃতিনিশ্চয়ম্
শুভং কর্ম পরিত্যজ্য যোঽহং শকুনিলুব্ধকঃ

নৃশংসস্য মমাদ্যায়ং প্রত্যাদেশো ন সংশয়ঃ
দত্তঃ স্বমাংসং দদতা কপোতেন মহাত্মনা

সোঽহং ত্যক্ষ্যে প্রিয়ান্প্রাণান্পুত্রদারং বিসৃজ্য চ
উপদিষ্টো হি মে ধর্মঃ কপোতেনাতিধর্মিণা

অদ্য প্রভৃতি দেহং স্বং সর্বভোগৈর্বিবর্জিতম্
যথা স্বল্পং জলং গ্রীষ্মে শোষয়িষ্যাম্যহং তথা

ক্ষুত্পিপাসাতপসহঃ কৃশো ধমনিসংততঃ
উপবাসৈর্বহুবিধৈশ্চরিষ্যে পারলৌকিকম্

অহো দেহপ্রদানেন দর্শিতাতিথিপূজনা
তস্মাদ্ধর্মং চরিষ্যামি ধর্মো হি পরমা গতিঃ
দৃষ্টো হি ধর্মো ধর্মিষ্ঠৈর্যাদৃশো বিহগোত্তমে

এবমুক্ত্বা বিনিশ্চিত্য রৌদ্রকর্মা স লুব্ধকঃ
মহাপ্রস্থানমাশ্রিত্য প্রয়য়ৌ সংশিতব্রতঃ

ততো যষ্টিং শলাকাশ্চ ক্ষারকং পঞ্জরং তথা
তাংশ্চ বদ্ধা কপোতান্স সংপ্রমুচ্যোত্সসর্জ হ