Utshovঅধ্যায় 142
142.1
ভীষ্ম উবাচ
অথ বৃক্ষস্য শাখায়াং বিহংগঃ সসুহৃজ্জনঃ
দীর্ঘকালোষিতো রাজংস্তত্র চিত্রতনূরুহঃ
142.2
তস্য কাল্যং গতা ভার্যা চরিতুং নাভ্যবর্তত
প্রাপ্তাং চ রজনীং দৃষ্ট্বা স পক্ষী পর্যতপ্যত
142.3
বাতবর্ষং মহচ্চাসীন্ন চাগচ্ছতি মে প্রিয়া
কিং নু তত্কারণং যেন সাদ্যাপি ন নিবর্ততে
142.4
অপি স্বস্তি ভবেত্তস্যাঃ প্রিয়ায়া মম কাননে
তয়া বিরহিতং হীদং শূন্যমদ্য গৃহং মম
142.5
যদি সা রক্তনেত্রান্তা চিত্রাঙ্গী মধুরস্বরা
অদ্য নাভ্যেতি মে কান্তা ন কার্যং জীবিতেন মে
142.6
পতিধর্মরতা সাধ্বী প্রাণেভ্যোঽপি গরীয়সী
সা হি শ্রান্তং ক্ষুধার্তং চ জানীতে মাং তপস্বিনী
142.7
অনুরক্তা হিতা চৈব স্নিগ্ধা চৈব পতিব্রতা
যস্য বৈ তাদৃশী ভার্যা ধন্যঃ স মনুজো ভুবি
142.8
ভার্যা হি পরমো নাথঃ পুরুষস্যেহ পঠ্যতে
অসহায়স্য লোকেঽস্মিঁল্লোকয়াত্রাসহায়িনী
142.9
তথা রোগাভিভূতস্য নিত্যং কৃচ্ছ্রগতস্য চ
নাস্তি ভার্যাসমং কিংচিন্নরস্যার্তস্য ভেষজম্
142.10
নাস্তি ভার্যাসমো বন্ধুর্নাস্তি ভার্যাসমা গতিঃ
নাস্তি ভার্যাসমো লোকে সহায়ো ধর্মসাধনঃ
142.11
এবং বিলপতস্তস্য দ্বিজস্যার্তস্য তত্র বৈ
গৃহীতা শকুনঘ্নেন ভার্যা শুশ্রাব ভারতীম্
142.12
ন সা স্ত্রীত্যভিভাষা স্যাদ্যস্যা ভর্তা ন তুষ্যতি
অগ্নিসাক্ষিকমপ্যেতদ্ভর্তা হি শরণং স্ত্রিয়ঃ
142.13
ইতি সংচিন্ত্য দুঃখার্তা ভর্তারং দুঃখিতং তদা
কপোতী লুব্ধকেনাথ যত্তা বচনমব্রবীৎ
142.14
হন্ত বক্ষ্যামি তে শ্রেয়ঃ শ্রুত্বা চ কুরু তত্তথা
শরণাগতসংত্রাতা ভব কান্ত বিশেষতঃ
142.15
এষ শাকুনিকঃ শেতে তব বাসং সমাশ্রিতঃ
শীতার্তশ্চ ক্ষুধার্তশ্চ পূজামস্মৈ প্রয়োজয়
142.16
যো হি কশ্চিদ্দ্বিজং হন্যাদ্গাং বা লোকস্য মাতরম্
শরণাগতং চ যো হন্যাত্তুল্যং তেষাং চ পাতকম্
142.17
যাস্মাকং বিহিতা বৃত্তিঃ কাপোতী জাতিধর্মতঃ
সা ন্যায্যাত্মবতা নিত্যং ত্বদ্বিধেনাভিবর্তিতুম্
142.18
যস্তু ধর্মং যথাশক্তি গৃহস্থো হ্যনুবর্ততে
স প্রেত্য লভতে লোকানক্ষয়ানিতি শুশ্রুম
142.19
স ত্বং সংতানবানদ্য পুত্রবানপি চ দ্বিজ
তত্স্বদেহে দয়াং ত্যক্ত্বা ধর্মার্থৌ পরিগৃহ্য বৈ
পূজামস্মৈ প্রয়ুঙ্ক্ষ্ব ত্বং প্রীয়েতাস্য মনো যথা
142.20
ইতি সা শকুনী বাক্যং ক্ষারকস্থা তপস্বিনী
অতিদুঃখান্বিতা প্রোচ্য ভর্তারং সমুদৈক্ষত
142.21
স পত্ন্যা বচনং শ্রুত্বা ধর্ময়ুক্তিসমন্বিতম্
হর্ষেণ মহতা যুক্তো বাষ্পব্যাকুললোচনঃ
142.22
তং বৈ শাকুনিকং দৃষ্ট্বা বিধিদৃষ্টেন কর্মণা
পূজয়ামাস যত্নেন স পক্ষী পক্ষিজীবিনম্
142.23
উবাচ চ স্বাগতং তে ব্রূহি কিং করবাণ্যহম্
সংতাপশ্চ ন কর্তব্যঃ স্বগৃহে বর্ততে ভবান্
142.24
তদ্ব্রবীতু ভবান্ক্ষিপ্রং কিং করোমি কিমিচ্ছসি
প্রণয়েন ব্রবীমি ত্বাং ত্বং হি নঃ শরণাগতঃ
142.25
শরণাগতস্য কর্তব্যমাতিথ্যমিহ যত্নতঃ
পঞ্চয়জ্ঞপ্রবৃত্তেন গৃহস্থেন বিশেষতঃ
142.26
পঞ্চয়জ্ঞাংস্তু যো মোহান্ন করোতি গৃহাশ্রমী
তস্য নায়ং ন চ পরো লোকো ভবতি ধর্মতঃ
142.27
তদ্ব্রূহি ত্বং সুবিস্রব্ধো যত্ত্বং বাচা বদিষ্যসি
তত্করিষ্যাম্যহং সর্বং মা ত্বং শোকে মনঃ কৃথাঃ
142.28
তস্য তদ্বচনং শ্রুত্বা শকুনের্লুব্ধকোঽব্রবীৎ
বাধতে খলু মা শীতং হিমত্রাণং বিধীয়তাম্
142.29
এবমুক্তস্ততঃ পক্ষী পর্ণান্যাস্তীর্য ভূতলে
যথাশুষ্কাণি যত্নেন জ্বলনার্থং দ্রুতং যয়ৌ
142.30
স গত্বাঙ্গারকর্মান্তং গৃহীত্বাগ্নিমথাগমৎ
ততঃ শুষ্কেষু পর্ণেষু পাবকং সোঽভ্যদীদিপৎ
142.31
সুসংদীপ্তং মহত্কৃত্বা তমাহ শরণাগতম্
প্রতাপয় সুবিস্রব্ধং স্বগাত্রাণ্যকুতোভয়ঃ
142.32
স তথোক্তস্তথেত্যুক্ত্বা লুব্ধো গাত্রাণ্যতাপয়ৎ
অগ্নিপ্রত্যাগতপ্রাণস্ততঃ প্রাহ বিহংগমম্
142.33
দত্তমাহারমিচ্ছামি ত্বয়া ক্ষুদ্বাধতে হি মাম্
তদ্বচঃ স প্রতিশ্রুত্য বাক্যমাহ বিহংগমঃ
142.34
ন মেঽস্তি বিভবো যেন নাশয়ামি তব ক্ষুধাম্
উত্পন্নেন হি জীবামো বয়ং নিত্যং বনৌকসঃ
142.35
সংচয়ো নাস্তি চাস্মাকং মুনীনামিব কাননে
ইত্যুক্ত্বা স তদা তত্র বিবর্ণবদনোঽভবৎ
142.36
কথং নু খলু কর্তব্যমিতি চিন্তাপরঃ সদা
বভূব ভরতশ্রেষ্ঠ গর্হয়ন্বৃত্তিমাত্মনঃ
142.37
মুহূর্তাল্লব্ধসংজ্ঞস্তু স পক্ষী পক্ষিঘাতকম্
উবাচ তর্পয়িষ্যে ত্বাং মুহূর্তং প্রতিপালয়
142.38
ইত্যুক্ত্বা শুষ্কপর্ণৈঃ স সংপ্রজ্বাল্য হুতাশনম্
হর্ষেণ মহতা যুক্তঃ কপোতঃ পুনরব্রবীৎ
142.39
দেবানাং চ মুনীনাং চ পিতৄণাং চ মহাত্মনাম্
শ্রুতপূর্বো ময়া ধর্মো মহানতিথিপূজনে
142.40
কুরুষ্বানুগ্রহং মেঽদ্য সত্যমেতদ্ব্রবীমি তে
নিশ্চিতা খলু মে বুদ্ধিরতিথিপ্রতিপূজনে
142.41
ততঃ সত্যপ্রতিজ্ঞো বৈ স পক্ষী প্রহসন্নিব
তমগ্নিং ত্রিঃ পরিক্রম্য প্রবিবেশ মহীপতে
142.42
অগ্নিমধ্যং প্রবিষ্টং তং লুব্ধো দৃষ্ট্বাথ পক্ষিণম্
চিন্তয়ামাস মনসা কিমিদং নু কৃতং ময়া
142.43
অহো মম নৃশংসস্য গর্হিতস্য স্বকর্মণা
অধর্মঃ সুমহান্ঘোরো ভবিষ্যতি ন সংশয়ঃ
142.44
এবং বহুবিধং ভূরি বিললাপ স লুব্ধকঃ
গর্হয়ন্স্বানি কর্মাণি দ্বিজং দৃষ্ট্বা তথাগতম্