Utshovঅধ্যায় 141
141.1
যুধিষ্ঠির উবাচ
পিতামহ মহাপ্রাজ্ঞ সর্বশাস্ত্রবিশারদ
শরণং পালয়ানস্য যো ধর্মস্তং বদস্ব মে
141.2
ভীষ্ম উবাচ
মহান্ধর্মো মহারাজ শরণাগতপালনে
অর্হঃ প্রষ্টুং ভবাংশ্চৈব প্রশ্নং ভরতসত্তম
141.3
নৃগপ্রভৃতয়ো রাজন্রাজানঃ শরণাগতান্
পরিপাল্য মহারাজ সংসিদ্ধিং পরমাং গতাঃ
141.4
শ্রূয়তে হি কপোতেন শত্রুঃ শরণমাগতঃ
পূজিতশ্চ যথান্যায়ং স্বৈশ্চ মাংসৈর্নিমন্ত্রিতঃ
141.5
যুধিষ্ঠির উবাচ
কথং কপোতেন পুরা শত্রুঃ শরণমাগতঃ
স্বমাংসৈর্ভোজিতঃ কাং চ গতিং লেভে স ভারত
141.6
ভীষ্ম উবাচ
শৃণু রাজন্কথাং দিব্যাং সর্বপাপপ্রণাশিনীম্
নৃপতের্মুচুকুন্দস্য কথিতাং ভার্গবেণ হ
141.7
ইমমর্থং পুরা পার্থ মুচুকুন্দো নরাধিপঃ
ভার্গবং পরিপপ্রচ্ছ প্রণতো ভরতর্ষভ
141.8
তস্মৈ শুশ্রূষমাণায় ভার্গবোঽকথয়ত্কথাম্
ইয়ং যথা কপোতেন সিদ্ধিঃ প্রাপ্তা নরাধিপ
141.9
ধর্মনিশ্চয়সংয়ুক্তাং কামার্থসহিতাং কথাম্
শৃণুষ্বাবহিতো রাজন্গদতো মে মহাভুজ
141.10
কশ্চিত্ক্ষুদ্রসমাচারঃ পৃথিব্যাং কালসংমতঃ
চচার পৃথিবীং পাপো ঘোরঃ শকুনিলুব্ধকঃ
141.11
কাকোল ইব কৃষ্ণাঙ্গো রূক্ষঃ পাপসমাহিতঃ
যবমধ্যঃ কৃশগ্রীবো হ্রস্বপাদো মহাহনুঃ
141.12
নৈব তস্য সুহৃত্কশ্চিন্ন সংবন্ধী ন বান্ধবঃ
স হি তৈঃ সংপরিত্যক্তস্তেন ঘোরেণ কর্মণা
141.13
স বৈ ক্ষারকমাদায় দ্বিজান্হত্বা বনে সদা
চকার বিক্রয়ং তেষাং পতংগানাং নরাধিপ
141.14
এবং তু বর্তমানস্য তস্য বৃত্তিং দুরাত্মনঃ
অগমত্সুমহান্কালো ন চাধর্মমবুধ্যত
141.15
তস্য ভার্যাসহায়স্য রমমাণস্য শাশ্বতম্
দৈবয়োগবিমূঢস্য নান্যা বৃত্তিররোচত
141.16
ততঃ কদাচিত্তস্যাথ বনস্থস্য সমুদ্গতঃ
পাতয়ন্নিব বৃক্ষাংস্তান্সুমহান্বাতসংভ্রমঃ
141.17
মেঘসংকুলমাকাশং বিদ্যুন্মণ্ডলমণ্ডিতম্
সংছন্নং সুমুহূর্তেন নৌস্থানেনেব সাগরঃ
141.18
বারিধারাসমূহৈশ্চ সংপ্রহৃষ্টঃ শতক্রতুঃ
ক্ষণেন পূরয়ামাস সলিলেন বসুংধরাম্
141.19
ততো ধারাকুলে লোকে সংভ্রমন্নষ্টচেতনঃ
শীতার্তস্তদ্বনং সর্বমাকুলেনান্তরাত্মনা
141.20
নৈব নিম্নং স্থলং বাপি সোঽবিন্দত বিহংগহা
পূরিতো হি জলৌঘেন মার্গস্তস্য বনস্য বৈ
141.21
পক্ষিণো বাতবেগেন হতা লীনাস্তদাভবন্
মৃগাঃ সিংহা বরাহাশ্চ স্থলান্যাশ্রিত্য তস্থিরে
141.22
মহতা বাতবর্ষেণ ত্রাসিতাস্তে বনৌকসঃ
ভয়ার্তাশ্চ ক্ষুধার্তাশ্চ বভ্রমুঃ সহিতা বনে
141.23
স তু শীতহতৈর্গাত্রৈর্জগামৈব ন তস্থিবান্
সোঽপশ্যদ্বনষণ্ডেষু মেঘনীলং বনস্পতিম্
141.24
তারাঢ্যং কুমুদাকারমাকাশং নির্মলং চ হ
মেঘৈর্মুক্তং নভো দৃষ্ট্বা লুব্ধকঃ শীতবিহ্বলঃ
141.25
দিশোঽবলোকয়ামাস বেলাং চৈব দুরাত্মবান্
দূরে গ্রামনিবেশশ্চ তস্মাদ্দেশাদিতি প্রভো
কৃতবুদ্ধির্বনে তস্মিন্বস্তুং তাং রজনীং তদা
141.26
সোঽঞ্জলিং প্রয়তঃ কৃত্বা বাক্যমাহ বনস্পতিম্
শরণং যামি যান্যস্মিন্দৈবতানীহ ভারত
141.27
স শিলায়াং শিরঃ কৃত্বা পর্ণান্যাস্তীর্য ভূতলে
দুঃখেন মহতাবিষ্টস্ততঃ সুষ্বাপ পক্ষিহা