Utshovঅধ্যায় 140
140.1
যুধিষ্ঠির উবাচ
যদিদং ঘোরমুদ্দিষ্টমশ্রদ্ধেয়মিবানৃতম্
অস্তি স্বিদ্দস্যুমর্যাদা যামহং পরিবর্জয়ে
140.2
সংমুহ্যামি বিষীদামি ধর্মো মে শিথিলীকৃতঃ
উদ্যমং নাধিগচ্ছামি কুতশ্চিত্পরিচিন্তয়ন্
140.3
ভীষ্ম উবাচ
নৈতচ্ছুদ্ধাগমাদেব তব ধর্মানুশাসনম্
প্রজ্ঞাসমবতারোঽয়ং কবিভিঃ সংভৃতং মধু
140.4
বহ্ব্যঃ প্রতিবিধাতব্যাঃ প্রজ্ঞা রাজ্ঞা ততস্ততঃ
নৈকশাখেন ধর্মেণ যাত্রৈষা সংপ্রবর্ততে
140.5
বুদ্ধিসংজননং রাজ্ঞাং ধর্মমাচরতাং সদা
জয়ো ভবতি কৌরব্য তদা তদ্বিদ্ধি মে বচঃ
140.6
বুদ্ধিশ্রেষ্ঠা হি রাজানো জয়ন্তি বিজয়ৈষিণঃ
ধর্মঃ প্রতিবিধাতব্যো বুদ্ধ্যা রাজ্ঞা ততস্ততঃ
140.7
নৈকশাখেন ধর্মেণ রাজ্ঞাং ধর্মো বিধীয়তে
দুর্বলস্য কুতঃ প্রজ্ঞা পুরস্তাদনুদাহৃতা
140.8
অদ্বৈধজ্ঞঃ পথি দ্বৈধে সংশয়ং প্রাপ্তুমর্হতি
বুদ্ধিদ্বৈধং বেদিতব্যং পুরস্তাদেব ভারত
140.9
পার্শ্বতঃকরণং প্রজ্ঞা বিষূচী ত্বাপগা ইব
জনস্তূচ্চারিতং ধর্মং বিজানাত্যন্যথান্যথা
140.10
সম্যগ্বিজ্ঞানিনঃ কেচিন্মিথ্যাবিজ্ঞানিনোঽপরে
তদ্বৈ যথাতথং বুদ্ধ্বা জ্ঞানমাদদতে সতাম্
140.11
পরিমুষ্ণন্তি শাস্ত্রাণি ধর্মস্য পরিপন্থিনঃ
বৈষম্যমর্থবিদ্যানাং নৈরর্থ্যাত্খ্যাপয়ন্তি তে
140.12
আজিজীবিষবো বিদ্যাং যশস্কামাঃ সমন্ততঃ
তে সর্বে নরপাপিষ্ঠা ধর্মস্য পরিপন্থিনঃ
140.13
অপক্বমতয়ো মন্দা ন জানন্তি যথাতথম্
সদা হ্যশাস্ত্রকুশলাঃ সর্বত্রাপরিনিষ্ঠিতাঃ
140.14
পরিমুষ্ণন্তি শাস্ত্রাণি শাস্ত্রদোষানুদর্শিনঃ
বিজ্ঞানমথ বিদ্যানাং ন সম্যগিতি বর্ততে
140.15
নিন্দয়া পরবিদ্যানাং স্বাং বিদ্যাং খ্যাপয়ন্তি যে
বাগস্ত্রা বাক্ছুরীমত্ত্বা দুগ্ধবিদ্যাফলা ইব
তান্বিদ্যাবণিজো বিদ্ধি রাক্ষসানিব ভারত
140.16
ব্যাজেন কৃত্স্নো বিদিতো ধর্মস্তে পরিহাস্যতে
ন ধর্মবচনং বাচা ন বুদ্ধ্যা চেতি নঃ শ্রুতম্
140.17
ইতি বার্হস্পতং জ্ঞানং প্রোবাচ মঘবা স্বয়ম্
ন ত্বেব বচনং কিংচিদনিমিত্তাদিহোচ্যতে
140.18
স্ববিনীতেন শাস্ত্রেণ ব্যবস্যন্তি তথাপরে
লোকয়াত্রামিহৈকে তু ধর্মমাহুর্মনীষিণঃ
140.19
সমুদ্দিষ্টং সতাং ধর্মং স্বয়মূহেন্ন পণ্ডিতঃ
অমর্ষাচ্ছাস্ত্রসংমোহাদবিজ্ঞানাচ্চ ভারত
140.20
শাস্ত্রং প্রাজ্ঞস্য বদতঃ সমূহে যাত্যদর্শনম্
আগতাগময়া বুদ্ধ্যা বচনেন প্রশস্যতে
140.21
অজ্ঞানাজ্জ্ঞানহেতুত্বাদ্বচনং সাধু মন্যতে
অনপাহতমেবেদং নেদং শাস্ত্রমপার্থকম্
140.22
দৈতেয়ানুশনাঃ প্রাহ সংশয়চ্ছেদনে পুরা
জ্ঞানমব্যপদেশ্যং হি যথা নাস্তি তথৈব তৎ
140.23
তেন ত্বং ছিন্নমূলেন কং তোষয়িতুমর্হসি
অতথ্যবিহিতং যো বা নেদং বাক্যমুপাশ্নুয়াৎ
140.24
উগ্রায়ৈব হি সৃষ্টোঽসি কর্মণে ন ত্ববেক্ষসে
অঙ্গেমামন্ববেক্ষস্ব রাজনীতিং বুভূষিতুম্
যয়া প্রমুচ্যতে ত্বন্যো যদর্থং চ প্রমোদতে
140.25
অজোঽশ্বঃ ক্ষত্রমিত্যেতত্সদৃশং ব্রহ্মণা কৃতম্
তস্মান্নতীক্ষ্ণভূতানাং যাত্রা কাচিত্প্রসিধ্যতি
140.26
যস্ত্ববধ্যবধে দোষঃ স বধ্যস্যাবধে স্মৃতঃ
এষৈব খলু মর্যাদা যাময়ং পরিবর্জয়েৎ
140.27
তস্মাত্তীক্ষ্ণঃ প্রজা রাজা স্বধর্মে স্থাপয়েদুত
অন্যোন্যং ভক্ষয়ন্তো হি প্রচরেয়ুর্বৃকা ইব
140.28
যস্য দস্যুগণা রাষ্ট্রে ধ্বাঙ্ক্ষা মত্স্যাঞ্জলাদিব
বিহরন্তি পরস্বানি স বৈ ক্ষত্রিয়পাংসনঃ
140.29
কুলীনান্সচিবান্কৃত্বা বেদবিদ্যাসমন্বিতান্
প্রশাধি পৃথিবীং রাজন্প্রজা ধর্মেণ পালয়ন্
140.30
বিহীনজমকর্মাণং যঃ প্রগৃহ্ণাতি ভূমিপঃ
উভয়স্যাবিশেষজ্ঞস্তদ্বৈ ক্ষত্রং নপুংসকম্
140.31
নৈবোগ্রং নৈব চানুগ্রং ধর্মেণেহ প্রশস্যতে
উভয়ং ন ব্যতিক্রামেদুগ্রো ভূত্বা মৃদুর্ভব
140.32
কষ্টঃ ক্ষত্রিয়ধর্মোঽয়ং সৌহৃদং ত্বয়ি যত্স্থিতম্
উগ্রে কর্মণি সৃষ্টোঽসি তস্মাদ্রাজ্যং প্রশাধি বৈ
140.33
অশিষ্টনিগ্রহো নিত্যং শিষ্টস্য পরিপালনম্
ইতি শক্রোঽব্রবীদ্ধীমানাপত্সু ভরতর্ষভ
140.34
যুধিষ্ঠির উবাচ
অস্তি স্বিদ্দস্যুমর্যাদা যামন্যো নাতিলঙ্ঘয়েৎ
পৃচ্ছামি ত্বাং সতাং শ্রেষ্ঠ তন্মে ব্রূহি পিতামহ
140.35
ভীষ্ম উবাচ
ব্রাহ্মণানেব সেবেত বিদ্যাবৃদ্ধাংস্তপস্বিনঃ
শ্রুতচারিত্রবৃত্তাঢ্যান্পবিত্রং হ্যেতদুত্তমম্
140.36
যা দেবতাসু বৃত্তিস্তে সাস্তু বিপ্রেষু সর্বদা
ক্রুদ্ধৈর্হি বিপ্রৈঃ কর্মাণি কৃতানি বহুধা নৃপ
140.37
তেষাং প্রীত্যা যশো মুখ্যমপ্রীত্যা তু বিপর্যয়ঃ
প্রীত্যা হ্যমৃতবদ্বিপ্রাঃ ক্রুদ্ধাশ্চৈব যথা বিষম্