Utshovঅধ্যায় 139
139.1
যুধিষ্ঠির উবাচ
হীনে পরমকে ধর্মে সর্বলোকাতিলঙ্ঘিনি
অধর্মে ধর্মতাং নীতে ধর্মে চাধর্মতাং গতে
139.2
মর্যাদাসু প্রভিন্নাসু ক্ষুভিতে ধর্মনিশ্চয়ে
রাজভিঃ পীডিতে লোকে চোরৈর্বাপি বিশাং পতে
139.3
সর্বাশ্রমেষু মূঢেষু কর্মসূপহতেষু চ
কামান্মোহাচ্চ লোভাচ্চ ভয়ং পশ্যত্সু ভারত
139.4
অবিশ্বস্তেষু সর্বেষু নিত্যভীতেষু পার্থিব
নিকৃত্যা হন্যমানেষু বঞ্চয়ত্সু পরস্পরম্
139.5
সংপ্রদীপ্তেষু দেশেষু ব্রাহ্মণ্যে চাভিপীডিতে
অবর্ষতি চ পর্জন্যে মিথো ভেদে সমুত্থিতে
139.6
সর্বস্মিন্দস্যুসাদ্ভূতে পৃথিব্যামুপজীবনে
কেন স্বিদ্ব্রাহ্মণো জীবেজ্জঘন্যে কাল আগতে
139.7
অতিত্যক্ষুঃ পুত্রপৌত্রাননুক্রোশান্নরাধিপ
কথমাপত্সু বর্তেত তন্মে ব্রূহি পিতামহ
139.8
কথং চ রাজা বর্তেত লোকে কলুষতাং গতে
কথমর্থাচ্চ ধর্মাচ্চ ন হীয়েত পরংতপ
139.9
ভীষ্ম উবাচ
রাজমূলা মহারাজ যোগক্ষেমসুবৃষ্টয়ঃ
প্রজাসু ব্যাধয়শ্চৈব মরণং চ ভয়ানি চ
139.10
কৃতং ত্রেতা দ্বাপরশ্চ কলিশ্চ ভরতর্ষভ
রাজমূলানি সর্বাণি মম নাস্ত্যত্র সংশয়ঃ
139.11
তস্মিংস্ত্বভ্যাগতে কালে প্রজানাং দোষকারকে
বিজ্ঞানবলমাস্থায় জীবিতব্যং তদা ভবেৎ
139.12
অত্রাপ্যুদাহরন্তীমমিতিহাসং পুরাতনম্
বিশ্বামিত্রস্য সংবাদং চণ্ডালস্য চ পক্কণে
139.13
ত্রেতাদ্বাপরয়োঃ সংধৌ পুরা দৈববিধিক্রমাৎ
অনাবৃষ্টিরভূদ্ঘোরা রাজন্দ্বাদশবার্ষিকী
139.14
প্রজানামভিবৃদ্ধানাং যুগান্তে পর্যুপস্থিতে
ত্রেতানির্মোক্ষসময়ে দ্বাপরপ্রতিপাদনে
139.15
ন ববর্ষ সহস্রাক্ষঃ প্রতিলোমোঽভবদ্গুরুঃ
জগাম দক্ষিণং মার্গং সোমো ব্যাবৃত্তলক্ষণঃ
139.16
নাবশ্যায়োঽপি রাত্র্যন্তে কুত এবাভ্ররাজয়ঃ
নদ্যঃ সংক্ষিপ্ততোয়ৌঘাঃ ক্বচিদন্তর্গতাভবন্
139.17
সরাংসি সরিতশ্চৈব কূপাঃ প্রস্রবণানি চ
হতত্বিট্কান্যলক্ষ্যন্ত নিসর্গাদ্দৈবকারিতাৎ
139.18
উপশুষ্কজলস্থায়া বিনিবৃত্তসভাপ্রপা
নিবৃত্তয়জ্ঞস্বাধ্যায়া নির্বষট্কারমঙ্গলা
139.19
উত্সন্নকৃষিগোরক্ষ্যা নিবৃত্তবিপণাপণা
নিবৃত্তপূগসময়া সংপ্রনষ্টমহোত্সবা
139.20
অস্থিকঙ্কালসংকীর্ণা হাহাভূতজনাকুলা
শূন্যভূয়িষ্ঠনগরা দগ্ধগ্রামনিবেশনা
139.21
ক্বচিচ্চোরৈঃ ক্বচিচ্ছস্ত্রৈঃ ক্বচিদ্রাজভিরাতুরৈঃ
পরস্পরভয়াচ্চৈব শূন্যভূয়িষ্ঠনির্জনা
139.22
গতদৈবতসংকল্পা বৃদ্ধবালবিনাকৃতা
গোজাবিমহিষৈর্হীনা পরস্পরহরাহরা
139.23
হতবিপ্রা হতারক্ষা প্রনষ্টৌষধিসংচয়া
শ্যাবভূতনরপ্রায়া বভূব বসুধা তদা
139.24
তস্মিন্প্রতিভয়ে কালে ক্ষীণে ধর্মে যুধিষ্ঠির
বভ্রমুঃ ক্ষুধিতা মর্ত্যাঃ খাদন্তঃ স্ম পরস্পরম্
139.25
ঋষয়ো নিয়মাংস্ত্যক্ত্বা পরিত্যক্তাগ্নিদৈবতাঃ
আশ্রমান্সংপরিত্যজ্য পর্যধাবন্নিতস্ততঃ
139.26
বিশ্বামিত্রোঽথ ভগবান্মহর্ষিরনিকেতনঃ
ক্ষুধা পরিগতো ধীমান্সমন্তাত্পর্যধাবত
139.27
স কদাচিত্পরিপতঞ্শ্বপচানাং নিবেশনম্
হিংস্রাণাং প্রাণিহন্তৄণামাসসাদ বনে ক্বচিৎ
139.28
বিভিন্নকলশাকীর্ণং শ্বচর্মাচ্ছাদনায়ুতম্
বরাহখরভগ্নাস্থিকপালঘটসংকুলম্
139.29
মৃতচেলপরিস্তীর্ণং নির্মাল্যকৃতভূষণম্
সর্পনির্মোকমালাভিঃ কৃতচিহ্নকুটীমঠম্
139.30
উলূকপক্ষধ্বজিভির্দেবতায়তনৈর্বৃতম্
লোহঘণ্টাপরিষ্কারং শ্বয়ূথপরিবারিতম্
139.31
তত্প্রবিশ্য ক্ষুধাবিষ্টো গাধেঃ পুত্রো মহানৃষিঃ
আহারান্বেষণে যুক্তঃ পরং যত্নং সমাস্থিতঃ
139.32
ন চ ক্বচিদবিন্দত্স ভিক্ষমাণোঽপি কৌশিকঃ
মাংসমন্নং মূলফলমন্যদ্বা তত্র কিংচন
139.33
অহো কৃচ্ছ্রং ময়া প্রাপ্তমিতি নিশ্চিত্য কৌশিকঃ
পপাত ভূমৌ দৌর্বল্যাত্তস্মিংশ্চণ্ডালপক্কণে
139.34
চিন্তয়ামাস স মুনিঃ কিং নু মে সুকৃতং ভবেৎ
কথং বৃথা ন মৃত্যুঃ স্যাদিতি পার্থিবসত্তম
139.35
স দদর্শ শ্বমাংসস্য কুতন্তীং বিততাং মুনিঃ
চণ্ডালস্য গৃহে রাজন্সদ্যঃ শস্ত্রহতস্য চ
139.36
স চিন্তয়ামাস তদা স্তেয়ং কার্যমিতো ময়া
ন হীদানীমুপায়োঽন্যো বিদ্যতে প্রাণধারণে
139.37
আপত্সু বিহিতং স্তেয়ং বিশিষ্টসমহীনতঃ
পরং পরং ভবেত্পূর্বমস্তেয়মিতি নিশ্চয়ঃ
139.38
হীনাদাদেয়মাদৌ স্যাত্সমানাত্তদনন্তরম্
অসংভবাদাদদীত বিশিষ্টাদপি ধার্মিকাৎ
139.39
সোঽহমন্তাবসানানাং হরমাণঃ পরিগ্রহাৎ
ন স্তেয়দোষং পশ্যামি হরিষ্যাম্যেতদামিষম্
139.40
এতাং বুদ্ধিং সমাস্থায় বিশ্বামিত্রো মহামুনিঃ
তস্মিন্দেশে প্রসুষ্বাপ পতিতো যত্র ভারত
139.41
স বিগাঢাং নিশাং দৃষ্ট্বা সুপ্তে চণ্ডালপক্কণে
শনৈরুত্থায় ভগবান্প্রবিবেশ কুটীমঠম্
139.42
স সুপ্ত এব চণ্ডালঃ শ্লেষ্মাপিহিতলোচনঃ
পরিভিন্নস্বরো রূক্ষ উবাচাপ্রিয়দর্শনঃ
139.43
কঃ কুতন্তীং ঘট্টয়তি সুপ্তে চণ্ডালপক্কণে
জাগর্মি নাবসুপ্তোঽস্মি হতোঽসীতি চ দারুণঃ
139.44
বিশ্বামিত্রোঽহমিত্যেব সহসা তমুবাচ সঃ
সহসাভ্যাগতভয়ঃ সোদ্বেগস্তেন কর্মণা
139.45
চণ্ডালস্তদ্বচঃ শ্রুত্বা মহর্ষের্ভাবিতাত্মনঃ
শয়নাদুপসংভ্রান্ত ইয়েষোত্পতিতুং ততঃ
139.46
স বিসৃজ্যাশ্রু নেত্রাভ্যাং বহুমানাত্কৃতাঞ্জলিঃ
উবাচ কৌশিকং রাত্রৌ ব্রহ্মন্কিং তে চিকীর্ষিতম্
139.47
বিশ্বামিত্রস্তু মাতঙ্গমুবাচ পরিসান্ত্বয়ন্
ক্ষুধিতোঽহং গতপ্রাণো হরিষ্যামি শ্বজাঘনীম্
139.48
অবসীদন্তি মে প্রাণাঃ স্মৃতির্মে নশ্যতি ক্ষুধা
স্বধর্মং বুধ্যমানোঽপি হরিষ্যামি শ্বজাঘনীম্
139.49
অটন্ভৈক্ষং ন বিন্দামি যদা যুষ্মাকমালয়ে
তদা বুদ্ধিঃ কৃতা পাপে হরিষ্যামি শ্বজাঘনীম্
139.50
তৃষিতঃ কলুষং পাতা নাস্তি হ্রীরশনার্থিনঃ
ক্ষুদ্ধর্মং দূষয়ত্যত্র হরিষ্যামি শ্বজাঘনীম্
139.51
অগ্নির্মুখং পুরোধাশ্চ দেবানাং শুচিপাদ্বিভুঃ
যথা স সর্বভুগ্ব্রহ্মা তথা মাং বিদ্ধি ধর্মতঃ
139.52
তমুবাচ স চণ্ডালো মহর্ষে শৃণু মে বচঃ
শ্রুত্বা তথা সমাতিষ্ঠ যথা ধর্মান্ন হীয়সে
139.53
মৃগাণামধমং শ্বানং প্রবদন্তি মনীষিণঃ
তস্যাপ্যধম উদ্দেশঃ শরীরস্যোরুজাঘনী
139.54
নেদং সম্যগ্ব্যবসিতং মহর্ষে কর্ম বৈকৃতম্
চণ্ডালস্বস্য হরণমভক্ষ্যস্য বিশেষতঃ
139.55
সাধ্বন্যমনুপশ্য ত্বমুপায়ং প্রাণধারণে
ন মাংসলোভাত্তপসো নাশস্তে স্যান্মহামুনে
139.56
জানতোঽবিহিতো মার্গো ন কার্যো ধর্মসংকরঃ
মা স্ম ধর্মং পরিত্যাক্ষীস্ত্বং হি ধর্মবিদুত্তমঃ
139.57
বিশ্বামিত্রস্ততো রাজন্নিত্যুক্তো ভরতর্ষভ
ক্ষুধার্তঃ প্রত্যুবাচেদং পুনরেব মহামুনিঃ
139.58
নিরাহারস্য সুমহান্মম কালোঽভিধাবতঃ
ন বিদ্যতেঽভ্যুপায়শ্চ কশ্চিন্মে প্রাণধারণে
139.59
যেন তেন বিশেষেণ কর্মণা যেন কেনচিৎ
অভ্যুজ্জীবেত্সীদমানঃ সমর্থো ধর্মমাচরেৎ
139.60
ঐন্দ্রো ধর্মঃ ক্ষত্রিয়াণাং ব্রাহ্মণানামথাগ্নিকঃ
ব্রহ্মবহ্নির্মম বলং ভক্ষ্যামি সময়ং ক্ষুধা
139.61
যথা যথা বৈ জীবেদ্ধি তত্কর্তব্যমপীডয়া
জীবিতং মরণাচ্ছ্রেয়ো জীবন্ধর্মমবাপ্নুয়াৎ
139.62
সোঽহং জীবিতমাকাঙ্ক্ষন্নভক্ষস্যাপি ভক্ষণম্
ব্যবস্যে বুদ্ধিপূর্বং বৈ তদ্ভবাননুমন্যতাম্
139.63
জীবন্ধর্মং চরিষ্যামি প্রণোত্স্যাম্যশুভানি চ
তপোভির্বিদ্যয়া চৈব জ্যোতীংষীব মহত্তমঃ
139.64
শ্বপচ উবাচ
নৈতত্খাদন্প্রাপ্স্যসে প্রাণমন্যং; নায়ুর্দীর্ঘং নামৃতস্যেব তৃপ্তিম্
ভিক্ষামন্যাং ভিক্ষ মা তে মনোঽস্তু; শ্বভক্ষণে শ্বা হ্যভক্ষো দ্বিজানাম্
139.65
বিশ্বামিত্র উবাচ
ন দুর্ভিক্ষে সুলভং মাংসমন্য;চ্ছ্বপাক নান্নং ন চ মেঽস্তি বিত্তম্
ক্ষুধার্তশ্চাহমগতির্নিরাশঃ; শ্বমাংসে চাস্মিন্ষড্রসান্সাধু মন্যে
139.66
শ্বপচ উবাচ
পঞ্চ পঞ্চনখা ভক্ষ্যা ব্রহ্মক্ষত্রস্য বৈ দ্বিজ
যদি শাস্ত্রং প্রমাণং তে মাভক্ষ্যে মানসং কৃথাঃ
139.67
বিশ্বামিত্র উবাচ
অগস্ত্যেনাসুরো জগ্ধো বাতাপিঃ ক্ষুধিতেন বৈ
অহমাপদ্গতঃ ক্ষুব্ধো ভক্ষয়িষ্যে শ্বজাঘনীম্
139.68
শ্বপচ উবাচ
ভিক্ষামন্যামাহরেতি ন চৈতত্কর্তুমর্হসি
ন নূনং কার্যমেতদ্বৈ হর কামং শ্বজাঘনীম্
139.69
বিশ্বামিত্র উবাচ
শিষ্টা বৈ কারণং ধর্মে তদ্বৃত্তমনুবর্তয়ে
পরাং মেধ্যাশনাদেতাং ভক্ষ্যাং মন্যে শ্বজাঘনীম্
139.70
শ্বপচ উবাচ
অসতা যত্সমাচীর্ণং ন স ধর্মঃ সনাতনঃ
নাবৃত্তমনুকার্যং বৈ মা ছলেনানৃতং কৃথাঃ
139.71
বিশ্বামিত্র উবাচ
ন পাতকং নাবমতমৃষিঃ সন্কর্তুমর্হসি
সমৌ চ শ্বমৃগৌ মন্যে তস্মাদ্ভক্ষ্যা শ্বজাঘনী
139.72
শ্বপচ উবাচ
যদ্ব্রাহ্মণার্থে কৃতমর্থিতেন; তেনর্ষিণা তচ্চ ভক্ষ্যাধিকারম্
স বৈ ধর্মো যত্র ন পাপমস্তি; সর্বৈরুপায়ৈর্হি স রক্ষিতব্যঃ
139.73
বিশ্বামিত্র উবাচ
মিত্রং চ মে ব্রাহ্মণশ্চায়মাত্মা; প্রিয়শ্চ মে পূজ্যতমশ্চ লোকে
তং ভর্তুকামোঽহমিমাং হরিষ্যে; নৃশংসানামীদৃশানাং ন বিভ্যে
139.74
শ্বপচ উবাচ
কামং নরা জীবিতং সংত্যজন্তি; ন চাভক্ষ্যৈঃ প্রতিকুর্বন্তি তত্র
সর্বান্কামান্প্রাপ্নুবন্তীহ বিদ্ব;ন্প্রিয়স্ব কামং সহিতঃ ক্ষুধা বৈ
139.75
বিশ্বামিত্র উবাচ
স্থানে তাবত্সংশয়ঃ প্রেত্যভাবে; নিঃসংশয়ং কর্মণাং বা বিনাশঃ
অহং পুনর্বর্ত ইত্যাশয়াত্মা; মূলং রক্ষন্ভক্ষয়িষ্যাম্যভক্ষ্যম্
139.76
বুদ্ধ্যাত্মকে ব্যস্তমস্তীতি তুষ্টো; মোহাদেকত্বং যথা চর্ম চক্ষুঃ
যদ্যপ্যেনঃ সংশয়াদাচরামি; নাহং ভবিষ্যামি যথা ত্বমেব
139.77
শ্বপচ উবাচ
পতনীয়মিদং দুঃখমিতি মে বর্ততে মতিঃ
দুষ্কৃতী ব্রাহ্মণং সন্তং যস্ত্বামহমুপালভে
139.78
বিশ্বামিত্র উবাচ
পিবন্ত্যেবোদকং গাবো মণ্ডূকেষু রুবত্স্বপি
ন তেঽধিকারো ধর্মেঽস্তি মা ভূরাত্মপ্রশংসকঃ
139.79
শ্বপচ উবাচ
সুহৃদ্ভূত্বানুশাস্মি ত্বা কৃপা হি ত্বয়ি মে দ্বিজ
তদেবং শ্রেয় আধত্স্ব মা লোভাচ্ছ্বানমাদিথাঃ
139.80
বিশ্বামিত্র উবাচ
সুহৃন্মে ত্বং সুখেপ্সুশ্চেদাপদো মাং সমুদ্ধর
জানেঽহং ধর্মতোঽঽত্মানং শ্বানীমুত্সৃজ জাঘনীম্
139.81
শ্বপচ উবাচ
নৈবোত্সহে ভবতে দাতুমেতাং; নোপেক্ষিতুং হ্রিয়মাণং স্বমন্নম্
উভৌ স্যাবঃ স্বমলেনাবলিপ্তৌ; দাতাহং চ ত্বং চ বিপ্র প্রতীচ্ছন্
139.82
বিশ্বামিত্র উবাচ
অদ্যাহমেতদ্বৃজিনং কর্ম কৃত্বা; জীবংশ্চরিষ্যামি মহাপবিত্রম্
প্রপূতাত্মা ধর্মমেবাভিপত্স্যে; যদেতয়োর্গুরু তদ্বৈ ব্রবীহি
139.83
শ্বপচ উবাচ
আত্মৈব সাক্ষী কিল লোককৃত্যে; ত্বমেব জানাসি যদত্র দুষ্টম্
যো হ্যাদ্রিয়েদ্ভক্ষ্যমিতি শ্বমাংসং; মন্যে ন তস্যাস্তি বিবর্জনীয়ম্
139.84
বিশ্বামিত্র উবাচ
উপাদানে খাদনে বাস্য দোষঃ; কার্যো ন্যায়ৈর্নিত্যমত্রাপবাদঃ
যস্মিন্ন হিংসা নানৃতে বাক্যলেশো; ভক্ষ্যক্রিয়া তত্র ন তদ্গরীয়ঃ
139.85
শ্বপচ উবাচ
যদ্যেষ হেতুস্তব খাদনস্য; ন তে বেদঃ কারণং নান্যধর্মঃ
তস্মাদভক্ষ্যে ভক্ষণাদ্বা দ্বিজেন্দ্র; দোষং ন পশ্যামি যথেদমাত্থ
139.86
বিশ্বামিত্র উবাচ
ন পাতকং ভক্ষণমস্য দৃষ্টং; সুরাং পীত্বা পততীতীহ শব্দঃ
অন্যোন্যকর্মাণি তথা তথৈব; ন লেশমাত্রেণ কৃত্যং হিনস্তি
139.87
শ্বপচ উবাচ
অস্থানতো হীনতঃ কুত্সিতাদ্বা; তং বিদ্বাংসং বাধতে সাধুবৃত্তম্
স্থানং পুনর্যো লভতে নিষঙ্গা;ত্তেনাপি দণ্ডঃ সহিতব্য এব
139.88
ভীষ্ম উবাচ
এবমুক্ত্বা নিববৃতে মাতঙ্গঃ কৌশিকং তদা
বিশ্বামিত্রো জহারৈব কৃতবুদ্ধিঃ শ্বজাঘনীম্
139.89
ততো জগ্রাহ পঞ্চাঙ্গীং জীবিতার্থী মহামুনিঃ
সদারস্তামুপাকৃত্য বনে যাতো মহামুনিঃ
139.90
এতস্মিন্নেব কালে তু প্রববর্ষাথ বাসবঃ
সংজীবয়ন্প্রজাঃ সর্বা জনয়ামাস চৌষধীঃ
139.91
বিশ্বামিত্রোঽপি ভগবাংস্তপসা দগ্ধকিল্বিষঃ
কালেন মহতা সিদ্ধিমবাপ পরমাদ্ভুতাম্
139.92
এবং বিদ্বানদীনাত্মা ব্যসনস্থো জিজীবিষুঃ
সর্বোপায়ৈরুপায়জ্ঞো দীনমাত্মানমুদ্ধরেৎ
139.93
এতাং বুদ্ধিং সমাস্থায় জীবিতব্যং সদা ভবেৎ
জীবন্পুণ্যমবাপ্নোতি নরো ভদ্রাণি পশ্যতি
139.94
তস্মাত্কৌন্তেয় বিদুষা ধর্মাধর্মবিনিশ্চয়ে
বুদ্ধিমাস্থায় লোকেঽস্মিন্বর্তিতব্যং যতাত্মনা