Utshovঅধ্যায় 138
138.1
যুধিষ্ঠির উবাচ
যুগক্ষয়াত্পরিক্ষীণে ধর্মে লোকে চ ভারত
দস্যুভিঃ পীড্যমানে চ কথং স্থেয়ং পিতামহ
138.2
ভীষ্ম উবাচ
হন্ত তে কথয়িষ্যামি নীতিমাপত্সু ভারত
উত্সৃজ্যাপি ঘৃণাং কালে যথা বর্তেত ভূমিপঃ
138.3
অত্রাপ্যুদাহরন্তীমমিতিহাসং পুরাতনম্
ভরদ্বাজস্য সংবাদং রাজ্ঞঃ শত্রুংতপস্য চ
138.4
রাজা শত্রুংতপো নাম সৌবীরাণাং মহারথঃ
কণিঙ্কমুপসংগম্য পপ্রচ্ছার্থবিনিশ্চয়ম্
138.5
অলব্ধস্য কথং লিপ্সা লব্ধং কেন বিবর্ধতে
বর্ধিতং পালয়েত্কেন পালিতং প্রণয়েত্কথম্
138.6
তস্মৈ বিনিশ্চয়ার্থং স পরিপৃষ্টার্থনিশ্চয়ঃ
উবাচ ব্রাহ্মণো বাক্যমিদং হেতুমদুত্তরম্
138.7
নিত্যমুদ্যতদণ্ডঃ স্যান্নিত্যং বিবৃতপৌরুষঃ
অচ্ছিদ্রশ্ছিদ্রদর্শী চ পরেষাং বিবরানুগঃ
138.8
নিত্যমুদ্যতদণ্ডস্য ভৃশমুদ্বিজতে জনঃ
তস্মাত্সর্বাণি ভূতানি দণ্ডেনৈব প্ররোধয়েৎ
138.9
এবমেব প্রশংসন্তি পণ্ডিতাস্তত্ত্বদর্শিনঃ
তস্মাচ্চতুষ্টয়ে তস্মিন্প্রধানো দণ্ড উচ্যতে
138.10
ছিন্নমূলে হ্যধিষ্ঠানে সর্বে তজ্জীবিনো হতাঃ
কথং হি শাখাস্তিষ্ঠেয়ুশ্ছিন্নমূলে বনস্পতৌ
138.11
মূলমেবাদিতশ্ছিন্দ্যাত্পরপক্ষস্য পণ্ডিতঃ
ততঃ সহায়ান্পক্ষং চ সর্বমেবানুসারয়েৎ
138.12
সুমন্ত্রিতং সুবিক্রান্তং সুয়ুদ্ধং সুপলায়িতম্
আপদাং পদকালেষু কুর্বীত ন বিচারয়েৎ
138.13
বাঙ্মাত্রেণ বিনীতঃ স্যাদ্ধৃদয়েন যথা ক্ষুরঃ
শ্লক্ষ্ণপূর্বাভিভাষী চ কামক্রোধৌ বিবর্জয়েৎ
138.14
সপত্নসহিতে কার্যে কৃত্বা সংধিং ন বিশ্বসেৎ
অপক্রামেত্ততঃ ক্ষিপ্রং কৃতকার্যো বিচক্ষণঃ
138.15
শত্রুং চ মিত্ররূপেণ সান্ত্বেনৈবাভিসান্ত্বয়েৎ
নিত্যশশ্চোদ্বিজেত্তস্মাত্সর্পাদ্বেশ্মগতাদিব
138.16
যস্য বুদ্ধিং পরিভবেত্তমতীতেন সান্ত্বয়েৎ
অনাগতেন দুষ্প্রজ্ঞং প্রত্যুত্পন্নেন পণ্ডিতম্
138.17
অঞ্জলিং শপথং সান্ত্বং প্রণম্য শিরসা বদেৎ
অশ্রুপ্রপাতনং চৈব কর্তব্যং ভূতিমিচ্ছতা
138.18
বহেদমিত্রং স্কন্ধেন যাবত্কালবিপর্যয়ঃ
অথৈনমাগতে কালে ভিন্দ্যাদ্ঘটমিবাশ্মনি
138.19
মুহূর্তমপি রাজেন্দ্র তিন্দুকালাতবজ্জ্বলেৎ
ন তুষাগ্নিরিবানর্চির্ধূমায়েত নরশ্চিরম্
138.20
নানর্থকেনার্থবত্ত্বং কৃতঘ্নেন সমাচরেৎ
অর্থে তু শক্যতে ভোক্তুং কৃতকার্যোঽবমন্যতে
তস্মাত্সর্বাণি কার্যাণি সাবশেষাণি কারয়েৎ
138.21
কোকিলস্য বরাহস্য মেরোঃ শূন্যস্য বেশ্মনঃ
ব্যাডস্য ভক্তিচিত্রস্য যচ্ছ্রেষ্ঠং তত্সমাচরেৎ
138.22
উত্থায়োত্থায় গচ্ছেচ্চ নিত্যয়ুক্তো রিপোর্গৃহান্
কুশলং চাপি পৃচ্ছেত যদ্যপ্যকুশলং ভবেৎ
138.23
নালসাঃ প্রাপ্নুবন্ত্যর্থান্ন ক্লীবা ন চ মানিনঃ
ন চ লোকরবাদ্ভীতা ন চ শশ্বত্প্রতীক্ষিণঃ
138.24
নাস্য ছিদ্রং পরো বিদ্যাদ্বিদ্যাচ্ছিদ্রং পরস্য তু
গূহেত্কূর্ম ইবাঙ্গানি রক্ষেদ্বিবরমাত্মনঃ
138.25
বকবচ্চিন্তয়েদর্থান্সিংহবচ্চ পরাক্রমেৎ
বৃকবচ্চাবলুম্পেত শশবচ্চ বিনিষ্পতেৎ
138.26
পানমক্ষাস্তথা নার্যো মৃগয়া গীতবাদিতম্
এতানি যুক্ত্যা সেবেত প্রসঙ্গো হ্যত্র দোষবান্
138.27
কুর্যাত্তৃণময়ং চাপং শয়ীত মৃগশায়িকাম্
অন্ধঃ স্যাদন্ধবেলায়াং বাধির্যমপি সংশ্রয়েৎ
138.28
দেশং কালং সমাসাদ্য বিক্রমেত বিচক্ষণঃ
দেশকালাভ্যতীতো হি বিক্রমো নিষ্ফলো ভবেৎ
138.29
কালাকালৌ সংপ্রধার্য বলাবলমথাত্মনঃ
পরস্পরবলং জ্ঞাত্বা তথাত্মানং নিয়োজয়েৎ
138.30
দণ্ডেনোপনতং শত্রুং যো রাজা ন নিয়চ্ছতি
স মৃত্যুমুপগূহ্যাস্তে গর্ভমশ্বতরী যথা
138.31
সুপুষ্পিতঃ স্যাদফলঃ ফলবান্স্যাদ্দুরারুহঃ
আমঃ স্যাত্পক্বসংকাশো ন চ শীর্যেত কস্যচিৎ
138.32
আশাং কালবতীং কুর্যাত্তাং চ বিঘ্নেন যোজয়েৎ
বিঘ্নং নিমিত্ততো ব্রূয়ান্নিমিত্তং চাপি হেতুতঃ
138.33
ভীতবত্সংবিধাতব্যং যাবদ্ভয়মনাগতম্
আগতং তু ভয়ং দৃষ্ট্বা প্রহর্তব্যমভীতবৎ
138.34
ন সংশয়মনারুহ্য নরো ভদ্রাণি পশ্যতি
সংশয়ং পুনরারুহ্য যদি জীবতি পশ্যতি
138.35
অনাগতং বিজানীয়াদ্যচ্ছেদ্ভয়মুপস্থিতম্
পুনর্বৃদ্ধিক্ষয়াত্কিংচিদভিবৃত্তং নিশাময়েৎ
138.36
প্রত্যুপস্থিতকালস্য সুখস্য পরিবর্জনম্
অনাগতসুখাশা চ নৈষ বুদ্ধিমতাং নয়ঃ
138.37
যোঽরিণা সহ সংধায় সুখং স্বপিতি বিশ্বসন্
স বৃক্ষাগ্রপ্রসুপ্তো বা পতিতঃ প্রতিবুধ্যতে
138.38
কর্মণা যেন তেনেহ মৃদুনা দারুণেন বা
উদ্ধরেদ্দীনমাত্মানং সমর্থো ধর্মমাচরেৎ
138.39
যে সপত্নাঃ সপত্নানাং সর্বাংস্তানপবত্সয়েৎ
আত্মনশ্চাপি বোদ্ধব্যাশ্চারাঃ প্রণিহিতাঃ পরৈঃ
138.40
চারঃ সুবিহিতঃ কার্য আত্মনোঽথ পরস্য চ
পাষণ্ডাংস্তাপসাদীংশ্চ পররাষ্ট্রং প্রবেশয়েৎ
138.41
উদ্যানেষু বিহারেষু প্রপাস্বাবসথেষু চ
পানাগারেষু বেশেষু তীর্থেষু চ সভাসু চ
138.42
ধর্মাভিচারিণঃ পাপাশ্চারা লোকস্য কণ্টকাঃ
সমাগচ্ছন্তি তান্বুদ্ধ্বা নিয়চ্ছেচ্ছময়েদপি
138.43
ন বিশ্বসেদবিশ্বস্তে বিশ্বস্তে নাপি বিশ্বসেৎ
বিশ্বস্তং ভয়মন্বেতি নাপরীক্ষ্য চ বিশ্বসেৎ
138.44
বিশ্বাসয়িত্বা তু পরং তত্ত্বভূতেন হেতুনা
অথাস্য প্রহরেত্কালে কিংচিদ্বিচলিতে পদে
138.45
অশঙ্ক্যমপি শঙ্কেত নিত্যং শঙ্কেত শঙ্কিতাৎ
ভয়ং হি শঙ্কিতাজ্জাতং সমূলমপি কৃন্ততি
138.46
অবধানেন মৌনেন কাষায়েণ জটাজিনৈঃ
বিশ্বাসয়িত্বা দ্বেষ্টারমবলুম্পেদ্যথা বৃকঃ
138.47
পুত্রো বা যদি বা ভ্রাতা পিতা বা যদি বা সুহৃৎ
অর্থস্য বিঘ্নং কুর্বাণা হন্তব্যা ভূতিবর্ধনাঃ
138.48
গুরোরপ্যবলিপ্তস্য কার্যাকার্যমজানতঃ
উত্পথপ্রতিপন্নস্য দণ্ডো ভবতি শাসনম্
138.49
প্রত্যুত্থানাভিবাদাভ্যাং সংপ্রদানেন কস্যচিৎ
প্রতিপুষ্কলঘাতী স্যাত্তীক্ষ্ণতুণ্ড ইব দ্বিজঃ
138.50
নাচ্ছিত্ত্বা পরমর্মাণি নাকৃত্বা কর্ম দারুণম্
নাহত্বা মত্স্যঘাতীব প্রাপ্নোতি পরমাং শ্রিয়ম্
138.51
নাস্তি জাত্যা রিপুর্নাম মিত্রং নাম ন বিদ্যতে
সামর্থ্যয়োগাজ্জায়ন্তে মিত্রাণি রিপবস্তথা
138.52
অমিত্রং নৈব মুঞ্চেত ব্রুবন্তং করুণান্যপি
দুঃখং তত্র ন কুর্বীত হন্যাত্পূর্বাপকারিণম্
138.53
সংগ্রহানুগ্রহে যত্নঃ সদা কার্যোঽনসূয়তা
নিগ্রহশ্চাপি যত্নেন কর্তব্যো ভূতিমিচ্ছতা
138.54
প্রহরিষ্যন্প্রিয়ং ব্রূয়াত্প্রহৃত্যাপি প্রিয়োত্তরম্
অপি চাস্য শিরশ্ছিত্ত্বা রুদ্যাচ্ছোচেদথাপি বা
138.55
নিমন্ত্রয়েত সান্ত্বেন সংমানেন তিতিক্ষয়া
আশাকারণমিত্যেতত্কর্তব্যং ভূতিমিচ্ছতা
138.56
ন শুষ্কবৈরং কুর্বীত ন বাহুভ্যাং নদীং তরেৎ
অপার্থকমনায়ুষ্যং গোবিষাণস্য ভক্ষণম্
দন্তাশ্চ পরিঘৃষ্যন্তে রসশ্চাপি ন লভ্যতে
138.57
ত্রিবর্গে ত্রিবিধা পীডানুবন্ধাস্ত্রয় এব চ
অনুবন্ধবধৌ জ্ঞাত্বা পীডাং হি পরিবর্জয়েৎ
138.58
ঋণশেষোঽগ্নিশেষশ্চ শত্রুশেষস্তথৈব চ
পুনঃ পুনর্বিবর্ধেত স্বল্পোঽপ্যনিবারিতঃ
138.59
বর্ধমানমৃণং তিষ্ঠত্পরিভূতাশ্চ শত্রবঃ
আবহন্ত্যনয়ং তীব্রং ব্যাধয়শ্চাপ্যুপেক্ষিতাঃ
138.60
নাসম্যক্কৃতকারী স্যাদপ্রমত্তঃ সদা ভবেৎ
কণ্টকোঽপি হি দুশ্ছিন্নো বিকারং কুরুতে চিরম্
138.61
বধেন চ মনুষ্যাণাং মার্গাণাং দূষণেন চ
আকরাণাং বিনাশৈশ্চ পররাষ্ট্রং বিনাশয়েৎ
138.62
গৃধ্রদৃষ্টির্বকালীনঃ শ্বচেষ্টঃ সিংহবিক্রমঃ
অনুদ্বিগ্নঃ কাকশঙ্কী ভুজংগচরিতং চরেৎ
138.63
শ্রেণিমুখ্যোপজাপেষু বল্লভানুনয়েষু চ
অমাত্যান্পরিরক্ষেত ভেদসংঘাতয়োরপি
138.64
মৃদুরিত্যবমন্যন্তে তীক্ষ্ণ ইত্যুদ্বিজন্তি চ
তীক্ষ্ণকালে চ তীক্ষ্ণঃ স্যান্মৃদুকালে মৃদুর্ভবেৎ
138.65
মৃদুনা সুমৃদুং হন্তি মৃদুনা হন্তি দারুণম্
নাসাধ্যং মৃদুনা কিংচিত্তস্মাত্তীক্ষ্ণতরং মৃদু
138.66
কালে মৃদুর্যো ভবতি কালে ভবতি দারুণঃ
স সাধয়তি কৃত্যানি শত্রূংশ্চৈবাধিতিষ্ঠতি
138.67
পণ্ডিতেন বিরুদ্ধঃ সন্দূরেঽস্মীতি ন বিশ্বসেৎ
দীর্ঘৌ বুদ্ধিমতো বাহূ যাভ্যাং হিংসতি হিংসিতঃ
138.68
ন তত্তরেদ্যস্য ন পারমুত্তরে;ন্ন তদ্ধরেদ্যত্পুনরাহরেত্পরঃ
ন তত্খনেদ্যস্য ন মূলমুত্খনে;ন্ন তং হন্যাদ্যস্য শিরো ন পাতয়েৎ
138.69
ইতীদমুক্তং বৃজিনাভিসংহিতং; ন চৈতদেবং পুরুষঃ সমাচরেৎ
পরপ্রয়ুক্তং তু কথং নিশাময়ে;দতো ময়োক্তং ভবতো হিতার্থিনা
138.70
যথাবদুক্তং বচনং হিতং তদা; নিশম্য বিপ্রেণ সুবীররাষ্ট্রিয়ঃ
তথাকরোদ্বাক্যমদীনচেতনঃ; শ্রিয়ং চ দীপ্তাং বুভুজে সবান্ধবঃ