Utshovঅধ্যায় 137
137.1
যুধিষ্ঠির উবাচ
উক্তো মন্ত্রো মহাবাহো ন বিশ্বাসোঽস্তি শত্রুষু
কথং হি রাজা বর্তেত যদি সর্বত্র নাশ্বসেৎ
137.2
বিশ্বাসাদ্ধি পরং রাজ্ঞো রাজন্নুত্পদ্যতে ভয়ম্
কথং বৈ নাশ্বসন্রাজা শত্রূঞ্জয়তি পার্থিব
137.3
এতন্মে সংশয়ং ছিন্ধি মনো মে সংপ্রমুহ্যতি
অবিশ্বাসকথামেতামুপশ্রুত্য পিতামহ
137.4
ভীষ্ম উবাচ
শৃণু কৌন্তেয় যো বৃত্তো ব্রহ্মদত্তনিবেশনে
পূজন্যা সহ সংবাদো ব্রহ্মদত্তস্য পার্থিব
137.5
কাম্পিল্যে ব্রহ্মদত্তস্য অন্তঃপুরনিবাসিনী
পূজনী নাম শকুনী দীর্ঘকালং সহোষিতা
137.6
রুতজ্ঞা সর্বভূতানাং যথা বৈ জীবজীবকঃ
সর্বজ্ঞা সর্বধর্মজ্ঞা তির্যগ্যোনিগতাপি সা
137.7
অভিপ্রজাতা সা তত্র পুত্রমেকং সুবর্চসম্
সমকালং চ রাজ্ঞোঽপি দেব্যাঃ পুত্রো ব্যজায়ত
137.8
সমুদ্রতীরং গত্বা সা ত্বাজহার ফলদ্বয়ম্
পুষ্ট্যর্থং চ স্বপুত্রস্য রাজপুত্রস্য চৈব হ
137.9
ফলমেকং সুতায়াদাদ্রাজপুত্রায় চাপরম্
অমৃতাস্বাদসদৃশং বলতেজোবিবর্ধনম্
তত্রাগচ্ছত্পরাং বৃদ্ধিং রাজপুত্রঃ ফলাশনাৎ
137.10
ধাত্র্যা হস্তগতশ্চাপি তেনাক্রীডত পক্ষিণা
শূন্যে তু তমুপাদায় পক্ষিণং সমজাতকম্
হত্বা ততঃ স রাজেন্দ্র ধাত্র্যা হস্তমুপাগমৎ
137.11
অথ সা শকুনী রাজন্নাগমত্ফলহারিকা
অপশ্যন্নিহতং পুত্রং তেন বালেন ভূতলে
137.12
বাষ্পপূর্ণমুখী দীনা দৃষ্ট্বা সা তু হতং সুতম্
পূজনী দুঃখসংতপ্তা রুদতী বাক্যমব্রবীৎ
137.13
ক্ষত্রিয়ে সংগতং নাস্তি ন প্রীতির্ন চ সৌহৃদম্
কারণে সংভজন্তীহ কৃতার্থাঃ সংত্যজন্তি চ
137.14
ক্ষত্রিয়েষু ন বিশ্বাসঃ কার্যঃ সর্বোপঘাতিষু
অপকৃত্যাপি সততং সান্ত্বয়ন্তি নিরর্থকম্
137.15
অহমস্য করোম্যদ্য সদৃশীং বৈরয়াতনাম্
কৃতঘ্নস্য নৃশংসস্য ভৃশং বিশ্বাসঘাতিনঃ
137.16
সহসংজাতবৃদ্ধস্য তথৈব সহভোজিনঃ
শরণাগতস্য চ বধস্ত্রিবিধং হ্যস্য কিল্বিষম্
137.17
ইত্যুক্ত্বা চরণাভ্যাং তু নেত্রে নৃপসুতস্য সা
ভিত্ত্বা স্বস্থা তত ইদং পূজনী বাক্যমব্রবীৎ
137.18
ইচ্ছয়ৈব কৃতং পাপং সদ্য এবোপসর্পতি
কৃতপ্রতিক্রিয়ং তেষাং ন নশ্যতি শুভাশুভম্
137.19
পাপং কর্ম কৃতং কিংচিন্ন তস্মিন্যদি বিদ্যতে
নিপাত্যতেঽস্য পুত্রেষু ন চেত্পৌত্রেষু নপ্তৃষু
137.20
ব্রহ্মদত্ত উবাচ
অস্তি বৈ কৃতমস্মাভিরস্তি প্রতিকৃতং ত্বয়া
উভয়ং তত্সমীভূতং বস পূজনি মা গমঃ
137.21
পূজন্যুবাচ
সকৃত্কৃতাপরাধস্য তত্রৈব পরিলম্বতঃ
ন তদ্বুধাঃ প্রশংসন্তি শ্রেয়স্তত্রাপসর্পণম্
137.22
সান্ত্বে প্রয়ুক্তে নৃপতে কৃতবৈরে ন বিশ্বসেৎ
ক্ষিপ্রং প্রবধ্যতে মূঢো ন হি বৈরং প্রশাম্যতি
137.23
অন্যোন্যং কৃতবৈরাণাং পুত্রপৌত্রং নিগচ্ছতি
পুত্রপৌত্রে বিনষ্টে তু পরলোকং নিগচ্ছতি
137.24
সর্বেষাং কৃতবৈরাণামবিশ্বাসঃ সুখাবহঃ
একান্ততো ন বিশ্বাসঃ কার্যো বিশ্বাসঘাতকঃ
137.25
ন বিশ্বসেদবিশ্বস্তে বিশ্বস্তেঽপি ন বিশ্বসেৎ
কামং বিশ্বাসয়েদন্যান্পরেষাং তু ন বিশ্বসেৎ
137.26
মাতা পিতা বান্ধবানাং বরিষ্ঠৌ; ভার্যা জরা বীজমাত্রং তু পুত্রঃ
ভ্রাতা শত্রুঃ ক্লিন্নপাণির্বয়স্য; আত্মা হ্যেকঃ সুখদুঃখস্য বেত্তা
137.27
অন্যোন্যকৃতবৈরাণাং ন সংধিরুপপদ্যতে
স চ হেতুরতিক্রান্তো যদর্থমহমাবসম্
137.28
পূজিতস্যার্থমানাভ্যাং জন্তোঃ পূর্বাপকারিণঃ
চেতো ভবত্যবিশ্বস্তং পূর্বং ত্রাসয়তে বলাৎ
137.29
পূর্বং সংমাননা যত্র পশ্চাচ্চৈব বিমাননা
জহ্যাত্তং সত্ত্ববান্বাসং সংমানিতবিমানিতঃ
137.30
উষিতাস্মি তবাগারে দীর্ঘকালমহিংসিতা
তদিদং বৈরমুত্পন্নং সুখমাস্স্ব ব্রজাম্যহম্
137.31
ব্রহ্মদত্ত উবাচ
যত্কৃতে প্রতিকুর্যাদ্বৈ ন স তত্রাপরাধ্নুয়াৎ
অনৃণস্তেন ভবতি বস পূজনি মা গমঃ
137.32
পূজন্যুবাচ
ন কৃতস্য ন কর্তুশ্চ সখ্যং সংধীয়তে পুনঃ
হৃদয়ং তত্র জানাতি কর্তুশ্চৈব কৃতস্য চ
137.33
ব্রহ্মদত্ত উবাচ
কৃতস্য চৈব কর্তুশ্চ সখ্যং সংধীয়তে পুনঃ
বৈরস্যোপশমো দৃষ্টঃ পাপং নোপাশ্নুতে পুনঃ
137.34
পূজন্যুবাচ
নাস্তি বৈরমুপক্রান্তং সান্ত্বিতোঽস্মীতি নাশ্বসেৎ
বিশ্বাসাদ্বধ্যতে বালস্তস্মাচ্ছ্রেয়ো হ্যদর্শনম্
137.35
তরসা যে ন শক্যন্তে শস্ত্রৈঃ সুনিশিতৈরপি
সাম্না তে বিনিগৃহ্যন্তে গজা ইব করেণুভিঃ
137.36
ব্রহ্মদত্ত উবাচ
সংবাসাজ্জায়তে স্নেহো জীবিতান্তকরেষ্বপি
অন্যোন্যস্য চ বিশ্বাসঃ শ্বপচেন শুনো যথা
137.37
অন্যোন্যকৃতবৈরাণাং সংবাসান্মৃদুতাং গতম্
নৈব তিষ্ঠতি তদ্বৈরং পুষ্করস্থমিবোদকম্
137.38
পূজন্যুবাচ
বৈরং পঞ্চসমুত্থানং তচ্চ বুধ্যন্তি পণ্ডিতাঃ
স্ত্রীকৃতং বাস্তুজং বাগ্জং সসপত্নাপরাধজম্
137.39
তত্র দাতা নিহন্তব্যঃ ক্ষত্রিয়েণ বিশেষতঃ
প্রকাশং বাপ্রকাশং বা বুদ্ধ্বা দেশবলাদিকম্
137.40
কৃতবৈরে ন বিশ্বাসঃ কার্যস্ত্বিহ সুহৃদ্যপি
ছন্নং সংতিষ্ঠতে বৈরং গূঢোঽগ্নিরিব দারুষু
137.41
ন বিত্তেন ন পারুষ্যৈর্ন সান্ত্বেন ন চ শ্রুতৈঃ
বৈরাগ্নিঃ শাম্যতে রাজন্নৌর্বাগ্নিরিব সাগরে
137.42
ন হি বৈরাগ্নিরুদ্ভূতঃ কর্ম বাপ্যপরাধজম্
শাম্যত্যদগ্ধ্বা নৃপতে বিনা হ্যেকতরক্ষয়াৎ
137.43
সত্কৃতস্যার্থমানাভ্যাং স্যাত্তু পূর্বাপকারিণঃ
নৈব শান্তির্ন বিশ্বাসঃ কর্ম ত্রাসয়তে বলাৎ
137.44
নৈবাপকারে কস্মিংশ্চিদহং ত্বয়ি তথা ভবান্
বিশ্বাসাদুষিতা পূর্বং নেদানীং বিশ্বসাম্যহম্
137.45
ব্রহ্মদত্ত উবাচ
কালেন ক্রিয়তে কার্যং তথৈব বিবিধাঃ ক্রিয়াঃ
কালেনৈব প্রবর্তন্তে কঃ কস্যেহাপরাধ্যতি
137.46
তুল্যং চোভে প্রবর্তেতে মরণং জন্ম চৈব হ
কার্যতে চৈব কালেন তন্নিমিত্তং হি জীবতি
137.47
বধ্যন্তে যুগপত্কেচিদেকৈকস্য ন চাপরে
কালো দহতি ভূতানি সংপ্রাপ্যাগ্নিরিবেন্ধনম্
137.48
নাহং প্রমাণং নৈব ত্বমন্যোন্যকরণে শুভে
কালো নিত্যমুপাধত্তে সুখং দুঃখং চ দেহিনাম্
137.49
এবং বসেহ সস্নেহা যথাকালমহিংসিতা
যত্কৃতং তচ্চ মে ক্ষান্তং ত্বং চৈব ক্ষম পূজনি
137.50
পূজন্যুবাচ
যদি কালঃ প্রমাণং তে ন বৈরং কস্যচিদ্ভবেৎ
কস্মাত্ত্বপচিতিং যান্তি বান্ধবা বান্ধবে হতে
137.51
কস্মাদ্দেবাসুরাঃ পূর্বমন্যোন্যমভিজঘ্নিরে
যদি কালেন নির্যাণং সুখদুঃখে ভবাভবৌ
137.52
ভিষজো ভেষজং কর্তুং কস্মাদিচ্ছন্তি রোগিণে
যদি কালেন পচ্যন্তে ভেষজৈঃ কিং প্রয়োজনম্
137.53
প্রলাপঃ ক্রিয়তে কস্মাত্সুমহাঞ্শোকমূর্ছিতৈঃ
যদি কালঃ প্রমাণং তে কস্মাদ্ধর্মোঽস্তি কর্তৃষু
137.54
তব পুত্রো মমাপত্যং হতবান্হিংসিতো ময়া
অনন্তরং ত্বয়া চাহং বন্ধনীয়া মহীপতে
137.55
অহং হি পুত্রশোকেন কৃতপাপা তবাত্মজে
তথা ত্বয়া প্রহর্তব্যং ময়ি তত্ত্বং চ মে শৃণু
137.56
ভক্ষার্থং ক্রীডনার্থং বা নরা বাঞ্ছন্তি পক্ষিণঃ
তৃতীয়ো নাস্তি সংয়োগো বধবন্ধাদৃতে ক্ষমঃ
137.57
বধবন্ধভয়াদেকে মোক্ষতন্ত্রমুপাগতাঃ
মরণোত্পাতজং দুঃখমাহুর্ধর্মবিদো জনাঃ
137.58
সর্বস্য দয়িতাঃ প্রাণাঃ সর্বস্য দয়িতাঃ সুতাঃ
দুঃখাদুদ্বিজতে সর্বঃ সর্বস্য সুখমীপ্সিতম্
137.59
দুঃখং জরা ব্রহ্মদত্ত দুঃখমর্থবিপর্যয়ঃ
দুঃখং চানিষ্টসংবাসো দুঃখমিষ্টবিয়োগজম্
137.60
বৈরবন্ধকৃতং দুঃখং হিংসাজং স্ত্রীকৃতং তথা
দুঃখং সুখেন সততং জনাদ্বিপরিবর্ততে
137.61
ন দুঃখং পরদুঃখে বৈ কেচিদাহুরবুদ্ধয়ঃ
যো দুঃখং নাভিজানাতি স জল্পতি মহাজনে
137.62
যস্তু শোচতি দুঃখার্তঃ স কথং বক্তুমুত্সহেৎ
রসজ্ঞঃ সর্বদুঃখস্য যথাত্মনি তথা পরে
137.63
যত্কৃতং তে ময়া রাজংস্ত্বয়া চ মম যত্কৃতম্
ন তদ্বর্ষশতৈঃ শক্যং ব্যপোহিতুমরিংদম
137.64
আবয়োঃ কৃতমন্যোন্যং তত্র সংধির্ন বিদ্যতে
স্মৃত্বা স্মৃত্বা হি তে পুত্রং নবং বৈরং ভবিষ্যতি
137.65
বৈরমন্তিকমাসজ্য যঃ প্রীতিং কর্তুমিচ্ছতি
মৃন্ময়স্যেব ভগ্নস্য তস্য সংধির্ন বিদ্যতে
137.66
নিশ্চিতশ্চার্থশাস্ত্রজ্ঞৈরবিশ্বাসঃ সুখোদয়ঃ
উশনাশ্চাথ গাথে দ্বে প্রহ্রাদায়াব্রবীত্পুরা
137.67
যে বৈরিণঃ শ্রদ্দধতে সত্যে সত্যেতরেঽপি বা
তে শ্রদ্দধানা বধ্যন্তে মধু শুষ্কতৃণৈর্যথা
137.68
ন হি বৈরাণি শাম্যন্তি কুলেষ্বা দশমাদ্যুগাৎ
আখ্যাতারশ্চ বিদ্যন্তে কুলে চেদ্বিদ্যতে পুমান্
137.69
উপগুহ্য হি বৈরাণি সান্ত্বয়ন্তি নরাধিপাঃ
অথৈনং প্রতিপিংষন্তি পূর্ণং ঘটমিবাশ্মনি
137.70
সদা ন বিশ্বসেদ্রাজন্পাপং কৃত্বেহ কস্যচিৎ
অপকৃত্য পরেষাং হি বিশ্বাসাদ্দুঃখমশ্নুতে
137.71
ব্রহ্মদত্ত উবাচ
নাবিশ্বাসাচ্চিন্বতেঽর্থান্নেহন্তে চাপি কিংচন
ভয়াদেকতরান্নিত্যং মৃতকল্পা ভবন্তি চ
137.72
পূজন্যুবাচ
যস্যেহ ব্রণিনৌ পাদৌ পদ্ভ্যাং চ পরিসর্পতি
ক্ষণ্যেতে তস্য তৌ পাদৌ সুগুপ্তমভিধাবতঃ
137.73
নেত্রাভ্যাং সরুজাভ্যাং যঃ প্রতিবাতমুদীক্ষতে
তস্য বায়ুরুজাত্যর্থং নেত্রয়োর্ভবতি ধ্রুবম্
137.74
দুষ্টং পন্থানমাশ্রিত্য যো মোহাদভিপদ্যতে
আত্মনো বলমজ্ঞাত্বা তদন্তং তস্য জীবিতম্
137.75
যস্তু বর্ষমবিজ্ঞায় ক্ষেত্রং কৃষতি মানবঃ
হীনং পুরুষকারেণ সস্যং নৈবাপ্নুতে পুনঃ
137.76
যশ্চ তিক্তং কষায়ং বাপ্যাস্বাদবিধুরং হিতম্
আহারং কুরুতে নিত্যং সোঽমৃতত্বায় কল্পতে
137.77
পথ্যং ভুক্ত্বা নরো লোভাদ্যোঽন্যদশ্নাতি ভোজনম্
পরিণামমবিজ্ঞায় তদন্তং তস্য জীবিতম্
137.78
দৈবং পুরুষকারশ্চ স্থিতাবন্যোন্যসংশ্রয়াৎ
উদাত্তানাং কর্ম তন্ত্রং দৈবং ক্লীবা উপাসতে
137.79
কর্ম চাত্মহিতং কার্যং তীক্ষ্ণং বা যদি বা মৃদু
গ্রস্যতেঽকর্মশীলস্তু সদানর্থৈরকিংচনঃ
137.80
তস্মাত্সংশয়িতেঽপ্যর্থে কার্য এব পরাক্রমঃ
সর্বস্বমপি সংত্যজ্য কার্যমাত্মহিতং নরৈঃ
137.81
বিদ্যা শৌর্যং চ দাক্ষ্যং চ বলং ধৈর্যং চ পঞ্চমম্
মিত্রাণি সহজান্যাহুর্বর্তয়ন্তীহ যৈর্বুধাঃ
137.82
নিবেশনং চ কুপ্যং চ ক্ষেত্রং ভার্যা সুহৃজ্জনঃ
এতান্যুপচিতান্যাহুঃ সর্বত্র লভতে পুমান্
137.83
সর্বত্র রমতে প্রাজ্ঞঃ সর্বত্র চ বিরোচতে
ন বিভীষয়তে কংচিদ্ভীষিতো ন বিভেতি চ
137.84
নিত্যং বুদ্ধিমতো হ্যর্থঃ স্বল্পকোঽপি বিবর্ধতে
দাক্ষ্যেণ কুরুতে কর্ম সংয়মাত্প্রতিতিষ্ঠতি
137.85
গৃহস্নেহাববদ্ধানাং নরাণামল্পমেধসাম্
কুস্ত্রী খাদতি মাংসানি মাঘমা সেগবামিব
137.86
গৃহং ক্ষেত্রাণি মিত্রাণি স্বদেশ ইতি চাপরে
ইত্যেবমবসীদন্তি নরা বুদ্ধিবিপর্যয়ে
137.87
উত্পতেত্সরুজাদ্দেশাদ্ব্যাধিদুর্ভিক্ষপীডিতাৎ
অন্যত্র বস্তুং গচ্ছেদ্বা বসেদ্বা নিত্যমানিতঃ
137.88
তস্মাদন্যত্র যাস্যামি বস্তুং নাহমিহোত্সহে
কৃতমেতদনাহার্যং তব পুত্রেণ পার্থিব
137.89
কুভার্যাং চ কুপুত্রং চ কুরাজানং কুসৌহৃদম্
কুসংবন্ধং কুদেশং চ দূরতঃ পরিবর্জয়েৎ
137.90
কুমিত্রে নাস্তি বিশ্বাসঃ কুভার্যায়াং কুতো রতিঃ
কুরাজ্যে নির্বৃতির্নাস্তি কুদেশে ন প্রজীব্যতে
137.91
কুমিত্রে সংগতং নাস্তি নিত্যমস্থিরসৌহৃদে
অবমানঃ কুসংবন্ধে ভবত্যর্থবিপর্যয়ে
137.92
সা ভার্যা যা প্রিয়ং ব্রূতে স পুত্রো যত্র নির্বৃতিঃ
তন্মিত্রং যত্র বিশ্বাসঃ স দেশো যত্র জীব্যতে
137.93
যত্র নাস্তি বলাত্কারঃ স রাজা তীব্রশাসনঃ
ন চৈব হ্যভিসংবন্ধো দরিদ্রং যো বুভূষতি
137.94
ভার্যা দেশোঽথ মিত্রাণি পুত্রসংবন্ধিবান্ধবাঃ
এতত্সর্বং গুণবতি ধর্মনেত্রে মহীপতৌ
137.95
অধর্মজ্ঞস্য বিলয়ং প্রজা গচ্ছন্ত্যনিগ্রহাৎ
রাজা মূলং ত্রিবর্গস্য অপ্রমত্তোঽনুপালয়ন্
137.96
বলিষড্ভাগমুদ্ধৃত্য বলিং তমুপয়োজয়েৎ
ন রক্ষতি প্রজাঃ সম্যগ্যঃ স পার্থিবতস্করঃ
137.97
দত্ত্বাভয়ং যঃ স্বয়মেব রাজা; ন তত্প্রমাণং কুরুতে যথাবৎ
স সর্বলোকাদুপলভ্য পাপ;মধর্মবুদ্ধির্নিরয়ং প্রয়াতি
137.98
দত্ত্বাভয়ং যঃ স্ম রাজা প্রমাণং কুরুতে সদা
স সর্বসুখকৃজ্জ্ঞেয়ঃ প্রজা ধর্মেণ পালয়ন্
137.99
পিতা মাতা গুরুর্গোপ্তা বহ্নির্বৈশ্রবণো যমঃ
সপ্ত রাজ্ঞো গুণানেতান্মনুরাহ প্রজাপতিঃ
137.100
পিতা হি রাজা রাষ্ট্রস্য প্রজানাং যোঽনুকম্পকঃ
তস্মিন্মিথ্যাপ্রণীতে হি তির্যগ্গচ্ছতি মানবঃ
137.101
সংভাবয়তি মাতেব দীনমভ্যবপদ্যতে
দহত্যগ্নিরিবানিষ্টান্যময়ন্ভবতে যমঃ
137.102
ইষ্টেষু বিসৃজত্যর্থান্কুবের ইব কামদঃ
গুরুর্ধর্মোপদেশেন গোপ্তা চ পরিপালনাৎ
137.103
যস্তু রঞ্জয়তে রাজা পৌরজানপদান্গুণৈঃ
ন তস্য ভ্রশ্যতে রাজ্যং গুণধর্মানুপালনাৎ
137.104
স্বয়ং সমুপজানন্হি পৌরজানপদক্রিয়াঃ
স সুখং মোদতে ভূপ ইহ লোকে পরত্র চ
137.105
নিত্যোদ্বিগ্নাঃ প্রজা যস্য করভারপ্রপীডিতাঃ
অনর্থৈর্বিপ্রলুপ্যন্তে স গচ্ছতি পরাভবম্
137.106
প্রজা যস্য বিবর্ধন্তে সরসীব মহোত্পলম্
স সর্বয়জ্ঞফলভাগ্রাজা লোকে মহীয়তে
137.107
বলিনা বিগ্রহো রাজন্ন কথংচিত্প্রশস্যতে
বলিনা বিগৃহীতস্য কুতো রাজ্যং কুতঃ সুখম্
137.108
ভীষ্ম উবাচ
সৈবমুক্ত্বা শকুনিকা ব্রহ্মদত্তং নরাধিপম্
রাজানং সমনুজ্ঞাপ্য জগামাথেপ্সিতাং দিশম্
137.109
এতত্তে ব্রহ্মদত্তস্য পূজন্যা সহ ভাষিতম্
ময়োক্তং ভরতশ্রেষ্ঠ কিমন্যচ্ছ্রোতুমিচ্ছসি