UtshovChapter 137
137.1
युधिष्ठिर उवाच
उक्तो मन्त्रो महाबाहो न विश्वासोऽस्ति शत्रुषु
कथं हि राजा वर्तेत यदि सर्वत्र नाश्वसेत्
Yudhishthira uvacha
Ukto mantro mahabaho na vishvasosti shatrushu
Katham hi raja varteta yadi sarvatra nashvaset
137.2
विश्वासाद्धि परं राज्ञो राजन्नुत्पद्यते भयम्
कथं वै नाश्वसन्राजा शत्रूञ्जयति पार्थिव
Vishvasaddhi param ragyo rajannutpadyate bhayam
Katham vai nashvasanraja shatrunjayati parthiva
137.3
एतन्मे संशयं छिन्धि मनो मे संप्रमुह्यति
अविश्वासकथामेतामुपश्रुत्य पितामह
Etanme sanshayam chhindhi mano me sampramuhyati
Avishvasakathametamupashrutya pitamaha
137.4
भीष्म उवाच
शृणु कौन्तेय यो वृत्तो ब्रह्मदत्तनिवेशने
पूजन्या सह संवादो ब्रह्मदत्तस्य पार्थिव
Bhishma uvacha
Shrinu kaunteya yo vritto brahmadattaniveshane
Pujanya saha sanvado brahmadattasya parthiva
137.5
काम्पिल्ये ब्रह्मदत्तस्य अन्तःपुरनिवासिनी
पूजनी नाम शकुनी दीर्घकालं सहोषिता
Kampilye brahmadattasya antahpuranivasini
Pujani nama shakuni dirghakalam sahoshita
137.6
रुतज्ञा सर्वभूतानां यथा वै जीवजीवकः
सर्वज्ञा सर्वधर्मज्ञा तिर्यग्योनिगतापि सा
Rutagya sarvabhutanam yatha vai jivajivakah
Sarvagya sarvadharmagya tiryagyonigatapi sa
137.7
अभिप्रजाता सा तत्र पुत्रमेकं सुवर्चसम्
समकालं च राज्ञोऽपि देव्याः पुत्रो व्यजायत
Abhiprajata sa tatra putramekam suvarchasam
Samakalam cha ragyopi devyah putro vyajayata
137.8
समुद्रतीरं गत्वा सा त्वाजहार फलद्वयम्
पुष्ट्यर्थं च स्वपुत्रस्य राजपुत्रस्य चैव ह
Samudratiram gatva sa tvajahara phaladvayam
Pushtyartham cha svaputrasya rajaputrasya chaiva ha
137.9
फलमेकं सुतायादाद्राजपुत्राय चापरम्
अमृतास्वादसदृशं बलतेजोविवर्धनम्
तत्रागच्छत्परां वृद्धिं राजपुत्रः फलाशनात्
Phalamekam sutayadadrajaputraya chaparam
Amritasvadasadrisham balatejovivardhanam
Tatragachchhatparam vriddhim rajaputrah phalashanat
137.10
धात्र्या हस्तगतश्चापि तेनाक्रीडत पक्षिणा
शून्ये तु तमुपादाय पक्षिणं समजातकम्
हत्वा ततः स राजेन्द्र धात्र्या हस्तमुपागमत्
Dhatrya hastagatashchapi tenakridata pakshina
Shunye tu tamupadaya pakshinam samajatakam
Hatva tatah sa rajendra dhatrya hastamupagamat
137.11
अथ सा शकुनी राजन्नागमत्फलहारिका
अपश्यन्निहतं पुत्रं तेन बालेन भूतले
Atha sa shakuni rajannagamatphalaharika
Apashyannihatam putram tena balena bhutale
137.12
बाष्पपूर्णमुखी दीना दृष्ट्वा सा तु हतं सुतम्
पूजनी दुःखसंतप्ता रुदती वाक्यमब्रवीत्
Bashpapurnamukhi dina drishtva sa tu hatam sutam
Pujani duhkhasantapta rudati vakyamabravit
137.13
क्षत्रिये संगतं नास्ति न प्रीतिर्न च सौहृदम्
कारणे संभजन्तीह कृतार्थाः संत्यजन्ति च
Kshatriye sangatam nasti na pritirna cha sauhridam
Karane sambhajantiha kritarthah santyajanti cha
137.14
क्षत्रियेषु न विश्वासः कार्यः सर्वोपघातिषु
अपकृत्यापि सततं सान्त्वयन्ति निरर्थकम्
Kshatriyeshu na vishvasah karyah sarvopaghatishu
Apakrityapi satatam santvayanti nirarthakam
137.15
अहमस्य करोम्यद्य सदृशीं वैरयातनाम्
कृतघ्नस्य नृशंसस्य भृशं विश्वासघातिनः
Ahamasya karomyadya sadrishim vairayatanam
Kritaghnasya nrishansasya bhrisham vishvasaghatinah
137.16
सहसंजातवृद्धस्य तथैव सहभोजिनः
शरणागतस्य च वधस्त्रिविधं ह्यस्य किल्बिषम्
Sahasanjatavriddhasya tathaiva sahabhojinah
Sharanagatasya cha vadhastrividham hyasya kilbisham
137.17
इत्युक्त्वा चरणाभ्यां तु नेत्रे नृपसुतस्य सा
भित्त्वा स्वस्था तत इदं पूजनी वाक्यमब्रवीत्
Ityuktva charanabhyam tu netre nripasutasya sa
Bhittva svastha tata idam pujani vakyamabravit
137.18
इच्छयैव कृतं पापं सद्य एवोपसर्पति
कृतप्रतिक्रियं तेषां न नश्यति शुभाशुभम्
Ichchhayaiva kritam papam sadya evopasarpati
Kritapratikriyam tesham na nashyati shubhashubham
137.19
पापं कर्म कृतं किंचिन्न तस्मिन्यदि विद्यते
निपात्यतेऽस्य पुत्रेषु न चेत्पौत्रेषु नप्तृषु
Papam karma kritam kinchinna tasminyadi vidyate
Nipatyatesya putreshu na chetpautreshu naptrishu
137.20
ब्रह्मदत्त उवाच
अस्ति वै कृतमस्माभिरस्ति प्रतिकृतं त्वया
उभयं तत्समीभूतं वस पूजनि मा गमः
Brahmadatta uvacha
Asti vai kritamasmabhirasti pratikritam tvaya
Ubhayam tatsamibhutam vasa pujani ma gamah
137.21
पूजन्युवाच
सकृत्कृतापराधस्य तत्रैव परिलम्बतः
न तद्बुधाः प्रशंसन्ति श्रेयस्तत्रापसर्पणम्
Pujanyuvacha
Sakritkritaparadhasya tatraiva parilambatah
Na tadbudhah prashansanti shreyastatrapasarpanam
137.22
सान्त्वे प्रयुक्ते नृपते कृतवैरे न विश्वसेत्
क्षिप्रं प्रबध्यते मूढो न हि वैरं प्रशाम्यति
Santve prayukte nripate kritavaire na vishvaset
Kshipram prabadhyate mudho na hi vairam prashamyati
137.23
अन्योन्यं कृतवैराणां पुत्रपौत्रं निगच्छति
पुत्रपौत्रे विनष्टे तु परलोकं निगच्छति
Anyonyam kritavairanam putrapautram nigachchhati
Putrapautre vinashte tu paralokam nigachchhati
137.24
सर्वेषां कृतवैराणामविश्वासः सुखावहः
एकान्ततो न विश्वासः कार्यो विश्वासघातकः
Sarvesham kritavairanamavishvasah sukhavahah
Ekantato na vishvasah karyo vishvasaghatakah
137.25
न विश्वसेदविश्वस्ते विश्वस्तेऽपि न विश्वसेत्
कामं विश्वासयेदन्यान्परेषां तु न विश्वसेत्
Na vishvasedavishvaste vishvastepi na vishvaset
Kamam vishvasayedanyanparesham tu na vishvaset
137.26
माता पिता बान्धवानां वरिष्ठौ; भार्या जरा बीजमात्रं तु पुत्रः
भ्राता शत्रुः क्लिन्नपाणिर्वयस्य; आत्मा ह्येकः सुखदुःखस्य वेत्ता
Mata pita bandhavanam varishthau; bharya jara bijamatram tu putrah
Bhrata shatruh klinnapanirvayasya; atma hyekah sukhaduhkhasya vetta
137.27
अन्योन्यकृतवैराणां न संधिरुपपद्यते
स च हेतुरतिक्रान्तो यदर्थमहमावसम्
Anyonyakritavairanam na sandhirupapadyate
Sa cha heturatikranto yadarthamahamavasam
137.28
पूजितस्यार्थमानाभ्यां जन्तोः पूर्वापकारिणः
चेतो भवत्यविश्वस्तं पूर्वं त्रासयते बलात्
Pujitasyarthamanabhyam jantoh purvapakarinah
Cheto bhavatyavishvastam purvam trasayate balat
137.29
पूर्वं संमानना यत्र पश्चाच्चैव विमानना
जह्यात्तं सत्त्ववान्वासं संमानितविमानितः
Purvam sammanana yatra pashchachchaiva vimanana
Jahyattam sattvavanvasam sammanitavimanitah
137.30
उषितास्मि तवागारे दीर्घकालमहिंसिता
तदिदं वैरमुत्पन्नं सुखमास्स्व व्रजाम्यहम्
Ushitasmi tavagare dirghakalamahinsita
Tadidam vairamutpannam sukhamassva vrajamyaham
137.31
ब्रह्मदत्त उवाच
यत्कृते प्रतिकुर्याद्वै न स तत्रापराध्नुयात्
अनृणस्तेन भवति वस पूजनि मा गमः
Brahmadatta uvacha
Yatkrite pratikuryadvai na sa tatraparadhnuyat
Anrinastena bhavati vasa pujani ma gamah
137.32
पूजन्युवाच
न कृतस्य न कर्तुश्च सख्यं संधीयते पुनः
हृदयं तत्र जानाति कर्तुश्चैव कृतस्य च
Pujanyuvacha
Na kritasya na kartushcha sakhyam sandhiyate punah
Hridayam tatra janati kartushchaiva kritasya cha
137.33
ब्रह्मदत्त उवाच
कृतस्य चैव कर्तुश्च सख्यं संधीयते पुनः
वैरस्योपशमो दृष्टः पापं नोपाश्नुते पुनः
Brahmadatta uvacha
Kritasya chaiva kartushcha sakhyam sandhiyate punah
Vairasyopashamo drishtah papam nopashnute punah
137.34
पूजन्युवाच
नास्ति वैरमुपक्रान्तं सान्त्वितोऽस्मीति नाश्वसेत्
विश्वासाद्बध्यते बालस्तस्माच्छ्रेयो ह्यदर्शनम्
Pujanyuvacha
Nasti vairamupakrantam santvitosmiti nashvaset
Vishvasadbadhyate balastasmachchhreyo hyadarshanam
137.35
तरसा ये न शक्यन्ते शस्त्रैः सुनिशितैरपि
साम्ना ते विनिगृह्यन्ते गजा इव करेणुभिः
Tarasa ye na shakyante shastraih sunishitairapi
Samna te vinigrihyante gaja iva karenubhih
137.36
ब्रह्मदत्त उवाच
संवासाज्जायते स्नेहो जीवितान्तकरेष्वपि
अन्योन्यस्य च विश्वासः श्वपचेन शुनो यथा
Brahmadatta uvacha
Sanvasajjayate sneho jivitantakareshvapi
Anyonyasya cha vishvasah shvapachena shuno yatha
137.37
अन्योन्यकृतवैराणां संवासान्मृदुतां गतम्
नैव तिष्ठति तद्वैरं पुष्करस्थमिवोदकम्
Anyonyakritavairanam sanvasanmridutam gatam
Naiva tishthati tadvairam pushkarasthamivodakam
137.38
पूजन्युवाच
वैरं पञ्चसमुत्थानं तच्च बुध्यन्ति पण्डिताः
स्त्रीकृतं वास्तुजं वाग्जं ससपत्नापराधजम्
Pujanyuvacha
Vairam panchasamutthanam tachcha budhyanti panditah
Strikritam vastujam vagjam sasapatnaparadhajam
137.39
तत्र दाता निहन्तव्यः क्षत्रियेण विशेषतः
प्रकाशं वाप्रकाशं वा बुद्ध्वा देशबलादिकम्
Tatra data nihantavyah kshatriyena visheshatah
Prakasham vaprakasham va buddhva deshabaladikam
137.40
कृतवैरे न विश्वासः कार्यस्त्विह सुहृद्यपि
छन्नं संतिष्ठते वैरं गूढोऽग्निरिव दारुषु
Kritavaire na vishvasah karyastviha suhridyapi
Chhannam santishthate vairam gudhogniriva darushu
137.41
न वित्तेन न पारुष्यैर्न सान्त्वेन न च श्रुतैः
वैराग्निः शाम्यते राजन्नौर्वाग्निरिव सागरे
Na vittena na parushyairna santvena na cha shrutaih
Vairagnih shamyate rajannaurvagniriva sagare
137.42
न हि वैराग्निरुद्भूतः कर्म वाप्यपराधजम्
शाम्यत्यदग्ध्वा नृपते विना ह्येकतरक्षयात्
Na hi vairagnirudbhutah karma vapyaparadhajam
Shamyatyadagdhva nripate vina hyekatarakshayat
137.43
सत्कृतस्यार्थमानाभ्यां स्यात्तु पूर्वापकारिणः
नैव शान्तिर्न विश्वासः कर्म त्रासयते बलात्
Satkritasyarthamanabhyam syattu purvapakarinah
Naiva shantirna vishvasah karma trasayate balat
137.44
नैवापकारे कस्मिंश्चिदहं त्वयि तथा भवान्
विश्वासादुषिता पूर्वं नेदानीं विश्वसाम्यहम्
Naivapakare kasminshchidaham tvayi tatha bhavan
Vishvasadushita purvam nedanim vishvasamyaham
137.45
ब्रह्मदत्त उवाच
कालेन क्रियते कार्यं तथैव विविधाः क्रियाः
कालेनैव प्रवर्तन्ते कः कस्येहापराध्यति
Brahmadatta uvacha
Kalena kriyate karyam tathaiva vividhah kriyah
Kalenaiva pravartante kah kasyehaparadhyati
137.46
तुल्यं चोभे प्रवर्तेते मरणं जन्म चैव ह
कार्यते चैव कालेन तन्निमित्तं हि जीवति
Tulyam chobhe pravartete maranam janma chaiva ha
Karyate chaiva kalena tannimittam hi jivati
137.47
बध्यन्ते युगपत्केचिदेकैकस्य न चापरे
कालो दहति भूतानि संप्राप्याग्निरिवेन्धनम्
Badhyante yugapatkechidekaikasya na chapare
Kalo dahati bhutani samprapyagnirivendhanam
137.48
नाहं प्रमाणं नैव त्वमन्योन्यकरणे शुभे
कालो नित्यमुपाधत्ते सुखं दुःखं च देहिनाम्
Naham pramanam naiva tvamanyonyakarane shubhe
Kalo nityamupadhatte sukham duhkham cha dehinam
137.49
एवं वसेह सस्नेहा यथाकालमहिंसिता
यत्कृतं तच्च मे क्षान्तं त्वं चैव क्षम पूजनि
Evam vaseha sasneha yathakalamahinsita
Yatkritam tachcha me kshantam tvam chaiva kshama pujani
137.50
पूजन्युवाच
यदि कालः प्रमाणं ते न वैरं कस्यचिद्भवेत्
कस्मात्त्वपचितिं यान्ति बान्धवा बान्धवे हते
Pujanyuvacha
Yadi kalah pramanam te na vairam kasyachidbhavet
Kasmattvapachitim yanti bandhava bandhave hate
137.51
कस्माद्देवासुराः पूर्वमन्योन्यमभिजघ्निरे
यदि कालेन निर्याणं सुखदुःखे भवाभवौ
Kasmaddevasurah purvamanyonyamabhijaghnire
Yadi kalena niryanam sukhaduhkhe bhavabhavau
137.52
भिषजो भेषजं कर्तुं कस्मादिच्छन्ति रोगिणे
यदि कालेन पच्यन्ते भेषजैः किं प्रयोजनम्
Bhishajo bheshajam kartum kasmadichchhanti rogine
Yadi kalena pachyante bheshajaih kim prayojanam
137.53
प्रलापः क्रियते कस्मात्सुमहाञ्शोकमूर्छितैः
यदि कालः प्रमाणं ते कस्माद्धर्मोऽस्ति कर्तृषु
Pralapah kriyate kasmatsumahanshokamurchhitaih
Yadi kalah pramanam te kasmaddharmosti kartrishu
137.54
तव पुत्रो ममापत्यं हतवान्हिंसितो मया
अनन्तरं त्वया चाहं बन्धनीया महीपते
Tava putro mamapatyam hatavanhinsito maya
Anantaram tvaya chaham bandhaniya mahipate
137.55
अहं हि पुत्रशोकेन कृतपापा तवात्मजे
तथा त्वया प्रहर्तव्यं मयि तत्त्वं च मे शृणु
Aham hi putrashokena kritapapa tavatmaje
Tatha tvaya prahartavyam mayi tattvam cha me shrinu
137.56
भक्षार्थं क्रीडनार्थं वा नरा वाञ्छन्ति पक्षिणः
तृतीयो नास्ति संयोगो वधबन्धादृते क्षमः
Bhakshartham kridanartham va nara vanchhanti pakshinah
Tritiyo nasti sanyogo vadhabandhadrite kshamah
137.57
वधबन्धभयादेके मोक्षतन्त्रमुपागताः
मरणोत्पातजं दुःखमाहुर्धर्मविदो जनाः
Vadhabandhabhayadeke mokshatantramupagatah
Maranotpatajam duhkhamahurdharmavido janah
137.58
सर्वस्य दयिताः प्राणाः सर्वस्य दयिताः सुताः
दुःखादुद्विजते सर्वः सर्वस्य सुखमीप्सितम्
Sarvasya dayitah pranah sarvasya dayitah sutah
Duhkhadudvijate sarvah sarvasya sukhamipsitam
137.59
दुःखं जरा ब्रह्मदत्त दुःखमर्थविपर्ययः
दुःखं चानिष्टसंवासो दुःखमिष्टवियोगजम्
Duhkham jara brahmadatta duhkhamarthaviparyayah
Duhkham chanishtasanvaso duhkhamishtaviyogajam
137.60
वैरबन्धकृतं दुःखं हिंसाजं स्त्रीकृतं तथा
दुःखं सुखेन सततं जनाद्विपरिवर्तते
Vairabandhakritam duhkham hinsajam strikritam tatha
Duhkham sukhena satatam janadviparivartate
137.61
न दुःखं परदुःखे वै केचिदाहुरबुद्धयः
यो दुःखं नाभिजानाति स जल्पति महाजने
Na duhkham paraduhkhe vai kechidahurabuddhayah
Yo duhkham nabhijanati sa jalpati mahajane
137.62
यस्तु शोचति दुःखार्तः स कथं वक्तुमुत्सहेत्
रसज्ञः सर्वदुःखस्य यथात्मनि तथा परे
Yastu shochati duhkhartah sa katham vaktumutsahet
Rasagyah sarvaduhkhasya yathatmani tatha pare
137.63
यत्कृतं ते मया राजंस्त्वया च मम यत्कृतम्
न तद्वर्षशतैः शक्यं व्यपोहितुमरिंदम
Yatkritam te maya rajanstvaya cha mama yatkritam
Na tadvarshashataih shakyam vyapohitumarindama
137.64
आवयोः कृतमन्योन्यं तत्र संधिर्न विद्यते
स्मृत्वा स्मृत्वा हि ते पुत्रं नवं वैरं भविष्यति
Avayoh kritamanyonyam tatra sandhirna vidyate
Smritva smritva hi te putram navam vairam bhavishyati
137.65
वैरमन्तिकमासज्य यः प्रीतिं कर्तुमिच्छति
मृन्मयस्येव भग्नस्य तस्य संधिर्न विद्यते
Vairamantikamasajya yah pritim kartumichchhati
Mrinmayasyeva bhagnasya tasya sandhirna vidyate
137.66
निश्चितश्चार्थशास्त्रज्ञैरविश्वासः सुखोदयः
उशनाश्चाथ गाथे द्वे प्रह्रादायाब्रवीत्पुरा
Nishchitashcharthashastragyairavishvasah sukhodayah
Ushanashchatha gathe dve prahradayabravitpura
137.67
ये वैरिणः श्रद्दधते सत्ये सत्येतरेऽपि वा
ते श्रद्दधाना वध्यन्ते मधु शुष्कतृणैर्यथा
Ye vairinah shraddadhate satye satyetarepi va
Te shraddadhana vadhyante madhu shushkatrinairyatha
137.68
न हि वैराणि शाम्यन्ति कुलेष्वा दशमाद्युगात्
आख्यातारश्च विद्यन्ते कुले चेद्विद्यते पुमान्
Na hi vairani shamyanti kuleshva dashamadyugat
Akhyatarashcha vidyante kule chedvidyate puman
137.69
उपगुह्य हि वैराणि सान्त्वयन्ति नराधिपाः
अथैनं प्रतिपिंषन्ति पूर्णं घटमिवाश्मनि
Upaguhya hi vairani santvayanti naradhipah
Athainam pratipinshanti purnam ghatamivashmani
137.70
सदा न विश्वसेद्राजन्पापं कृत्वेह कस्यचित्
अपकृत्य परेषां हि विश्वासाद्दुःखमश्नुते
Sada na vishvasedrajanpapam kritveha kasyachit
Apakritya paresham hi vishvasadduhkhamashnute
137.71
ब्रह्मदत्त उवाच
नाविश्वासाच्चिन्वतेऽर्थान्नेहन्ते चापि किंचन
भयादेकतरान्नित्यं मृतकल्पा भवन्ति च
Brahmadatta uvacha
Navishvasachchinvaterthannehante chapi kinchana
Bhayadekatarannityam mritakalpa bhavanti cha
137.72
पूजन्युवाच
यस्येह व्रणिनौ पादौ पद्भ्यां च परिसर्पति
क्षण्येते तस्य तौ पादौ सुगुप्तमभिधावतः
Pujanyuvacha
Yasyeha vraninau padau padbhyam cha parisarpati
Kshanyete tasya tau padau suguptamabhidhavatah
137.73
नेत्राभ्यां सरुजाभ्यां यः प्रतिवातमुदीक्षते
तस्य वायुरुजात्यर्थं नेत्रयोर्भवति ध्रुवम्
Netrabhyam sarujabhyam yah prativatamudikshate
Tasya vayurujatyartham netrayorbhavati dhruvam
137.74
दुष्टं पन्थानमाश्रित्य यो मोहादभिपद्यते
आत्मनो बलमज्ञात्वा तदन्तं तस्य जीवितम्
Dushtam panthanamashritya yo mohadabhipadyate
Atmano balamagyatva tadantam tasya jivitam
137.75
यस्तु वर्षमविज्ञाय क्षेत्रं कृषति मानवः
हीनं पुरुषकारेण सस्यं नैवाप्नुते पुनः
Yastu varshamavigyaya kshetram krishati manavah
Hinam purushakarena sasyam naivapnute punah
137.76
यश्च तिक्तं कषायं वाप्यास्वादविधुरं हितम्
आहारं कुरुते नित्यं सोऽमृतत्वाय कल्पते
Yashcha tiktam kashayam vapyasvadavidhuram hitam
Aharam kurute nityam somritatvaya kalpate
137.77
पथ्यं भुक्त्वा नरो लोभाद्योऽन्यदश्नाति भोजनम्
परिणाममविज्ञाय तदन्तं तस्य जीवितम्
Pathyam bhuktva naro lobhadyonyadashnati bhojanam
Parinamamavigyaya tadantam tasya jivitam
137.78
दैवं पुरुषकारश्च स्थितावन्योन्यसंश्रयात्
उदात्तानां कर्म तन्त्रं दैवं क्लीबा उपासते
Daivam purushakarashcha sthitavanyonyasanshrayat
Udattanam karma tantram daivam kliba upasate
137.79
कर्म चात्महितं कार्यं तीक्ष्णं वा यदि वा मृदु
ग्रस्यतेऽकर्मशीलस्तु सदानर्थैरकिंचनः
Karma chatmahitam karyam tikshnam va yadi va mridu
Grasyatekarmashilastu sadanarthairakinchanah
137.80
तस्मात्संशयितेऽप्यर्थे कार्य एव पराक्रमः
सर्वस्वमपि संत्यज्य कार्यमात्महितं नरैः
Tasmatsanshayitepyarthe karya eva parakramah
Sarvasvamapi santyajya karyamatmahitam naraih
137.81
विद्या शौर्यं च दाक्ष्यं च बलं धैर्यं च पञ्चमम्
मित्राणि सहजान्याहुर्वर्तयन्तीह यैर्बुधाः
Vidya shauryam cha dakshyam cha balam dhairyam cha panchamam
Mitrani sahajanyahurvartayantiha yairbudhah
137.82
निवेशनं च कुप्यं च क्षेत्रं भार्या सुहृज्जनः
एतान्युपचितान्याहुः सर्वत्र लभते पुमान्
Niveshanam cha kupyam cha kshetram bharya suhrijjanah
Etanyupachitanyahuh sarvatra labhate puman
137.83
सर्वत्र रमते प्राज्ञः सर्वत्र च विरोचते
न विभीषयते कंचिद्भीषितो न बिभेति च
Sarvatra ramate pragyah sarvatra cha virochate
Na vibhishayate kanchidbhishito na bibheti cha
137.84
नित्यं बुद्धिमतो ह्यर्थः स्वल्पकोऽपि विवर्धते
दाक्ष्येण कुरुते कर्म संयमात्प्रतितिष्ठति
Nityam buddhimato hyarthah svalpakopi vivardhate
Dakshyena kurute karma sanyamatpratitishthati
137.85
गृहस्नेहावबद्धानां नराणामल्पमेधसाम्
कुस्त्री खादति मांसानि माघमा सेगवामिव
Grihasnehavabaddhanam naranamalpamedhasam
Kustri khadati mansani maghama segavamiva
137.86
गृहं क्षेत्राणि मित्राणि स्वदेश इति चापरे
इत्येवमवसीदन्ति नरा बुद्धिविपर्यये
Griham kshetrani mitrani svadesha iti chapare
Ityevamavasidanti nara buddhiviparyaye
137.87
उत्पतेत्सरुजाद्देशाद्व्याधिदुर्भिक्षपीडितात्
अन्यत्र वस्तुं गच्छेद्वा वसेद्वा नित्यमानितः
Utpatetsarujaddeshadvyadhidurbhikshapiditat
Anyatra vastum gachchhedva vasedva nityamanitah
137.88
तस्मादन्यत्र यास्यामि वस्तुं नाहमिहोत्सहे
कृतमेतदनाहार्यं तव पुत्रेण पार्थिव
Tasmadanyatra yasyami vastum nahamihotsahe
Kritametadanaharyam tava putrena parthiva
137.89
कुभार्यां च कुपुत्रं च कुराजानं कुसौहृदम्
कुसंबन्धं कुदेशं च दूरतः परिवर्जयेत्
Kubharyam cha kuputram cha kurajanam kusauhridam
Kusambandham kudesham cha duratah parivarjayet
137.90
कुमित्रे नास्ति विश्वासः कुभार्यायां कुतो रतिः
कुराज्ये निर्वृतिर्नास्ति कुदेशे न प्रजीव्यते
Kumitre nasti vishvasah kubharyayam kuto ratih
Kurajye nirvritirnasti kudeshe na prajivyate
137.91
कुमित्रे संगतं नास्ति नित्यमस्थिरसौहृदे
अवमानः कुसंबन्धे भवत्यर्थविपर्यये
Kumitre sangatam nasti nityamasthirasauhride
Avamanah kusambandhe bhavatyarthaviparyaye
137.92
सा भार्या या प्रियं ब्रूते स पुत्रो यत्र निर्वृतिः
तन्मित्रं यत्र विश्वासः स देशो यत्र जीव्यते
Sa bharya ya priyam brute sa putro yatra nirvritih
Tanmitram yatra vishvasah sa desho yatra jivyate
137.93
यत्र नास्ति बलात्कारः स राजा तीव्रशासनः
न चैव ह्यभिसंबन्धो दरिद्रं यो बुभूषति
Yatra nasti balatkarah sa raja tivrashasanah
Na chaiva hyabhisambandho daridram yo bubhushati
137.94
भार्या देशोऽथ मित्राणि पुत्रसंबन्धिबान्धवाः
एतत्सर्वं गुणवति धर्मनेत्रे महीपतौ
Bharya deshotha mitrani putrasambandhibandhavah
Etatsarvam gunavati dharmanetre mahipatau
137.95
अधर्मज्ञस्य विलयं प्रजा गच्छन्त्यनिग्रहात्
राजा मूलं त्रिवर्गस्य अप्रमत्तोऽनुपालयन्
Adharmagyasya vilayam praja gachchhantyanigrahat
Raja mulam trivargasya apramattonupalayan
137.96
बलिषड्भागमुद्धृत्य बलिं तमुपयोजयेत्
न रक्षति प्रजाः सम्यग्यः स पार्थिवतस्करः
Balishadbhagamuddhritya balim tamupayojayet
Na rakshati prajah samyagyah sa parthivataskarah
137.97
दत्त्वाभयं यः स्वयमेव राजा; न तत्प्रमाणं कुरुते यथावत्
स सर्वलोकादुपलभ्य पाप;मधर्मबुद्धिर्निरयं प्रयाति
Dattvabhayam yah svayameva raja; na tatpramanam kurute yathavat
Sa sarvalokadupalabhya papa;madharmabuddhirnirayam prayati
137.98
दत्त्वाभयं यः स्म राजा प्रमाणं कुरुते सदा
स सर्वसुखकृज्ज्ञेयः प्रजा धर्मेण पालयन्
Dattvabhayam yah sma raja pramanam kurute sada
Sa sarvasukhakrijgyeyah praja dharmena palayan
137.99
पिता माता गुरुर्गोप्ता वह्निर्वैश्रवणो यमः
सप्त राज्ञो गुणानेतान्मनुराह प्रजापतिः
Pita mata gururgopta vahnirvaishravano yamah
Sapta ragyo gunanetanmanuraha prajapatih
137.100
पिता हि राजा राष्ट्रस्य प्रजानां योऽनुकम्पकः
तस्मिन्मिथ्याप्रणीते हि तिर्यग्गच्छति मानवः
Pita hi raja rashtrasya prajanam yonukampakah
Tasminmithyapranite hi tiryaggachchhati manavah
137.101
संभावयति मातेव दीनमभ्यवपद्यते
दहत्यग्निरिवानिष्टान्यमयन्भवते यमः
Sambhavayati mateva dinamabhyavapadyate
Dahatyagnirivanishtanyamayanbhavate yamah
137.102
इष्टेषु विसृजत्यर्थान्कुबेर इव कामदः
गुरुर्धर्मोपदेशेन गोप्ता च परिपालनात्
Ishteshu visrijatyarthankubera iva kamadah
Gururdharmopadeshena gopta cha paripalanat
137.103
यस्तु रञ्जयते राजा पौरजानपदान्गुणैः
न तस्य भ्रश्यते राज्यं गुणधर्मानुपालनात्
Yastu ranjayate raja paurajanapadangunaih
Na tasya bhrashyate rajyam gunadharmanupalanat
137.104
स्वयं समुपजानन्हि पौरजानपदक्रियाः
स सुखं मोदते भूप इह लोके परत्र च
Svayam samupajananhi paurajanapadakriyah
Sa sukham modate bhupa iha loke paratra cha
137.105
नित्योद्विग्नाः प्रजा यस्य करभारप्रपीडिताः
अनर्थैर्विप्रलुप्यन्ते स गच्छति पराभवम्
Nityodvignah praja yasya karabharaprapiditah
Anarthairvipralupyante sa gachchhati parabhavam
137.106
प्रजा यस्य विवर्धन्ते सरसीव महोत्पलम्
स सर्वयज्ञफलभाग्राजा लोके महीयते
Praja yasya vivardhante sarasiva mahotpalam
Sa sarvayagyaphalabhagraja loke mahiyate
137.107
बलिना विग्रहो राजन्न कथंचित्प्रशस्यते
बलिना विगृहीतस्य कुतो राज्यं कुतः सुखम्
Balina vigraho rajanna kathanchitprashasyate
Balina vigrihitasya kuto rajyam kutah sukham
137.108
भीष्म उवाच
सैवमुक्त्वा शकुनिका ब्रह्मदत्तं नराधिपम्
राजानं समनुज्ञाप्य जगामाथेप्सितां दिशम्
Bhishma uvacha
Saivamuktva shakunika brahmadattam naradhipam
Rajanam samanugyapya jagamathepsitam disham
137.109
एतत्ते ब्रह्मदत्तस्य पूजन्या सह भाषितम्
मयोक्तं भरतश्रेष्ठ किमन्यच्छ्रोतुमिच्छसि
Etatte brahmadattasya pujanya saha bhashitam
Mayoktam bharatashreshtha kimanyachchhrotumichchhasi