Utshovঅধ্যায় 136
136.1
যুধিষ্ঠির উবাচ
সর্বত্র বুদ্ধিঃ কথিতা শ্রেষ্ঠা তে ভরতর্ষভ
অনাগতা তথোত্পন্না দীর্ঘসূত্রা বিনাশিনী
136.2
তদিচ্ছামি পরাং বুদ্ধিং শ্রোতুং ভরতসত্তম
যথা রাজন্ন মুহ্যেত শত্রুভিঃ পরিবারিতঃ
136.3
ধর্মার্থকুশল প্রাজ্ঞ সর্বশাস্ত্রবিশারদ
পৃচ্ছামি ত্বা কুরুশ্রেষ্ঠ তন্মে ব্যাখ্যাতুমর্হসি
136.4
শত্রুভির্বহুভির্গ্রস্তো যথা বর্তেত পার্থিবঃ
এতদিচ্ছাম্যহং শ্রোতুং সর্বমেব যথাবিধি
136.5
বিষমস্থং হি রাজানং শত্রবঃ পরিপন্থিনঃ
বহবোঽপ্যেকমুদ্ধর্তুং যতন্তে পূর্বতাপিতাঃ
136.6
সর্বতঃ প্রার্থ্যমানেন দুর্বলেন মহাবলৈঃ
একেনৈবাসহায়েন শক্যং স্থাতুং কথং ভবেৎ
136.7
কথং মিত্রমরিং চৈব বিন্দেত ভরতর্ষভ
চেষ্টিতব্যং কথং চাত্র শত্রোর্মিত্রস্য চান্তরে
136.8
প্রজ্ঞাতলক্ষণে রাজন্নমিত্রে মিত্রতাং গতে
কথং নু পুরুষঃ কুর্যাত্কিং বা কৃত্বা সুখী ভবেৎ
136.9
বিগ্রহং কেন বা কুর্যাত্সংধিং বা কেন যোজয়েৎ
কথং বা শত্রুমধ্যস্থো বর্তেতাবলবানিতি
136.10
এতদ্বৈ সর্বকৃত্যানাং পরং কৃত্যং পরংতপ
নৈতস্য কশ্চিদ্বক্তাস্তি শ্রোতা চাপি সুদুর্লভঃ
136.11
ঋতে শাংতনবাদ্ভীষ্মাত্সত্যসংধাজ্জিতেন্দ্রিয়াৎ
তদন্বিষ্য মহাবাহো সর্বমেতদ্বদস্ব মে
136.12
ভীষ্ম উবাচ
ত্বদ্যুক্তোঽয়মনুপ্রশ্নো যুধিষ্ঠির গুণোদয়ঃ
শৃণু মে পুত্র কার্ত্স্ন্যেন গুহ্যমাপত্সু ভারত
136.13
অমিত্রো মিত্রতাং যাতি মিত্রং চাপি প্রদুষ্যতি
সামর্থ্যয়োগাত্কার্যাণাং তদ্গত্যা হি সদা গতিঃ
136.14
তস্মাদ্বিশ্বসিতব্যং চ বিগ্রহং চ সমাচরেৎ
দেশং কালং চ বিজ্ঞায় কার্যাকার্যবিনিশ্চয়ে
136.15
সংধাতব্যং বুধৈর্নিত্যং ব্যবস্যং চ হিতার্থিভিঃ
অমিত্রৈরপি সংধেয়ং প্রাণা রক্ষ্যাশ্চ ভারত
136.16
যো হ্যমিত্রৈর্নরো নিত্যং ন সংদধ্যাদপণ্ডিতঃ
ন সোঽর্থমাপ্নুয়াত্কিংচিত্ফলান্যপি চ ভারত
136.17
যস্ত্বমিত্রেণ সংধত্তে মিত্রেণ চ বিরুধ্যতে
অর্থয়ুক্তিং সমালোক্য সুমহদ্বিন্দতে ফলম্
136.18
অত্রাপ্যুদাহরন্তীমমিতিহাসং পুরাতনম্
মার্জারস্য চ সংবাদং ন্যগ্রোধে মূষকস্য চ
136.19
বনে মহতি কস্মিংশ্চিন্ন্যগ্রোধঃ সুমহানভূৎ
লতাজালপরিচ্ছন্নো নানাদ্বিজগণায়ুতঃ
136.20
স্কন্ধবান্মেঘসংকাশঃ শীতচ্ছায়ো মনোরমঃ
বৈরন্ত্যমভিতো জাতস্তরুর্ব্যালমৃগাকুলঃ
136.21
তস্য মূলং সমাশ্রিত্য কৃত্বা শতমুখং বিলম্
বসতি স্ম মহাপ্রাজ্ঞঃ পলিতো নাম মূষকঃ
136.22
শাখাশ্চ তস্য সংশ্রিত্য বসতি স্ম সুখং পুরঃ
লোমশো নাম মার্জারঃ পক্ষিসত্ত্বাবসাদকঃ
136.23
তত্র চাগত্য চণ্ডালো বৈরন্ত্যকৃতকেতনঃ
অয়োজয়ত্তমুন্মাথং নিত্যমস্তং গতে রবৌ
136.24
তত্র স্নায়ুময়ান্পাশান্যথাবত্সংনিধায় সঃ
গৃহং গত্বা সুখং শেতে প্রভাতামেতি শর্বরীম্
136.25
তত্র স্ম নিত্যং বধ্যন্তে নক্তং বহুবিধা মৃগাঃ
কদাচিত্তত্র মার্জারস্ত্বপ্রমত্তোঽপ্যবধ্যত
136.26
তস্মিন্বদ্ধে মহাপ্রাজ্ঞঃ শত্রৌ নিত্যাততায়িনি
তং কালং পলিতো জ্ঞাত্বা বিচচার সুনির্ভয়ঃ
136.27
তেনানুচরতা তস্মিন্বনে বিশ্বস্তচারিণা
ভক্ষং বিচরমাণেন নচিরাদ্দৃষ্টমামিষম্
136.28
স তমুন্মাথমারুহ্য তদামিষমভক্ষয়ৎ
তস্যোপরি সপত্নস্য বদ্ধস্য মনসা হসন্
136.29
আমিষে তু প্রসক্তঃ স কদাচিদবলোকয়ন্
অপশ্যদপরং ঘোরমাত্মনঃ শত্রুমাগতম্
136.30
শরপ্রসূনসংকাশং মহীবিবরশায়িনম্
নকুলং হরিকং নাম চপলং তাম্রলোচনম্
136.31
তেন মূষকগন্ধেন ত্বরমাণমুপাগতম্
ভক্ষার্থং লেলিহদ্বক্ত্রং ভূমাবূর্ধ্বমুখং স্থিতম্
136.32
শাখাগতমরিং চান্যদপশ্যত্কোটরালয়ম্
উলূকং চন্দ্রকং নাম তীক্ষ্ণতুণ্ডং ক্ষপাচরম্
136.33
গতস্য বিষয়ং তস্য নকুলোলূকয়োস্তদা
অথাস্যাসীদিয়ং চিন্তা তত্প্রাপ্য সুমহদ্ভয়ম্
136.34
আপদ্যস্যাং সুকষ্টায়াং মরণে সমুপস্থিতে
সমন্তাদ্ভয় উত্পন্নে কথং কার্যং হিতৈষিণা
136.35
স তথা সর্বতো রুদ্ধঃ সর্বত্র সমদর্শনঃ
অভবদ্ভয়সংতপ্তশ্চক্রে চেমাং পরাং গতিম্
136.36
আপদ্বিনাশভূয়িষ্ঠা শতৈকীয়ং চ জীবিতম্
সমন্তসংশয়া চেয়মস্মানাপদুপস্থিতা
136.37
গতং হি সহসা ভূমিং নকুলো মাং সমাপ্নুয়াৎ
উলূকশ্চেহ তিষ্ঠন্তং মার্জারঃ পাশসংক্ষয়াৎ
136.38
ন ত্বেবাস্মদ্বিধঃ প্রাজ্ঞঃ সংমোহং গন্তুমর্হতি
করিষ্যে জীবিতে যত্নং যাবদুচ্ছ্বাসনিগ্রহম্
136.39
ন হি বুদ্ধ্যান্বিতাঃ প্রাজ্ঞা নীতিশাস্ত্রবিশারদাঃ
সংভ্রমন্ত্যাপদং প্রাপ্য মহতোঽর্থানবাপ্য চ
136.40
ন ত্বন্যামিহ মার্জারাদ্গতিং পশ্যামি সাংপ্রতম্
বিষমস্থো হ্যয়ং জন্তুঃ কৃত্যং চাস্য মহন্ময়া
136.41
জীবিতার্থী কথং ত্বদ্য প্রার্থিতঃ শত্রুভিস্ত্রিভিঃ
তস্মাদিমমহং শত্রুং মার্জারং সংশ্রয়ামি বৈ
136.42
ক্ষত্রবিদ্যাং সমাশ্রিত্য হিতমস্যোপধারয়ে
যেনেমং শত্রুসংঘাতং মতিপূর্বেণ বঞ্চয়ে
136.43
অয়মত্যন্তশত্রুর্মে বৈষম্যং পরমং গতঃ
মূঢো গ্রাহয়িতুং স্বার্থং সংগত্যা যদি শক্যতে
136.44
কদাচিদ্ব্যসনং প্রাপ্য সংধিং কুর্যান্ময়া সহ
বলিনা সংনিবিষ্টস্য শত্রোরপি পরিগ্রহঃ
কার্য ইত্যাহুরাচার্যা বিষমে জীবিতার্থিনা
136.45
শ্রেয়ান্হি পণ্ডিতঃ শত্রুর্ন চ মিত্রমপণ্ডিতম্
মম হ্যমিত্রে মার্জারে জীবিতং সংপ্রতিষ্ঠিতম্
136.46
হন্তৈনং সংপ্রবক্ষ্যামি হেতুমাত্মাভিরক্ষণে
অপীদানীময়ং শত্রুঃ সংগত্যা পণ্ডিতো ভবেৎ
136.47
ততোঽর্থগতিতত্ত্বজ্ঞঃ সংধিবিগ্রহকালবিৎ
সান্ত্বপূর্বমিদং বাক্যং মার্জারং মূষকোঽব্রবীৎ
136.48
সৌহৃদেনাভিভাষে ত্বা কচ্চিন্মার্জার জীবসি
জীবিতং হি তবেচ্ছামি শ্রেয়ঃ সাধারণং হি নৌ
136.49
ন তে সৌম্য বিষত্তব্যং জীবিষ্যসি যথা পুরা
অহং ত্বামুদ্ধরিষ্যামি প্রাণাঞ্জহ্যাং হি তে কৃতে
136.50
অস্তি কশ্চিদুপায়োঽত্র পুষ্কলঃ প্রতিভাতি মাম্
যেন শক্যস্ত্বয়া মোক্ষঃ প্রাপ্তুং শ্রেয়ো যথা ময়া
136.51
ময়া হ্যুপায়ো দৃষ্টোঽয়ং বিচার্য মতিমাত্মনঃ
আত্মার্থং চ ত্বদর্থং চ শ্রেয়ঃ সাধারণং হি নৌ
136.52
ইদং হি নকুলোলূকং পাপবুদ্ধ্যভিতঃ স্থিতম্
ন ধর্ষয়তি মার্জার তেন মে স্বস্তি সাংপ্রতম্
136.53
কূজংশ্চপলনেত্রোঽয়ং কৌশিকো মাং নিরীক্ষতে
নগশাখাগ্রহস্তিষ্ঠংস্তস্যাহং ভৃশমুদ্বিজে
136.54
সতাং সাপ্তপদং সখ্যং সবাসো মেঽসি পণ্ডিতঃ
সাংবাস্যকং করিষ্যামি নাস্তি তে মৃত্যুতো ভয়ম্
136.55
ন হি শক্নোষি মার্জার পাশং ছেত্তুং বিনা ময়া
অহং ছেত্স্যামি তে পাশং যদি মাং ত্বং ন হিংসসি
136.56
ত্বমাশ্রিতো নগস্যাগ্রং মূলং ত্বহমুপাশ্রিতঃ
চিরোষিতাবিহাবাং বৈ বৃক্ষেঽস্মিন্বিদিতং হি তে
136.57
যস্মিন্নাশ্বসতে কশ্চিদ্যশ্চ নাশ্বসতে ক্বচিৎ
ন তৌ ধীরাঃ প্রশংসন্তি নিত্যমুদ্বিগ্নচেতসৌ
136.58
তস্মাদ্বিবর্ধতাং প্রীতিঃ সত্যা সংগতিরস্তু নৌ
কালাতীতমপার্থং হি ন প্রশংসন্তি পণ্ডিতাঃ
136.59
অর্থয়ুক্তিমিমাং তাবদ্যথাভূতাং নিশাময়
তব জীবিতমিচ্ছামি ত্বং মমেচ্ছসি জীবিতম্
136.60
কশ্চিত্তরতি কাষ্ঠেন সুগম্ভীরাং মহানদীম্
স তারয়তি তত্কাষ্ঠং স চ কাষ্ঠেন তার্যতে
136.61
ঈদৃশো নৌ সমায়োগো ভবিষ্যতি সুনিস্তরঃ
অহং ত্বাং তারয়িষ্যামি ত্বং চ মাং তারয়িষ্যসি
136.62
এবমুক্ত্বা তু পলিতস্তদর্থমুভয়োর্হিতম্
হেতুমদ্গ্রহণীয়ং চ কালাকাঙ্ক্ষী ব্যপৈক্ষত
136.63
অথ সুব্যাহৃতং তস্য শ্রুত্বা শত্রুর্বিচক্ষণঃ
হেতুমদ্গ্রহণীয়ার্থং মার্জারো বাক্যমব্রবীৎ
136.64
বুদ্ধিমান্বাক্যসংপন্নস্তদ্বাক্যমনুবর্ণয়ন্
তামবস্থামবেক্ষ্যান্ত্যাং সাম্নৈব প্রত্যপূজয়ৎ
136.65
ততস্তীক্ষ্ণাগ্রদশনো বৈডূর্যমণিলোচনঃ
মূষকং মন্দমুদ্বীক্ষ্য মার্জারো লোমশোঽব্রবীৎ
136.66
নন্দামি সৌম্য ভদ্রং তে যো মাং জীবন্তমিচ্ছসি
শ্রেয়শ্চ যদি জানীষে ক্রিয়তাং মা বিচারয়
136.67
অহং হি দৃঢমাপন্নস্ত্বমাপন্নতরো ময়া
দ্বয়োরাপন্নয়োঃ সংধিঃ ক্রিয়তাং মা বিচারয়
136.68
বিধত্স্ব প্রাপ্তকালং যত্কার্যং সিধ্যতু চাবয়োঃ
ময়ি কৃচ্ছ্রাদ্বিনির্মুক্তে ন বিনঙ্ক্ষ্যতি তে কৃতম্
136.69
ন্যস্তমানোঽস্মি ভক্তোঽস্মি শিষ্যস্ত্বদ্ধিতকৃত্তথা
নিদেশবশবর্তী চ ভবন্তং শরণং গতঃ
136.70
ইত্যেবমুক্তঃ পলিতো মার্জারং বশমাগতম্
বাক্যং হিতমুবাচেদমভিনীতার্থমর্থবৎ
136.71
উদারং যদ্ভবানাহ নৈতচ্চিত্রং ভবদ্বিধে
বিদিতো যস্তু মার্গো মে হিতার্থং শৃণু তং মম
136.72
অহং ত্বানুপ্রবেক্ষ্যামি নকুলান্মে মহদ্ভয়ম্
ত্রায়স্ব মাং মা বধীশ্চ শক্তোঽস্মি তব মোক্ষণে
136.73
উলূকাচ্চৈব মাং রক্ষ ক্ষুদ্রঃ প্রার্থয়তে হি মাম্
অহং ছেত্স্যামি তে পাশান্সখে সত্যেন তে শপে
136.74
তদ্বচঃ সংগতং শ্রুত্বা লোমশো যুক্তমর্থবৎ
হর্ষাদুদ্বীক্ষ্য পলিতং স্বাগতেনাভ্যপূজয়ৎ
136.75
স তং সংপূজ্য পলিতং মার্জারঃ সৌহৃদে স্থিতঃ
সুবিচিন্ত্যাব্রবীদ্ধীরঃ প্রীতস্ত্বরিত এব হি
136.76
ক্ষিপ্রমাগচ্ছ ভদ্রং তে ত্বং মে প্রাণসমঃ সখা
তব প্রাজ্ঞ প্রসাদাদ্ধি ক্ষিপ্রং প্রাপ্স্যামি জীবিতম্
136.77
যদ্যদেবংগতেনাদ্য শক্যং কর্তুং ময়া তব
তদাজ্ঞাপয় কর্তাহং সংধিরেবাস্তু নৌ সখে
136.78
অস্মাত্তে সংশয়ান্মুক্তঃ সমিত্রগণবান্ধবঃ
সর্বকার্যাণি কর্তাহং প্রিয়াণি চ হিতানি চ
136.79
মুক্তশ্চ ব্যসনাদস্মাত্সৌম্যাহমপি নাম তে
প্রীতিমুত্পাদয়েয়ং চ প্রতিকর্তুং চ শক্নুয়াম্
136.80
গ্রাহয়িত্বা তু তং স্বার্থং মার্জারং মূষকস্তদা
প্রবিবেশ সুবিস্রব্ধঃ সম্যগর্থাংশ্চচার হ
136.81
এবমাশ্বাসিতো বিদ্বান্মার্জারেণ স মূষকঃ
মার্জারোরসি বিস্রব্ধঃ সুষ্বাপ পিতৃমাতৃবৎ
136.82
লীনং তু তস্য গাত্রেষু মার্জারস্যাথ মূষকম্
তৌ দৃষ্ট্বা নকুলোলূকৌ নিরাশৌ জগ্মতুর্গৃহান্
136.83
লীনস্তু তস্য গাত্রেষু পলিতো দেশকালবিৎ
চিচ্ছেদ পাশান্নৃপতে কালাকাঙ্ক্ষী শনৈঃ শনৈঃ
136.84
অথ বন্ধপরিক্লিষ্টো মার্জারো বীক্ষ্য মূষকম্
ছিন্দন্তং বৈ তদা পাশানত্বরন্তং ত্বরান্বিতঃ
136.85
তমত্বরন্তং পলিতং পাশানাং ছেদনে তদা
সংচোদয়িতুমারেভে মার্জারো মূষকং তদা
136.86
কিং সৌম্য নাভিত্বরসে কিং কৃতার্থোঽবমন্যসে
ছিন্ধি পাশানমিত্রঘ্ন পুরা শ্বপচ এতি সঃ
136.87
ইত্যুক্তস্ত্বরতা তেন মতিমান্পলিতোঽব্রবীৎ
মার্জারমকৃতপ্রজ্ঞং বশ্যমাত্মহিতং বচঃ
136.88
তূষ্ণীং ভব ন তে সৌম্য ত্বরা কার্যা ন সংভ্রমঃ
বয়মেবাত্র কালজ্ঞা ন কালঃ পরিহাস্যতে
136.89
অকালে কৃত্যমারব্ধং কর্তুং নার্থায় কল্পতে
তদেব কাল আরব্ধং মহতেঽর্থায় কল্পতে
136.90
অকালবিপ্রমুক্তান্মে ত্বত্ত এব ভয়ং ভবেৎ
তস্মাত্কালং প্রতীক্ষস্ব কিমিতি ত্বরসে সখে
136.91
যাবত্পশ্যামি চণ্ডালমায়ান্তং শস্ত্রপাণিনম্
ততশ্ছেত্স্যামি তে পাশং প্রাপ্তে সাধারণে ভয়ে
136.92
তস্মিন্কালে প্রমুক্তস্ত্বং তরুমেবাধিরোহসি
ন হি তে জীবিতাদন্যত্কিংচিত্কৃত্যং ভবিষ্যতি
136.93
ততো ভবত্যতিক্রান্তে ত্রস্তে ভীতে চ লোমশ
অহং বিলং প্রবেক্ষ্যামি ভবাঞ্শাখাং গমিষ্যতি
136.94
এবমুক্তস্তু মার্জারো মূষকেণাত্মনো হিতম্
বচনং বাক্যতত্ত্বজ্ঞো জীবিতার্থী মহামতিঃ
136.95
অথাত্মকৃত্যত্বরিতঃ সম্যক্প্রশ্রয়মাচরন্
উবাচ লোমশো বাক্যং মূষকং চিরকারিণম্
136.96
ন হ্যেবং মিত্রকার্যাণি প্রীত্যা কুর্বন্তি সাধবঃ
যথা ত্বং মোক্ষিতঃ কৃচ্ছ্রাত্ত্বরমাণেন বৈ ময়া
136.97
তথৈব ত্বরমাণেন ত্বয়া কার্যং হিতং মম
যত্নং কুরু মহাপ্রাজ্ঞ যথা স্বস্ত্যাবয়োর্ভবেৎ
136.98
অথ বা পূর্ববৈরং ত্বং স্মরন্কালং বিকর্ষসি
পশ্য দুষ্কৃতকর্মত্বং ব্যক্তমায়ুঃক্ষয়ো মম
136.99
যচ্চ কিংচিন্ময়াজ্ঞানাত্পুরস্তাদ্বিপ্রিয়ং কৃতম্
ন তন্মনসি কর্তব্যং ক্ষময়ে ত্বাং প্রসীদ মে
136.100
তমেবংবাদিনং প্রাজ্ঞঃ শাস্ত্রবিদ্বুদ্ধিসংমতঃ
উবাচেদং বচঃ শ্রেষ্ঠং মার্জারং মূষকস্তদা
136.101
শ্রুতং মে তব মার্জার স্বমর্থং পরিগৃহ্ণতঃ
মমাপি ত্বং বিজানীহি স্বমর্থং পরিগৃহ্ণতঃ
136.102
যন্মিত্রং ভীতবত্সাধ্যং যন্মিত্রং ভয়সংহিতম্
সুরক্ষিতং ততঃ কার্যং পাণিঃ সর্পমুখাদিব
136.103
কৃত্বা বলবতা সংধিমাত্মানং যো ন রক্ষতি
অপথ্যমিব তদ্ভুক্তং তস্যানর্থায় কল্পতে
136.104
ন কশ্চিত্কস্যচিন্মিত্রং ন কশ্চিত্কস্যচিত্সুহৃৎ
অর্থৈরর্থা নিবধ্যন্তে গজৈর্বনগজা ইব
136.105
ন হি কশ্চিত্কৃতে কার্যে কর্তারং সমবেক্ষতে
তস্মাত্সর্বাণি কার্যাণি সাবশেষাণি কারয়েৎ
136.106
তস্মিন্কালেঽপি চ ভবান্দিবাকীর্তিভয়ান্বিতঃ
মম ন গ্রহণে শক্তঃ পলায়নপরায়ণঃ
136.107
ছিন্নং তু তন্তুবাহুল্যং তন্তুরেকোঽবশেষিতঃ
ছেত্স্যাম্যহং তদপ্যাশু নির্বৃতো ভব লোমশ
136.108
তয়োঃ সংবদতোরেবং তথৈবাপন্নয়োর্দ্বয়োঃ
ক্ষয়ং জগাম সা রাত্রির্লোমশং চাবিশদ্ভয়ম্
136.109
ততঃ প্রভাতসময়ে বিকৃতঃ কৃষ্ণপিঙ্গলঃ
স্থূলস্ফিগ্বিকচো রূক্ষঃ শ্বচক্রপরিবারিতঃ
136.110
শঙ্কুকর্ণো মহাবক্ত্রঃ পলিতো ঘোরদর্শনঃ
পরিঘো নাম চণ্ডালঃ শস্ত্রপাণিরদৃশ্যত
136.111
তং দৃষ্ট্বা যমদূতাভং মার্জারস্ত্রস্তচেতনঃ
উবাচ পলিতং ভীতঃ কিমিদানীং করিষ্যসি
136.112
অথ চাপি সুসংত্রস্তৌ তং দৃষ্ট্বা ঘোরদর্শনম্
ক্ষণেন নকুলোলূকৌ নৈরাশ্যং জগ্মতুস্তদা
136.113
বলিনৌ মতিমন্তৌ চ সংঘাতং চাপ্যুপাগতৌ
অশক্যৌ সুনয়াত্তস্মাত্সংপ্রধর্ষয়িতুং বলাৎ
136.114
কার্যার্থং কৃতসংধী তৌ দৃষ্ট্বা মার্জারমূষকৌ
উলূকনকুলৌ তূর্ণং জগ্মতুঃ স্বং স্বমালয়ম্
136.115
ততশ্চিচ্ছেদ তং তন্তুং মার্জারস্য স মূষকঃ
বিপ্রমুক্তোঽথ মার্জারস্তমেবাভ্যপতদ্দ্রুমম্
136.116
স চ তস্মাদ্ভয়ান্মুক্তো মুক্তো ঘোরেণ শত্রুণা
বিলং বিবেশ পলিতঃ শাখাং ভেজে চ লোমশঃ
136.117
উন্মাথমপ্যথাদায় চণ্ডালো বীক্ষ্য সর্বশঃ
বিহতাশঃ ক্ষণেনাথ তস্মাদ্দেশাদপাক্রমৎ
জগাম চ স্বভবনং চণ্ডালো ভরতর্ষভ
136.118
ততস্তস্মাদ্ভয়ান্মুক্তো দুর্লভং প্রাপ্য জীবিতম্
বিলস্থং পাদপাগ্রস্থঃ পলিতং লোমশোঽব্রবীৎ
136.119
অকৃত্বা সংবিদং কাংচিত্সহসাহমুপপ্লুতঃ
কৃতজ্ঞং কৃতকল্যাণং কচ্চিন্মাং নাভিশঙ্কসে
136.120
গত্বা চ মম বিশ্বাসং দত্ত্বা চ মম জীবিতম্
মিত্রোপভোগসময়ে কিং ত্বং নৈবোপসর্পসি
136.121
কৃত্বা হি পূর্বং মিত্রাণি যঃ পশ্চান্নানুতিষ্ঠতি
ন স মিত্রাণি লভতে কৃচ্ছ্রাস্বাপত্সু দুর্মতিঃ
136.122
তত্কৃতোঽহং ত্বয়া মিত্রং সামর্থ্যাদাত্মনঃ সখে
স মাং মিত্রত্বমাপন্নমুপভোক্তুং ত্বমর্হসি
136.123
যানি মে সন্তি মিত্রাণি যে চ মে সন্তি বান্ধবাঃ
সর্বে ত্বাং পূজয়িষ্যন্তি শিষ্যা গুরুমিব প্রিয়ম্
136.124
অহং চ পূজয়িষ্যে ত্বাং সমিত্রগণবান্ধবম্
জীবিতস্য প্রদাতারং কৃতজ্ঞঃ কো ন পূজয়েৎ
136.125
ঈশ্বরো মে ভবানস্তু শরীরস্য গৃহস্য চ
অর্থানাং চৈব সর্বেষামনুশাস্তা চ মে ভব
136.126
অমাত্যো মে ভব প্রাজ্ঞ পিতেব হি প্রশাধি মাম্
ন তেঽস্তি ভয়মস্মত্তো জীবিতেনাত্মনঃ শপে
136.127
বুদ্ধ্যা ত্বমুশনাঃ সাক্ষাদ্বলে ত্বধিকৃতা বয়ম্
ত্বন্মন্ত্রবলয়ুক্তো হি বিন্দেত জয়মেব হ
136.128
এবমুক্তঃ পরং সান্ত্বং মার্জারেণ স মূষকঃ
উবাচ পরমার্থজ্ঞঃ শ্লক্ষ্ণমাত্মহিতং বচঃ
136.129
যদ্ভবানাহ তত্সর্বং ময়া তে লোমশ শ্রুতম্
মমাপি তাবদ্ব্রুবতঃ শৃণু যত্প্রতিভাতি মাম্
136.130
বেদিতব্যানি মিত্রাণি বোদ্ধব্যাশ্চাপি শত্রবঃ
এতত্সুসূক্ষ্মং লোকেঽস্মিন্দৃশ্যতে প্রাজ্ঞসংমতম্
136.131
শত্রুরূপাশ্চ সুহৃদো মিত্ররূপাশ্চ শত্রবঃ
সান্ত্বিতাস্তে ন বুধ্যন্তে রাগলোভবশং গতাঃ
136.132
নাস্তি জাত্যা রিপুর্নাম মিত্রং নাম ন বিদ্যতে
সামর্থ্যয়োগাজ্জায়ন্তে মিত্রাণি রিপবস্তথা
136.133
যো যস্মিঞ্জীবতি স্বার্থং পশ্যেত্তাবত্স জীবতি
স তস্য তাবন্মিত্রং স্যাদ্যাবন্ন স্যাদ্বিপর্যয়ঃ
136.134
নাস্তি মৈত্রী স্থিরা নাম ন চ ধ্রুবমসৌহৃদম্
অর্থয়ুক্ত্যা হি জায়ন্তে মিত্রাণি রিপবস্তথা
136.135
মিত্রং চ শত্রুতামেতি কস্মিংশ্চিত্কালপর্যয়ে
শত্রুশ্চ মিত্রতামেতি স্বার্থো হি বলবত্তরঃ
136.136
যো বিশ্বসতি মিত্রেষু ন চাশ্বসতি শত্রুষু
অর্থয়ুক্তিমবিজ্ঞায় চলিতং তস্য জীবিতম্
136.137
অর্থয়ুক্তিমবিজ্ঞায় যঃ শুভে কুরুতে মতিম্
মিত্রে বা যদি বা শত্রৌ তস্যাপি চলিতা মতিঃ
136.138
ন বিশ্বসেদবিশ্বস্তে বিশ্বস্তেঽপি ন বিশ্বসেৎ
বিশ্বাসাদ্ভয়মুত্পন্নং মূলান্যপি নিকৃন্ততি
136.139
অর্থয়ুক্ত্যা হি দৃশ্যন্তে পিতা মাতা সুতাস্তথা
মাতুলা ভাগিনেয়াশ্চ তথা সংবন্ধিবান্ধবাঃ
136.140
পুত্রং হি মাতাপিতরু ত্যজতঃ পতিতং প্রিয়ম্
লোকো রক্ষতি চাত্মানং পশ্য স্বার্থস্য সারতাম্
136.141
তং মন্যে নিকৃতিপ্রজ্ঞং যো মোক্ষং প্রত্যনন্তরম্
কৃত্যং মৃগয়সে কর্তুং সুখোপায়মসংশয়ম্
136.142
অস্মিন্নিলয় এব ত্বং ন্যগ্রোধাদবতারিতঃ
পূর্বং নিবিষ্টমুন্মাথং চপলত্বান্ন বুদ্ধবান্
136.143
আত্মনশ্চপলো নাস্তি কুতোঽন্যেষাং ভবিষ্যতি
তস্মাত্সর্বাণি কার্যাণি চপলো হন্ত্যসংশয়ম্
136.144
ব্রবীতি মধুরং কংচিত্প্রিয়ো মে হ ভবানিতি
তন্মিথ্যাকরণং সর্বং বিস্তরেণাপি মে শৃণু
136.145
কারণাত্প্রিয়তামেতি দ্বেষ্যো ভবতি কারণাৎ
অর্থার্থী জীবলোকোঽয়ং ন কশ্চিত্কস্যচিত্প্রিয়ঃ
136.146
সখ্যং সোদরয়োর্ভ্রাত্রোর্দংপত্যোর্বা পরস্পরম্
কস্যচিন্নাভিজানামি প্রীতিং নিষ্কারণামিহ
136.147
যদ্যপি ভ্রাতরঃ ক্রুদ্ধা ভার্যা বা কারণান্তরে
স্বভাবতস্তে প্রীয়ন্তে নেতরঃ প্রীয়তে জনঃ
136.148
প্রিয়ো ভবতি দানেন প্রিয়বাদেন চাপরঃ
মন্ত্রহোমজপৈরন্যঃ কার্যার্থং প্রীয়তে জনঃ
136.149
উত্পন্নে কারণে প্রীতির্নাস্তি নৌ কারণান্তরে
প্রধ্বস্তে কারণস্থানে সা প্রীতির্বিনিবর্ততে
136.150
কিং নু তত্কারণং মন্যে যেনাহং ভবতঃ প্রিয়ঃ
অন্যত্রাভ্যবহারার্থাত্তত্রাপি চ বুধা বয়ম্
136.151
কালো হেতুং বিকুরুতে স্বার্থস্তমনুবর্ততে
স্বার্থং প্রাজ্ঞোঽভিজানাতি প্রাজ্ঞং লোকোঽনুবর্ততে
136.152
ন ত্বীদৃশং ত্বয়া বাচ্যং বিদুষি স্বার্থপণ্ডিতে
অকালেঽবিষমস্থস্য স্বার্থহেতুরয়ং তব
136.153
তস্মান্নাহং চলে স্বার্থাত্সুস্থিতঃ সংধিবিগ্রহে
অভ্রাণামিব রূপাণি বিকুর্বন্তি ক্ষণে ক্ষণে
136.154
অদ্যৈব হি রিপুর্ভূত্বা পুনরদ্যৈব সৌহৃদম্
পুনশ্চ রিপুরদ্যৈব যুক্তীনাং পশ্য চাপলম্
136.155
আসীত্তাবত্তু মৈত্রী নৌ যাবদ্ধেতুরভূত্পুরা
সা গতা সহ তেনৈব কালয়ুক্তেন হেতুনা
136.156
ত্বং হি মেঽত্যন্ততঃ শত্রুঃ সামর্থ্যান্মিত্রতাং গতঃ
তত্কৃত্যমভিনির্বৃত্তং প্রকৃতিঃ শত্রুতাং গতা
136.157
সোঽহমেবং প্রণীতানি জ্ঞাত্বা শাস্ত্রাণি তত্ত্বতঃ
প্রবিশেয়ং কথং পাশং ত্বত্কৃতং তদ্বদস্ব মে
136.158
ত্বদ্বীর্যেণ বিমুক্তোঽহং মদ্বীর্যেণ তথা ভবান্
অন্যোন্যানুগ্রহে বৃত্তে নাস্তি ভূয়ঃ সমাগমঃ
136.159
ত্বং হি সৌম্য কৃতার্থোঽদ্য নির্বৃত্তার্থাস্তথা বয়ম্
ন তেঽস্ত্যন্যন্ময়া কৃত্যং কিংচিদন্যত্র ভক্ষণাৎ
136.160
অহমন্নং ভবান্ভোক্তা দুর্বলোঽহং ভবান্বলী
নাবয়োর্বিদ্যতে সংধির্নিয়ুক্তে বিষমে বলে
136.161
সংমন্যেঽহং তব প্রজ্ঞাং যন্মোক্ষাত্প্রত্যনন্তরম্
ভক্ষ্যং মৃগয়সে নূনং সুখোপায়মসংশয়ম্
136.162
ভক্ষ্যার্থমেব বদ্ধস্ত্বং স মুক্তঃ প্রসৃতঃ ক্ষুধা
শাস্ত্রজ্ঞমভিসংধায় নূনং ভক্ষয়িতাদ্য মাম্
136.163
জানামি ক্ষুধিতং হি ত্বামাহারসময়শ্চ তে
স ত্বং মামভিসংধায় ভক্ষ্যং মৃগয়সে পুনঃ
136.164
যচ্চাপি পুত্রদারং স্বং তত্সংনিসৃজসে ময়ি
শুশ্রূষাং নাম মে কর্তুং সখে মম ন তত্ক্ষমম্
136.165
ত্বয়া মাং সহিতং দৃষ্ট্বা প্রিয়া ভার্যা সুতাশ্চ যে
কস্মান্মাং তে ন খাদেয়ুর্হৃষ্টাঃ প্রণয়িনস্ত্বয়ি
136.166
নাহং ত্বয়া সমেষ্যামি বৃত্তো হেতুঃ সমাগমে
শিবং ধ্যায়স্ব মেঽত্রস্থঃ সুকৃতং স্মর্যতে যদি
136.167
শত্রোরন্নাদ্যভূতঃ সন্ক্লিষ্টস্য ক্ষুধিতস্য চ
ভক্ষ্যং মৃগয়মাণস্য কঃ প্রাজ্ঞো বিষয়ং ব্রজেৎ
136.168
স্বস্তি তেঽস্তু গমিষ্যামি দূরাদপি তবোদ্বিজে
নাহং ত্বয়া সমেষ্যামি নির্বৃতো ভব লোমশ
136.169
বলবত্সংনিকর্ষো হি ন কদাচিত্প্রশস্যতে
প্রশান্তাদপি মে প্রাজ্ঞ ভেতব্যং বলিনঃ সদা
136.170
যদি ত্বর্থেন মে কার্যং ব্রূহি কিং করবাণি তে
কামং সর্বং প্রদাস্যামি ন ত্বাত্মানং কদাচন
136.171
আত্মার্থে সংততিস্ত্যাজ্যা রাজ্যং রত্নং ধনং তথা
অপি সর্বস্বমুত্সৃজ্য রক্ষেদাত্মানমাত্মনা
136.172
ঐশ্বর্যধনরত্নানাং প্রত্যমিত্রেঽপি তিষ্ঠতাম্
দৃষ্টা হি পুনরাবৃত্তির্জীবতামিতি নঃ শ্রুতম্
136.173
ন ত্বাত্মনঃ সংপ্রদানং ধনরত্নবদিষ্যতে
আত্মা তু সর্বতো রক্ষ্যো দারৈরপি ধনৈরপি
136.174
আত্মরক্ষিততন্ত্রাণাং সুপরীক্ষিতকারিণাম্
আপদো নোপপদ্যন্তে পুরুষাণাং স্বদোষজাঃ
136.175
শত্রূন্সম্যগ্বিজানন্তি দুর্বলা যে বলীয়সঃ
তেষাং ন চাল্যতে বুদ্ধিরাত্মার্থং কৃতনিশ্চয়া
136.176
ইত্যভিব্যক্তমেবাসৌ পলিতেনাবভর্ত্সিতঃ
মার্জারো ব্রীডিতো ভূত্বা মূষকং বাক্যমব্রবীৎ
136.177
সংমন্যেঽহং তব প্রজ্ঞাং যস্ত্বং মম হিতে রতঃ
উক্তবানর্থতত্ত্বেন ময়া সংভিন্নদর্শনঃ
136.178
ন তু মামন্যথা সাধো ত্বং বিজ্ঞাতুমিহার্হসি
প্রাণপ্রদানজং ত্বত্তো মম সৌহৃদমাগতম্
136.179
ধর্মজ্ঞোঽস্মি গুণজ্ঞোঽস্মি কৃতজ্ঞোঽস্মি বিশেষতঃ
মিত্রেষু বত্সলশ্চাস্মি ত্বদ্বিধেষু বিশেষতঃ
136.180
তন্মামেবংগতে সাধো ন যাবয়িতুমর্হসি
ত্বয়া হি যাব্যমানোঽহং প্রাণাঞ্জহ্যাং সবান্ধবঃ
136.181
ধিক্শব্দো হি বুধৈর্দৃষ্টো মদ্বিধেষু মনস্বিষু
মরণং ধর্মতত্ত্বজ্ঞ ন মাং শঙ্কিতুমর্হসি
136.182
ইতি সংস্তূয়মানো হি মার্জারেণ স মূষকঃ
মনসা ভাবগম্ভীরং মার্জারং বাক্যমব্রবীৎ
136.183
সাধুর্ভবাঞ্শ্রুতার্থোঽস্মি প্রীয়তে ন চ বিশ্বসে
সংস্তবৈর্বা ধনৌঘৈর্বা নাহং শক্যঃ পুনস্ত্বয়া
136.184
ন হ্যমিত্রবশং যান্তি প্রাজ্ঞা নিষ্কারণং সখে
অস্মিন্নর্থে চ গাথে দ্বে নিবোধোশনসা কৃতে
136.185
শত্রুসাধারণে কৃত্যে কৃত্বা সংধিং বলীয়সা
সমাহিতশ্চরেদ্যুক্ত্যা কৃতার্থশ্চ ন বিশ্বসেৎ
136.186
তস্মাত্সর্বাস্ববস্থাসু রক্ষেজ্জীবিতমাত্মনঃ
দ্রব্যাণি সংততিশ্চৈব সর্বং ভবতি জীবতঃ
136.187
সংক্ষেপো নীতিশাস্ত্রাণামবিশ্বাসঃ পরো মতঃ
নৃষু তস্মাদবিশ্বাসঃ পুষ্কলং হিতমাত্মনঃ
136.188
বধ্যন্তে ন হ্যবিশ্বস্তাঃ শত্রুভির্দুর্বলা অপি
বিশ্বস্তাস্ত্বাশু বধ্যন্তে বলবন্তোঽপি দুর্বলৈঃ
136.189
ত্বদ্বিধেভ্যো ময়া হ্যাত্মা রক্ষ্যো মার্জার সর্বদা
রক্ষ ত্বমপি চাত্মানং চণ্ডালাজ্জাতিকিল্বিষাৎ
136.190
স তস্য ব্রুবতস্ত্বেবং সংত্রাসাজ্জাতসাধ্বসঃ
স্ববিলং হি জবেনাশু মার্জারঃ প্রয়য়ৌ ততঃ
136.191
ততঃ শাস্ত্রার্থতত্ত্বজ্ঞো বুদ্ধিসামর্থ্যমাত্মনঃ
বিশ্রাব্য পলিতঃ প্রাজ্ঞো বিলমন্যজ্জগাম হ
136.192
এবং প্রজ্ঞাবতা বুদ্ধ্যা দুর্বলেন মহাবলাঃ
একেন বহবোঽমিত্রাঃ পলিতেনাভিসংধিতাঃ
136.193
অরিণাপি সমর্থেন সংধিং কুর্বীত পণ্ডিতঃ
মূষকশ্চ বিডালশ্চ মুক্তাবন্যোন্যসংশ্রয়াৎ
136.194
ইত্যেষ ক্ষত্রধর্মস্য ময়া মার্গোঽনুদর্শিতঃ
বিস্তরেণ মহীপাল সংক্ষেপেণ পুনঃ শৃণু
136.195
অন্যোন্যকৃতবৈরৌ তু চক্রতুঃ প্রীতিমুত্তমাম্
অন্যোন্যমভিসংধাতুমভূচ্চৈব তয়োর্মতিঃ
136.196
তত্র প্রাজ্ঞোঽভিসংধত্তে সম্যগ্বুদ্ধিবলাশ্রয়াৎ
অভিসংধীয়তে প্রাজ্ঞঃ প্রমাদাদপি চাবুধৈঃ
136.197
তস্মাদভীতবদ্ভীতো বিশ্বস্তবদবিশ্বসন্
ন হ্যপ্রমত্তশ্চলতি চলিতো বা বিনশ্যতি
136.198
কালেন রিপুণা সংধিঃ কালে মিত্রেণ বিগ্রহঃ
কার্য ইত্যেব তত্ত্বজ্ঞাঃ প্রাহুর্নিত্যং যুধিষ্ঠির
136.199
এবং মত্বা মহারাজ শাস্ত্রার্থমভিগম্য চ
অভিয়ুক্তোঽপ্রমত্তশ্চ প্রাগ্ভয়াদ্ভীতবচ্চরেৎ
136.200
ভীতবত্সংবিধিঃ কার্যঃ প্রতিসংধিস্তথৈব চ
ভয়াদুত্পদ্যতে বুদ্ধিরপ্রমত্তাভিয়োগজা
136.201
ন ভয়ং বিদ্যতে রাজন্ভীতস্যানাগতে ভয়ে
অভীতস্য তু বিস্রম্ভাত্সুমহজ্জায়তে ভয়ম্
136.202
ন ভীরুরিতি চাত্যন্তং মন্ত্রোঽদেয়ঃ কথংচন
অবিজ্ঞানাদ্ধি বিজ্ঞাতে গচ্ছেদাস্পদদর্শিষু
136.203
তস্মাদভীতবদ্ভীতো বিশ্বস্তবদবিশ্বসন্
কার্যাণাং গুরুতাং বুদ্ধ্বা নানৃতং কিংচিদাচরেৎ
136.204
এবমেতন্ময়া প্রোক্তমিতিহাসং যুধিষ্ঠির
শ্রুত্বা ত্বং সুহৃদাং মধ্যে যথাবত্সমুপাচর
136.205
উপলভ্য মতিং চাগ্র্যামরিমিত্রান্তরং তথা
সংধিবিগ্রহকালং চ মোক্ষোপায়ং তথাপদি
136.206
শত্রুসাধারণে কৃত্যে কৃত্বা সংধিং বলীয়সা
সমাগমং চরেদ্যুক্ত্যা কৃতার্থো ন চ বিশ্বসেৎ
136.207
অবিরুদ্ধাং ত্রিবর্গেণ নীতিমেতাং যুধিষ্ঠির
অভ্যুত্তিষ্ঠ শ্রুতাদস্মাদ্ভূয়স্ত্বং রঞ্জয়ন্প্রজাঃ
136.208
ব্রাহ্মণৈশ্চাপি তে সার্ধং যাত্রা ভবতু পাণ্ডব
ব্রাহ্মণা হি পরং শ্রেয়ো দিবি চেহ চ ভারত
136.209
এতে ধর্মস্য বেত্তারঃ কৃতজ্ঞাঃ সততং প্রভো
পূজিতাঃ শুভকর্মাণঃ পূর্বজিত্যা নরাধিপ
136.210
রাজ্যং শ্রেয়ঃ পরং রাজন্যশঃ কীর্তিং চ লপ্স্যসে
কুলস্য সংততিং চৈব যথান্যায়ং যথাক্রমম্
136.211
দ্বয়োরিমং ভারত সংধিবিগ্রহং; সুভাষিতং বুদ্ধিবিশেষকারিতম্
তথান্ববেক্ষ্য ক্ষিতিপেন সর্বদা; নিষেবিতব্যং নৃপ শত্রুমণ্ডলে