অধ্যায় 135

135.1

ভীষ্ম উবাচ
অত্রৈব চেদমব্যগ্রঃ শৃণ্বাখ্যানমনুত্তমম্
দীর্ঘসূত্রং সমাশ্রিত্য কার্যাকার্যবিনিশ্চয়ে

নাতিগাধে জলস্থায়ে সুহৃদঃ শকুলাস্ত্রয়ঃ
প্রভূতমত্স্যে কৌন্তেয় বভূবুঃ সহচারিণঃ

অত্রৈকঃ প্রাপ্তকালজ্ঞো দীর্ঘদর্শী তথাপরঃ
দীর্ঘসূত্রশ্চ তত্রৈকস্ত্রয়াণাং জলচারিণাম্

কদাচিত্তজ্জলস্থায়ং মত্স্যবন্ধাঃ সমন্ততঃ
নিঃস্রাবয়ামাসুরথো নিম্নেষু বিবিধৈর্মুখৈঃ

প্রক্ষীয়মাণং তং বুদ্ধ্বা জলস্থায়ং ভয়াগমে
অব্রবীদ্দীর্ঘদর্শী তু তাবুভৌ সুহৃদৌ তদা

ইয়মাপত্সমুত্পন্না সর্বেষাং সলিলৌকসাম্
শীঘ্রমন্যত্র গচ্ছামঃ পন্থা যাবন্ন দুষ্যতি

অনাগতমনর্থং হি সুনয়ৈর্যঃ প্রবাধতে
ন স সংশয়মাপ্নোতি রোচতাং বাং ব্রজামহে

দীর্ঘসূত্রস্তু যস্তত্র সোঽব্রবীত্সম্যগুচ্যতে
ন তু কার্যা ত্বরা যাবদিতি মে নিশ্চিতা মতিঃ

অথ সংপ্রতিপত্তিজ্ঞঃ প্রাব্রবীদ্দীর্ঘদর্শিনম্
প্রাপ্তে কালে ন মে কিংচিন্ন্যায়তঃ পরিহাস্যতে

এবমুক্তো নিরাক্রামদ্দীর্ঘদর্শী মহামতিঃ
জগাম স্রোতসৈকেন গম্ভীরসলিলাশয়ম্

ততঃ প্রস্রুততোয়ং তং সমীক্ষ্য সলিলাশয়ম্
ববন্ধুর্বিবিধৈর্যোগৈর্মত্স্যান্মত্স্যোপজীবিনঃ

বিলোড্যমানে তস্মিংস্তু স্রুততোয়ে জলাশয়ে
অগচ্ছদ্গ্রহণং তত্র দীর্ঘসূত্রঃ সহাপরৈঃ

উদ্দানং ক্রিয়মাণং চ মত্স্যানাং বীক্ষ্য রজ্জুভিঃ
প্রবিশ্যান্তরমন্যেষামগ্রসত্প্রতিপত্তিমান্

গ্রস্তমেব তদুদ্দানং গৃহীত্বাস্ত তথৈব সঃ
সর্বানেব তু তাংস্তত্র তে বিদুর্গ্রথিতা ইতি

ততঃ প্রক্ষাল্যমানেষু মত্স্যেষু বিমলে জলে
ত্যক্ত্বা রজ্জুং বিমুক্তোঽভূচ্ছীঘ্রং সংপ্রতিপত্তিমান্

দীর্ঘসূত্রস্তু মন্দাত্মা হীনবুদ্ধিরচেতনঃ
মরণং প্রাপ্তবান্মূঢো যথৈবোপহতেন্দ্রিয়ঃ

এবং প্রাপ্ততমং কালং যো মোহান্নাববুধ্যতে
স বিনশ্যতি বৈ ক্ষিপ্রং দীর্ঘসূত্রো যথা ঝষঃ

আদৌ ন কুরুতে শ্রেয়ঃ কুশলোঽস্মীতি যঃ পুমান্
স সংশয়মবাপ্নোতি যথা সংপ্রতিপত্তিমান্

অনাগতবিধানং তু যো নরঃ কুরুতে ক্ষমম্
শ্রেয়ঃ প্রাপ্নোতি সোঽত্যর্থং দীর্ঘদর্শী যথা হ্যসৌ

কলাঃ কাষ্ঠা মুহূর্তাশ্চ দিনা নাড্যঃ ক্ষণা লবাঃ
পক্ষা মাসাশ্চ ঋতবস্তুল্যাঃ সংবত্সরাণি চ

পৃথিবী দেশ ইত্যুক্তঃ কালঃ স চ ন দৃশ্যতে
অভিপ্রেতার্থসিদ্ধ্যর্থং ন্যায়তো যচ্চ তত্তথা

এতৌ ধর্মার্থশাস্ত্রেষু মোক্ষশাস্ত্রেষু চর্ষিভিঃ
প্রধানাবিতি নির্দিষ্টৌ কামেশাভিমতৌ নৃণাম্

পরীক্ষ্যকারী যুক্তস্তু সম্যক্সমুপপাদয়েৎ
দেশকালাবভিপ্রেতৌ তাভ্যাং ফলমবাপ্নুয়াৎ